Yu e memre disi ete?

Yu ben prisiri fu leisi den Waktitoren di kon na doro no so langa pasa? Luku efu yu kan gi piki tapu den aksi di e kon now:

• Gado feni en bun te wan sma abi moro leki wán trowpatna?

Nôno. Na ini Eden, Gado ben sori taki wan sma musu abi wán trowpatna nomo. Bakaten, Yesus Krestes taigi den bakaman fu en a srefi sani disi (Gen. 2:18-24; Mat. 19:4-6).​—1/10, bladzijde 30.

• Di Petrus ben e sungu na ini a se, dan Yesus yepi en. San wi kan leri fu a sani dati di Yesus du? (Mat. 14:28-31)

Te wi e si taki wan Kresten brada abi wan swaki bribi, dan na wan agersi fasi wi kan langa wi anu gi en fu yepi en fu kisi moro bribi.​—15/9, bladzijde 8.

• San Yehovah ben musu du fu frulusu wi?

Yehovah gi pasi taki sma pina en Manpikin èn taki den spotu en. Neleki fa Abraham ben de klariklari fu gi en manpikin leki wan srakti-ofrandi, na so Yehovah gi pasi taki sma kiri en Manpikin leki wan ogriman.​—15/9, bladzijde 28, 29.

• Suma ben de den leriman fu Wet di ben e gens Yesus?

Den man disi ben e wroko na lanti, den ben sabi a Wet, èn a kan de so tu taki den ben abi a wroko fu skrifi sani abra, noso fu krutu afersi na den krutubangi drape (Mark. 2:6; 9:14; Luk. 5:17-21).​—1/10, bladzijde 31.

• San Odo 24:27 e leri wi fu a ’bow di wi musu bow wi osofamiri’?

Efu wan man wani trow, dan a musu sreka ensrefi fu tyari a frantwortu dati. Disi wani taki dati a musu de srekasreka fu sorgu gi wan osofamiri èn fu teki fesi na ini na anbegi.—15/10, bladzijde 12.

• Te wan sma ben salfu, dan san dati ben wani taki?

Dati ben wani taki dati a sma ben e kisi wan spesrutu posisi (Lev. 8:12; 1 Sam. 16:13; Mateyus 3:16).​—1/10, bladzijde 31.

• Sortu fasi Yehovah lobi?

Yehovah lobi te den wan di e anbegi en, abi safri-ati fasi. Efu wi wani kon krosibei na Gado, dan wi musu du tranga muiti fu rutu iniwan fasi puru di kan meki taki wi abi heimemre, taki wi e dyarusu, èn taki wi e suku fu kisi moro grani. Na den safri-ati sma Yehovah lobi. A e pramisi: „Den safri-ati sma o kisi grontapu, èn den o prisiri srefisrefi, fu di vrede o de pasa marki.” (Ps. 37:11; Yak. 4:6).​—1/10, bladzijde 26.

• Fa na eksempre fu Yehovah nanga Yesus e leri wi fu abi bun maniri?

Aladi Yehovah abi wan hei posisi, toku a e sori switifasi nanga lespeki gi libisma. Di a ben taki nanga Abraham èn nanga Moses, dan a gebroiki wan Hebrew wortu di e sori taki a no ben e komanderi den fu du wan sani, ma taki a ben e aksi den na wan lespeki fasi fu du a sani dati (Gen. 13:14; Ex. 4:6). Gado e arki tu te libisma e taki nanga en (Gen. 18:23-32). Yesus ben e du dati tu, èn a ben de klariklari fu yepi den sma di ben de nanga en. Nofo tron, a ben e kari den na den nen srefi.​—15/11, bladzijde 25.

• San wi kan leri fu Rakab?

Boiti taki a ben yere den sani di Gado ben du fu kibri En pipel, a ben yepi den Israelsma tu di a kisi na okasi fu du dati (Yos. 2:1-24; 6:1-5, 14, 15, 20-25).​—1/10, bladzijde 24, 25.