Yu e si Yehovah leki yu Papa?

„MASRA, leri wi fa fu begi”. Di wan fu den disipel fu Yesus aksi en a sani disi, dan Yesus piki en: „Te unu e begi, dan un musu taki: ’Mi Tata [noso Papa], meki yu nen kon santa’” (Luk. 11:1, 2). Di Yesus ben taki fu Yehovah, dan a ben kan gebroiki kefalek nen soleki na „Almaktiwan”, a „Gran Leriman”, „a Mekiman”, „a sma di de sensi owruten”, èn „a têgo Kownu” (Gen. 49:25; Yes. 30:20; 40:28; Dan. 7:9; 1 Tim. 1:17). Ma na presi fu dati, Yesus gebroiki a wortu „Tata”, noso Papa. Fu san ede a ben du dati? Kande na fu di a ben wani dati wi musu taki nanga a moro hei Sma fu hemel nanga grontapu, soleki fa wan pikin di abi sakafasi e taki nanga en lobi papa.

Ma son sma feni en muilek fu si Gado leki den Papa. Wan Kresten di nen Atsuko * e taki: „Furu yari baka di mi teki dopu, a ben muilek gi mi fu kon krosibei na Yehovah èn fu taki nanga en neleki a de mi Papa.” Fu san ede a sisa disi no ben man du dati? A e taki: „Fu di mi no man memre nowan enkri leisi di mi eigi papa sori lobi gi mi.”

Na ini den muilek lasti dei disi, bun furu papa no e sori „lobi” gi den pikin fu den (2 Tim. 3:1, 3). Dati meki a no e fruwondru wi taki sma abi den firi di Atsuko abi. Ma a moi fu sabi taki wi abi bun reide fu si Yehovah leki wi lobi Papa.

Yehovah na a Sma di e sorgu bun gi wi

Efu wi wani si Yehovah leki wi Papa, dan wi musu kon leri sabi en bun. Yesus ben taki: „Nowan sma sabi a Tata trutru, boiti a Manpikin èn a sma di a Manpikin wani fu a kon sabi a Tata” (Mat. 11:27). Wan moi fasi fa wi kan kon leri sabi Yehovah leki wan Papa, na te wi e poti prakseri na den sani di Yesus ben taki fu a tru Gado. Sobun, san Yesus ben taki fu en Papa?

Yesus ben si Yehovah leki a Sma di gi en libi, fu di a ben taki: „Mi e libi fu di a Tata gi mi libi” (Yoh. 6:57). Sosrefi wi de na libi fu di wi Papa gi wi libi (Ps. 36:9; Tori. 17:28). San ben meki taki Yehovah gi trawan libi? A no fu di a lobi wi meki a du dati? Dati meki wi musu lobi wi hemel Papa tu.

A moro prenspari fasi fa Gado sori lobi gi libisma, na taki a gi Yesus leki wan frulusu-ofrandi. Na ofrandi disi meki taki sondu libisma kan abi wan bun matifasi nanga Yehovah nanga yepi fu en lobi Manpikin (Rom. 5:12; 1 Yoh. 4:9, 10). Boiti dati, wi hemel Papa, na a Sma di e meki den pramisi fu en kon tru. Dati meki wi kan de seiker taki te fu kaba, ala sma di lobi en èn di e gi yesi na en, o tron „pikin fu Gado èn den o kisi kefalek bigi fri”.—Rom. 8:21.

Wi hemel Papa „e meki a son fu en opo” gi wi tu ibri dei (Mat. 5:45). Nofo tron, wi no feni en fanowdu fu begi Gado fu meki a son opo. Ma wi abi a son nanga a waran fu en fanowdu trutru! Boiti dati, nowan tra sma e sorgu so bun gi wi leki fa wi Papa e sorgu gi wi. A sabi heri bun san wi abi fanowdu èn a e gi wi den sani dati fosi wi e aksi en. Fu dati ede, a ben o bun te wi e teki ten fu luku fa wi hemel Papa e sorgu gi den sani di a meki. Na so wi o man sori en taki wi de nanga tangi.—Mat. 6:8, 26.

 Wi Papa na a ’Sma di sori bun-ati gi wi’

A profeititori fu Yesaya ben gi a pipel fu Gado fu owruten a dyaranti disi: „’Kande den bergi skoifi èn den pikin bergi seki, ma noiti mi o tapu fu sori yu bun-ati èn noiti mi frubontu fu freide o seki’, na so Yehovah, a sma di sori yu bun-ati, taki” (Yes. 54:10). Yesus ben sori taki a sani disi tru, fu di na a lasti neti fu en libi na grontapu, a ben begi Yehovah, èn na ini a begi dati a sori taki Gado trutru abi „bun-ati”. Luku san Yesus ben begi gi den disipel fu en: „Den de na grontapu ete èn mi o kon na yu. Santa Tata, kibri den fu yu eigi nen ede” (Yoh. 17:11, 14). Iya, Yehovah ben luku den bakaman fu Yesus èn a ben kibri den.

Wan fasi fa Gado e kibri wi gi den triki fu Satan na ini a ten disi, na taki a e gi wi yeye nyanyan na a reti ten. A e du dati nanga yepi fu „a getrow èn koni srafu” (Mat. 24:45). A de prenspari taki wi e teki a nyanyan disi di e gi wi krakti, bika na so wi o ’abi ala den sani di Gado gi wi fu feti’. Luku fu eksempre ’a bigi skelt, noso a bribi’ di e meki taki wi ’man kiri a faya fu ala den peiri di na ogriwan e sutu kon na wi tapu’ (Ef. 6:11, 16). A bribi di wi e sori, e yepi wi fu kan abi wan bun matifasi nanga Yehovah. Boiti dati, te wi e sori a bribi disi, dan dati na wan buweisi taki a Papa fu wi abi a makti fu kibri wi.

Wi kan leri moro fu a bun-ati fu wi hemel Papa te wi e luku fa en Manpikin ben tyari ensrefi di a ben de na grontapu. Luku san skrifi na Markus 10:13-16. Na ini den tekst dati, Yesus e taigi den disipel fu en: „Meki den pikin-nengre kon na mi.” Di den pikin-nengre kon tanapu na Yesus lontu, dan a brasa den hori èn a blesi den. A ben musu de so taki den pikin ben breiti srefisrefi! Èn fu di Yesus ben taki „a sma di si mi, si a Tata tu”, meki wi sabi taki a tru Gado wani taki wi kon na en.—Yoh. 14:9.

Yehovah Gado na a Sma di abi lobi pasa marki. Nowan sma man sorgu so bun gi wi leki en, èn nowan sma man kibri wi so bun leki en. Boiti dati, a wani taki wi kon krosibei na en (Yak. 4:8). Sobun, a de krin taki Yehovah na trutru a moro bun Papa di de!

Wi e kisi furu wini!

Wi e kisi furu wini te wi e poti wi frutrow tapu Yehovah, wi lobi hemel Papa (Odo 3:5, 6). Yesus ben kisi furu wini fu di a ben e frutrow dorodoro tapu en Papa. A ben taigi den disipel fu en: „Mi no de mi wawan, ma a Tata di seni mi kon de nanga mi” (Yoh. 8:16). Ala ten Yesus ben abi a frutrow taki Yehovah ben e horibaka gi en. Fu eksempre, di Yesus teki dopu, dan en Papa gi en deki-ati na wan lobi-ati fasi, fu di a ben taki: „Disi na mi Manpikin, a lobiwan di mi feni bun” (Mat. 3:15-17). Èn syatu bifo Yesus dede, dan a bari nanga wan tranga sten, taki: „Mi Tata, mi e poti mi yeye na ini yu anu” (Luk. 23:46). Iya, Yesus ben frutrow tapu en Papa trutru.

Wi kan du dati tu. Te Yehovah de nanga wi, dan wi no abi fu frede noti (Ps. 118:6). Atsuko, di wi ben taki fu en na a bigin, ben gwenti fu frutrow tapu ensrefi te problema ben miti en. Ma a studeri sani di ben abi fu du nanga Yesus en libi èn nanga a diniwroko fu en, èn a poti prakseri spesrutu na a krosibei matifasi di Yesus abi nanga en hemel Papa. San ben de a bakapisi? Atsuko e taki: „Mi kon sabi san a wani taki fu abi wan Papa èn fu frutrow na en tapu.” A e taki moro fara: „Mi e firi korostu trutru èn mi de koloku. Iya, wi no abi nowan enkri reide fu broko wi ede nanga sani.”

Sortu tra wini wi e kisi te wi e si Yehovah leki wi Papa? Nofo tron, pikin nengre lobi den papa nanga mama èn den wani plisi den. Fu di a Manpikin fu Gado lobi en Papa, meki ’ala ten a ben e du san ben e plisi en Papa’ (Yoh. 8:29). Na so a de tu taki a lobi di wi abi gi wi hemel Papa kan meki wi handri na wan koni fasi, èn a kan meki wi ’prèise en na fesi ala sma’.—Mat. 11:25; Yoh. 5:19.

 A Papa fu wi ’e grabu wi reti-anu hori’

Wi hemel Papa gi wi wan „yepiman” tu, namku en santa yeye. Yesus ben taki dati a „o leri [wi] a heri waarheid” (Yoh. 14:15-17; 16:12, 13). A santa yeye fu Gado o yepi wi fu kon leri sabi wi Papa heri bun. A santa yeye kan yepi wi fu „broko sani puru di tanapu steifi”, èn dati na fowtu denki noso kruktu denki. Na so a sa „basi ibri prakseri fu meki a gi yesi na Krestes” (2 Kor. 10:4, 5). Sobun, meki wi begi Yehovah fu gi wi en „yepiman”, èn meki wi abi a frutrow taki „a Tata di de na hemel sa gi santa yeye na den sma di e aksi en” (Luk. 11:13). A bun tu fu begi taki a santa yeye yepi wi fu kon moro krosibei na Yehovah.

Wan yongu pikin di e hori en papa anu aladi a e waka nanga en, no e frede noti. Te yu e si Yehovah leki yu Papa, dan yu kan abi a frutrow na ini den wortu disi di e gi deki-ati: „Mi, Yehovah, na yu Gado di e grabu yu reti-anu hori. Mi na a sma di e taigi yu: ’No frede. Misrefi o yepi yu’” (Yes. 41:13). Yu kan abi a moi grani fu „waka” nanga Gado fu têgo (Mik. 6:8). Tan du a wani fu en, dan yu sa ondrofeni lobi nanga prisiri fu di yu e si Yehovah leki yu Papa. Boiti dati, yu sa abi wan korostu firi.

[Futuwortu]