A tiri fu Satan no sa abi bun bakapisi kwetikweti
A tiri fu Satan no sa abi bun bakapisi kwetikweti
„A no o go bun kwetikweti nanga den ogrisma.”—PREIK. 8:13.
1. Fu san ede a de wan trowstu gi wi taki den ogrisma sa kisi krutu heri esi?
HERI ESI, Gado sa krutu ogrisma. Den sa musu gi frantwortu fu den sani di den du (Odo 5:22; Preik. 8:12, 13). A sani disi de wan trowstu spesrutu gi den wan di lobi retidu èn di ondrofeni den takru sani di ogrisma du nanga den. Ma a moro prenspari ogri sma di Gado sa krutu, na a tata fu ala ogri, namku Satan Didibri.—Yoh. 8:44.
2. Fu san ede ten ben musu pasa fu tyari kon na krin, suma ben abi leti na ini na afersi di ben opo kon na ini Eden?
2 Fu di Satan ben abi heimemre, meki a kori den tu fosi libisma na ini Eden fu no saka densrefi na ondro a tiri fu Yehovah. Leki bakapisi fu dati, wi fosi papa nanga mama horibaka gi Satan di ben e tyalensi a reti di Yehovah abi fu tiri ala sani. A sani dati meki taki Gado kon si den leki sondusma (Rom. 5:12-14). A no de fu taki, dati di den sma disi trangayesi Yehovah èn opo densrefi teige en, dan Yehovah ben sabi san ben o de a bakapisi. Ma Gado ben wani taki ala libisma nanga engel ben musu kon sabi dati tu. Dati meki ten ben musu pasa so taki a ben kan kon na krin dati den sma di ben opo densrefi teige Gado, no ben abi leti kwetikweti.
3. Fa wi musu si libisma tirimakti?
3 Fu di libisma weigri fu teki a tiri fu Yehovah, meki den ben musu seti den eigi tirimakti. Na ini a brifi di na apostel Paulus ben skrifi gi den Kresten na ini Rome, a ben taigi den taki den ben musu saka densrefi na ondro „den tiriman”. Na ini a ten fu Paulus, Rome ben de a moro prenspari ’tirimakti’, èn Kèiser Nero ben e tiri na a ten dati. Nero tiri fu a yari 54 te go miti a yari 68. Paulus ben taki dati ’na Gado gi den tiriman dati na okasi fu tiri, ma a makti fu den ben e difrenti fu a di fu Gado’. (Leisi Romesma 13:1, 2.) San dati wani taki? A sani dati wani taki dati Paulus ben e gi den Kresten a deki-ati fu horibaka gi libisma tirimakti, na presi fu horibaka gi a di fu Gado? Kwetikweti. Paulus ben wani taki nomo dati solanga Yehovah e gi pasi taki libisma tiri de, Kresten musu lespeki ’a seti dati fu Gado’. Boiti dati, den musu saka densrefi na ondro den tiriman dati.
Wan pasi di e tyari takru bakapisi kon
4. Fruklari fu san ede libisma tirimakti no sa abi bun bakapisi.
4 Ma toku libisma tirimakti di de na ondro a tirimakti fu Satan, no sa abi bun bakapisi kwetikweti. Fu san ede? Wan reide, na taki a no e kruderi nanga a koni fu Gado. Yehovah wawan abi ala koni. Sobun, na en wawan sabi soifri fa fu tiri na wan fasi di e tyari bun bakapisi kon (Yer. 8:9; Rom. 16:27). Tra fasi leki libisma di nofo tron e meki fowtu fosi den e leri wan sani, Yehovah ala ten sabi san na a moro bun fasi fu handri. Iniwan tirimakti di no e teki a tiri fu En, no sa abi bun bakapisi. A sani dati wawan, ben e sori kaba taki a tiri di Satan e tiri nanga yepi fu libisma tirimakti, no ben o abi bun bakapisi. Boiti dati, Satan no ben abi a bun fu libisma na prakseri kwetikweti.
5, 6. San meki taki Satan bigin gens Yehovah?
5 Wan sma di e gebroiki en frustan bun, no sa pruberi fu du wan sani di no sa abi bun bakapisi. Efu a sma dati de nomonomo fu du a sani dati, dan a sa kon si taki a no ben handri nanga koni. Na ini den hondrohondro yari di pasa, a kon na krin furu leisi taki a no e tyari nowan enkri wini kon te sma e gens na almakti Mekiman. (Leisi Odo 21:30.) Ma fu di Satan ben abi heimemre, meki a drai baka gi Yehovah. Na so Didibri srefi teki wan pasi di ben o tyari soso takru bakapisi kon gi en.
6 Bakaten, wan tiriman fu Babilon kon abi a srefi heimemre di Satan abi. Soleki fa Bijbel e sori, dan a tiriman disi ben taki: „Mi o opo go na hemel èn mi o poti mi kownusturu moro hei leki den stari fu Gado. Mi o sidon na noordsei, na a moro farawe presi na tapu a bergi pe konmakandra e hori. Mi o opo go na tapusei fu den wolku, dan mi o gersi a Moro Heiwan” (Yes. 14:13-15). A don bosroiti di a tiriman dati ben teki, no ben abi bun bakapisi, èn a tirimakti fu Babilon kon na wan kaba na wan syen fasi. Heri esi, Satan nanga a grontapu fu en sa kisi pori dorodoro na wan srefi sortu fasi.
Fu san ede Gado gi pasi taki Satan e tiri?
7, 8. Sortu wini libisma kisi fu di Yehovah gi pasi taki ogridu de fu wan pisi ten?
7 Son sma ben kan aksi densrefi fu san ede Yehovah no e tapu libisma fu horibaka gi Satan èn fu saka densrefi na ondro wan tiri di no sa abi bun bakapisi kwetikweti. Fu di Yehovah na a Almakti Gado, meki a ben kan du dati seiker (Ex. 6:3). Ma toku a no du dati. Fu di a de wan koni Gado, meki a ben sabi taki a ben o moro bun fu no bemui wan pisi ten nanga den bosroiti di trangayesi libisma e teki. Te fu kaba, a ben o kon na krin taki Yehovah na trutru wan regtfardiki èn lobi-ati Tiriman. Boiti dati, reti-ati libisma ben o kisi wini fu a bosroiti di Gado teki.
8 A no de fu taki, dati furu problema no ben abi fu miti libisma, efu den no ben gi pasi taki Satan kori den, èn efu den ben weigri fu drai baka gi a tiri fu Gado! Ma toku a bosroiti di Yehovah ben teki fu meki libisma tiri densrefi wan pisi ten, tyari wini kon. Reti-ati sma kon si krin taki a e tyari wini kon te den e arki Gado èn te den e frutrow na en tapu. Na ini den hondrohondro yari di pasa, libisma seti difrenti sortu tirimakti, ma nowan fu den bun nofo. A sani dati gi den anbegiman fu Gado wan moro tranga overtoigi taki a tiri fu Yehovah na a moro bunwan. A tru taki furu problema miti libisma fu di Yehovah gi pasi taki Satan tiri grontapu na wan ogri-ati fasi. Srefi den wan di e anbegi Gado nanga den heri ati kisi problema tu. Ma den reti-ati futuboi disi kisi wini tu fu di Gado gi pasi taki ogridu de fu wan pisi ten.
Yehovah kisi glori aladi sma opo densrefi teige en
9, 10. Fruklari fa a tiri fu Satan e meki taki Yehovah e kisi glori.
9 Aladi Yehovah gi pasi taki Satan kori libisma, èn taki libisma tiri densrefi, toku dati no wani taki dati a tiri fu En no bun. Na presi fu dati, a kon na krin na ini den yari di pasa, taki a sani di Yeremia ben taki nanga yepi fu santa yeye, na wan tru tori. Yeremia ben taki dati libisma no man tiri densrefi. (Leisi Yeremia 10:23.) Boiti dati, di Satan opo ensrefi teige Yehovah, dan dati gi Yehovah na okasi fu sori den bun fasi fu en moro soifri. Fa a du dati?
10 Fu di wi kan si den takru bakapisi fu a tiri fu Satan, meki den tumusi moi fasi fu Yehovah de moro krin fu si now. A sani disi meki taki den wan di lobi Yehovah kon abi moro lespeki gi en. Iya, aladi a gersi leki a no de so, toku a tru taki a tiri fu Satan meki taki Gado kisi glori. A tiri fu Satan tyari kon na krin taki Yehovah handri na wan tumusi koni fasi fu sori taki na en abi a reti fu tiri ala sani. Fu sori taki a sani disi tru, dan wi sa poti prakseri syatu na wan tu fu den fasi fu Yehovah. Na so wi sa kon si na sortu fasi na ogri-ati tiri fu Satan meki Yehovah sori den fasi fu en moro krin.
11. Fa Yehovah sori lobi gi libisma?
11 Lobi. Bijbel e taki dati „Gado na lobi” (1 Yoh. 4:8). Na a fosi presi, Gado meki libisma fu di a abi lobi. Boiti dati, Gado meki wi na wan tumusi moi fasi di e meki sma kisi bigi lespeki gi en. A sani dati e sori taki Gado lobi wi. Èn fu di Yehovah lobi wi, meki a gi wi wan moi tanpresi di abi ala san wi abi fanowdu fu man de koloku (Gen. 1:29-31; 2:8, 9; Ps. 139:14-16). Ma di libisma kisi fu du nanga ogridu, dan Yehovah sori a lobi fu en na wan tra fasi di libisma no ben ondrofeni ete. Fa a du dati? Na apostel Yohanes e gebroiki den wortu fu Yesus di ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yoh. 3:16). Iya, Gado seni en wan-enkri Manpikin kon na grontapu fu frulusu libisma. Yu denki taki wan moro bun fasi de fa Gado ben kan sori lobi gi libisma? (Yoh. 15:13) A tumusi moi fasi disi fa Gado sori lobi gi wi, na wan eksempre tu gi libisma, fu di dati e gi den deki-ati fu teki na eksempre fu Yesus, èn fu sori a srefi lobi dati na ini den aladei libi.—Yoh. 17:25, 26.
12. Na sortu fasi Yehovah e sori a makti fu en?
12 Makti. Soso „Gado, na Almaktiwan”, abi a makti fu gi libi (Openb. 11:17; Ps. 36:9). Te wan sma gebore, dan en libi de leki wan pisi papira pe noti no skrifi na tapu. Te wan sma dede, dan a papira dati kon lai nanga den bosroiti di a teki, den sani di a du, èn nanga den sani di a ondrofeni na ini en libi. Ala den sani disi meki taki a kon de a sma di a ben de. Yehovah kan hori ala den sani dati na prakseri. Na a reti ten, Yehovah kan gi a sma dati libi baka, èn a sma dati o abi den srefi fasi di a ben abi bifo (Yoh. 5:28, 29). Sobun, Gado no ben wani taki libisma dede, ma now di dati e pasa, dan dati gi Yehovah okasi fu sori taki a abi a makti fu wiki den dedewan. Iya, Yehovah na „Gado, na Almaktiwan”.
13. Fa na ofrandi fu Yesus ben sori taki Yehovah e handri na wan reti fasi ala ten?
13 Retidu. Yehovah no e lei, èn a no e du kruktudu (Deut. 32:4; Tit. 1:2). Ala ten a e tan du san tru èn san reti, awansi a gersi leki dati no e tyari wini kon gi en (Rom. 8:32). A ben musu fu hati Yehovah fu si fa en lobi Manpikin dede na wan pina-postu, leki wan sma di ben taki ogri fu En! Ma fu di Yehovah lobi sondu libisma, meki a ben de klariklari fu gi pasi taki a sari sani disi pasa. Na so a ben kan hori ensrefi na en tumusi bun markitiki fu retidu. (Leisi Romesma 5:18-21.) Fu di grontapu lai nanga kruktudu, meki Yehovah ben kan sori taki a de wan Gado di ala ten e handri na wan reti fasi.
14, 15. Na sortu fasi a kon na krin taki Yehovah abi koni pasa marki èn taki abi pasensi?
14 Koni. Baka di Adam nanga Eva sondu, dan wantewante Yehovah tyari kon na krin na sortu fasi a ben o tyari wan kaba kon na ala den takru sani di pasa, fu di libisma ben opo densrefi teige en (Gen. 3:15). Fu di Yehovah handri wantewante, èn fu di a meki den futuboi fu en kon sabi safrisafri fa a ben o lusu a problema, meki a ben de krin fu si taki a de wan koni Gado (Rom. 11:33). Nowan sani kan tapu Yehovah fu du san a abi na prakseri. Na ini a grontapu disi, furu sma e du hurudu, furu orloku e feti, sma no e handri na wan reti fasi, den no e sori sari-ati gi trawan, den lobi a wan sma moro a trawan, èn den abi hoigrifasi. Dati meki Yehovah abi nofo okasi fu sori libisma nanga den engel, san na trutru koni. A disipel Yakobus ben taki: „Na a fosi presi, a koni fu Gado e meki taki wan sma de krin, èn a e meki sosrefi taki a lobi vrede, a de klariklari fu fiti ensrefi, a de klariklari fu gi yesi, a de klariklari fu sori sari-ati èn fu du bun, a no lobi a wan sma moro a trawan, èn a no e hoigri.”—Yak. 3:17.
15 A abi langa pasensi. Efu libisma no ben e meki fowtu, efu den no ben abi sondu nanga swakifasi, dan Yehovah no ben o abi fu sori langa pasensi. Fu di Yehovah ben de klariklari fu du dati dusundusun yari langa, meki a de krin fu si taki a abi den tumusi moi fasi disi dorodoro. Èn wi musu de nanga tangi trutru taki dati de so. Na apostel Petrus ben taki nanga leti taki wi musu „si a pasensi fu wi Masra leki frulusu”.—2 Petr. 3:9, 15.
16. Fu san ede a e gi wi bigi prisiri taki Yehovah de klariklari fu gi wi pardon?
16 A de klariklari fu gi sma pardon. Wi alamala na sondusma, èn wi alamala e sondu furu tron (Yak. 3:2; 1 Yoh. 1:8, 9). Wi musu de nanga tangi trutru taki Yehovah de klariklari fu gi wi pardon „nanga en heri ati”! (Yes. 55: 7) Prakseri sosrefi a sani disi: Fu di wi gebore leki sondusma, meki wi man ondrofeni bigi prisiri te Yehovah e gi wi pardon fu den sondu fu wi (Ps. 51: 5, 9, 17). Te wi e ondrofeni a lobi-ati fasi fa Yehovah e gi wi pardon, dan dati e meki wi kisi moro lobi gi en. Boiti dati, a e gi wi deki-ati fu teki na eksempre fu En, èn fu gi trawan pardon tu.—Leisi Kolosesma 3:13.
Fa a du kon taki a situwâsi na grontapu takru so?
17, 18. San e sori taki a tiri fu Satan no abi bun bakapisi?
17 Na ini den hondrohondro yari di pasa, a kon na krin ibri tron baka taki a heri grontapu sistema fu Satan, no bun. Na a tiri fu Satan meki taki a sistema disi kon de so. Iya, dati tru! Satan kori a fosi papa nanga mama fu wi fu drai baka gi a tiri fu Yehovah èn fu teki a tiri fu libisma. Na so den bigin tiri grontapu na wan fasi di no ben o abi bun bakapisi kwetikweti. A pina èn a sari di libisma na heri grontapu ondrofeni, e sori taki libisma tiri no tyari bun bakapisi kon kwetikweti.
18 A tiri fu Satan e meki sma denki densrefi nomo. Ma sma no e denki densrefi nomo te den abi lobi gi trawan. Èn na a lobi dati sma e ondrofeni te den e saka densrefi na ondro a tiri fu Yehovah. A tiri fu Satan no man tyari wan kaba kon na den someni problema na grontapu. Boiti dati, a tiri fu en meki taki sma no de koloku, èn sma no abi a dyaranti taki sani sa waka bun nanga den. A de krin taki a tiri fu Yehovah na a moro bunwan! Buweisi de di e sori dati na ini a ten disi? Iya, wi sa si dati na ini a tra artikel.
Te a abi fu du nanga tirimakti, dan san wi leri fu . . .
• Odo 21:30?
[Aksi fu a tori disi]
[Prenki na tapu bladzijde 25]
A tiri fu Satan noiti no tyari wini kon gi libisma
[Sma di abi a reti fu a prenki]
U.S. Army photo
WHO photo by P. Almasy
[Prenki na tapu bladzijde 26]
Yehovah abi sosrefi a makti fu puru sma na ini a grebi
[Prenki na tapu bladzijde 27]
A lobi fu Yehovah èn a retidu fu en kon na krin di a gi en Manpikin leki wan srakti-ofrandi