Kakafutu gi den lei fu Satan

’NO KORI unsrefi. A Gado fu unu no o yepi unu. Efu unu no gi unsrefi abra, dan a no o moi gi unu!’ Disi na a boskopu di Rabsakei, wan boskopuman fu Kownu Sanherib, ben tyari gi den sma di ben e tan na ini Yerusalem. A legre fu a kownu ben kon na ini a kondre Yuda. Rabsakei ben taki den sani disi fu meki den sma na ini Yerusalem lasi-ati èn fu tapu skreki gi den, so taki den ben sa gi densrefi abra.—2 Kow. 18:28-35.

Den Asiriasma ben de wan pipel di ben e du ogri-ati sani nanga sma. Den ben e tapu skreki gi den feanti fu den, fu di den ben e meki den kon sabi finifini sortu ogri-ati sani den ben e du nanga den katiboman fu den. Soleki fa historia skrifiman Philip Taylor e taki, dan den Asiriasma ben abi „a gwenti fu tapu skreki gi den feanti fu den èn fu panya leitori, soso fu kan basi den feanti fu den. Den ben e tapu skreki tu gi den pipel di ben kan tron feanti fu den, fu di den ben e panya tori di ben e sori na sortu ogri-ati fasi den ben handri nanga tra pipel. Den ben e panya den tori disi na wan triki fasi, fu man abi krakti na tapu a denki fu den sma disi.” A panya di sma e panya leitori, kan du furu ogri. Taylor e taki dati a sani disi kan „bruya a frustan fu trawan”.

Tru Kresten „no e feti nanga libisma, ma nanga . . . den ogri yeye” di opo densrefi teige Gado (Ef. 6:12). A moro bigi feanti, na Satan Didibri. A e panya lei tu fu tapu skreki gi wi.

Satan e taki dati a kan meki ibriwan fu wi trangayesi Gado. Na ini a ten fu a famiri-edeman Yob, Satan ben taigi Yehovah Gado: „Meki a de taki na dede wan sma de fu dede, dan yu o si efu a no o gi ala san a abi soso fu man tan na libi.” Fu taki en leti, Satan ben taki dati, efu wan sma e tan kisi tesi, dan te fu kaba, a o drai baka gi Gado (Yob 2:4). Satan ben abi leti di a taki a sani dati? A tru taki wi alamala sa brokokindi te fu kaba, soso fu man tan na libi? Na dati Satan wani wi fu bribi. Dati meki a e panya leitori safrisafri fu poti a denki dati na ini wi ede. Meki wi go luku wan tu fu den fasi fa Satan e panya den sortu tori disi, èn wi sa luku tu fa wi kan kakafutu gi en.

„A fondamenti fu den na doti”

Di den dri mati fu Yob go luku en, dan Satan gebroiki Elifas, wán fu den mati dati, fu taigi Yob taki libisma swaki tumusi fu tan gi yesi na Gado. Elifas ben taki dati libisma „e tan na ini tokotoko oso”, èn a taigi Yob: „A fondamenti fu den na doti! Sma kan masi den moro makriki leki te den e masi wan woron. Fu mamanten teleki neti sma e masi den finifini. Nowan sma e si srefi taki den dede. Fu têgo den no de moro.”—Yob 4:19, 20.

Wan tra Bijbeltekst e agersi libisma nanga swaki „patu di meki fu tokotoko” (2 Kor. 4:7). Wi swaki fu di wi kisi sondu, èn fu di wi no de volmaakti (Rom. 5:12). Wi wawan no man kakafutu gi Satan. Ma wi leki Kresten, no de wi wawan. Aladi wi abi swakifasi, toku Gado lobi wi (Yes. 43:3). Boiti dati, Yehovah e gi santa yeye na den wan di e aksi en (Luk. 11:13). A yeye fu en kan gi wi „krakti di bigi pasa marki”, so taki wi kan horidoro awinsi sortu tesi Satan e tyari kon na wi tapu (2 Kor. 4:7; Fil. 4:13). Te wi e kakafutu gi Didibri, èn te wi abi „wan tranga bribi”, dan Gado sa meki wi tanapu kánkan, èn a sa meki wi kon  tranga (1 Petr. 5:8-10). Dati meki wi no abi fu frede Satan Didibri.

A man „e dringi kruktudu leki watra”

Elifas ben taki: „Nowan libisma kan de krin, èn nowan libisma di wan umasma meki kan abi leti.” A ben taki moro fara: „Efu Gado no e frutrow den santawan fu en èn hemel srefi no de krin gi en, dan a no o frutrow wan sma tu di e du tegu sani nanga kruktu sani, wan sma di e dringi kruktudu leki watra!” (Yob 15:14-16) Elifas ben wani sori Yob taki gi Yehovah, nowan libisma de regtfardiki. Didibri wani tu taki wi musu denki takru fu sani. A wani taki wi e broko wi ede nanga fowtu di wi ben meki na ini a ten di pasa, so taki wi e krutu wisrefi tumusi. Na so wi o bigin denki taki Gado no sa gi wi pardon. Satan wani meki wi denki tu taki Yehovah e aksi tumusi furu fu wi, èn taki Yehovah no sa de klariklari ala ten fu sori sari-ati gi wi, fu gi wi pardon, èn fu yepi wi.

A tru taki wi alamala ’sondu, èn wi no man doro a glori fu Gado’. Nowan sondu libisma man hori ensrefi finifini na ala den regtfardiki markitiki fu Yehovah (Rom. 3:23; 7:21-23). Ma dati no wani taki dati wi no warti noti gi en. Yehovah sabi taki na „a fosi sneki, a wan di den e kari Didibri nanga Satan”, wani kori wi fu di wi na sondu libisma (Openb. 12:9, 10). Gado e hori na prakseri taki „na fu doti wi meki”, èn a no e „tan suku fowtu” na wi.—Ps. 103:8, 9, 14.

Efu wi e tapu fu du san ogri, èn efu wi e begi Yehovah fu di wi abi trutru berow, dan ’a o de klariklari fu gi wi pardon’ (Yes. 55:7; Ps. 51:17). Awinsi den sondu fu wi „redi leki brudu, toku den sa kon weti leki katun”, na so Bijbel e taki (Yes. 1:18). Fu dati ede, meki wi abi a fasti bosroiti fu tan meki muiti fu du a wani fu Gado.

Leki sondu libisma, wi noiti no o kon abi a reti fu de regtfardiki na ini Gado ai. Adam nanga Eva lasi a volmaakti fasi fu den, èn sosrefi a howpu di den ben abi fu kisi têgo libi. Na so a du kon taki wi alamala lasi den sani dati (Rom. 6:23). Ma fu di Yehovah lobi libisma trutru, meki a seti sani so taki wi kan kisi pardon fu sondu te wi e sori bribi na ini a srakti-ofrandi fu en Manpikin, Yesus Krestes (Mat. 20:28; Yoh. 3:16). Dati na wan tumusi moi fasi fa Gado sori „no-frudini bun-ati” gi wi! (Tit. 2:11) Iya, wi kan kisi pardon fu sondu! Fu dati ede, wi no musu gi pasi taki Satan kori wi fu denki taki dati no tru.

„Meki a firi en te na ini en bonyo srefi”

Satan ben taki dati Yob ben o drai baka gi Gado efu a ben o kon siki. Didibri tyalensi Yehovah, èn a taki: „Meki a firi en te na ini en bonyo srefi, dan yu o si efu a no o fluku yu leti na ini yu fesi” (Yob 2:5). A no de fu taki dati a Feanti fu Gado ben o breiti efu a ben kan meki wi denki taki wi no warti noti gi Gado te wi siki.

 Ma Yehovah no e poti wi na wan sei te wi no man du so furu moro na ini a diniwroko leki fosi. San wi ben o du efu wan sma ben o du ogri nanga wan bun mati fu wi? A de so taki wi no ben o lobi a mati dati moro, soso fu di a no man du so furu gi wi leki fosi? Kwetikweti! Wi ben o tan lobi en, èn wi ben o tan broko wi ede nanga en, spesrutu te a ben kisi mankeri fu di a ben wani du wi wan bun. Yehovah ben o du a srefi, a no so? Bijbel e taki: „Gado no de onregtfardiki taki a sa frigiti den wroko fu unu èn taki a sa frigiti a lobi di unu sori gi a nen fu en.”—Hebr. 6:10.

Bijbel e taki fu „wan pôti uma” di kande ben e horibaka gi na anbegi fu Gado furu yari langa. Yesus ben si taki na uma disi poti „tu sensi di no ben warti furu”, na ini a monikisi fu a tempel. A wisiwasi na uma fu a sani dati ede? A ben feni taki a moni di na uma ben poti no ben warti notinoti? Nôno. Na presi fu dati, a prèise na uma fu di a ben e du ala san a ben man fu horibaka gi a tru anbegi.—Luk. 21:1-4.

Efu wi e tan gi yesi na Yehovah, dan wi kan de seiker taki a sa tan si wi leki en mati, awinsi o owru, noso awinsi o siki wi de leki bakapisi fu a sondu skin fu wi. Gado noiti no o drai baka gi den wan di e tan gi yesi na en, soso fu di problema e meki taki den no man du so furu gi en.—Ps. 71:9, 17, 18.

Teki „a helm di e gi frulusu”

Fa wi kan sorgu taki den leitori di Satan e panya, no abi krakti na wi tapu? Na apostel Paulus ben skrifi: „Meki Masra gi unu krakti, èn tranga unsrefi nanga a kefalek bigi krakti fu en. Un musu sorgu taki unu abi ala den sani di Gado gi unu fu feti, so taki unu kan tanapu kánkan gi den triki di Didibri e gebroiki fu kori sma; Teki sosrefi a helm di e gi frulusu” (Ef. 6:10, 11, 17). Fu man kakafutu gi den leitori di Satan e panya, dan wi musu sorgu taki wi e weri a helm dati, èn wi no musu puru en fu wi ede. Wan srudati e weri wan helm fu kibri en ede. ’A howpu di wi abi taki wi o kisi frulusu’, sa yepi wi fu no bribi den lei fu Satan. A howpu dati na a frutrow di wi abi taki Gado sa tyari wan nyun grontapu kon, soleki fa a pramisi (1 Tes. 5:8). Fu sorgu taki wi no e lasi a howpu dati, dan wi musu studeri Bijbel fayafaya.

Yob horidoro aladi Satan ben du bun furu ogri nanga en. A bribi di Yob ben abi na ini na opobaka ben tranga so te, taki a tan gi yesi na Gado aladi a ben kan lasi en libi. Yob ben taigi Yehovah: „Yu o kari mi èn mi o piki yu. Yu o angri fu si mi, a sani di yu meki nanga yu eigi anu” (Yob 14:15). Awinsi Yob ben o lasi en libi fu di a ben wani tan gi yesi na Gado, toku a ben abi a frutrow taki Gado ben o gi en libi baka, fu di A lobi den reti-ati futuboi fu En.

Wi musu abi a srefi frutrow na ini a tru Gado. Awinsi san Satan e du nanga wi, Yehovah kan meki ala sani kon reti baka. Hori na prakseri tu taki Paulus ben gi wi a dyaranti disi: „Gado de getrow, èn a no sa meki unu kisi tesi di hebi moro leki san unu man frudrage; ma te tesi miti unu, dan a sa tyari wan frulekti kon, so taki unu man horidoro.”—1 Kor. 10:13.

[Prenki na tapu bladzijde 20]

Yehovah e warderi en taki yu e tan dini en

[Prenki na tapu bladzijde 21]

Weri a helm di e gi frulusu, èn no puru en fu yu ede