Aksi fu leisiman

O ten wan sma ben kan prakseri fu teki dopu baka?

Na ini son situwâsi, a ben o bun te wan sma di dopu e aksi ensrefi efu a dopu fu en ben e kruderi nanga den markitiki fu Gado. Kande a sma disi musu prakseri fu teki dopu baka. Fu eksempre, a kan taki na a ten di a sma teki dopu, a ben e libi na wan fasi di no fiti, sondro taki trawan ben sabi fu dati. Noso, kande a ben abi wan takru gwenti. Efu a sma disi ben de wan sma di ben dopu kaba na wan fasi di ben e kruderi nanga den markitiki fu Gado, dan den sondu di a ben du ben kan meki taki den puru en fu a gemeente. A ben kan gi ensrefi abra na Gado na ini a situwâsi dati? So wan sma ben o man gi ensrefi abra na Yehovah na wan fasi di fiti, soso te a ben tapu fu libi na wan fasi di no e kruderi nanga Bijbel gronprakseri. Sobun, te wan sma teki dopu aladi a ben e du den seryusu sondu dati, dan a ben o fiti te a ben o prakseri fu teki dopu baka.

Ma kande wan sma no ben e du sondu na a ten di a teki dopu, ma baka di a teki dopu, a du wan sondu di meki taki a musu kon na fesi wan krutu komte. Fa a de nanga a situwâsi dati? Kande a sma disi feni taki a no ben sabi san a ben e du na a ten di a teki dopu, èn taki a dopu fu en no ben e kruderi nanga den markitiki fu Gado. Te owruman o taki nanga wan sma di du wan sondu, dan den no musu gi en a firi taki wan sani no ben bun na a dopu fu en. Den no musu aksi en tu efu a feni taki a gi di a gi ensrefi abra na Yehovah, èn a dopu fu en ben e kruderi nanga den markitiki fu Gado. Fu taki en leti, fosi a sma teki dopu, a arki wan Bijbel lezing di e sori san a wani taki fu teki dopu. A sma piki ’Iya’ tapu den aksi di abi fu du nanga a gi di a gi ensrefi abra na Yehovah, èn nanga a dopu fu en. Baka dati, a sma kenki krosi, èn den dukrun en heri skin na ondro watra. Sobun, a de krin taki a sma ben e frustan heri bun taki a dopu fu en, ben de wan seryusu sani. Dati meki den owruman musu si a sma disi leki wan dopu sma te den e krutu na afersi fu en.

Efu a sma disi feni taki a dopu fu en no ben e kruderi nanga den markitiki fu Gado, dan den owruman kan gi en a rai fu poti prakseri na wan tu Waktitoren artikel di ben e taki fu a tori disi. Baka dati, den kan taki nanga en fu den artikel dati. Te a abi fu du nanga spesrutu situwâsi (soleki te wan sma dopu, aladi a no ben e frustan Bijbel leri bun), dan wan sma srefi musu bosroiti efu a o teki dopu baka.

Sortu sani Kresten musu hori na prakseri te den wani tan nanga trawan na ini wán oso?

Ala sma abi wan tanpresi fanowdu. Ma na ini a ten disi, furu sma no abi den eigi oso. Kande dati e kon fu di den wawan no man pai gi den kostu fu wan oso. Noso kande na fu di den e siki, noso kande na fu wan tra reide ede. Dati meki furu sma e tan makandra nanga tra famiriman. Na son presi na grontapu, a e pasa son leisi taki wan heri grupu famiriman e tan makandra na ini wán kamra, èn den no man du noti sondro taki den trawan sabi fu dati.

Na organisâsi fu Yehovah no abi a frantwortu fu meki wan lo wet fu sori den memre fu a gemeente na heri grontapu, san na a yoisti situwâsi fu libi na ini. Kresten e kisi a deki-ati fu  luku sortu Bijbel gronprakseri kan yepi den fu kon sabi efu Gado e agri nanga a situwâsi di den e libi na ini. San na wan tu fu den gronprakseri dati?

Wan prenspari sani di wi musu hori na prakseri te wi e libi makandra nanga tra sma, na taki a situwâsi dati sa abi krakti na wi tapu, èn na tapu a bribi fu wi. Wi musu aksi wisrefi: Mi sabi fa den sma disi de trutru? Den e anbegi Yehovah? Den e libi na wan fasi di e kruderi nanga Bijbel gronprakseri? Na apostel Paulus ben skrifi: „No kori unsrefi. Takru kompe e pori bun gwenti.”—1 Kor. 15:33.

Den Santa Buku fu Bijbel e sori taki Yehovah e krutu huruman nanga sutaman (Hebr. 13:4). Sobun, Gado no ben o feni en bun kwetikweti te wi e gi pasi taki wan man nanga wan uma di no trow, e libi nanga makandra na ini wán oso. Wan Kresten no ben o wani tan na ini wan oso pe sma e du hurudu.

Boiti dati, Bijbel e gi ala sma di wani taki Gado feni den bun, a rai fu „lowe gi hurudu” (1 Kor. 6:18). Dati meki a ben o de wan koni sani te wan Kresten no ben o libi na wan presi pe a ben o kisi tesi fu du hurudu. Fu eksempre, luku a situwâsi fu wan tu Kresten di e sribi na ini a srefi oso. Kon meki wi taki dati wan tu fu den Kresten dati no de na oso wan leisi, èn tu trawan di no trow nanga makandra e si taki den de den wawan, sondro taki den ben fruwakti dati. Yu denki taki a situwâsi disi ben kan tron wan tesi gi den? Na so a ben o tron wan tesi tu te sma di no trow èn di abi lobi firi gi makandra, e tan na ini a srefi oso. A ben o bun te Kresten e wai pasi gi den sortu situwâsi dati.

A no ben o fiti tu te sma di broko trow nanga makandra e tan libi makandra na ini a srefi oso. Fu di den ben gwenti fu abi seks nanga makandra, meki a situwâsi dati ben kan tron wan tesi gi den fu du hurudu.—Odo 22:3.

Wan lasti sani di wi musu hori na prakseri èn di prenspari tu, na taki wi musu luku fa sma na ini a birti fu wi e denki fu den bosroiti di wi e teki. Wan Kresten ben kan feni taki a situwâsi di a e libi na ini no e trobi a konsensi fu en, aladi den sma na ini a birti no e taki bun fu a situwâsi dati. Te dati de so dan wi musu poti prakseri na a tori dati. Noiti wi no wani gi Yehovah porinen nanga a fasi fa wi e tyari wisrefi. Paulus ben taki en na a fasi disi: „Un no musu du nowan sani di e meki Dyu, Grikisma, noso a gemeente fu Gado fadon, neleki fa misrefi e du ala sani fu plisi ala sma, fu di mi no e suku mi eigi bun, ma mi e suku a bun fu furu sma, so taki den kan kisi frulusu.”—1 Kor. 10:32, 33.

A kan de wan tyalensi gi den wan di wani hori densrefi na den regtfardiki markitiki fu Yehovah, fu feni wan tanpresi di fiti. Ma Kresten musu „tan ondrosuku san Masra feni bun”. Den musu de seiker taki nowan enkri sani di no fiti, e pasa na ini na oso fu den (Ef. 5:5, 10). Dati meki Kresten musu begi Gado fu tiri den, den musu du ala san den man fu sorgu taki ogri no e miti den, èn taki den e tan tyari densrefi na wan fasi di fiti. Den musu sorgu tu taki Yehovah no e kisi porinen.