Tan kisi wini fu a moro bun fasi fu libi!
Tan kisi wini fu a moro bun fasi fu libi!
„Awansi wi e libi noso wi e dede, wi na fu Yehovah.”—ROM. 14:8.
1. San Yesus ben leri wi fu a moro bun fasi fu libi?
YEHOVAH wani taki wi musu abi a moro bun fasi fu libi. Sma kan libi na difrenti fasi, ma wán fasi fu libi nomo na a moro bunwan. A moro bun sani di wi kan du nanga wi libi, na fu libi na wan fasi di e kruderi nanga Gado Wortu, èn fu teki leri fu en Manpikin, Yesus Krestes. Yesus ben leri den bakaman fu en fu anbegi Gado nanga yeye èn nanga waarheid, èn a ben gi den a wroko fu meki disipel (Mat. 28:19, 20; Yoh. 4:24). Te wi e du san Yesus e taigi wi fu du, dan Yehovah sa feni wi bun èn a sa blesi wi.
2. San furu sma fu a fosi yarihondro du di den yere a Kownukondre boskopu, èn san a ben wan taki te wan sma ben de fu „A Pasi fu Masra”?
2 Te den wan di ’abi a yoisti denki fu man kisi têgo libi’ e poti bribi na ini a boskopu èn e teki dopu, dan wi abi bun reide fu gi den deki-ati fu tan kisi wini fu a moro bun fasi fu libi (Tori. 13:48). Na ini a fosi yarihondro, dusundusun sma fu difrenti kondre teki a tru anbegi, èn den teki dopu fu sori ala sma taki den gi densrefi abra na Gado (Tori. 2:41). Den fosi disipel dati ben de fu „a Pasi fu Masra” (Tori. 9:2; 19:23). Den wortu dati ben fiti fu di den sma di tron bakaman fu Krestes ben e libi na wan fasi di ben e sori taki den ben e bribi na ini Yesus Krestes èn taki den ben e teki na eksempre fu en.—1 Petr. 2:21.
3. Fu san ede a pipel fu Yehovah e teki dopu, èn omeni sma teki dopu na ini den yari di pasa?
3 A wroko di Kresten e du fu meki disipel, go na fesi trutru na ini den lasti dei disi, èn now a wroko disi e du na ini moro leki 230 kondre. Na ini den lasti tin yari di pasa, moro leki 2.700.000 sma teki a bosroiti fu dini Yehovah èn fu teki dopu leki buweisi taki den gi densrefi abra na en. Dati na moro leki 5000 sma ibri wiki! Wan sma e teki dopu fu di a lobi Gado, fu di a teki leri fu Bijbel, èn fu di a e bribi den sani di a leri. Te wi teki dopu, dan dati na wan tumusi prenspari sani, fu di a e sori taki wi bigin wan bun matifasi nanga Yehovah. A sani disi e sori tu taki wi abi a frutrow taki Yehovah sa yepi wi fu tan dini en nanga wi heri ati, neleki fa a ben yepi den owruten futuboi fu en fu tan waka a pasi fu en.—Yes. 30:21.
Fu san ede yu musu teki dopu?
4, 5. Kari wan tu fu den blesi nanga den wini di yu sa kisi te yu teki dopu.
4 Kande yu kon leri sabi Gado, kande yu tyari kenki kon na ini yu libi, èn kande yu e dini now leki wan preikiman di no dopu ete. Efu dati de so, dan yu du wan heri bun sani. Ma a de so taki yu gi yusrefi abra na Gado na ini begi, èn yu e angri fu teki dopu? Fu di yu studeri Bijbel, meki a musu de so taki yu sabi taki yu no musu libi soso fu kisi wini gi yusrefi, noso fu feti baka gudu. Na presi fu dati, yu sabi taki yu musu gebroiki yu libi fu gi glori na Yehovah. (Leisi Psalm 148:11-13; Luk. 12:15.) Sobun, san na wan tu fu den blesi nanga den wini di wan sma e kisi te a teki dopu?
5 Efu yu na wan dopu Kresten, dan yu abi a moro bun marki na ini a libi. Yu sa de koloku fu di yu e du a wani fu Gado (Rom. 12:1, 2). Nanga yepi fu a santa yeye fu Yehovah, yu o man sori den fasi fu En, soleki vrede nanga bribi (Gal. 5:22, 23). Gado o piki den begi fu yu, èn a o blesi a muiti di yu e du fu libi na wan fasi di e kruderi nanga a Wortu fu en. A diniwroko fu yu sa gi yu prisiri, èn fu di yu e libi na wan fasi di Gado feni bun, meki a howpu di yu abi fu kisi têgo libi sa kon moro tranga. Boiti dati, te yu gi yusrefi abra na Gado èn e teki dopu, dan dati sa sori krin taki yu wani de wan Kotoigi fu Yehovah.—Yes. 43:10-12.
6. Te wi e teki dopu, dan san dati e sori?
6 Te wi gi wisrefi abra na Gado èn e teki dopu, dan wi e meki ala sma kon sabi taki wi na futuboi fu Yehovah. Na apostel Paulus ben skrifi: „Fu taki en leti, nowan fu wi e libi soso gi ensrefi èn nowan sma e dede soso gi ensrefi; bika efu wi e libi, dan wi e libi gi Yehovah, èn efu wi e dede, dan wi e dede gi Yehovah. Fu dati ede, awansi wi e libi noso wi e dede, wi na fu Yehovah” (Rom. 14:7, 8). Gado gi wi a grani fu teki wi eigi bosroiti. Te wi abi a fasti bosroiti fu tan libi na a fasi disi fu di wi lobi Gado, dan wi e meki na ati fu en prisiri (Odo 27:11). Te wi teki dopu, dan dati e sori taki wi gi wisrefi abra na Gado, èn wi e meki ala sma kon sabi tu taki Yehovah na wi Tiriman. A sani disi e sori tu taki wi teki a sei fu Yehovah, fu di wi e si en leki a Sma di abi a reti fu tiri hemel nanga grontapu (Tori. 5:29, 32). Fu dati ede, wi kan abi a dyaranti taki Yehovah de na wi sei. (Leisi Psalm 118:6.) Te wi teki dopu, dan dati e opo a pasi tu gi wi fu kisi furu tra blesi now èn na ini a ten di e kon.
Wi sa kon abi lobi Kresten brada nanga sisa
7-9. (a) Sortu dyaranti Yesus ben gi den wan di ben libi ala sani na baka fu tron bakaman fu en? (b) Fa a sani di Yesus taki na Markus 10:29, 30 e kon tru?
7 Na apostel Petrus ben taigi Yesus: „Luku! Wi gowe libi ala sani èn wi kon waka na yu baka; san wi o kisi dan?” (Mat. 19:27) Petrus ben wani sabi san ben o pasa nanga en èn nanga den tra disipel fu Yesus. Den ben libi prenspari sani na baka fu man poti ala den prakseri na a Kownukondre preikiwroko (Mat. 4:18-22). Sortu dyaranti Yesus ben gi den?
8 Te wi e luku na Evangelietori fu Markus, dan Yesus e sori taki den disipel fu en ben o tron memre fu wan famiri fu Kresten brada nanga sisa. A ben taki: „Ibri sma di gowe libi en oso, noso en brada, noso en sisa, noso en mama, noso en papa, noso en pikin, noso en gron gi mi èn gi a bun nyunsu, sa kisi oso, brada, sisa, mama, pikin, nanga gron wan hondro tron moro na ini a ten disi, èn a o kisi frufolgu tu, ma na ini a grontapu sistema di e kon a o kisi têgo libi” (Mark. 10:29, 30). Lidia, Akwila, Preskela, nanga Gayus, ben de wan tu fu den fosi Kresten di ben meki trawan kon tan na ini den „oso”, èn den tron ’brada, sisa, nanga mama’ gi tra Kresten, soleki fa Yesus ben pramisi.—Tori. 16:14, 15; 18:2-4; 3 Yoh. 1, 5-8.
9 A sani di Yesus ben taki e kisi wan moro bigi kontru na ini a ten disi. Den „gron” di den bakaman fu en ben libi na baka, abi fu du nanga a grontapu wroko di furu Kresten libi na baka fu man horibaka gi Kownukondre afersi na ini difrenti kondre. Wan tu fu den Kresten dati, na zendeling, memre fu a Bethelfamiri, brada nanga sisa di e du bow-wroko na tra kondre, èn sosrefi tra Kresten. Furu brada nanga sisa gowe libi den oso fu man poti moro prakseri na Kownukondre afersi, èn a e gi wi prisiri fu yere den ondrofenitori fu den di e sori fa Yehovah sorgu gi den èn fa den e firi koloku (Tori. 20:35). Boiti dati, ala dopu futuboi fu Yehovah kan kisi a blesi fu „tan suku a kownukondre nanga [Gado] En regtfardikifasi fosi”, leki memre fu a Kresten famiri di de na heri grontapu.—Mat. 6:33.
Yu sa de na ini „a kibripresi”
10, 11. San na „a kibripresi fu a Moro Heiwan”, èn fa wi kan kisi okasi fu kon na ini a kibripresi dati?
10 Te wan sma gi ensrefi abra na Gado èn e teki dopu, dan a e kisi ete wan blesi. Iya, a e kisi a grani fu tan na ini „a kibripresi fu a Moro Heiwan”. (Leisi Psalm 91:1.) Na ini na agersi presi disi, Gado e kibri wi gi sani di kan pori a bribi fu wi. Sma di no e denki soleki fa Gado e denki èn di no e frutrow na en tapu, no sabi a kibripresi disi. Te wi e tan du a wani fu Yehovah soleki fa wi ben pramisi en, èn te wi e frutrow na en tapu dorodoro, dan fu taki en leti, wi e taigi en: „Yu na mi kibripresi nanga mi fortresi, mi Gado di mi sa frutrow” (Ps. 91:2). Na so Yehovah Gado e tron wi kibripresi (Ps. 91:9). Wan moro bun kibripresi leki dati no de, a no so?
11 Te wi kisi okasi fu kon na ini „a kibripresi” fu Yehovah, dan dati e sori tu taki a gi wi a grani fu tron mati fu en. Wi e tron wan mati fu Yehovah te wi e gi wisrefi abra na en èn e teki dopu. Baka dati, wi e du muiti fu kon moro krosibei na Gado, èn fu dati ede wi e tan studeri Bijbel, wi e begi Gado fayafaya, èn wi e gi yesi na en na ini ala sani (Yak. 4:8). Nowan sma abi wan moro bun matifasi nanga Yehovah leki Yesus, fu di a noiti no lasi frutrow na ini a Mekiman (Yoh. 8:29). Dati meki, noiti wi musu denki taki Yehovah no wani, noso taki a no man yepi wi fu gi yesi na en soleki fa wi ben pramisi en di wi gi wisrefi abra na en (Preik. 5:4). Den sani di Gado seti gi a pipel fu en e sori krin taki a lobi wi trutru, èn taki a wani wi fu tan dini en.
Sori warderi gi na agersi paradijs di wi de na ini now
12, 13. (a) San na a agersi paradijs di wi de na ini now? (b) Fa wi kan yepi den nyunwan na ini a gemeente?
12 Te wi gi wisrefi abra na Gado èn teki dopu, dan dati e opo a pasi gi wi fu tan na ini na agersi paradijs. A paradijs disi e prenki a tumusi moi grani di wi abi fu anbegi Yehovah Gado makandra nanga Kresten brada nanga sisa di abi vrede nanga Gado èn nanga makandra (Ps. 29:11; Yes. 54:13). Noti no de na grontapu di wi kan agersi nanga a paradijs fu wi. Disi de krin fu si spesrutu na den internationaal kongres pe wi Kresten brada nanga sisa fu difrenti kondre, difrenti tongo, èn fu difrenti kulturu e kon makandra na ini vrede, wánfasi, nanga lobi.
13 Na agersi paradijs di wi de na ini, de heri tra fasi leki a takru situwâsi di de na grontapu na ini ten disi. (Leisi Yesaya 65:13, 14.) Fu di wi e preiki a Kownukondre boskopu, meki wi abi a grani fu gi trawan wan kari fu kon na ini na agersi paradijs. A de wan grani tu fu yepi den nyunwan di e kon na a gemeente, di musu leri fu du a diniwroko. Den owruman kan gi wi a grani tu fu yepi spesrutu nyunwan, neleki fa Akwila nanga Preskela ben „fruklari a pasi fu Gado moro soifri” gi Apolos.—Tori. 18:24-26.
Tan teki leri fu Yesus
14, 15. Sortu bun reide wi abi fu tan teki leri fu Yesus?
14 Wi abi bun reide fu tan teki leri fu Yesus. Fosi Yesus ben kon na grontapu, a ben e wroko milyunmilyun yari makandra nanga en Papa (Odo 8:22, 30). A ben sabi taki a moro bun fasi fa a ben kan gebroiki en libi, ben de fu dini Gado èn fu gi kotoigi fu a waarheid (Yoh. 18:37). Yesus ben sabi krin taki efu a ben o libi na wan tra fasi, dan dati ben o sori taki a ben e denki ensrefi nomo, èn taki a no ben sabi san na den moro prenspari sani. A ben sabi taki a ben o kisi hebi tesi, èn taki sma ben o kiri en (Mat. 20:18, 19; Hebr. 4:15). Leki na Eksempre fu wi, a leri wi fa wi kan de sma di e tan gi yesi na Gado.
15 Syatu baka di Yesus teki dopu, Satan ben wani kori en fu drai baka gi a moro bun fasi fu libi, ma Yesus no arki en (Mat. 4:1-11). Disi e sori wi taki awinsi san Satan e du, toku wi man tan gi yesi na Gado. A no de fu taki, dati Satan e pruberi fu kori den wan di wani teki dopu, èn den wan di teki dopu no so langa pasa (1 Petr. 5:8). Kande famiriman di abi a bun fu wi na prakseri sa gens wi, fu di den abi wan fowtu denki fu Yehovah Kotoigi. Ma den sortu tesi disi e gi wi na okasi fu sori den moi fasi fu Krestes te wi e piki den aksi fu den, èn te wi e gi kotoigi na den. Iya, wi sa sori lespeki gi den famiriman fu wi, èn wi no sa hati den firi fu den (1 Petr. 3:15). Fu dati ede, te wi e tyari wisrefi na a fasi disi, dan den wan di e arki wi sa de klariklari fu bribi den sani di wi e taigi den.—1 Tim. 4:16.
Tan kisi wini fu a moro bun fasi fu libi!
16, 17. (a) San na den dri prenspari sani di wi musu du fu man kisi libi, soleki fa Deuteronomium 30:19, 20 e sori? (b) Fa Yesus, Yohanes, nanga Paulus ben horibaka gi den sani di Moses ben skrifi?
16 Sowan 1500 yari fosi Yesus ben kon na grontapu, Moses gi den Israelsma a deki-ati fu bosroiti fu teki a moro bun fasi fu libi. A ben taki: „Tide ala sma na hemel nanga grontapu musu sabi taki mi gi unu na okasi fu bosroiti efu unu wani libi noso dede, efu unu wani kisi blesi noso fluku. Ma grantangi, teki a libi, dan unu nanga un bakapikin o tan na libi. Unu o tan na libi efu unu lobi Yehovah un Gado, efu unu arki en sten, èn efu unu e tai hori na en” (Deut. 30:19, 20). Den Israelsma no ben tan gi yesi na Gado. Ma efu wi na ini a ten disi wani kisi libi, dan wi musu du den dri prenspari sani ete di Moses ben taigi den Israelsma fu du. Yesus nanga den tra apostel ben taki tu fu den sani disi.
17 A fosi sani di wi musu du, na taki ’wi musu lobi Yehovah wi Gado’. Wi e sori taki wi lobi Gado te wi e hori wisrefi na den regtfardiki markitiki fu en (Mat. 22:37). A di fu tu sani di wi musu du, na taki ’wi musu arki Yehovah en sten’, èn fu dati ede wi musu studeri Gado Wortu, èn wi musu gi yesi na den komando fu en (1 Yoh. 5:3). Dati meki wi musu de na den Kresten konmakandra doronomo, pe wi e kisi leri fu Bijbel (Hebr. 10:23-25). A di fu dri sani di wi musu du, na taki ’wi musu tai hori na Yehovah’. Awinsi sortu tesi e miti wi, toku wi musu tan sori bribi na ini Gado, èn wi musu waka baka a Manpikin fu en.—2 Kor. 4:16-18.
18. (a) San The Watchtower fu 1914 ben taki fu a tru bribi? (b) Fa wi musu si den tru tori di wi e leri fu Bijbel na ini a ten disi?
18 A de wan blesi trutru fu libi na wan fasi di e kruderi nanga den tru tori fu Bijbel! Na ini 1914, The Watchtower ben taki a moi sani disi: „Wi na wan koloku pipel di e kisi furu blesi, a no so? Yu no e agri taki wi e dini wan reti-ati Gado? Efu wan sma sabi wan moro bun sani, dan meki a teki dati. Efu oiti wán fu unu feni wan moro bun sani, dan wi e howpu taki yu sa fruteri wi dati. Wi no sabi nowan enkri sani di bun moro den sani di wi leri na ini Gado Wortu. . . . Nowan sma man fruklari a vrede, a prisiri, nanga a blesi di wi kisi fu di wi kisi soifri sabi fu Gado. Den sani di wi leri fu a koni fu Gado, fu a retidu fu en, fu a makti fu en, èn fu a lobi fu en e meki wi kon sabi sani moro krin, èn den de wan trowstu gi wi. Wi no e suku nowan tra sani. Wi no wani noti moro, leki fu kon sabi moro fu Gado” (The Watch Tower fu 15 december 1914, bladzijde 377, 378). Te now ete wi de nanga tangi gi den tru tori fu Bijbel di wi kon sabi. Iya, now wi abi moro reide fu prisiri taki wi e „waka na ini a leti fu Yehovah”.—Yes. 2:5; Ps. 43:3; Odo 4:18.
19. Fu san ede den wan di doro den markitiki fu teki dopu, no musu draidrai fu du dati?
19 Efu yu wani „waka na ini a leti fu Yehovah”, ma yu no de wan dopu Kresten ete, dan no draidrai. Du san de fanowdu fu doro den markitiki fu Bijbel so taki yu kan teki dopu, fu di dati na a moro bun fasi fa yu kan sori warderi gi den sani di Gado nanga Krestes du gi wi. Gi Yehovah a moro prenspari sani di yu abi, namku yu libi. Tron wan bakaman fu Krestes, fu di yu abi a fasti bosroiti fu du a wani fu Gado (2 Kor. 5:14, 15). A no de fu taki, dati disi na a moro bun fasi fu libi!
San yu ben sa piki?
• Te wi e teki dopu, dan san dati e prenki?
• Sortu blesi wi e kisi te wi e gi wisrefi abra na Gado èn e teki dopu?
• Fu san ede a prenspari taki wi e teki leri fu Yesus?
• San o yepi wi fu tan kisi wini fu a moro bun fasi fu libi?
[Aksi fu a tori disi]
[Prenki na tapu bladzijde 25]
Te yu teki dopu, dan dati e sori taki yu teki a moro bun fasi fu libi
[Prenki na tapu bladzijde 26]
Yu de na ini „a kibripresi”?