„A yeye nanga a trowmisi e tan taki: ’Kon!’”
„A yeye nanga a trowmisi e tan taki: ’Kon!’”
„A yeye nanga a trowmisi e tan taki: ’Kon!’ . . . Ibri sma di watra e kiri en, meki a kon; meki ibri sma di wani, kon dringi fu a watra di e gi libi èn di de fu kisi fu soso.”—OPENB. 22:17.
1, 2. O prenspari Kownukondre afersi musu de gi wi, èn fu san ede?
O PRENSPARI Kownukondre afersi musu de gi wi? Yesus ben gi den bakaman fu en a deki-ati fu ’tan suku a kownukondre fosi’, èn a gi den a dyaranti taki efu den ben o du dati, dan Gado ben o gi den san den ben abi fanowdu (Mat. 6:25-33). Yesus ben agersi a Kownukondre fu Gado nanga wan peri di warti so te, taki di wan bisnisman feni en, a „seri ala den sani di a ben abi èn a bai a peri” (Mat. 13:45, 46). Sobun, wi musu poti a Kownukondre preikiwroko èn a wroko di wi abi fu meki disipel, na a fosi presi na ini wi libi, a no so?
2 Na ini den fosi tu artikel, wi si taki te wi e taki sondro frede èn te wi e gebroiki Gado Wortu na wan koni fasi na ini a diniwroko, dan dati e sori taki a yeye fu Gado e tiri wi. A yeye dati e yepi wi tu fu teki prati doronomo na a Kownukondre preikiwroko. Meki wi go luku fa dati e pasa.
Wan kari gi ala sma!
3. Sortu watra ala libisma e kisi kari fu kon dringi?
3 Ala libisma e kisi wan kari nanga yepi fu santa yeye. (Leisi Openbaring 22:17.) Den e kisi a kari fu „kon”, èn fu dringi wan spesrutu sortu watra. A watra disi a no a watra di wi e dringi ala dei. A tru taki watra de fanowdu fu hori den sani na grontapu na libi. Ma Yesus ben e taki fu wan tra sortu watra di a taigi wan Samaria uma na wan watrapeti a sani disi: „Efu wan sma e dringi a watra di mi o gi en, dan watra no sa kiri en noiti moro, ma a watra di mi o gi en o tron wan peti na ini en, pe watra e komopo di e gi sma têgo libi” (Yoh. 4:14). A tumusi aparti watra di libisma e kisi a kari fu kon dringi, kan gi den têgo libi.
4. Fa a du kon taki libisma ben abi a watra di e gi libi fanowdu, èn san a watra dati e prenki?
4 O ten libisma kon abi a watra fanowdu di e gi libi? Dati na di a fosi man, Adam nanga en wefi, Eva, trangayesi Yehovah Gado, a sma di meki den (Gen. 2:16, 17; 3:1-6). Gado puru den fosi tu libisma disi na ini a dyari fu Eden, pe den ben e tan, ’so taki Adam no ben o kisi na okasi fu langa en anu piki wan froktu fu a bon di nen „Libi” èn nyan fu en, so taki a libi fu têgo’ (Gen. 3:22). Na so a du kon taki Adam, a fosi tata fu libisma, tyari dede kon gi ala libisma (Rom. 5:12). A watra di e gi libi e prenki ala den sani di Gado seti fu frulusu reti-ati libisma fu sondu nanga dede, èn fu gi den têgo libi na ini a Paradijs na grontapu. Yehovah ben man seti ala den sani disi, nanga yepi fu a frulusu-ofrandi fu Yesus Krestes.—Mat. 20:28; Yoh. 3:16; 1 Yoh. 4:9, 10.
5. Suma e gi libisma a kari fu „kon dringi fu a watra di e gi libi èn di de fu kisi fu soso”? Tyari disi kon na krin.
5 Suma e gi libisma a kari fu „kon dringi fu a watra di e gi libi èn di de fu kisi fu soso”? Na a ten fu a Dusun Yari Tiri fu Krestes, libisma o man kisi wini dorodoro fu den sani di Gado seti nanga yepi fu Yesus, so taki wi kan kisi libi. Bijbel e agersi den seti disi nanga ’wan liba di abi watra di e gi libi, èn a watra krin leki dyamanti’. Soleki fa Bijbel e sori, dan a liba dati „e lon komoto fu a kownusturu fu Gado èn fu a Pikin Skapu” (Openb. 22:1). Sobun, a watra di e gi libi e komoto fu Yehovah, a Sma di e gi libi (Ps. 36:9). En na a Sma di e gi wi a watra nanga yepi fu „a Pikin Skapu”, Yesus Krestes (Yoh. 1:29). Yehovah o gebroiki na agersi liba disi fu tyari wan kaba kon na ala ogri di miti libisma fu di Adam ben trangayesi en. Iya, a kari di libisma e kisi fu „kon”, e komoto fu Yehovah Gado.
6. O ten libisma bigin kisi wini fu a ’liba di abi watra di e gi libi’?
6 Soleki fa wi si, dan na a pisi ten fu a Dusun Yari Tiri fu Krestes, libisma sa kisi wini dorodoro fu a ’liba di abi watra di e gi libi’. Libisma bigin kisi wini fu den seti disi na ini „a dei fu Masra”, di bigin na a ten di „a Pikin Skapu” tron kownu na hemel na ini 1914 (Openb. 1:10). Sobun, sensi a ten dati, libisma ben kan kisi wini fu wan tu fu den seti di e gi libi. Den seti dati abi fu du nanga a boskopu fu Gado Wortu, Bijbel, di e prenki „watra” (Ef. 5:26). Ala sma di e yere a bun nyunsu fu a Kownukondre èn di e gi yesi na en, e teki „a watra di e gi libi”. Ma suma na den wan di e gi sma wan kari na ini a dei fu Masra?
„A trowmisi” e taki „Kon!”
7. Suma ben de den fosiwan „na ini a dei fu Masra” di ben gi sma a kari fu „kon”, èn na suma den gi a kari dati?
7 Den memre fu a grupu fu a trowmisi, noso den salfu Kresten, na den fosiwan di gi trawan a kari fu „kon”. Suma den gi a kari? We, a trowmisi no e gi ensrefi a kari fu „kon”. A e gi a kari dati na den wan di abi a howpu fu kisi têgo libi na grontapu, baka „a feti na tapu a bigi dei fu Gado na Almaktiwan”.—Leisi Openbaring 16:14, 16.
8. Sortu buweisi de taki den salfu Kresten e gi sma a kari di e komoto fu Yehovah, sensi 1918?
8 Den salfu bakaman fu Krestes e gi sma a kari disi sensi 1918. A yari dati, wan lezing hori di nen: „Milyunmilyun sma di e libi now, no sa dede noiti”. A lezing dati gi furu sma a howpu taki den sa kisi têgo libi na ini wan paradijs na grontapu baka a feti fu Armagedon. Na ini 1922, wan lezing ben hori fu gi den arkiman deki-ati ’fu meki a Kownu nanga en kownukondre’ bekènti. A lezing disi ben hori na a kongres fu den Bijbel Ondrosukuman, na ini Cedar Point, Ohio, na ini Amerkankondre. A lezing disi ben yepi den salfuwan di ben de ete na grontapu fu gi moro sma wan kari. The Watchtower fu 15 maart 1929 ben abi wan artikel na ini di nen „Gado e gi wi wan kari fu di a abi sari-ati nanga wi” èn a thematekst fu na artikel ben de Openbaring 22:17. Wan pisi fu na artikel ben taki: „Den reti-ati salfuwan di de ete na grontapu e wroko makandra nanga [a Moro Heiwan] fu gi sma wan kari fu ’kon’, fu di Gado abi sari-ati nanga den sma disi. A boskopu disi musu meki bekènti na den wan di e angri gi retidu nanga waarheid. A musu meki bekènti nownowde”. Te na a dei fu tide, den salfuwan e tan gi sma a kari dati.
„Ibri sma di e yere disi, meki a taki: ’Kon!’”
9, 10. Fa den sma di yere a kari e kisi deki-ati fu taki „Kon!” tu?
9 Ma fa a de nanga den wan di e yere a kari fu „kon”? Den e kisi a kari fu taki „Kon!” tu. Fu eksempre, The Watchtower fu 1 augustus 1932, ben taki na tapu bladzijde 232: „Meki den salfuwan gi ala sma deki-ati fu teki prati na a bun nyunsu fu a kownukondre. Den sma disi no abi fu de salfuwan fu man meki a boskopu fu Masra bekènti. A de wan bigi trowstu gi den Kotoigi fu Yehovah fu sabi now taki den e kisi okasi fu tyari a watra di e gi sma libi gi wan grupu sma di kan pasa Armagedon libilibi fu kisi têgo libi na grontapu.”
10 The Watchtower fu 15 augustus 1934 ben sori krin taki sma di e yere a kari, abi a frantwortu fu taki „Kon!” Na tapu bladzijde 249 fu a tijdschrift dati skrifi: „Den memre fu a Yonadab-grupu musu wroko makandra nanga na agersi Yehu-grupu, noso den salfuwan, fu meki a kownukondre boskopu bekènti, èn den musu du dati aladi den no de salfu Kotoigi fu Yehovah.” Na ini 1935, a kon na krin suma na den sma fu a „bigi ipi” di kari na ini Openbaring 7:9-17. Leki bakapisi fu dati, a wroko di wi e du fu gi sma a kari di e komoto fu Gado, go na fesi trutru. Sensi a ten dati, moro nanga moro tru anbegiman fu a bigi ipi teki a kari dati. Now a grupu dati pasa moro leki seibi milyun sma. Fu di den de nanga tangi taki den yere a boskopu, meki den gi densrefi abra na Gado, den teki dopu, èn den wroko makandra nanga a salfu-grupu fu gi trawan a kari fu ’kon dringi a watra di e gi libi èn di de fu kisi fu soso’.
„A yeye” e taki „Kon!”
11. Fa a santa yeye yepi den disipel fu du a preikiwroko na ini a fosi yarihondro?
11 Di Yesus ben preiki na ini wan snoga na ini Nasaret, dan a opo a bukulolo fu a profeiti Yesaya èn a leisi: „A yeye fu Yehovah de na mi tapu, bika a salfu mi fu meki a bun nyunsu bekènti na den pôtisma; a seni mi go fu preiki taki den strafuman o kon fri, taki den breniwan o si baka, èn taki a o meki den sma di e kisi kwinsi gowe leki friman, fu meki a yari bekènti pe Yehovah o feni sma bun.” Baka dati Yesus sori taki den wortu dati ben abi fu du nanga en, fu di a taki: „Tide den wortu di unu yere didyonsro kon tru” (Luk. 4:17-21). Fosi Yesus opo go na hemel, a fruteri den disipel fu en: „Unu sa kisi krakti te a santa yeye kon na un tapu, èn unu sa de kotoigi fu mi . . . te na den moro farawe presi fu grontapu” (Tori. 1:8). Na ini a fosi yarihondro, a santa yeye ben de wan bigi yepi gi den disipel di ben e du a preikiwroko.
12. Fa a yeye fu Gado e yepi wi fu gi sma wan kari na ini a ten disi?
12 Fa Gado en santa yeye e yepi wi fu gi sma wan kari na ini a ten disi? A santa yeye e komoto fu Yehovah. Gado e gebroiki en santa yeye fu yepi den salfuwan fu frustan Bijbel, a Wortu fu en. A yeye e meki den gi trawan wan kari, èn a e meki den tyari tru tori fu Bijbel kon na krin gi den wan di abi a howpu fu libi fu têgo na ini wan Paradijs na grontapu. Fa a de nanga den wan di teki a kari disi, di e tron disipel fu Yesus Krestes èn e gi trawan a kari tu? A yeye e yepi den tu fu du dati. Fu di den dopu ’na ini a nen fu a santa yeye’, meki den e wroko makandra nanga a yeye èn den abi a frutrow taki a yeye disi o yepi den (Mat. 28:19). Prakseri sosrefi a boskopu di den salfuwan èn a bigi ipi e preiki. A e komoto fu Bijbel, a buku di skrifi nanga yepi fu Gado en santa yeye. Sobun, den e gi sma a kari nanga yepi fu santa yeye. Fu taki en leti, a yeye dati e tiri wi. Sortu krakti a sani disi musu abi tapu a ten di wi e gebroiki fu gi trawan wan kari?
Den „e tan taki: ’Kon!’”
13. San den wortu „a yeye èn a trowmisi e tan taki: ’Kon!’”, wani taki?
13 „A yeye èn a trowmisi” no e taki „Kon!” nomo. A Griki wortu di wani taki ’kon’, abi fu du nanga wan sani di e pasa doronomo. Dati meki a Nyun Grontapuvertaling vertaal a tekst dati na a fasi disi: „A yeye nanga a trowmisi e tan taki: ’Kon!’”A sani disi e sori taki wi musu gi sma a kari doronomo. Fa a de nanga den wan di e yere èn e teki a kari? Den sma disi e taki „Kon!” tu. Soleki fa Bijbel e sori, dan a bigi ipi tru anbegiman ’e du santa diniwroko dei nanga neti na ini a tempel fu Yehovah’ (Openb. 7:9, 15). Na sortu fasi den ’e du diniwroko dei nanga neti’? (Leisi Lukas 2:36, 37; Tori fu den Apostel 20:31; 2 Tesalonikasma 3:8.) Na eksempre fu na owru profeiti-uma Ana èn a di fu na apostel Paulus e sori taki wan sma di ’e du santa diniwroko dei nanga neti’, e teki prati doronomo na a diniwroko, èn a e du dati fayafaya.
14, 15. Fa Danièl sori taki a de prenspari fu anbegi Gado doronomo?
14 A profeiti Danièl ben sori tu taki a de prenspari fu teki prati na a anbegi doronomo. (Leisi Danièl 6:4-10, 16.) A tan begi Gado „dri tron wan dei, . . . soleki fa a ben gwenti du ala ten”. A no tapu nanga a gwenti dati, awansi na gi wán mun nomo, èn awansi den ben o trowe en go na ini na olo pe den lew de. A fasi fa Danièl handri, meki den sma di ben e luku en kon frustan krin taki a moro prenspari sani gi en ben de fu anbegi Yehovah doronomo!—Mat. 5:16.
15 Baka di Danièl ben tan wan neti na ini na olo pe den lew ben de, dan a kownu srefi go drape èn a bari kari: „Danièl, futuboi fu a libi Gado, a Gado di yu e dini doronomo ben man frulusu yu puru na a mofo fu den lew?” Wantewante Danièl piki en: „Kownu, tan libi fu têgo. Mi eigi Gado seni en engel kon, dan a tapu a mofo fu den lew. Den no kiri mi, fu di mi no du nowan ogri. Kownu, yu srefi mi no du ogri tu.” Yehovah blesi Danièl fu di a ben e dini en „doronomo”.—Dan. 6:19-22.
16. Te wi e luku na eksempre fu Danièl, dan san wi musu aksi wisrefi?
16 Danièl ben de klariklari fu dede na presi fu tapu nanga a gwenti di a ben abi fu anbegi Gado doronomo. Fa a de nanga wi? Sortu muiti wi e du now, èn sortu muiti wi sa wani du fu meki a bun nyunsu fu Gado Kownukondre bekènti doronomo? We, wi no musu meki wan mun pasa sondro taki wi e fruteri trawan fu Yehovah! Efu a kan, dan wi musu du muiti fu teki prati na a preikiwroko ibri wiki, a no so? Awansi wi man preiki 15 miniti nomo wan mun fu di wi siki noso fu di wi swaki, toku wi musu skrifi dati na tapu wi preikiwroko raportu. Fu san ede wi musu du dati? Fu di wi e angri fu tan taki „Kon!”, makandra nanga a yeye èn a trowmisi. Iya, wi wani du ala san wi man fu tan preiki a Kownukondre doronomo.
17. Sortu okasi wi musu teki fu gi trawan a kari di e komoto fu Yehovah?
17 Wi musu teki ibri okasi fu gi trawan a kari di e komoto fu Yehovah. Wi no musu gi den a kari dati soso te wi e teki prati na a preikiwroko. A de wan grani trutru taki wi man gi sma di watra e kiri den a kari fu „kon dringi fu a watra di e gi libi èn di de fu kisi fu soso”. Èn wi kan du dati na ten te wi e bai sani na wenkri, te wi e go na tra kondre, te wi de nanga fakansi, te wi de na wroko, noso te wi e go na skoro! Awansi lanti e tapu a preikiwroko, toku wi kan tan preiki kibrikibri. Kande wi kan preiki na wan tu oso nomo na ini wan birti, èn baka dati wi kan go preiki na ini wan tra birti. Noso kande wi kan du moro muiti leki fosi fu preiki na tra okasi.
Tan taki „Kon!”
18, 19. Fa yu e sori taki yu de nanga tangi gi a grani di yu abi fu wroko makandra nanga Gado?
18 Moro leki neigitenti yari now, a yeye èn a trowmisi e taki „Kon!” fu gi iniwan sma di watra e kiri den a kari fu kon dringi fu a watra di e gi libi. Yu yere a tumusi moi kari dati tu? Efu dati de so, dan wi e gi yu deki-ati fu gi trawan a kari dati tu.
19 Wi no sabi o langa Yehovah o tan gi sma a lobi-ati kari disi, ma te wi di yere a kari disi e tan taki „Kon!”, dan wi sa de sma di e wroko makandra nanga Gado (1 Kor. 3:6, 9). A sani disi na wan grani trutru! Meki wi sori taki wi de nanga tangi taki wi abi a grani disi, èn meki wi teki prati na a preikiwroko doronomo fu „gi Gado wan srakti-ofrandi fu preise ala ten” (Hebr. 13:15). Meki den wan di abi a howpu fu libi na grontapu tan taki „Kon!”, makandra nanga a grupu fu a trowmisi. Èn wi e howpu taki moro sma sa „dringi fu a watra di e gi libi èn di de fu kisi fu soso”!
San yu leri?
• Suma e kisi a kari fu „kon”?
• Fu san ede wi kan taki dati na Yehovah e gi sma a kari fu „kon”?
• Fa a santa yeye e yepi wi fu gi sma a kari fu „kon”?
• Fu san ede wi musu du muiti fu teki prati na a preikiwroko doronomo?
[Aksi fu a tori disi]
[Schema/Prenki na tapu bladzijde 16]
(Efu yu wani si pe den sani disi skrifi, luku a tijdschrift)
Tan taki „Kon!”
1914
5100 preikiman
1918
Furu sma sa libi na ini a Paradijs na grontapu
1922
„Preiki, preiki, preiki, a Kownu nanga en kownukondre”
1929
Den reti-ati salfuwan di e libi ete na grontapu e taki, „Kon!”
1932
A no soso den salfuwan e kisi a grani fu gi sma a kari fu „Kon!”
1934
A Yonadab-grupu e kisi a kari fu preiki
1935
A kon na krin suma na den sma fu a „bigi ipi”
2009
7.313.173 preikiman