Tan du san Gado feni bun awinsi yu libi e kenki

A DE SO taki yu libi kon kenki? A muilek gi yu fu fiti yusrefi na den kenki dati? A sani disi miti furu fu wi, noso a o miti wi ete. Te wi e luku na eksempre fu sma fu owruten, dan wi o kon sabi sortu fasi wi musu abi fu man pasa den situwâsi dati.

Fu eksempre, luku a tori fu David èn den someni sani di ben kenki na ini en libi. Di Samuel salfu David fu tron kownu, dan David ben de wan yongu boi nomo di ben e luku skapu. Di a ben yongu ete, a ben de klariklari fu feti nanga a langa bigi-skin Filisteaman, Goliat (1 Sam. 17:26-32, 42). A yonkuman David kisi a kari fu go libi na ini a kownu-oso fu Kownu Saul, èn a tron edeman fu a legre. Noiti David ben denki taki en libi ben o kenki so. Èn a no ben sabi tu san ben o miti en bakaten.

Sani no ben e go bun srefisrefi na mindri David nanga Saul (1 Sam. 18:8, 9; 19:9, 10). Fu no lasi en libi, David ben musu libi leki wan loweman furu yari langa. Srefi di David ben e tiri leki kownu fu Israel, a libi fu en kenki srefisrefi. Dati pasa spesrutu baka di a du hurudu, èn di a kiri wan sma fu di a ben wani kibri a sondu dati. Leki bakapisi fu en eigi sondu, David kisi bigi problema na ini na osofamiri fu en. Fu eksempre, Absalom, a manpikin fu David, opo ensrefi teige a tiri fu en papa (2 Sam. 12:10-12; 15:1-14). Ma baka di David sori berow fu den sondu fu en, dan Yehovah gi en pardon, èn A ben feni David bun baka.

A situwâsi fu yu kan kenki tu. A libi fu wi kan kenki te wi kon siki, te na ekonomia fu a kondre no e drai bun, èn te wi abi problema na ini wi osofamiri. Srefi son sani di wi e du, kan meki taki a libi fu wi e kenki. Sortu fasi wi musu abi fu man kakafutu gi den sortu tesi disi?

Wi musu abi sakafasi

Wan sma di abi sakafasi, de klariklari fu fiti ensrefi na iniwan situwâsi. Te wi abi trutru sakafasi, dan dati e yepi wi fu abi wan yoisti denki fu wisrefi èn fu tra sma. Te wi e lespeki trawan fu di den abi bun fasi èn fu di den abi bun bakapisi, dan wi o abi moro warderi gi den sma dati èn gi den sani di den e du. Na so a de tu taki te wi abi sakafasi, dan dati kan yepi wi fu frustan fu san ede wan sani pasa nanga wi, èn fa wi kan handri na a yoisti fasi.

Yonatan, a manpikin fu Saul, na wan bun eksempre gi wi. Sani ben pasa di kenki a libi fu en, èn a no ben man du noti fu  meki sani waka tra fasi. Di Samuel taigi Saul taki Yehovah ben o puru en leki kownu, dan Samuel no taki dati Yonatan ben o tron kownu na ini a presi fu en papa (1 Sam. 15:28; 16:1, 12, 13). Gado no teki Yonatan fu tron kownu, ma A teki David. Te yu luku en bun, dan a trangayesi di Saul trangayesi Gado, tyari takru bakapisi kon gi Yonatan. Aladi Yonatan no ben abi noti fu du nanga den sani di en papa ben du, toku a no ben o tron kownu na ini a presi fu en papa (1 Sam. 20:30, 31). Fa Yonatan handri na ini a situwâsi disi? A ben e hori David na ati fu di a no ben kisi a grani dati? A ben e dyarusu tapu David? Nôno. Yonatan ben owru moro David èn a ben abi moro ondrofeni leki David, ma toku Yonatan tan horibaka gi en (1 Sam. 23:16-18). Fu di a ben abi sakafasi, meki a ben frustan taki Gado ben teki David leki kownu. Èn a ’no ben e denki moro fu ensrefi leki san ben de fanowdu’ (Rom. 12:3). Yonatan ben frustan san Yehovah ben e fruwakti fu en, èn a ben de klariklari fu fiti ensrefi na a nyun situwâsi.

A no de fu taki, dati te furu kenki e kon na ini wan sma en libi, dan son leisi dati e tyari wan tu problema kon. Luku na eksempre fu Yonatan. Na wan spesrutu pisi ten, a ondrofeni wan tu sani nanga tu man di a ben sabi heri bun. Wan fu den ben de en mati David, di Yehovah ben o poti leki kownu. A trawan ben de en papa Saul, di Yehovah no ben feni bun moro, ma di ben e tiri ete leki kownu. Aladi Yonatan ben e pruberi fu handri na wan fasi di Yehovah feni bun, toku a ben musu fu de so taki a situwâsi disi ben e gi Yonatan furu broko-ede. Te kenki e kon na ini wi libi, dan dati kan gi wi broko-ede. Ma efu wi e pruberi fu si sani soleki fa Yehovah e si sani, dan dati o yepi wi fu tan dini en aladi wi e pruberi fu handri na a yoisti fasi na ini a situwâsi dati.

A de prenspari fu no denki tumusi furu fu wisrefi

Wan sma di no e denki tumusi furu fu ensrefi, sabi san a man du èn san a no man du. Dati meki awansi wan sma abi sakafasi, toku dati no wani taki ete dati a e hori na prakseri taki a abi swakifasi.

David no ben e denki tumusi furu fu ensrefi. Aladi Yehovah ben salfu en fu tron kownu, toku a ben teki furu yari fosi David ben kan tiri leki kownu. Bijbel no e sori taki Yehovah ben fruklari gi David fu san ede a ben musu wakti so langa. Ma aladi a situwâsi disi ben de wan tesi gi David, toku a no ben e broko en ede tumusi nanga a tori. A ben sabi san a ben man du, èn san a no ben man du. Èn aladi Yehovah ben e gi pasi taki a sani disi miti David, toku David ben e frustan taki Yehovah ben sabi san A ben e du. Sobun, di David kisi na okasi fu kiri Saul, dan a no du dati, aladi dati ben kan kibri en eigi libi. Èn a tapu en mati Abisai tu fu du dati.—1 Sam. 26:6-9.

Son leisi, a kan de so taki wan situwâsi e opo kon na ini a gemeente fu wi, èn wi no e frustan a situwâsi dati. Noso kande wi feni taki wan problema no lusu na a yoisti fasi. Wi sa hori na prakseri taki Yesus na a Edeman fu a gemeente èn taki na en e tiri a gemeente nanga yepi fu  den owruman di e teki fesi? Wi sabi taki efu wi wani taki Yehovah tan feni wi bun, dan wi musu wakti en fu tiri wi nanga yepi fu Yesus Krestes. Sobun, wi sa sori taki wi no e denki tumusi furu fu wisrefi? Wi sa tan wakti awinsi a no makriki fu du dati?—Odo 11:2.

Wi musu abi safri-ati fu man abi wan bun denki fu sani

Wan sma di abi safri-ati, man hori ensrefi fu no atibron te a e kisi tesi. Te wi abi a fasi disi, dan dati e yepi wi fu no atibron esi, fu no hori sma na ati, èn fu no pai ogri nanga ogri. Safri-ati na wan fasi di muilek fu kweki. A moi fu sabi taki na ini wan Bijbeltekst, den „safri-ati sma fu grontapu” e kisi a deki-ati fu „suku safri-ati” (Sef. 2:3). Wan sma di abi safri-ati, abi sakafasi èn a no e denki tumusi furu fu ensrefi. Ma so wan sma abi tra fasi tu, soleki bun-ati nanga switifasi. Wan safri-ati sma kan kon abi wan moro bun matifasi nanga Gado fu di a de klariklari fu teki leri nanga rai.

Te wi abi safri-ati, dan fa dati kan yepi wi te a libi fu wi e kenki? Kande yu si taki furu sma no e denki bun fu den kenki di e kon na ini den libi. Ma te yu e luku en bun, dan den kenki disi kan gi wi na okasi fu kisi moro leri fu Yehovah. A libi fu Moses e sori dati.

Di Moses ben abi 40 yari, a ben abi tumusi moi fasi kaba. Moses ben sori taki a ben e broko en ede nanga a pipel fu Gado, èn a no ben e suku wini gi ensrefi nomo (Hebrewsma 11:24-26). Ma fosi Yehovah gi en a frantwortu fu tyari den Israelsma komoto na ini Egepte, dan Moses en libi kenki na wan fasi di meki taki a kisi moro safri-ati. Moses ben musu lowe komoto na ini Egepte èn a ben musu go libi 40 yari langa na ini a kondre Midian. Drape a ben e wroko leki skapuman, èn a no ben abi a hei posisi di a ben abi na ini Egepte. San ben de a bakapisi? A kenki disi meki taki Moses kon tron wan moro bun sma (Num. 12:3). A leri fu poti a wani fu Yehovah na a fosi presi na ini en libi.

Fu man si o furu safri-ati Moses ben abi, dan meki wi luku san pasa di Yehovah taki dati A no ben wani den Israelsma moro leki a pipel fu en, fu di den ben e trangayesi en. Yehovah ben wani taki den bakapikin fu Moses ben musu tron wan makti pipel (Num. 14:11-20). Moses taki gi den Israelsma. Den sani di a taki e sori taki a no ben e suku en eigi bun, ma taki a ben e broko en ede nanga a nen fu Gado èn nanga a tanbun fu a pipel fu en. Fu man tyari a frantwortu leki fesiman nanga mindriman fu a pipel, dan Moses ben musu de wan sma di ben abi safri-ati. Bijbel e sori taki aladi Miriam nanga Aron ben e krutukrutu teige Moses, toku a ben de „a moro safri-ati sma na heri grontapu” (Num. 12:1-3, 9-15). Soleki fa a sori, dan Moses ben frudrage a krutukrutu fu den nanga pasensi. Fa sani ben o waka efu Moses no ben abi safri-ati?

Na wan tra okasi, a yeye fu Yehovah kon tapu wan tu man, èn a sani  disi meki taki den bigin taki profeititori. Yosua, a dinari fu Moses, ben feni taki den Israelsma disi no ben abi a reti fu handri leki profeiti. Ma Moses, di ben abi safri-ati, ben e si sani soleki fa Yehovah e si sani, èn a no ben frede taki a ben o lasi a frantwortu fu en (Num. 11:26-29). Efu Moses no ben abi safri-ati, dan yu denki taki a ben o fiti ensrefi na a nyun seti disi fu Yehovah?

Fu di Moses ben abi safri-ati, meki a ben man tyari a frantwortu di Gado ben gi en, na wan bun fasi. Yehovah ben taigi en fu go na tapu Horeb-bergi, èn fu tanapu na fesi a pipel. Gado ben taki nanga Moses nanga yepi fu wan engel, èn a ben poti en leki mindriman fu a frubontu. Fu di Moses ben abi safri-ati, meki a teki a bigi frantwortu disi na en tapu, èn toku a sorgu taki Gado tan feni en bun.

Fa a de nanga wi? Efu wi wani tron moro bun sma, dan a de tumusi prenspari taki wi abi safri-ati. Ala sma di kisi grani nanga frantwortu na mindri a pipel fu Gado, musu abi safri-ati. A fasi disi e yepi wi fu no abi bigifasi te kenki e kon na ini wi libi. Safri-ati e yepi wi tu fu handri na wan yoisti fasi na ini den sortu situwâsi dati. A fasi fa wi e handri de prenspari. Wi sa fiti wisrefi na a nyun situwâsi fu wi? Wi sa si en leki wan okasi di kan yepi wi fu tron moro bun sma? Kande dati sa de wan moi okasi fu kweki safri-ati!

Wi libi o kenki doronomo. Son leisi a muilek fu frustan fu san ede son sani e pasa. Wi eigi swakifasi nanga den broko-ede fu wi kan meki en muilek gi wi fu si sani soleki fa Yehovah e si sani. Ma te wi abi sakafasi nanga safri-ati, dan dati sa yepi wi fu fiti wisrefi na den kenki di e kon na ini wi libi. Boiti dati, wi o tan handri na wan fasi di Gado feni bun.

[Prenspari pisi na tapu bladzijde 4]

Te wi abi trutru sakafasi, dan dati e yepi wi fu abi wan yoisti denki fu wisrefi

[Prenspari pisi na tapu bladzijde 5]

Efu wi wani tron moro bun sma, dan a de tumusi prenspari taki wi abi safri-ati

[Prenki na tapu bladzijde 5]

Moses en libi kenki na wan fasi di meki taki a kisi moro safri-ati