Gebroiki „a feti-owru fu a yeye” na wan koni fasi

„Teki . . . a feti-owru fu a yeye, dati na Gado wortu.”—EF. 6:17.

1, 2. San wi musu du fu di moro Kownukondre preikiman de fanowdu?

DI YESUS si taki den ipi-ipi sma ben abi Gado fanowdu na ini den libi, dan a taigi den disipel fu en: „A kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman fu go du a kotiwroko fu en.” Yesus ben du moro leki dati. Baka di a taki a sani dati, dan „a kari den twarfu disipel fu en kon” èn a seni den fu go preiki, noso fu go ’du wan kotiwroko’ (Mat 9:35-38; 10:1, 5). Bakaten, Yesus „teki ete seibitenti sma èn a seni den tu na tu” fu go du a srefi wroko dati.—Luk. 10:1, 2.

² Moro Kownukondre preikiman de fanowdu tu na ini a ten disi. Na ini a dienstyari 2009, sowan 18.168.323 sma ben de na a Memrefesa di hori na heri grontapu. Dati na 10 milyun sma moro leki a nomru fu den Kotoigi fu Yehovah. A sani disi e sori krin taki a nyanyan na ini den gron lepi kaba fu koti (Yoh. 4:34, 35). Dati meki wi musu begi Gado èn wi musu aksi en fu seni moro wrokoman fu kon du a kotiwroko. Ma fa wi kan handri na wan fasi di e kruderi nanga a sani disi di wi e aksi Yehovah? We, wi musu teki prati fayafaya na a Kownukondre preikiwroko èn na a wroko di wi kisi fu meki disipel, èn wi musu leri fu du a wroko dati moro bun.—Mat. 28:19, 20; Mark. 13:10.

3. Fa a yeye fu Gado e yepi wi fu tron moro bun preikiman?

³ A fosi studie-artikel ben e sori fa a yeye fu Gado e yepi wi fu „taki a wortu fu Gado sondro frede” (Tori. 4:31). A yeye dati kan yepi wi tu fu tron moro bun preikiman. Wan fasi fa wi kan du a preikiwroko moro bun, na te wi e leri fu gebroiki a tumusi moi sani di Yehovah Gado gi wi. Dati na Bijbel, a Wortu fu en. A buku disi skrifi nanga yepi fu santa yeye (2 Tim. 3:16). A boskopu fu Bijbel komoto fu Gado. Sobun, te wi e gebroiki Bijbel na wan koni fasi fu gi sma leri na ini a preikiwroko, dan wi e meki a santa yeye tiri wi. Fosi wi poti prakseri fa wi kan du dati, meki wi go luku o furu krakti a Wortu dati abi.

’A Wortu fu Gado abi krakti’

4. Fa a boskopu na ini Gado Wortu kan kenki sma?

⁴ A wortu fu Gado, noso a boskopu na ini, abi krakti trutru! (Hebr. 4:12) Na wan agersi fasi, a boskopu fu Bijbel srapu moro iniwan feti-owru di libisma meki, fu di a man koti so dipi taki a e prati bonyo nanga bonyo-fatu fu makandra. Den tru tori fu Bijbel e doro te na ini na ati èn a frustan fu wan sma, èn a e tyari kon na krin fa a sma de trutru. Den tru tori dati kan abi krakti tapu wan sma, èn den kan kenki wan sma trutru. (Leisi Kolosesma 3:10.) Iya, Gado Wortu man kenki sma libi!

5. Na sortu fasi Bijbel kan tiri wi, èn san na a bakapisi?

⁵ Boiti dati, Bijbel na wan buku di lai nanga koni di no de fu feni na nowan tra presi. A buku disi abi bun rai na ini di e sori sma fa den musu libi na ini a bruya grontapu disi. Boiti taki a Wortu fu Gado na wan lampu gi wi futu, a de sosrefi wan leti na tapu wi pasi (Ps. 119:105). A wortu disi de wan bigi yepi te wi e kisi fu du nanga problema, noso te wi musu bosroiti sortu mati wi o teki, sortu prisiriten wi o abi, sortu wroko wi o du, sortu krosi wi o weri, èn so moro fara (Ps. 37:25; Odo 13:20; Yoh. 15:14; 1 Tim. 2:9). Te wi e hori wisrefi na  den gronprakseri di de fu feni na ini Gado Wortu, dan wi o man libi bun nanga trawan (Mat. 7:12; Fil. 2:3, 4). Te wi e meki a Wortu fu Gado skèin na tapu wi pasi, dan wi o man si na fesi sortu bakapisi den bosroiti fu wi o tyari kon te fu kaba (1 Tim. 6:9). Den Buku fu Bijbel e tyari kon na krin tu san Gado o du na ini a ten di e kon, èn dati e yepi wi fu libi na wan fasi di e kruderi nanga a prakseri dati (Mat. 6:33; 1 Yoh. 2:17, 18). Iya, wan sma kan de koloku te a e meki den gronprakseri fu Gado tiri en na ini en libi!

6. Fa Bijbel e yepi wi fu kakafutu gi Satan?

⁶ Poti prakseri tu na a krakti di Bijbel abi fu yepi wi, so taki wi man kakafutu gi Satan. Paulus ben kari Gado wortu „a feti-owru fu a yeye”. (Leisi Efeisesma 6:12, 17.) Te wi e tyari a boskopu fu Bijbel na wan koni fasi, dan a kan fri sma di de na ini a makti fu Satan. A feti-owru disi no e pori sma libi, ma a e kibri sma libi. Dati meki wi musu du muiti fu gebroiki a feti-owru disi na wan koni fasi, a no so?

Gebroiki Gado Wortu na wan reti fasi

7. Fu san ede a de prenspari taki wi e leri fu gebroiki „a feti-owru fu a yeye” bun?

⁷ Wan srudati di e teki prati na wan feti, sa man gebroiki den fetisani fu en bun, soso te a leri fa fu du dati. Na so a de tu te wi musu gebroiki „a feti-owru fu a yeye” fu kakafutu gi Satan. Paulus ben skrifi: „Du ala san yu man fu gi yusrefi na Gado leki wan sma di a feni bun, wan wrokoman di no abi fu syen fu noti èn di e gebroiki a wortu fu waarheid na wan reti fasi.”—2 Tim. 2:15.

8, 9. San o yepi wi fu kon frustan san Bijbel e taki? Gi wan eksempre.

⁸ San o yepi wi fu ’gebroiki a wortu fu waarheid na wan reti fasi’ te wi e teki prati na a preikiwroko? Fosi wi kan fruteri trawan krin san Bijbel e taki, dan wisrefi musu frustan tu san skrifi na ini a buku disi. Dati meki wi musu poti prakseri na den wortu lontu wan tekst noso lontu wan pisi di skrifi na ini Bijbel.

⁹ Fu man frustan wan pisi di skrifi na ini Bijbel, dan wi musu poti prakseri tu na den tekst di skrifi lontu a pisi dati. Den wortu di Paulus e taki na Galasiasma 5:13, e sori taki a de fanowdu fu du dati. A ben skrifi: „Brada, a no de fu taki dati Gado kari unu fu de fri; no gebroiki a fri disi fu du san a sondu skin wani, ma dini makandra leki srafu fu di un lobi makandra.” Fu sortu fri Paulus ben e taki? A ben e taki dati wi ben kon fri fu sondu nanga dede, fu a krakti di falsi bribi abi na wi tapu, noso fu wan tra sani? Den tra tekst na ini a kapitel disi e sori taki Paulus ben e taki fu a fri di den Dyu ben kisi fu di Krestes ’bai den puru na ondro a fluku fu a Wet’ (Gal. 3:13, 19-24; 4:1-5). Paulus ben e taki fu a fri di den ben kisi now fu di den ben tron bakaman fu Krestes. Den sma di ben abi warderi gi a fri dati, ben e dini makandra fu di den ben lobi makandra. Ma den wan di no ben e sori lobi, ben e taki ogri fu  makandra, èn den ben e krutu nanga makandra.—Gal. 5:15.

10. Fu man frustan Bijbeltekst bun, dan sortu sani wi musu kon sabi, èn fa wi kan kon sabi den sani dati?

¹⁰ Fu man frustan krin san wan Bijbeltekst wani taki, dan wi musu luku suma na a skrifiman fu a Bijbel buku dati, o ten a ben skrifi, èn san ben de a situwâsi di a sma skrifi en. A bun tu fu kon sabi fu san ede a buku ben skrifi, sortu gwenti den sma fu a ten dati ben abi, fa den ben e tyari densrefi, na sortu markitiki den ben e hori densrefi, èn sortu anbegi den ben abi. *

11. San wi no musu du te wi e fruklari Bijbel gi sma?

¹¹ Te wan sma e „gebroiki a wortu fu waarheid na wan reti fasi”, dan dati no wani taki nomo dati a sma e tyari den tru tori fu Bijbel kon na krin na wan soifri fasi. Wi musu luku bun taki wi no e gebroiki Bijbel fu tapu skreki gi sma. Aladi wi kan gebroiki Bijbel fu opo taki gi a waarheid, soleki fa Yesus ben du dati di Didibri ben tesi en, toku wi no musu gebroiki Bijbel fu tapu skreki gi sma, noso fu meki den firi syen (Deut. 6:16; 8:3; 10:20; Mat. 4:4, 7, 10). Wi musu gi yesi na a rai disi di na apostel Petrus ben gi: „Santa a Krestes leki Masra na ini un ati, èn ala ten un musu de srekasreka fu opo taki gi unsrefi na fesi ala sma di e aksi unu fu a howpu di de na ini unu, ma du dati na wan safri fasi èn nanga bigi lespeki.”—1 Petr. 3:15.

12, 13. Sortu ’sani di tanapu steifi’ Gado Wortu man broko puru? Gi wan eksempre fu dati.

¹² Te wi e gebroiki Gado Wortu na a yoisti fasi, dan sortu krakti den tru tori na ini Bijbel kan abi tapu sma? (Leisi 2 Korentesma 10:4, 5.) Den tru tori fu Bijbel man „broko sani puru di tanapu steifi”, noso den kan tyari falsi leri kon na krin, èn den kan yepi sma fu kon si taki son sani di den e du kan tyari takru bakapisi kon gi den. Boiti dati, Bijbel e yepi sma fu si efu wan leri di e komoto fu sondu libisma no e kruderi nanga Bijbel. Wi kan gebroiki Bijbel fu broko iniwan denki puru ’di e gens a sabi fu Gado’. Wi kan gebroiki den leri fu Bijbel fu yepi trawan fu kon abi wan denki di e kruderi nanga den tru tori fu Bijbel.

¹³ Fu eksempre, luku a tori fu wan uma di abi 93 yari, èn di e libi na ini India. Yonguyongu kaba a leri taki sma di dede e gebore baka na ini a skin fu wan tra sma, noso na ini a di fu wan meti. A manpikin fu en di e libi na ini wan tra kondre, bigin studeri Bijbel nanga en, èn a du dati nanga yepi fu brifi di a ben e seni go gi en mama. Di na uma bigin leri suma na Yehovah èn san A o du, dan a ben makriki gi en fu bribi den sani dati. Ma di en manpikin sori en san na a situwâsi fu den dedewan, dan a weigri fu bribi den sani dati, fu di en heri libi langa a ben leri taki sma di dede e gebore baka na ini a skin fu wan tra sma, noso na ini a di fu  wan meti. Na uma ben taki: „A muilek gi mi fu bribi san a Bijbel fu yu e leri fu a tori disi. Ala bribi e leri taki wan sani na ini wi e tan na libi, baka te wi dede. Mi heri libi langa mi leri taki a skin e dede èn taki wan pisi fu en di wi no man si e libi go doro na ini wan tra skin. Èn a sani disi e pasa doronomo, iya, sowan 8.400.000 leisi. Fa a sani disi no ben kan de tru? Yu wani taigi mi taki furu fu den tra bribi no abi leti na ini a tori disi?” „A wortu fu a yeye” kan broko den sortu tranga bribi disi puru? A manpikin fu na uma disi gebroiki Bijbel fu taki moro fara fu a tori disi nanga en mama. Wan tu wiki baka dati, na uma skrifi wan brifi seni go gi en, fu taigi en: „Now fosi mi e bigin frustan san na trutru a situwâsi fu den dedewan. Mi breiti srefisrefi fu sabi taki na a ten fu na opobaka, wi o miti baka nanga den lobiwan fu wi di dede. Mi e howpu taki a Kownukondre fu Gado e kon heri esi.”

Gebroiki Bijbel fu overtoigi sma

14. San a wani taki fu overtoigi den sma di e arki wi?

¹⁴ Te wi wani gebroiki Bijbel bun na ini a diniwroko, dan dati no wani taki nomo dati wi musu leisi Bijbeltekst gi sma. Paulus ben e pruberi fu „overtoigi” sma, èn wi musu du dati tu. (Leisi Tori fu den Apostel 19:8, 9; 28:23.) Te wi e pruberi fu „overtoigi” sma, dan dati wani taki dati wi e suku fu „meki wan sma agri nanga wi”. A sma dati e „kon abi so wan tranga overtoigi, taki a e bigin bribi wan sani”. Te wi e pruberi fu overtoigi wan sma fu bribi wan Bijbel leri, dan wi e yepi en fu poti frutrow na ini a leri dati. Fu man du disi, dan wi musu overtoigi a sma taki a sani di wi e fruteri en, na wan tru tori. Meki wi go luku fa wi kan du dati.

15. Fa yu kan poti prakseri na Bijbel na wan fasi di e meki sma kisi lespeki gi a buku dati?

¹⁵ Poti prakseri na Gado Wortu na wan fasi di sa meki sma kisi lespeki gi a wortu disi. Fosi yu taki fu wan Bijbeltekst, dan sori a sma fu san ede a prenspari taki a e kon abi a srefi denki fu Gado na ini a tori dati. Te yu poti wan aksi gi na ososma èn a sma e piki, dan kande yu kan taki wan sani soleki ’Meki wi go luku fa Gado e denki fu a tori disi’. Noso kande yu kan aksi a sma ’Fa Gado feni a situwâsi disi?’ Te yu e taki den sortu sani disi fosi yu leisi wan tekst, dan yu e sori a sma krin taki Bijbel na a Wortu fu Gado, èn a sma sa kon kisi bigi lespeki gi a buku disi. Wi musu du dati spesrutu te wi e gi kotoigi na wan sma di e bribi na ini Gado, ma di no sabi san Bijbel e leri.—Ps. 19:7-10.

16. San o yepi yu fu tyari Bijbeltekst kon na krin na wan yoisti fasi?

¹⁶ No leisi den Bijbeltekst nomo, ma tyari den kon na krin. Te Paulus ben e gi sma leri fu Bijbel, dan a ben gwenti fu ’tyari sani kon na krin nanga yepi fu den sani di skrifi kaba’ (Tori. 17:3). Furu Bijbeltekst abi fu du nanga moro leki wán sani, èn kande yu o abi fu sori sortu wortu na ini a tekst abi fu du nanga a tori di yu e taki. Kande yu kan leisi den wortu baka di abi fu du nanga a tori dati, noso kande yu kan poti aksi di sa yepi a sma fu kon sabi sortu wortu yu abi na prakseri. Baka dati, fruklari san a pisi fu a tekst dati wani taki. Te yu du dati kaba, dan yu kan yepi a sma fu kon si fa a tekst abi fu du nanga en.

17. Fa yu kan gebroiki Bijbel fu overtoigi sma?

¹⁷ Gebroiki Bijbel fu fruklari sani gi sma na wan fasi di e overtoigi den. Te Paulus ben e ’gebroiki Gado Buku fu overtoigi sma’, dan a ben e du dati na wan makriki fasi èn na wan fasi di e naki na ati fu den sma (Tori. 17:2, 4).  Neleki Paulus, yu musu pruberi fu doro na ati fu den sma di e arki yu. Poti aksi gi a sma fu sori en taki yu e broko yu ede trutru nanga en. Na so yu o man ’hari kon na tapu’ san de na ini na ati fu a sma (Odo 20:5). No taki na wan fasi di e sori taki yu no e hori den firi fu a sma na prakseri. Tyari den tru tori fu Bijbel kon na krin na wan soifri fasi, èn na wan fasi di makriki fu frustan. Gi a sma bun buweisi so taki a kan bribi san yu e taki. Den sani di yu e taki musu komoto fu Gado Wortu. A moro bun fu tyari wán Bijbeltekst nomo kon na krin, na presi fu leisi tu noso dri tekst esi-esi baka makandra. Te yu e gebroiki buweisi, dan dati kan yepi yu tu fu „taki nanga koni” (Odo 16:23). Son leisi, a kan de fanowdu fu ondrosuku sani moro fini èn fu meki a sma kon sabi moro fu wan spesrutu tori. Na uma di abi 93 yari, èn di wi ben taki fu en kaba, ben wani sabi fu san ede so furu kerki e leri sma taki a sili no man dede. Fu man yepi en fu bribi san Bijbel e leri fu a tori dati, dan a ben musu kon frustan fosi pe a leri dati komoto, èn fa a du kon taki furu bribi na grontapu abi a leri dati. *

Tan gebroiki en na wan koni fasi

18, 19. Fu san ede wi musu tan gebroiki „a feti-owru fu a yeye” na wan koni fasi?

¹⁸ „A komedi-prei fu grontapu e kenki”, na so Bijbel e taki. Ogri sma e kon moro ogri dei fu dei (1 Kor. 7:31; 2 Tim. 3:13). Dati meki a de prenspari trutru taki wi e gebroiki ’a feti-owru fu a yeye, noso Gado wortu’ fu tan broko sani puru „di tanapu steifi”.

¹⁹ Wi breiti trutru taki wi abi Bijbel, a Wortu fu Gado, èn taki wi kan gebroiki a krakti boskopu fu en fu rutu falsi leri puru èn fu yepi reti-ati sma! Nowan enkri sani di tanapu steifi, krakti moro a boskopu dati. Fu dati ede, meki wi du ala san wi man fu gebroiki „a feti-owru fu a yeye” na wan koni fasi te wi e du a wroko di Gado gi wi fu meki a Kownukondre bekènti.

[Futuwortu]

San yu leri?

• O furu krakti a Wortu fu Gado abi?

• Fa wi kan „gebroiki a wortu fu waarheid na wan reti fasi”?

• San a boskopu fu Bijbel man du nanga ’sani di tanapu steifi’?

• Fa yu kan overtoigi sma moro bun na ini a preikiwroko?

[Aksi fu a tori disi]

[Faki/​Prenki na tapu bladzijde 12]

Fa wi kan gebroiki Gado Wortu fu overtoigi sma?

▪ Meki a sma kon abi lespeki gi Bijbel

▪ Tyari Bijbeltekst kon na krin

▪ Taki na wan fasi di e overtoigi a sma, so taki yu kan doro na ati fu en

[Prenki na tapu bladzijde 11]

Yu musu leri fu gebroiki „a feti-owru fu a yeye” na wan koni fasi