Den tesi di wi kisi meki taki wi kisi moro frutrow na ini Yehovah

Soleki fa Ada Dello Stritto fruteri

Didyonsro mi kaba skrifi a deitekst abra na ini a pikin buku fu mi. Mi abi 36 yari, ma a teki mi tu yuru langa fu skrifi den wortu dati. Fu san ede a teki so langa? Mi mama sa fruteri fu san ede.—Joel

MI NANGA mi masra dopu leki Yehovah Kotoigi na ini 1968. Baka di mi kisi tu gosontu pikin di nen David nanga Marc, dan a di fu dri pikin fu wi gebore. En nen na Joel. A gebore na ini 1973, na ini wan ati-oso ini a foto Binche na ini Belgia, di de sowan 60 kilometer komoto fu Brussel. Ma a ben gebore tumusi fruku. Joel ben wegi 1.7 kilo nomo. Di mi komoto na ati-oso, dan Joel ben musu tan drape teleki a ben kon moro steifi.

Wan tu wiki baka dati, a situwâsi fu a boi fu wi ben de a srefi ete, sobun mi nanga mi masra Luigi tyari en go na wan pikin-nengre datra. Baka di a datra ondrosuku Joel, a taki: „Mi no sabi fa mi musu taigi unu disi, ma a gersi leki Joel abi ala den problema di den brada fu en no abi.” Nowan fu wi ben sabi san fu taki. Na a momenti dati, mi kon frustan taki a pikin boi fu wi ben siki seryusu. Baka dati a datra taigi mi masra: „A beibi fu yu abi wan siki di nen trisomy 21”, èn sma sabi a siki dati tu leki a syndroom van Down. *

Wi ben sari srefisrefi di a datra taigi wi taki a pikin fu wi abi a siki disi. Dati meki wi bosroiti fu go na wan tra datra. A datra disi ondrosuku Joel pikinmoro wán yuru, sondro fu taki wan sani. Gi mi nanga Luigi, a ben gersi wan heri dei. Te fu kaba, a datra opo en ede luku wi èn a taki: „A pikin fu unu o abi a yepi fu unu tranga fanowdu.” Ne a taki na wan switi fasi: „Ma Joel o de koloku, fu di en papa nanga mama lobi en!” A sani dati naki mi ati so te, taki mi hori Joel na wan lobi-ati fasi na ini mi anu, èn wi tyari en go na oso. Na a ten dati a ben abi aiti wiki.

Den Kresten konmakandra nanga a diniwroko e gi wi deki-ati

Di datra ondrosuku Joel moro fara, dan wi kon sabi tu  taki a ben abi seryusu problema na en ati èn taki den bonyo fu en ben swaki srefisrefi. Na ati fu Joel ben bigi tumusi èn a ben e kwinsi den fokofoko fu en. A sani disi ben e meki taki a ben kan kon siki makriki. Di Joel ben abi fo mun, dan fosi yu denki, a kon siki na en fokofoko. A ben musu go didon baka na ati-oso, èn datra ben poti en aparti fu den tra siki pikin. A ben muilek srefisrefi gi wi fu si fa Joel ben e feti fu tan na libi. Wi ben e winsi taki wi ben kan hori en na ini wi anu fu sori en taki wi lobi en. Ma tin wiki langa wi no ben mag fasi en srefisrefi, èn a sani dati ben e meki wi firi sari trutru. A wan-enkri sani di mi nanga Luigi ben man du, na fu tanapu luku en, aladi wi ben e brasa makandra hori, èn ben e begi nanga makandra.

Na ini den muilek ten dati, wi tan go na den konmakandra, makandra nanga David nanga Marc, di ben abi 6 yari nanga 3 yari na a ten dati. Te wi ben de na a Kownukondre zaal, dan a ben gersi leki Yehovah ben brasa wi hori fu trowstu wi. Na ini den yuru di wi ben de na den konmakandra, wi Kresten brada nanga sisa ben de na wi lontu, èn wi ben e firi taki wi ben man poti wi hebi tapu Yehovah. Dati ben e yepi wi fu kon abi wan korostu firi (Ps. 55:22). Srefi den ati-oso zuster di ben e sorgu gi Joel ben taki dati den ben kan si taki den Kresten konmakandra ben de wan yepi gi wi.

Na a ten dati, mi begi Yehovah tu fu gi mi a krakti fu go du a preikiwroko. Na presi fu sidon krei na oso, mi ben wani fruteri trawan fu na overtoigi di mi abi na ini a pramisi di Gado gi libisma taki den o libi na ini wan grontapu pe siki no de. Mi ben wani fruteri den tu fu san ede na overtoigi dati ben e gi mi krakti. Ibri leisi te mi ben du a preikiwroko, mi ben e firi taki Yehovah ben piki den begi fu mi.

„Disi na wan wondru!”

Di wi ben mag tyari Joel go na oso te fu kaba, dan wi ben breiti srefisrefi! Ma a dei baka dati, wi ben e firi sari baka. Heri esi a situwâsi fu Joel ben e kon moro ogri, èn wi ben musu lon tyari en go na ati-oso. Baka di datra ondrosuku en, dan den taigi wi: „Joel abi siksi mun nomo fu libi.” Tu mun baka dati, di Joel ben abi sowan aiti mun, a ben gersi leki a datra ben abi leti, fu di Joel ben e kon siki moro nanga moro. Wan datra sidon nanga wi èn a taigi wi: „A e hati mi fu taigi unu disi, ma wi no man du noti moro gi en.” Ne a taki moro fara: „Now, na Yehovah wawan kan yepi en.”

Mi go baka na ini na ati-oso kamra fu Joel. Aladi mi ben e firi brokosaka èn aladi mi ben weri srefisrefi, toku mi ben de nomonomo fu tan nanga Joel. Ibri leisi, wan tra Kresten sisa ben e tan na ati-oso makandra nanga mi, fu di Luigi ben musu sorgu gi den tu tra boi fu wi. Wan wiki pasa. Ne wantronso, na ati fu Joel bigin du muilek. Den ati-oso zuster lon kon na ini a kamra, ma den no ben man du noti fu yepi en. Baka wan tu miniti, wan fu den taki nanga wan safu sten: „A kaba . . . ” Fu di mi ben weri srefisrefi, meki mi bigin krei, èn mi komoto na ini a kamra. Mi pruberi fu begi Yehovah, ma mi no ben man feni wortu fu sori en fa mi ben e sari. Sowan 15 miniti baka dati, wan zuster bari gi mi: „Joel kisi ensrefi baka!” A hori mi na mi anu èn a taki: „Kon, yu kan go luku en now.” Di mi go baka na Joel, dan mi si taki en ati ben e naki baka! Heri esi, moro nanga moro sma kon yere a nyunsu disi. Den zuster nanga datra kon luku en èn furu fu den ben taki: „Disi na wan wondru!”

 Wan moi sani pasa di Joel ben abi fo yari

Na ini den fosi yari fu Joel en libi, datra ben gwenti taigi wi: „Un musu sori furu lobi gi Joel.” Fu di Yehovah ben sori lobi gi mi nanga Luigi baka di Joel gebore, meki wi ben wani gi a boi fu wi a srefi lobi disi. Wi ben abi furu okasi fu du dati, fu di Joel abi a yepi fu wi fanowdu na ini ala sani.

Na ini den fosi seibi yari fu Joel en libi, den srefi sani ben pasa nanga en ibri yari baka. Na ini a pisi ten fu oktober nanga maart, a kisi a wán siki baka a trawan. Na so wi ben musu tyari en go na ati-oso ibri tron baka. Na a srefi ten, mi ben musu du ala san mi man fu sorgu gi wi boi David nanga Marc. Den fu den sei, ben e du furu muiti tu fu man yepi Joel fu go na fesi, èn a fruwondru wi fu si fa sani waka. Fu eksempre, difrenti datra ben taigi wi taki Joel noiti no ben o man waka. Ma wan dei di Joel ben abi fo yari, dan Marc taigi en: „Kon Joel, sori mama taki yu kan du en!” Mi ben breiti srefisrefi di mi si fa Joel bigin waka! Wi alamala ben breiti, èn wi begi makandra leki osofamiri fu taigi Yehovah tangi komoto fu wi ati. Na tra okasi te wi ben e si taki Joel ben e go na fesi pikinso nanga wan spesrutu sani, dan wi ben e prèise en na wan switi fasi.

A leri fu Gado di Joel kisi yonguyongu kaba, tyari bun bakapisi kon

Wi ben e tyari Joel go na den konmakandra na ini a Kownukondre zaal, so furu leki wi man. Wi ben e poti en na ini wan spesrutu beibi wagi di ben tapu nanga plastiek, fu kibri en gi bakteria di ben kan meki a kon siki. Iya, aladi a ben e sidon na ini a wagi dati di ben tapu nanga plastiek, toku a ben breiti fu de makandra nanga den brada nanga sisa na ini a gemeente.

Den Kresten brada nanga sisa fu wi gi wi furu deki-ati, den ben e sori furu lobi gi wi, èn den ben e du ala san den ben man fu yepi wi. Wan brada ben gwenti fu memre wi na den wortu di skrifi na Yesaya 59:1: „Na anu fu Yehovah no kon syatu, so taki a no man frulusu sma. En yesi no kon dofu, so taki a no man yere.” Den moi wortu dati yepi wi fu frutrow tapu Yehovah.

Di Joel gro kon bigi, dan wi du ala san wi man fu meki na anbegi fu Yehovah tron wan prenspari sani na ini en libi. Wi ben e teki ibri okasi fu taki nanga Joel fu Yehovah, èn wi ben e du dati na so wan fasi taki a kan kon lobi en hemel Tata. Wi begi Yehovah fu blesi a muiti di wi ben e du, so taki a leri di wi ben e gi en fu Gado ben o abi bun bakapisi.

Di Joel ben de wan yongu tini, dan wi ben breiti fu si taki a lobi fu fruteri sma den tru tori fu Bijbel. Di a ben abi 14 yari, dan a du wan bigi oparâsi. Na a ten di a ben e kon betre baka, dan a aksi mi wan sani di meki mi firi koloku trutru. A ben aksi mi: „Mama, mi kan gi a datra a Libi foe têgo-buku?” Wan tu yari baka dati, Joel ben musu du oparâsi baka. Wi ben sabi taki kande a no ben o meki en. Bifo a du na oparâsi, a gi den datra fu en wan brifi di wi ben sreka makandra nanga en. Na ini a brifi a skrifi taki a no o teki brudu. A datra di ben o du na oparâsi aksi en: „Yu agri nanga san skrifi na ini a brifi?” Nanga wan krakti sten Joel taki: „Iya  datra.” Wi breiti so te, taki wi boi sori taki a ben e frutrow tapu en Mekiman, èn taki a ben abi a fasti bosroiti fu plisi En. Den sma di ben e wroko na ati-oso ben de wan trutru yepi gi wi, èn wi ben de nanga tangi gi a yepi dati.

Joel go na fesi na ini a tru anbegi

Di Joel ben abi 17 yari, a gi ensrefi abra na Gado èn a teki dopu. A dei dati ben de wan dei di wi noiti no sa frigiti. Wi ati breiti srefisrefi fu si fa a ben go na fesi na ini na anbegi. Sensi a ten dati, a tan lobi Yehovah èn a tan fayafaya na ini a tru anbegi. Fu taki en leti, Joel lobi fu taigi ala sma di a e miti a sani disi: „A tru anbegi na mi libi!”

Di Joel ben abi sowan 20 yari, dan a leri leisi èn skrifi. A no ben makriki srefisrefi. Ma a ben breiti nanga ibri pikinpikin wortu di a ben man skrifi. Sensi a ten dati, a bigin leisi a deitekst ibri dei na ini a pikin buku Ondrosuku den buku fu Bijbel ala dei. Baka dati, a e meki ala en muiti fu skrifi den Bijbeltekst na ini wan fu den pikin buku fu en, èn now a abi furu fu den pikin buku dati di moi fu si srefisrefi!

Tapu konmakandra dei, Joel e sorgu taki wi go fruku na a Kownukondre zaal fu di a wani de drape biten fu gi ala den sma di e kon na ini a zaal wan switikon. Na den konmakandra, a lobi fu gi piki èn fu hori demonstrâsi. A e yepi tu nanga den mikrofon, èn nanga tra sani. Ibri wiki, efu a e firi bun, a e go makandra nanga wi na ini a preikiwroko. Na ini 2007, den brada meki bekènti taki Joel tron dinari ini a diniwroko. Wi krei fu di wi ben breiti srefisrefi. Dati ben de wan tumusi moi blesi fu Yehovah!

Wi ondrofeni taki na anu fu Yehovah no syatu

Na ini 1999, wan tra tesi miti wi. Wan sma di ben e rèi leki wan lawman, naki na wagi fu wi, èn Luigi kisi hebi mankeri. Datra ben musu koti a wan sei futu fu en puru, èn a ben musu du wan tu bigi oparâsi na en bakabonyo. Fu di wi ben e frutrow tapu Yehovah, meki agen wi ondrofeni taki a e gi den futuboi fu en a krakti di den abi fanowdu (Fil. 4:13). Aladi Luigi no man waka so bun moro, toku wi e pruberi fu abi wan yoisti denki fu sani. Fu di a no man du grontapu wroko moro, a abi moro ten now fu de nanga Joel. Disi gi mi na okasi fu du moro na ini a diniwroko. Luigi abi moro ten now fu yepi tranga a bribi fu wi osofamiri èn a di fu den sma na ini a gemeente, pe a e dini leki fesiman fu den owruman.

Fu di a situwâsi fu wi e difrenti fu a di fu tra sma, meki wi man du furu sani makandra leki famiri. Baka wan pisi ten wi leri fu fiti wisrefi na a situwâsi fu wi èn fu teki sani soleki fa den de. A de wan sari sani taki di den boi fu wi, David nanga Marc kon bigi èn den froisi gowe fu oso, den tapu fu dini Yehovah. Wi howpu taki den sa drai kon baka na Yehovah.—Luk. 15:17-24.

Na ini den yari di pasa, wi ondrofeni fa Yehovah yepi wi èn wi leri fu frutrow tapu en na ini ala sani di e miti wi. Wi lobi den wortu so te di skrifi na Yesaya 41:13: „Bika mi, Yehovah, na yu Gado di e grabu yu reti-anu hori. Mi na a sma di e taigi yu: ’No frede. Misrefi o yepi yu.’” A e gi wi deki-ati trutru fu sabi taki Yehovah e grabu wi anu hori. Iya, wi kan taki trutru dati fu di wi horidoro di tesi miti wi, meki a bribi di wi abi na ini wi hemel Tata Yehovah, kon moro tranga.

[Futuwortu]

[Prenki na tapu bladzijde 16, 17]

Joel nanga en mama, Ada

[Prenki na tapu bladzijde 18]

Ada, Joel, nanga Luigi

[Prenki na tapu bladzijde 19]

Joel lobi fu gi den brada nanga sisa wan switikon na a Kownukondre zaal