Yehovah e gebroiki en santa yeye fu du san a abi na prakseri

„Den wortu di e komoto na mi mofo . . . musu fu abi bun bakapisi.”—YES. 55:11.

1. Fruteri san na a difrenti na mindri den tu man na ini a paragraaf.

KON meki wi taki dati tu man e sreka sani fu go na wan presi nanga oto. Wan fu den sabi krin sortu pasi a o rèi fu doro drape. A trawan sabi krin pe a wani go, ma a sabi furu tra pasi tu di o man tyari en go drape. A de srekasreka fu teki wan tra pasi te dati de fanowdu. Te yu luku en bun, dan wi e si wan difrenti na mindri den tu man disi. Wan fu den man abi na prakseri fu du wan sani, ma a abi wán spesrutu fasi nomo fu doro a marki dati, èn a seti sani finifini tu. A trawan abi na prakseri tu fu du wan sani, ma a abi difrenti fasi fu doro a marki dati.

2, 3. (a) San Yehovah abi na prakseri fu du, èn san a du di Adam nanga Eva sondu? (b) Fu san ede wi musu tan na ai fu si fa a wani fu Yehovah e kon tru?

² Yehovah no abi wan-enkri fasi nomo fu meki a wani fu en kon tru, ma safrisafri a e du san de fanowdu fu meki a wani dati kon tru (Ef. 3:11). A sani di Yehovah wani du, na fu kenki a grontapu disi kon tron wan paradijs pe libisma di no abi sondu kan libi na ini vrede, èn pe den kan de koloku. Na dati a ben abi na prakseri gi libisma nanga grontapu sensi a bigin (Gen. 1:28). Di Adam nanga Eva sondu, dan Yehovah no libi a sani so, ma a seti sani fu sorgu taki a wani fu en kan kon tru. (Leisi Genesis 3:15.) Yehovah  bosroiti taki na agersi uma fu en ben o kisi wan „pikin”, di te fu kaba ben o pori Satan, a moro bigi gensman, èn di ben o tyari wan kaba kon na ala takru bakapisi fu a sani di Satan du.—Hebr. 2:14; 1 Yoh. 3:8.

³ Nowan sma na hemel noso na grontapu kan tapu Gado fu du san a abi na prakseri (Yes. 46:9-11). Fu san ede wi kan taki dati? Fu di Yehovah e gebroiki en santa yeye. A tumusi bigi krakti disi e gi wi a dyaranti taki a sani di Gado wani du, „musu fu abi bun bakapisi” (Yes. 55:10, 11). Wi musu de na ai fu si fa Gado e meki a wani fu en kon tru, èn wi musu handri tu na wan fasi di e kruderi nanga a wani dati. A libi fu wi de na ini a tori. Boiti dati, a e tranga a bribi fu wi fu si fa Yehovah e gebroiki a santa yeye fu en. Sobun, meki wi luku fa Yehovah gebroiki a santa yeye fu en fu du san a abi na prakseri. Wi sa luku fa a du dati na ini owruten, fa a du dati na ini a ten disi, èn fa a o du dati na ini a ten di e kon.

Fa Yehovah gebroiki a santa yeye na ini owruten?

4. Fa Yehovah tyari kon na krin safrisafri san a abi na prakseri fu du?

⁴ Na ini Bijbel ten, Yehovah ben tyari kon na krin safrisafri san a abi na prakseri fu du. Na a bigin, sma no ben sabi suma ben de a pramisi Pikin, fu di dati ben de „wan santa kibritori” (1 Kor. 2:7). Ma sowan 2000 yari baka dati, dan fosi Yehovah taki baka fu a pikin dati. (Leisi Genesis 12:7; 22:15-18.) Yehovah ben pramisi Abraham wan sani di ben o abi wan moro bigi kontru. Den wortu „doro joe siri [noso, na yu bakapikin o meki taki, NWT]”, ben sori krin taki a Pikin ben o de wan libisma, namku wan bakapikin fu Abraham. Wi kan de seiker taki Satan ben e angri fu kon sabi suma ben o de a pikin disi. A no de fu taki dati a Feanti disi ben de nomonomo fu pori a famirilin fu Abraham so taki a wani fu Gado no ben kan kon tru. Ma dati no ben o man pasa, fu di a yeye fu Gado di sma no man si ben e tapu pasi gi Satan. Na sortu fasi a yeye ben e du dati?

5, 6. Fa Yehovah gebroiki en yeye fu kibri den afo fu a pramisi Pikin?

⁵ Yehovah gebroiki en yeye fu kibri den afo fu a pramisi Pikin. Yehovah ben taigi Abram (Abraham): „Na mi e kibri yu” (Gen. 15:1). A no fu soso Yehovah ben taki a sani dati. Fu eksempre, luku san ben pasa na ini a yari 1919 bifo Krestes. Na a ten dati, Abraham nanga Sara ben go libi wan pisi ten na ini Gerar. Fu di Abimeilek, a kownu fu Gerar, no ben sabi taki Sara ben de a wefi fu Abraham, meki a ben wani teki Sara leki en wefi. A de so taki Satan ben e pruberi fu tapu pasi gi Sara fu kon de nanga bere fu Abraham? Bijbel no e taki dati. Ma san Bijbel e taki, na taki Yehovah kon na ini a tori. Na ini wan dren, a warskow Abimeilek fu no fasi Sara.—Gen. 20:1-18.

⁶ Dati no ben de a wan-enkri leisi di Yehovah kibri Abraham nanga en famiri. Ma a du dati furu leisi (Gen. 12:14-20; 14:13-20; 26:26-29). Dati meki a psalm skrifiman ben kan taki a sani disi fu Abraham nanga den bakapikin fu en: „[Yehovah] no meki nowan libisma du ogri nanga den. Ma fu den ede, meki a piri-ai gi kownu. A ben taki: ’Un no musu fasi den salfuwan fu mi èn un no musu du nowan ogri nanga den profeiti fu mi.’”—Ps. 105:14, 15.

7. Na sortu fasi Yehovah kibri a pipel Israel?

⁷ Nanga yepi fu en yeye, Yehovah kibri a pipel Israel fu owruten, fu pe a pramisi Pikin ben o komoto. Nanga yepi fu en yeye, Yehovah gi Israel en Wet, di ben sorgu taki a tru anbegi no kon pori. A Wet disi sorgu tu taki den Dyu tan anbegi Yehovah na a yoisti fasi, taki den ben tan tyari densrefi na wan fasi di fiti, èn taki den ben e tan hori densrefi krin (Ex. 31:18; 2 Kor. 3:3). Na a ten fu den Krutuman, a yeye fu Yehovah gi son man a krakti fu frulusu den Israelsma fu den feanti fu den  (Krut. 3:9, 10). A ben musu fu de so taki a santa yeye kibri Yerusalem, Betlehem, nanga a tempel, na ini den hondrohondro yari baka dati, te go miti a ten di Yesus, a moro prenspari bakapikin fu Abraham, gebore. Ala den presi dati ben o abi fu du nanga a kontru fu den profeititori di abi fu du nanga Yesus.

8. San e sori taki santa yeye ben e tiri Yesus en libi èn a diniwroko fu en?

⁸ Santa yeye ben e tiri a libi nanga a diniwroko fu Yesus. Santa yeye ben e kibri a muru fu a nyunwenke Maria èn na so a yeye disi du wan sani di noiti no ben pasa ete. A meki taki wan sondu uma kon de nanga bere, èn na uma disi kisi wan Manpikin di no abi sondu èn di no abi fu dede leki bakapisi fu sondu (Luk. 1:26-31, 34, 35). A santa yeye ben kibri a yongu pikin Yesus, so taki sma no ben kan kiri en (Mat. 2:7, 8, 12, 13). Di Yesus ben abi sowan 30 yari, dan Gado salfu en nanga santa yeye. Na so Yehovah salfu en fu tron kownu na tapu a kownusturu fu David, èn A gi en a frantwortu fu preiki a bun nyunsu (Luk. 1:32, 33; 4:16-21). Santa yeye gi Yesus a krakti fu du wondru, fu dresi den sikiwan, fu gi ipi-ipi sma nyanyan èn fu gi dedewan wan opobaka. Den bigi wondru disi ben sori sortu blesi wi o kisi te Yesus o tiri leki kownu.

9, 10. (a) San ben sori taki den fosi disipel fu Yesus ben kisi a santa yeye? (b) Fa a wani fu Yehovah kon tru na ini a fosi yarihondro?

⁹ Sensi a Pinksterfesa fu a yari 33, Yehovah gebroiki en santa yeye fu salfu tra bakapikin fu Abraham. Den wan disi no ben de trutru bakapikin fu Abraham, ma den ben de bakapikin fu en na wan agersi fasi (Rom. 8:15-17; Gal. 3:29). Na a fosi yarihondro, a ben de krin fu si taki den disipel fu Yesus ben kisi a santa yeye. Dati meki den ben man preiki fayafaya èn den ben man du bigi wondru (Tori. 1:8; 2:1-4; 1 Kor. 12:7-11). Nanga yepi fu den presenti dati, santa yeye meki taki a wani fu Yehovah kon tru na wan heri moi fasi. Yehovah no ben wani moro taki sma ben e anbegi en na a srefi fasi fa a ben seti dati hondrohondro yari na fesi, èn a moro prenspari presi fu anbegi ben de na ini Yerusalem. Sensi a ten dati, Yehovah e gebroiki a nyun Kresten gemeente dati fu meki a wani fu en kon tru.

¹⁰ Wan tu fasi fa Yehovah gebroiki a santa yeye fu en na ini Bijbel ten fu du san a abi na prakseri, na fu kibri sma, fu gi sma krakti, èn fu salfu sma. Ma fa a de nanga a ten fu wi? Fa Yehovah e gebroiki en santa yeye now fu meki a wani fu en kon tru? Wi musu kon sabi dati, fu di wi wani wroko makandra nanga a yeye. Fu dati ede, meki wi poti prakseri na fo fasi fa Yehovah e gebroiki en yeye na ini a ten disi.

Fa Yehovah e gebroiki a santa yeye na ini a ten disi?

11. San e sori taki a santa yeye e yepi a pipel fu Gado fu tan krin? Fa yu kan sori taki yu e meki a yeye tiri yu?

¹¹ Na a fosi presi, a santa yeye e yepi a pipel fu Gado fu tan krin. Den wan di e du a wani fu Yehovah, èn di sa kisi blesi te den pramisi fu en kon tru, musu de krin. (Leisi 1 Korentesma 6:9-11.) Bifo son sma ben tron tru Kresten, den ben e du hurudu, den ben du sutadu, èn den ben e libi wan homo-sekslibi. A firi di wan sma abi fu du sondu kan tranga srefisrefi (Yak. 1:14, 15). Ma den sma disi „wasi kon krin”. Disi e sori taki den kenki a libi fu den fu man plisi Gado. San e yepi wan sma di lobi Gado fu kakafutu gi takru lostu? Dati na „a yeye fu Gado”, soleki fa 1 Korentesma 6:11 e taki. Te yu e tan tyari yusrefi na wan fasi di fiti, dan dati e sori taki yu e meki a yeye tiri yu.

12. (a) Fa Yehovah e tiri na organisâsi fu en, soleki fa a fisyun fu Esekièl e sori? (b) Fa yu kan sori taki yu e teki a tiri fu a santa yeye?

¹² Na a di fu tu presi, Yehovah e gebroiki a yeye fu en fu tiri na organisâsi fu en so taki sani e waka soleki fa a wani. A fisyun fu Esekièl e sori taki na ini hemel, den memre fu  na organisâsi fu Yehovah de leki wan wagi di e rèi doronomo fu meki a wani fu Yehovah kon tru. San e meki taki a wagi dati e go pe a musu go? Na a santa yeye e du dati (Esek. 1:20, 21). Meki wi hori na prakseri taki na organisâsi fu Yehovah abi memre na hemel èn na grontapu. Efu a santa yeye e tiri den memre na ini hemel, dan a musu fu de so taki a e tiri den wan na grontapu tu. Te yu e tan gi yesi na den rai di yu e kisi fu den wan na grontapu di e teki fesi na ini Gado en organisâsi, dan yu e sori taki yu e go pe a hemel wagi fu Yehovah e go, èn taki yu e meki a santa yeye tiri yu.—Hebr. 13:17.

13, 14. (a) Suma na „den sma fu a ten disi”, di Yesus ben taki fu den? (b) Gi wan eksempre di e sori taki a santa yeye e sorgu taki den tru tori fu Bijbel e kon na krin. (Luku a faki „Yu e tan meki muiti fu frustan den tru tori fu Bijbel moro bun?”)

¹³ Na a di fu dri presi, a santa yeye e sorgu taki den tru tori fu Bijbel e kon na krin (Odo 4:18). Langa ten kaba, „a getrow èn koni srafu” e gebroiki A Waktitoren leki a moro prenspari publikâsi fu tyari tru tori fu Bijbel kon na krin (Mat. 24:45). Fu eksempre, prakseri a grani di wi abi fu sabi suma na „den sma fu a ten disi”, di kari na ini Mateyus 24:32-34. (Leisi en.) Fu sortu sma Yesus ben e taki? Na artikel „A denoya fu Krestes—San a wani taki gi yu?” ben tyari kon na krin taki Yesus no ben e taki fu ogrisma, ma a ben e taki fu den disipel fu en, di ben o salfu nanga santa yeye syatu baka dati. * Den salfu bakaman fu Yesus na ini a fosi yarihondro èn na ini a ten disi, na den wan di ben o si a marki, èn den ben o frustan tu san a marki dati wani taki, namku taki Yesus „e tanapu leti na mofodoro”.

¹⁴ San dati wani taki gi wi? Aladi wi no man sabi soifri o langa a pisi ten de di abi fu du nanga „den sma fu a ten disi”, toku wi musu hori wan tu sani na prakseri te a abi fu du nanga den wortu dati. Nofo tron den wortu dati abi fu du nanga sma di abi difrenti yari, èn di alamala de na libi na ini wán spesrutu pisi ten. A pisi ten dati no langa tumusi, èn a e kon na wan kaba (Ex. 1:6). We, san Yesus ben wani taki nanga den wortu „den sma fu a ten disi”? Soleki fa a sori, dan Yesus ben wani meki wi kon frustan taki fosi sonwan fu den salfuwan di ben si a bigin fu a marki na ini 1914 ben o dede, dan tra salfuwan di ben o si a bigin fu a bigi banawtu, ben  o de na libi kaba. A pisi ten dati ben abi wan bigin, èn a musu de so taki a sa kon na wan kaba. Fu di difrenti sani di abi fu du nanga a marki kon tru kaba, meki a de krin taki a bigi banawtu de krosibei. Dati meki yu musu tan hori na prakseri na ini sortu ten wi e libi èn yu musu tan na ai. Na so yu e sori taki yu e meki muiti fu frustan den tru tori fu Bijbel moro bun, èn taki yu e meki a santa yeye tiri yu.—Mark. 13:37.

15. San e sori taki na a santa yeye e gi wi a krakti fu preiki a bun nyunsu?

¹⁵ Na a di fu fo presi, a santa yeye e gi wi a krakti fu preiki a bun nyunsu (Tori. 1:8). Sortu tra sani ben kan meki taki a bun nyunsu e preiki na heri grontapu? Denki a tori. Kande fosi yu ben e syensyen, noso yu ben e frede srefisrefi, èn kande yu ben e denki: ’Noiti mi o man preiki oso fu oso!’ Ma now yu e du a wroko dati fayafaya. * Furu Kotoigi fu Yehovah tan preiki a bun nyunsu aladi sma ben e gens den, noso frufolgu den. Soso a yeye fu Gado kan gi wi a krakti fu pasa hebi tesi, èn fu du sani di wi no ben o man du nanga wi eigi krakti (Mika 3:8; Mat. 17:20). Te yu e teki prati fayafaya na a preikiwroko, dan yu e sori taki yu e teki a tiri fu a santa yeye.

Fa Yehovah o gebroiki en santa yeye na ini a ten di e kon?

16. Fu san ede wi kan abi a dyaranti taki Yehovah o kibri en pipel na a ten fu a bigi banawtu?

¹⁶ Na ini a ten di e kon, Yehovah o gebroiki en santa yeye na wan tumusi moi fasi fu meki a wani fu en kon tru. Luku fosi fa a o kibri sma. Soleki fa wi si kaba, dan na ini owruten Yehovah gebroiki en yeye fu kibri difrenti sma, èn fu kibri a pipel Israel. Sobun, wi abi nofo reide fu bribi taki a sa gebroiki a srefi krakti yeye dati fu kibri a pipel fu en na a ten fu a bigi banawtu. Wi no abi fu sidon denki na sortu fasi Yehovah o sorgu gi wi na a ten dati. Na presi fu dati, wi kan abi na overtoigi taki Yehovah ala ten sa poti prakseri na den wan di lobi en, èn ala ten a o gi den a santa yeye fu en.—2 Kron. 16:9; Ps. 139:7-12.

17. Fa Yehovah o gebroiki en santa yeye na ini a nyun grontapu?

¹⁷ Fa Yehovah o gebroiki en santa yeye na ini a nyun grontapu? Nanga yepi fu a santa yeye, nyun bukulolo o skrifi, èn sma o opo den na a ten dati (Openb. 20:12). San o skrifi na ini den bukulolo dati? Soleki fa a sori, dan den bukulolo o sori finifini san Yehovah o fruwakti fu wi na ini den dusun yari. Yu e angri fu kon sabi san skrifi na ini den bukulolo dati? Wi no man wakti srefisrefi fu de na ini a nyun grontapu. A no de fu taki, dati wi sa prisiri trutru fu libi na ini a moi ten dati pe Yehovah sa gebroiki en santa yeye fu du san a abi na prakseri gi libisma, èn gi grontapu.

18. Sortu fasti bosroiti yu abi?

¹⁸ Wi noiti no musu frigiti taki a wani fu Yehovah o kon tru seiker, fu di a e gebroiki en santa yeye, a moro bigi makti na hemel nanga grontapu, fu du dati. Yu kan kisi wini tu te a wani fu Gado kon tru. Fu dati ede, abi a fasti bosroiti fu aksi Yehovah a yeye fu en, èn aksi en fu meki a yeye dati tiri yu (Luk. 11:13). Na so yu o man abi a howpu fu libi fu têgo na ini Paradijs na grontapu, soleki fa Yehovah ben wani dati gi libisma.

[Futuwortu]

Yu e memre disi ete?

• Na sortu fasi Yehovah gebroiki en santa yeye na ini Bijbel ten fu meki a wani fu en kon tru safrisafri?

• Fa Yehovah e gebroiki a santa yeye fu en na ini a ten disi?

• Fa Yehovah o gebroiki a santa yeye fu en na ini a ten di e kon fu meki a wani fu en kon tru?

[Aksi fu a tori disi]

[Faki na tapu bladzijde 10]

Yu e tan meki muiti fu frustan den tru tori fu Bijbel moro bun?

Yehovah e tan tyari den tru tori fu Bijbel kon na krin gi a pipel fu en. San na wan tu fu den tori di wi kon frustan moro krin, soleki fa wi ben kan leisi dati na ini A Waktitoren?

▪ San na agersitori fu Yesus di e taki fu a srudeki, e leri wi fu a fasi fa wan sma e tron wan disipel fu Krestes? (Mat. 13:33)—15 yuli 2008, bladzijde 19, 20.

▪ O ten Gado no o gi Kresten wan kari moro fu tron memre fu a grupu di abi a howpu fu go na hemel?—1 mei 2007, bladzijde 30, 31.

▪ San a wani taki fu anbegi Yehovah „nanga yeye”? (Yoh. 4:24)—15 yuli 2002, bladzijde 15.

▪ Na ini sortu fesidyari a bigi ipi e dini? (Openb. 7:15)—1 mei 2002, bladzijde 30, 31.

▪ O ten Yesus o prati den skapu fu den bokoboko? (Mat. 25:31-33)—15 oktober 1995, bladzijde 18-28.