A tiri fu Yehovah na a moro bun wan!
A tiri fu Yehovah na a moro bun wan!
„A Moro Heiwan na Tiriman fu a kownukondre fu libisma.”—DAN. 4:17.
1, 2. San na wan tu reide fu san ede libisma tiri no tyari bun bakapisi kon gi wi?
A TIRI fu libisma no tyari bun bakapisi kon gi wi! A sani dati de krin fu si. Wan prenspari reide fu san ede a tiri dati no bun, na fu di libisma no abi a koni fu tiri na wan fasi di e tyari wini kon. Spesrutu na ini a ten disi, a de krin taki a tiri fu libisma no bun, fu di furu tiriman ’lobi densrefi nomo, den lobi moni, den e denki tumusi furu fu densrefi, den abi heimemre, den no de loyaal’. Boiti dati, ’den no wani meki kruderi, den e fruteri ogri-ati lei fu trawan, den no man dwengi densrefi, den e du ogri-ati sani nanga trawan, den no lobi san bun, den e tori trawan, èn den abi bigimemre’.—2 Tim. 3:2-4.
2 Langa ten pasa, a fosi papa nanga mama fu wi weigri fu saka densrefi na ondro a tiri fu Gado. Kande den ben du dati fu di den ben e denki taki den ben o man du san den wani. Ma fu taki en leti, den ben e saka densrefi na ondro a tiri fu Satan. Siksi dusun yari langa, libisma tiri grontapu na wan fasi di no bun kwetikweti, èn dati e kon fu di Satan, „a tiriman fu a grontapu”, abi bigi krakti na den tapu. Na a sani dati meki taki a situwâsi na grontapu kon takru so tide na a dei (Yoh. 12:31). Wan buku di e taki fu a situwâsi fu libisma na ini a ten disi, e sori taki na lasiten fu „howpu tapu wan volmaakti grontapu”. A buku e taki moro fara: „Boiti taki grontapu noiti no o kon de so, a de so tu taki te sma e suku fu seti grontapu na a fasi dati, dan dati e tyari soso rampu kon, ogri-ati tirimakti e teki a makti abra, èn bun bigi orloku e pasa” (The Oxford History of the Twentieth Century). A sani disi e sori taki libisma tiri no bun!
3. San wi kan taki fu a fasi fa Gado ben o tiri grontapu, efu Adam nanga Eva no ben sondu?
3 Dati meki a de wan sari sani taki wi fosi papa nanga mama weigri fu saka densrefi na ondro a wan-enkri tiri di bun, namku a tiri fu Gado! A no de fu taki, dati wi no sabi soifri fa Yehovah ben o tiri grontapu efu Adam nanga Eva ben tan gi yesi na en. Ma wi kan de seiker taki te ala sma ben o saka densrefi na ondro a tiri fu Yehovah, dan a ben o de krin fu si na ala sei taki Gado na lobi, èn taki a no lobi a wan sma moro a trawan (Tori. 10:34; 1 Yoh. 4:8). Fu di Gado koni pasa marki, meki wi kan de seiker tu taki te libisma ben tan saka densrefi na ondro a tiri fu Yehovah, dan wi no ben o kisi fu du nanga den fowtu di libisma tiriman meki. A tiri fu Gado, ben o man gi „ala libisani den sani di den e angri fu kisi” (Ps. 145:16). Fu taki en syatu, a tiri dati ben o de wan volmaakti tiri (Deut. 32:4). A de wan sari sani trutru taki libisma no ben wani saka densrefi na ondro a tiri dati!
4. O fara Gado gi pasi taki Satan mag tiri libisma?
4 Ma toku wi musu hori na prakseri taki aladi Yehovah gi pasi taki libisma e tiri densrefi, toku noiti a no gi den a reti fu tiri, fu di na en wawan abi a reti dati. Srefi a makti kownu fu Babilon ben musu kon frustan taki „a Moro Heiwan na Tiriman fu a kownukondre fu libisma” (Dan. 4:17). Te fu kaba, a Kownukondre fu Gado sa meki sani waka soleki fa Gado wani (Mat. 6:10). A tru taki fu wan syatu pisi ten, Yehovah gi pasi taki Satan handri leki „a gado fu a grontapu sistema disi”. Na so Gado ben o man sori krin suma ben abi leti na ini den afersi di ben opo kon fu di Satan ben suku fu gens En (2 Kor. 4:4; 1 Yoh. 5:19). Ma toku Yehovah noiti no gi pasi taki Satan du ala san a wani. (2 Kron. 20:6; luku Yob 1:11, 12; 2:3-6.) Èn ala ten wan tu sma ben de di ben de klariklari fu teki a tiri fu Gado, aladi den ben e libi na ini wan grontapu di de na ondro a makti fu a bigi Gensman fu Gado.
A fasi fa Gado tiri Israel
5. San Israel ben pramisi Gado?
5 Sensi a ten fu Abel, te go miti a ten fu den famiri-edeman, furu reti-ati sma anbegi Yehovah èn den gi yesi na den komando fu en (Hebr. 11:4-22). Na ini a ten fu Moses, Yehovah ben meki wan frubontu nanga den bakapikin fu na famiri-edeman Yakob, èn den bakapikin disi tron a pipel fu Israel. Na ini 1513 bifo Krestes, den Israelsma pramisi Yehovah taki den nanga den bakapikin fu den ben o teki en leki Tiriman. Den ben taki: „Wi o du ala san Yehovah taki.”—Ex. 19:8.
6, 7. Fa Gado ben tiri Israel?
6 Yehovah ben abi wan reide fu san ede a teki den Israelsma leki a pipel fu en. (Leisi Deuteronomium 7:7, 8.) A no du dati soso fu di a ben o sorgu bun gi den, ma a nen fu Gado èn a reti di a abi fu tiri ala sani, ben de tu ini a tori. Den sani dati ben de moro prenspari. Israel ben musu de leki wan kotoigi di ben o tyari kon na krin taki Yehovah na a wan-enkri tru Gado (Yes. 43:10; 44:6-8). Dati meki Yehovah taigi a pipel dati: „Yehovah un Gado e si unu leki wan santa pipel. Yehovah teki unu leki en pipel, wan spesrutu gudu na mindri ala pipel di de na grontapu.”—Deut. 14:2.
7 Di Gado ben e tiri den Israelsma, dan a hori na prakseri taki den ben de sondusma. Ma den wet fu en ben bun dorodoro, èn den ben e sori den fasi fu a Sma di ben gi den Israelsma den wet dati. Den komando di Yehovah gi a pipel nanga yepi fu Moses, ben e sori krin taki a santa, taki a lobi retidu, taki a de klariklari fu gi sma pardon, èn taki a abi pasensi. Bakaten, na ini a ten fu Yosua, a pipel gi yesi na den komando fu Yehovah, èn den ben abi vrede èn Gado ben e blesi den (Yos. 24:21, 22, 31). A pisi ten dati na ini a historia fu Israel, sori taki a tiri fu Yehovah e tyari wini kon gi libisma.
Libisma tiri e tyari takru bakapisi kon
8, 9. Sortu don sani Israel ben aksi Gado, èn san ben de a bakapisi?
8 Ma bakaten, den Israelsma drai baka gi a tiri fu Gado ibri leisi baka, èn dati meki taki Gado no kibri den moro. Te fu kaba, Israel meki a profeiti Samuel taigi Yehovah fu gi den wan kownu di den ben man si. Yehovah taigi Samuel fu gi a pipel san den ben aksi. Ma Yehovah ben taki tu: „A no yu den no wani moro, ma na mi den no wani leki kownu fu den” (1 Sam. 8:7). Aladi Yehovah gi pasi taki Israel teki wan libisma leki kownu, toku a warskow den taki a tiri fu a kownu dati ben o tyari takru bakapisi kon gi den.—Leisi 1 Samuel 8:9-18.
9 Den sani di miti libisma na ini den hondrohondro yari di pasa, e sori taki Yehovah ben abi leti. Di Israel ben abi libisma leki kownu, dan dati tyari seryusu problema kon gi den, spesrutu te a kownu dati no ben e dini Gado nanga en heri ati. Te wi e luku san miti Israel, dan a no e fruwondru wi taki na ini den hondrohondro yari di pasa, tiriman di no sabi Yehovah, no ben abi bun bakapisi doronomo. A tru taki son tiriman wani taki Gado e blesi den te den e suku vrede èn te den e du muiti fu meki sani waka bun nanga a pipel fu den. Ma fa Gado kan blesi den wan di no wani saka densrefi na ondro a tiri fu en?—Ps. 2:10-12.
Gado e tiri wan nyun pipel
10. Fu san ede Gado teki wan tra pipel na ini a presi fu Israel?
10 A pipel fu Israel no ben wani dini Yehovah nanga den heri ati. Te fu kaba, den weigri fu gi yesi na a sma di Gado ben teki leki Mesias. Dati meki Yehovah no ben feni den bun moro èn a bosroiti fu teki wan tra grupu sma leki a pipel fu en. Na so a du kon taki na ini a yari 33, a Kresten gemeente fu salfu anbegiman fu Yehovah, seti. Fu taki en leti, a gemeente dati ben de wan nyun pipel di Yehovah ben e tiri. Paulus ben kari a pipel dati „na Israel fu Gado”.—Gal. 6:16.
11, 12. Fa a pipel fu Israel èn „na Israel fu Gado” e kruderi nanga makandra te a abi fu du nanga den wan di e teki fesi?
11 Te yu e luku en bun, dan a pipel fu Israel èn a nyun „Israel fu Gado” e difrenti fu makandra, ma na ini wan tu tra sani den e kruderi nanga makandra. Tra fasi leki Israel fu owruten, den memre fu a Kresten gemeente no abi wan libisma leki kownu, èn den no abi fu tyari meti leki ofrandi fu aksi pardon fu sondu. Wan fasi fa a pipel fu Israel nanga a Kresten gemeente e kruderi nanga makandra, na taki Israel ben abi wan seti fu owruman, èn a Kresten gemeente abi dati tu (Ex. 19:3-8). Den Kresten owruman dati no e basi den skapu. Na presi fu dati, den e luku a gemeente èn den e teki fesi fayafaya na ini a wroko di a gemeente e du. Den e handri na wan lobi-ati fasi nanga ibri skapu na ini a gemeente, èn den e sori lespeki tu gi ibriwan fu den.—2 Kor. 1:24; 1 Petr. 5:2, 3.
12 Te den memre fu „na Israel fu Gado” èn den „tra skapu” e denki dipi fu a fasi fa Gado ben e handri nanga Israel, dan den e kisi moro warderi gi den sani di Yehovah e du, èn gi a fasi fa a e tiri (Yoh. 10:16). Fu eksempre, na ini den yari di pasa, den kownu fu Israel ben abi bigi krakti tapu a pipel fu den. Son leisi, dati ben e tyari bun bakapisi kon, ma tra leisi baka, dati ben e tyari takru bakapisi kon. A sani dati e meki den wan di e teki fesi na ini a Kresten gemeente kon frustan taki, aladi den a no tiriman leki den kownu fu owruten, toku den musu de wan bun eksempre gi trawan te a abi fu du nanga a bribi fu den.—Hebr. 13:7.
A fasi fa Yehovah e tiri na ini a ten disi
13. Sortu prenspari sani pasa na ini 1914?
13 Kresten na ini a ten disi, e meki ala sma kon sabi taki dyonsro wan kaba o kon na libisma tiri. Na ini 1914, Yehovah seti a Kownukondre fu en na hemel, èn a poti Yesus Krestes leki Kownu fu a Kownukondre dati. Na a ten dati, a gi Yesus a makti fu go „feti a wan feti baka a trawan èn fu wini a feti fu en” (Openb. 6:2). Gado ben taigi a nyun Kownu: „Go na mindri den feanti fu yu èn poti den na yu ondro” (Ps. 110:2). A sari fu taki dati grontapusma tan weigri fu saka densrefi na ondro a tiri fu Yehovah. Den tan tyari densrefi neleki „nowan Yehovah no de”.—Ps. 14:1.
14, 15. (a) Fa a Kownukondre fu Gado e tiri wi na ini a ten disi, èn sortu aksi wi musu poti gi wisrefi? (b) Fa a de krin fu si na ini a ten disi sosrefi, taki a tiri fu Gado na a moro bunwan?
14 Wan tu salfuwan fu „na Israel fu Gado” de na grontapu ete, èn den sma disi di de brada fu Yesus, e tan handri leki „sma di e teki presi gi Krestes” (2 Kor. 5:20). Den salfuwan disi kisi a frantwortu fu dini leki wan getrow èn koni srafu di musu luku den tra futuboi fu Yesus, èn den musu gi den yeye nyanyan. Den futuboi dati na den salfuwan èn sosrefi a grupu fu milyunmilyun Kresten di e kon bigi moro nanga moro, èn di abi a howpu fu libi fu têgo na grontapu (Mat. 24:45-47; Openb. 7:9-15). Te yu e luku fa den tru anbegiman fu Gado e go na fesi na ini na anbegi, dan a de krin taki Yehovah blesi a seti dati.
15 A ben o bun te ibriwan fu wi e aksi ensrefi: ’Mi e frustan sortu frantwortu mi musu tyari na ini a Kresten gemeente? Mi e horibaka na a yoisti fasi gi a tiri fu Yehovah? Mi e si en leki wan grani taki Yehovah en Kownukondre e tiri mi? Mi abi a fasti bosroiti fu du ala san mi man fu fruteri trawan fu Gado en Kownukondre?’ Wi leki a pipel fu Gado de klariklari fu gi yesi na den rai di wi e kisi fu a Tiri Skin, èn wi e wroko makandra nanga den owruman di e teki fesi na ini den gemeente. Na so wi e sori taki wi e saka wisrefi na ondro a tiri fu Gado. (Leisi Hebrewsma 13:17.) Te wi de klariklari fu saka wisrefi na ondro a tiri fu Gado, dan dati e tyari wánfasi kon na mindri den futuboi fu Gado na heri grontapu, èn a sani dati na wan tumusi aparti sani na ini a grontapu disi di lai nanga pratifasi. Vrede sa de tu na wi mindri, èn wi sa libi bun nanga makandra, so taki Yehovah e kisi glori. Disi sa sori taki a tiri fu Yehovah na a moro bunwan.
A tiri fu Yehovah abi bun bakapisi
16. Sortu bosroiti ala sma na ini a ten disi musu teki?
16 Dyonsro a sa kon na krin suma ben abi leti na ini den afersi di opo kon na ini Eden. Dati meki disi na a ten gi sma fu teki wan bosroiti. Ibri sma musu bosroiti efu a sa saka ensrefi na ondro a tiri fu Yehovah, noso efu a sa tan horibaka gi libisma tirimakti. Wi abi a grani fu yepi safri-ati sma fu teki a yoisti bosroiti. Heri esi, a tiri fu Yehovah sa teki a presi fu libisma tirimakti di de na ondro a makti fu Satan, èn dati o pasa na ini Armagedon (Dan. 2:44; Openb. 16:16). Libisma tiri sa kon na wan kaba, èn Gado Kownukondre sa tiri heri grontapu. A sa kon na krin dorodoro taki a tiri fu Yehovah na a moro bunwan.—Leisi Openbaring 21:3-5.
17. Sortu sani kan yepi safri-ati sma fu bosroiti suma den wani leki tiriman?
17 Den sma di no bosroiti ete efu den o dini Yehovah, musu begi en fu yepi den fu kon si sortu wini a tiri fu en o tyari gi libisma. Libisma tiri no man tyari wan kaba kon na ogridu, èn a no man tyari wan kaba kon na den sani di ogri-ati sma e du fu gens tirimakti. A tiri fu Gado sa tyari wan kaba kon na ala ogridu di e pasa na grontapu (Ps. 37:1, 2, 9). A tiri fu libisma meki taki orloku e feti doronomo, ma a tiri fu Gado sa meki „feti kon na wan kaba te na a moro farawe presi fu grontapu” (Ps. 46:9). Iya, a tiri fu Gado sa tyari vrede kon srefi na mindri libisma nanga meti! (Yes. 11:6-9) Libisma tiri meki taki sma kisi fu du doronomo nanga pôtifasi èn nanga angriten, ma a tiri fu Gado sa tyari wan kaba kon na den sani disi (Yes. 65:21). Srefi tiriman di abi a bun fu trawan na prakseri, no ben man tyari wan kaba kon na siki nanga dede. Ma te Gado sa tiri grontapu, dan den owruwan nanga den sikiwan sa prisiri fu di den sa tron krakti yonguwan baka (Yob 33:25; Yes. 35:5, 6). Iya, grontapu sa tron wan paradijs pe srefi den dedewan sa kisi wan opobaka.—Luk. 23:43; Tori. 24:15.
18. Fa wi kan sori taki wi e bribi taki a tiri fu Gado na a moro bunwan?
18 Iya, a tiri fu Gado sa tyari wan kaba kon na ala problema di Satan tyari kon di a kori wi fosi papa nanga mama fu drai baka gi a Mekiman fu den. Èn hori na prakseri, taki Satan e tyari problema kon sowan 6000 yari kaba. Ma a sa teki Gado 1000 yari nomo fu tyari wan kaba kon na ala den problema dati, èn a sa du dati nanga yepi fu Krestes! Dati na a moro moi buweisi taki a tiri fu Gado na a moro bunwan! Fu di wi na Kotoigi fu a Gado fu wi, meki wi e teki en leki wi Tiriman. Sobun, meki wi sori ibri dei nanga ibri yuru fu wi libi taki wi na anbegiman fu Yehovah. Meki wi sori taki wi e saka wisrefi na ondro a tiri fu a Kownukondre fu en, èn taki wi e si en leki wan grani fu de en Kotoigi. Meki wi gebroiki ibri okasi tu fu fruteri ibriwan sma di wani arki, taki a tiri fu Yehovah na a moro bunwan.
Te a abi fu du nanga a tiri fu Gado, dan san wi leri fu . . .
[Aksi fu a tori disi]
[Prenki na tapu bladzijde 29]
Noiti Yehovah tapu fu tiri
[Prenki na tapu bladzijde 31]
Te wi de klariklari fu saka wisrefi na ondro a tiri fu Yehovah, dan dati e tyari wánfasi kon na mindri den futuboi fu en na heri grontapu