Sori taki yu na wan trutru bakaman fu Krestes

„Ibri bun bon e meki bun froktu, ma ibri siki bon e meki froktu di no bun.”—Mat. 7:17.

1, 2. Fu san ede den tru bakaman fu Krestes e difrenti fu den falsiwan, spesrutu na ini den lasti dei disi?

YESUS ben taki dati sma ben o man si krin suma na den trutru bakaman fu en èn suma na den falsiwan. Sma ben o man si dati na den froktu di den sma dati e meki. Den froktu dati na den sani di den e leri trawan èn a fasi fa den e tyari densrefi (Mat. 7:15-17, 20). Iya, den sani di sma e leri, abi krakti tapu den ati nanga den frustan (Mat. 15:18, 19). Den sma di e leri sani di no tru, e meki „froktu di no bun”, ma den sma di e leri den tru tori fu Gado, e meki „bun froktu”.

² Na ini den lasti dei disi, a de krin fu si suma e meki bun froktu, èn suma e meki froktu di no bun. (Leisi Danièl 12:3, 10.) Falsi Kresten no abi a yoisti denki fu Gado èn nofo tron den e du neleki den e anbegi Gado fayafaya. Ma den wan di e frustan den tru leri fu Bijbel e anbegi Gado „nanga yeye èn nanga waarheid” (Yoh. 4:24; 2 Tim. 3:1-5). Den e du muiti fu sori den fasi fu Krestes. Ma fa a de nanga wi? Na ini na artikel disi wi o poti prakseri na feifi sani di e sori efu wan sma na wan tru Kresten. Te yu e luku den sani disi, dan aksi yusrefi: ’A fasi fa mi e tyari misrefi èn den sani di mi e leri sma e kruderi nanga Gado Wortu? Na eksempre fu mi e meki taki trawan wani kon sabi a tru anbegi?’

Libi na wan fasi di e kruderi nanga Gado Wortu

3. San prenspari gi Yehovah, èn san dati wani taki gi tru Kresten?

³ Yesus ben taki: „A no ala sma di e taigi mi: ’Masra, Masra’, sa go na ini a kownukondre fu hemel, ma na a sma di e du a wani fu mi Tata na hemel, sa go na ini” (Mat. 7:21). Iya, a no a te wan sma e taki dati en na wan Kresten prenspari gi Yehovah, ma na te wan sma e du san wan Kresten musu du. Tru bakaman fu Krestes e sori taki den e du a wani fu Gado èn disi de fu si na ini ala sani di den e du. Iya, a de fu si na ini a fasi fa den e denki fu moni, fu grontapuwroko, fu prisiriten, fu grontapu gwenti nanga fesa, fu a trowlibi èn fu a matifasi di den abi nanga tra sma. Ma falsi Kresten e teki a denki nanga den fasi fu grontapu abra, èn den sani disi e kon moro ogri dei fu dei.—Ps. 92:7.

4, 5. Fa wi kan fiti den wortu fu Yehovah di skrifi na Maleaki 3:18?

⁴ Dati meki a profeiti Maleaki ben skrifi: „Unu o man si krin baka suma na wan reti-ati sma èn suma na wan ogri-ati sma, suma e dini Gado èn suma no e dini en” (Mal. 3:18). Te yu e prakseri den wortu dati, dan aksi yusrefi: ’Mi e du leki sma fu grontapu, noso mi de tra fasi leki den? Mi e du muiti ala ten fu moksi nanga sma di mi sabi na skoro noso na mi wrokope? Noso mi e hori misrefi fayafaya na Bijbel gronprakseri? Mi e opo taki gi a bribi fu mi te dati de fanowdu?’ (Leisi 1 Petrus 3:16.) A no de fu taki, dati wi no wani gi sma a denki taki wi bun moro den, ma a musu de krin fu si taki wi de heri tra fasi leki den wan di no lobi Yehovah èn di no e dini en.

⁵ Efu yu e si taki yu musu tyari wan tu kenki kon, dan a ben o bun te yu e begi Gado fu yepi yu. Te yu e studeri Bijbel doronomo, te yu gwenti begi Gado èn te yu e tan go na den konmakandra, dan dati sa gi yu a krakti fu tyari den kenki disi kon. O moro yu e hori yusrefi na Gado Wortu, o moro yu sa meki „bun froktu”, sosrefi „den  froktu fu a mofo di e meki [Gado] en nen bekènti na trawan”.—Hebr. 13:15.

Preiki Gado Kownukondre

6, 7. Te a abi fu du nanga a Kownukondre boskopu, dan fa tru Kresten e difrenti fu den falsiwan?

⁶ Yesus ben taki: „Mi musu go fruteri a bun nyunsu fu Gado kownukondre na tra foto tu, bika na fu disi Gado ben seni mi kon” (Luk. 4:43). Fu san ede a Kownukondre fu Gado ben de a moro prenspari boskopu di Yesus ben e preiki? Leki Kownu fu a Kownukondre dati, a ben sabi taki en nanga den tra salfu brada fu en di ben o kisi wan opobaka, ben o puru den rutu fu den problema fu libisma, èn dati na sondu nanga Didibri (Rom. 5:12; Openb. 20:10). Dati meki a gi den bakaman fu en a komando fu preiki a Kownukondre teleki a kaba fu a sistema disi doro (Mat. 24:14). Sma di e taki nomo dati den na bakaman fu Krestes no e teki prati na a wroko disi. Fu taki en leti, den no man du dati. Fu san ede? We, dri reide de fu san ede den no man. A fosi reide, na taki den no man preiki san den no man frustan. A di fu tu reide, na taki furu fu den no abi a sakafasi èn a deki-ati di de fanowdu fu prati a Kownukondre boskopu gi trawan. Preikiman abi den fasi disi fanowdu fu di son leisi sma e spotu den èn e gens a wroko di den e du (Mat. 24:9; 1 Petr. 2:23). Èn a di fu dri reide, na taki den no abi a yeye fu Gado.—Yoh. 14:16, 17.

⁷ Ma den tru bakaman fu Krestes, e frustan san na a Kownukondre fu Gado èn san a o du gi libisma. Boiti dati, den e poti Kownukondre afersi na a fosi presi na ini den libi èn den e meki a Kownukondre dati bekènti na heri grontapu, nanga yepi fu a yeye fu Yehovah (Sak. 4:6). Yu e teki prati na a wroko disi doronomo? Yu e du muiti fu tron wan moro bun Kownukondre preikiman? Yu e gebroiki moro ten na ini a diniwroko, noso yu e pruberi fu du a wroko moro bun? Sonwan fu den preikiman disi du muiti fu gebroiki den Bijbel moro bun. Na apostel Paulus ben gwenti fu gebroiki den Buku fu Bijbel fu taki-go-taki-kon nanga sma. A ben skrifi: ’A wortu fu Gado de na libi, èn a abi krakti’.—Hebr. 4:12; Tori. 17:2, 3.

8, 9. (a) Sortu ondrofenitori e sori o prenspari a de fu gebroiki Bijbel na ini a preikiwroko? (b) Fa wi kan leri fu gebroiki Gado Wortu moro bun?

⁸ Di wan brada ben e preiki oso fu oso, dan a leisi Danièl 2:44 gi wan man di ben abi a Lomsu bribi. A brada sori a man fa a Kownukondre fu Gado o tyari trutru vrede kon, èn fa a o meki ala sani waka bun nanga libisma. A man ben taki: „Mi breiti srefisrefi taki yu opo a Bijbel fu sori mi san skrifi na ini, na presi taki yu taigi mi dati nanga yu eigi wortu.” Di wan brada leisi wan Bijbeltekst gi wan uma fu a Griki Orthodox Kerki, dan na uma disi poti wan tu aksi di ben e sori taki a ben wani sabi moro. A brada disi di ben e wroko makandra nanga en wefi, gebroiki Bijbel tu fu piki den aksi fu na uma. Bakaten, na uma taki: „Yu sabi fu san ede mi ben de klariklari fu taki nanga yu? Na fu di yu kon na mi nanga yu Bijbel, èn yu leisi san skrifi na ini.”

⁹ A no de fu taki, dati den publikâsi fu wi prenspari, èn wi musu prati den gi den sma di wi e miti na ini a preikiwroko. Ma Bijbel na a moro prenspari sani di wi musu gebroiki. Sobun, efu yu no gwenti fu gebroiki Bijbel doronomo na ini a diniwroko fu yu, dan a ben o bun fu du  dati. Kande yu kan suku wan tu Bijbeltekst di e tyari kon na krin san na a Kownukondre fu Gado èn fa a sa lusu spesrutu problema di den sma na ini yu kontren abi. De klariklari fu leisi den te yu e preiki oso fu oso.

Si en leki wan grani fu tyari a nen fu Gado

10, 11. Te a abi fu du nanga a nen fu Gado, dan fa Yesus e difrenti fu den someni sma di e taki dati den na bakaman fu en?

¹⁰ „’Unu na mi kotoigi èn mi na a tru Gado’, na so Yehovah taki” (Yes. 43:12). A moro prenspari Kotoigi fu Yehovah, namku Yesus Krestes, ben si en leki wan grani fu tyari a nen fu Gado èn fu meki sma kon sabi a nen dati. (Leisi Yohanes 17:6; Hebrewsma 2:12.) Fu taki en leti, na fu di Yesus ben e meki a nen fu en Tata bekènti, meki Bijbel e kari en „a Getrow Kotoigi”.—Openb. 1:5; Mat. 6:9.

¹¹ Ma furu sma di e taki dati den e teki presi gi Gado nanga en Manpikin, no sori lespeki srefisrefi gi a nen fu Gado. Den puru a nen dati srefi na ini den Bijbel fu den. Wi e si a srefi denki disi, te wi e luku a komando di den beskopu fu a Lomsu Kerki kisi. Den ben kisi a komando taki den „no musu gebroiki a nen fu Gado di e skrifi nanga yepi fu den Hebrew letter YHWH” te den e teki prati na a anbegi fu den. A denki disi no bun kwetikweti!

12. San pasa na ini 1931, so taki sma ben man si moro krin suma na den futuboi fu Yehovah?

¹² Neleki Krestes nanga den „someni kotoigi” di ben kon na en fesi, tru Kresten e si en leki wan grani fu gebroiki a nen fu Gado (Hebr. 12:1). Fu taki en leti, di den futuboi fu Gado teki a nen Yehovah Kotoigi na ini a yari 1931, dan sma ben man si moro krin taki den na anbegiman fu Yehovah. (Leisi Yesaya 43:10-12.) Sobun, na wan aparti fasi, den tru bakaman fu Krestes tron „sma di e tyari [Gado] nen”.—Tori. 15:14, 17.

13. Fa wi kan libi na wan fasi di e gi glori na a nen fu Gado?

¹³ Fa ibriwan fu wi kan libi na wan fasi di e gi glori na a nen fu Gado? Wan sani di wi musu du, na taki wi musu gi kotoigi fayafaya fu a nen fu Gado. Paulus ben skrifi: „Ala sma di e kari a nen fu Yehovah, o kisi frulusu.” A e taki moro fara: „Ma fa den o kari en efu den no bribi na ini en? Èn fa den o bribi na ini en efu den no yere fu en? Èn fa den o yere efu wan sma no preiki gi den? Èn fa den o preiki efu wan sma no seni den go?” (Rom. 10:13-15) Wan tra sani di wi musu du, na taki wi musu tyari falsi leri kon na krin di e pori a nen fu wi Mekiman, èn wi musu du dati na wan lespeki fasi. Wan fu den leri dati na a di fu helfaya, di e leri sma taki a Gado fu lobi abi den ogri-ati fasi fu Didibri.—Yer. 7:31; 1 Yoh. 4:8; luku Markus 9:17-27.

14. San wan tu sma du, di den kon sabi a nen fu Gado?

¹⁴ Yu e si en leki wan grani fu tyari a nen fu yu hemel Tata? Yu e yepi trawan fu kon sabi a santa nen dati? Wan uma na ini Parijs, Fransikondre, ben yere taki Yehovah Kotoigi sabi a nen fu Gado. Sobun, a tra leisi di a miti wan Kotoigi, dan a aksi en fu sori en pe a nen dati skrifi na ini Bijbel. Di na uma leisi Psalm 83:18, dan dati naki en ati trutru. Na uma bigin studeri Bijbel, èn now a de wan sisa di e dini Gado nanga en heri ati na ini wan tra kondre. Wan uma fu Australia, di ben abi a Lomsu bribi, ben si a nen fu Gado fu a fosi leisi na ini Bijbel. A ben breiti so te, taki a bigin krei. Now a e pionier furu yari kaba. No so langa pasa, Kotoigi na ini Yamaika sori wan uma a nen fu Gado na ini en eigi Bijbel. Na uma disi krei tu fu di a ben breiti. Sobun, si en leki wan grani fu tyari a nen fu Gado, èn meki ala sma kon sabi a tumusi warti nen dati, neleki fa Yesus ben e du dati.

„No lobi grontapu”

15, 16. Fa tru Kresten e denki fu a grontapu disi, èn sortu sani wi musu aksi wisrefi?

¹⁵ Bijbel e taki: „No lobi grontapu nanga den sani fu grontapu. Efu wan sma lobi grontapu, dan a lobi fu a Tata no de na ini en” (1 Yoh. 2:15). A yeye fu grontapu e gens Yehovah nanga a santa yeye fu en. Fu dati ede, den tru bakaman fu Krestes no de wan pisi fu grontapu. Fu taki en leti, den e weigri fu lobi grontapu, fu di den sabi taki den wortu di na apostel Yakobus ben skrifi  de tru. Na apostel dati ben taki: „Te wan sma de wan mati fu grontapu, dan a de wan feanti fu Gado.”—Yak. 4:4.

¹⁶ A kan de wan muilek sani fu gi yesi na a rai fu Yakobus, fu di wi e libi na ini wan grontapu di e tesi sma na ala sortu fasi (2 Tim. 4:10). Dati meki Yesus ben begi gi den bakaman fu en: „Mi no e aksi yu fu puru den na grontapu, ma fu kibri den so taki na ogriwan no kan du den ogri. Den no de wan pisi fu grontapu, neleki fa mi no de wan pisi fu grontapu” (Yoh. 17:15, 16). Aksi yusrefi den sani disi: ’Mi e du muiti fu no de wan pisi fu grontapu? Tra sma sabi fa mi e denki fu fesa nanga gwenti di no e kruderi nanga Bijbel? Aladi son fesa no abi fu du nanga heiden fesa nanga gwenti, toku a de krin fu si taki den e sori a denki fu grontapu. Sma sabi fa mi e denki fu den sortu sani dati?’—2 Kor. 6:17; 1 Petr. 4:3, 4.

17. San kan meki taki reti-ati sma teki a sei fu Yehovah?

¹⁷ A no de fu taki, dati grontapu no sa lobi wi fu di wi e hori wisrefi na Bijbel gronprakseri. Ma te wi e tan hori wisrefi na den gronprakseri dati, dan reti-ati sma o wani sabi moro fu a bribi fu wi. Iya, te den sortu sma dati e si taki a bribi fu wi rutu dipi na ini Gado Wortu, èn taki wi e hori wisrefi na a Wortu dati na ini ala sani di wi e du, dan a sa de neleki den e taigi den salfuwan: „Wi wani go nanga unu, bika wi yere taki Gado de nanga unu.”—Sak. 8:23.

Sori tru Kresten lobi

18. Fa wi musu sori lobi gi Yehovah èn gi tra sma?

¹⁸ Yesus ben taki: „Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan.” A ben taki tu: „Yu musu lobi tra sma leki fa yu lobi yusrefi” (Mat. 22:37, 39). Wan sma di e sori a lobi dati (a·gaʹpe na ini Grikitongo), e du san reti, soleki fa dati fiti, èn a e hori ensrefi na yoisti markitiki. Ma nofo tron a sma disi e sori taki a e firi trutru gi sma (1 Petr. 1:22). A no e denki ensrefi nomo, fu di den sani di a e taki èn e du e sori taki a e broko en ede nanga trawan.—Leisi 1 Korentesma 13:4-7.

19, 20. Fruteri wan tu ondrofenitori di e sori taki Kresten lobi abi krakti.

¹⁹ Fu di lobi na wan fu den fasi fu Gado en santa yeye, meki tru Kresten man du san trawan no man du. Den man sori lobi gi ala sma, awansi den sma dati de fu wan tra ras, fu wan tra kulturu, noso awansi sortu tirimakti den  abi (Leisi Yohanes 13:34, 35; Gal. 5:22). Te safri-ati sma e si taki wi e sori a lobi dati gi den, dan dati e naki den ati. Fu eksempre, wan Dyu yonkuman na ini Israel ben go na wan Kresten konmakandra fu a fosi leisi. Di a ben de drape, dan a no ben man bribi fu si taki Dyu nanga Arabiri brada nanga sisa ben e anbegi Yehovah na ini wánfasi. Dati meki a bigin go na den konmakandra doronomo, èn a bigin studeri Bijbel. Yu e sori a srefi lobi dati gi den Kresten brada nanga sisa fu yu? Èn yu e du muiti fu gi nyun sma di e kon na a Kownukondre zaal wan switikon? Yu e du dati awansi fu sortu kondre den de, awansi fu sortu ras den de, èn awansi den gudu noso pôti?

²⁰ Leki tru Kresten wi e du muiti fu sori lobi gi ala sma. Na ini El Salvador, wan yongu preikiman ben e studeri Bijbel nanga wan uma fu 87 yari di ben abi a Lomsu bribi. Ma na uma disi ben e tan horibaka nomo gi a kerki fu en. Wan dei, na uma kon siki seryusu, èn a ben musu go didon na ati-oso. Di a go baka na oso, dan den Kotoigi go luku en, èn den sorgu taki a ben abi nyanyan. Den du dati wan heri mun langa. Nowan enkri sma fu a kerki fu en go luku en. San ben de a bakapisi? A trowe ala den prenki nanga tra sani gowe di ben abi fu du nanga na anbegi fu en. A gowe libi a kerki èn a go doro nanga a Bijbelstudie fu en. Iya, Kresten lobi abi krakti trutru! Te wi e sori lobi na a fasi disi, dan dati e naki sma ati moro leki te wi e taigi sma nomo taki wi lobi den.

21. San wi kan du fu sorgu taki sani waka bun nanga wi?

²¹ Heri esi, Yesus sa taigi ala den sma di e du neleki den na bakaman fu en: „Mi no sabi unu kwetikweti! Komoto na mi fesi, un sma di e du kruktudu” (Mat. 7:23). Dati meki a bun te wi e meki froktu di e gi grani na a Tata èn na a Manpikin. Yesus ben taki: „Efu wan sma e yere den sani disi di mi taki èn a e du den, dan a sa de leki wan koni man di bow en oso na tapu ston-gron” (Mat. 7:24). Iya, te wi e sori taki wi na trutru bakaman fu Krestes, dan Gado sa feni wi bun, èn sani sa waka bun nanga wi. Iya, a sa de neleki wi bow wi oso na tapu ston-gron!

Yu e memre disi ete?

• Fa den tru bakaman fu Krestes e difrenti fu den falsiwan?

• Kari wan tu fu den „froktu” di tru Kresten e meki.

• Sortu marki yu kan poti gi yusrefi, so taki sma kan si taki yu na wan tru Kresten?

[Aksi fu a tori disi]

[Prenki na tapu bladzijde 13]

Yu gwenti fu gebroiki a Bijbel na ini a diniwroko fu yu?

[Prenki na tapu bladzijde 15]

Tra sma sabi fa yu e denki fu fesa di no e kruderi nanga Bijbel?