„A reti di pikin abi fu kon leri sabi Gado”

TAPU 9 december 2008, wan organisâsi fu Sweden di e horibaka gi den reti fu pikin, ben hori wan aparti konmakandra. Na a konmakandra dati, den poti prakseri na a tori disi: „A reti di pikin abi fu kon leri sabi Gado.” Difrenti takiman ben e kenki prakseri nanga makandra fu a tori disi. Den takiman disi ben e teki presi gi a Kerki fu Sweden, gi tra kerki fu Krestenhèit, gi na Islam, èn gi na organisâsi di e leri sma taki den no abi Gado fanowdu fu man de koloku.

Wan fu den takiman ben de wan domri, di ben taki: „A no de fu taki, dati a de tumusi prenspari taki pikin e kon leri sabi den tori fu Bijbel, so taki den kan kon sabi Gado.” Fa den tori fu Bijbel e yepi den pikin fu kon abi wan matifasi nanga Gado?

„Den Bijbeltekst nanga den tori na ini Bijbel, e yepi den pikin fu denki dipi fu sani”, na so a domri ben taki. A ben kari wan tu Bijbel tori soleki „a tori fu Adam nanga Eva, a di fu Kain nanga Abel, a di fu David nanga Goliat, a di fu Yesus na a ten di a ben gebore, èn a di fu Sakeyus di ben e teki belasting moni gi lanti”. A ben kari sosrefi na agersitori „fu a manpikin di ben lasi, èn a di fu a Samariasma di ben du bun gi wan tra sma”. A domri ben taki dati den tori disi na „wan tu fu den tumusi prenspari tori di e yepi wan pikin fu kon abi a yoisti denki fu afersi soleki a tori di sma e tori trawan, a gi di sma musu gi trawan pardon, a meki di sma musu meki sani bun baka nanga Gado, bita-ati, a syen di sma e kisi, a bun di sma e du fu meki vrede baka nanga trawan, a lobi di brada abi gi makandra èn gi trawan”. A domri ben taki tu: „Den tori disi e leri sma sani di den kan fiti na ini den eigi libi.”

A no de fu taki, dati a bun fu gi pikin deki-ati fu leisi Bijbel. Ma a de so trutru taki pikin man „denki dipi fu” den sani di den e leisi na ini Bijbel? A tru taki den o man frustan den tori dati bun, sondro taki trawan yepi den?

Srefi bigisma abi yepi fanowdu fu man frustan den Bijbel tori dati. Fu eksempre, Bijbel e taki fu wan man di ben e „denki dipi fu sani”, ma toku a no ben man kon frustan a Wortu fu Gado. A man dati ben de wan heiman fu Etiopia. A ben e leisi a profeititori fu Yesaya, ma a no ben e frustan den sani di a ben e leisi. Fu di a ben wani frustan san a boskopu fu a profeiti ben wani taki, meki a ben breiti di a disipel Filipus fruklari a boskopu gi en (Tori. 8:26-40). Na Etiopiaman dati no ben de a wan-enkri sma di ben abi yepi fanowdu fu man frustan Gado Wortu. Wi alamala abi a yepi dati fanowdu, èn spesrutu yonguwan e kisi wini fu a yepi dati.

Bijbel e warskow wi: „Don de na ini na ati fu wan boi” (Odo 22:15). Pikin musu kisi leri fu kon sabi san bun èn san no bun. Dati meki den papa nanga mama fu den abi a frantwortu fu kweki den bun èn fu gi den leri fu Gado nanga yepi fu Bijbel èn nanga yepi fu den sani di den e leri na ini a Kresten gemeente. Pikin abi a reti fu kisi a leri dati. Yonguyongu kaba den pikin musu kisi yepi fu man leri sabi Gado bun nanga yepi fu Bijbel. Na so den sa gro kon tron „ lepi sma . . . di leri fa fu gebroiki den frustan fu man si sani krin, so taki den kan sabi san bun èn san no bun.”—Hebr. 5:14.