Yehovah no wani taki ’wan sani pasa nanga yu’

TE ARMAGEDON e doro wantronso, dan na Almakti Gado o sorgu taki den sma di a feni bun, e „kisi frulusu” (Yoèl 2:32). Ma fu taki en leti, ala ten Yehovah ben wani kibri sma gi ogri. Fu di „[en] na a sma di e gi libi”, meki a e si ala libisma leki warti sani, èn a wani taki den kisi kibri.—Ps. 36:9.

Na ini owruten, den reti-ati futuboi fu Gado ben e si a libi soleki fa Gado e si a libi. Soleki fa Genesis 33:18 e sori, dan Yakob nanga en osofamiri ben teki waka go na wan presi, aladi ogri ben kan miti den na pasi. Ma den ben doro ’sondro taki wan sani pasa nanga den’. Yakob ben abi a frutrow taki Yehovah ben o kibri en, ma a ben e du sani tu fu sorgu taki sani ben e waka bun nanga ala den sma di ben e teki waka nanga en (Gen. 32:7, 8; 33:14, 15). Te yu e fiti Bijbel gronprakseri na ini yu libi, dan a no o pasa so makriki taki ogri miti yu, noso trawan. Meki wi luku fa a rai disi kan yepi den wan di e bow Kownukondre zaal, den wan di e du tra sortu wroko leki disi, èn den wan di e yepi brada nanga sisa di kisi fu du nanga rampu.

A Wet di Gado ben gi Moses ben e yepi sma fu no kisi mankeri

Soleki fa a Wet di Gado ben gi Moses ben sori, dan a pipel fu Gado ben musu du spesrutu sani fu sorgu taki trawan no kisi mankeri. Fu eksempre, efu wan Israelsma ben o bow wan oso, dan a ben musu meki wan pikin skotu lontu a daki fu en. Fu di sma ben gwenti de na tapu a plata daki fu den oso, meki a pikin skotu dati ben e sorgu taki wan sma no ben e fadon komoto fu a daki (1 Sam. 9:26; Mat. 24:17). Efu wan sma ben kisi mankeri fu di a sma di abi na oso no ben gi yesi na a wet disi, dan Yehovah ben o aksi frantwortu fu a sma dati.—Deut. 22:8.

A Wet ben sori tu taki wan sma ben kan kisi strafu efu wan meti fu en ben gi wan tra sma mankeri. Efu wan mankaw ben buku wan sma kiri, dan a sma di ben abi a kaw dati ben musu kiri en, so taki a no gi tra sma mankeri. A sma disi no ben mag nyan a meti, èn a no ben mag seri en gi tra sma fu nyan en. Dati meki a ben de wan bigi lasi gi so wan sma efu a ben musu kiri a kaw. Ma fa a ben de te wan mankaw ben gi wan sma mankeri, ma a sma di ben abi a kaw no ben tai en bakaten? Efu a srefi mankaw dati ben o kiri wan sma bakaten, dan den ben o kiri a mankaw dati èn sosrefi a sma di ben abi en. Te wan sma no ben e broko en ede nanga den sani di den meti fu en ben e du, dan a wet dati ben e gi so wan sma okasi fu tyari kenki kon na ini a fasi fa a ben e du sani.—Ex. 21:28, 29.

A Wet ben e gi sma deki-ati tu fu gebroiki den wrokosani fu den na a yoisti fasi. Furu Israelsma ben e gebroiki beiri fu koti udu fu meki faya. Efu a beiri ben e frei komoto fu a tiki èn a ben kiri wan sma di ben de na ini a birti, dan a sma di ben e koti udu ben musu lowe go na wan fu den loweman foto. A ben musu tan drape teleki a granpriester dede. Son leisi, disi ben wani taki dati wan sma di ben kiri wan trawan sondro taki a ben wani dati,  no ben o man tan na en osofamiri èn na ini en eigi oso. Kande a no ben o man du dati furu yari langa. A seti dati ben leri den Israelsma taki a libi na wan santa sani gi Yehovah. Wan sma di ben e si a libi soleki fa Gado e si a libi, ben e sorgu taki den wrokosani fu en bun, èn a ben e gebroiki den na wan yoisti fasi tu, so taki trawan no ben e kisi mankeri.—Num. 35:25; Deut. 19:4-6.

Nanga den sortu wet disi, Yehovah ben sori a pipel fu en krin taki den ben musu luku bun taki a situwâsi inisei nanga dorosei fu den oso, no ben e meki sma kisi mankeri. Den sma di ben e meki trawan lasi den libi, noso di ben e meki trawan kisi mankeri, awansi dati no ben de fu espresi, ben musu gi frantwortu na Gado. Na ini a ten disi, Yehovah no kenki (Mal. 3:6). Te now ete a wani taki  sma musu luku bun taki den no e meki densrefi, noso trawan kisi mankeri. Disi de so spesrutu te wi e bow zaal di wi e gebroiki gi a tru anbegi fu en, noso te wi e meki den zaal disi kon bun baka.

Wi musu sorgu taki sma no e kisi mankeri te wi e du bow-wroko

Wi e si en leki wan bigi grani fu bow Kownukondre zaal, Kongreshal, nanga bijkantoro, èn wi e si en leki wan bigi grani tu fu sorgu taki den presi disi tan bun. Wi kan taki a srefi fu a wroko di wi e du fu yepi brada nanga sisa di kisi fu du nanga rampu. Ala ten wi wani du wi wroko na wan koni fasi, bika efu wi no man du wan wroko bun, awinsi dati na wan pikin wroko, dan wi kan gi wisrefi, noso trawan mankeri (Preik. 10:9). Iya, te wi e kon abi a gwenti fu du wi wroko bun, dan wi sa sorgu taki sma no kisi mankeri.

Bijbel e taki: „Na a krakti fu yongu sma e meki taki den e kisi glori èn na a weti wiwiri fu owru sma e gi den grani” (Odo 20:29). Krakti yonguwan de fanowdu fu du hebi wroko. Ma wrokoman nanga weti wiwiri, noso den wan di abi ondrofeni na ini bow-wroko, e du finifini wroko nanga den anu noso nanga wrokosani. Èn fosi, den wan di kon owru now, ben e gebroiki a krakti di den ben abi leki yonguwan fu du hebi wroko. Efu fosi tron yu e bigin yepi du bow-wroko, dan luku fa den wan di abi ondrofeni e du a wroko, èn teki a rai di den e gi yu. Efu yu wani leri du a wroko, dan  den wan di abi ondrofeni na ini bow-wroko sa leri yu furu sani. Den sa leri yu fa yu musu wroko nanga sani di kan gi sma mankeri, èn den sa leri yu tu fa yu musu opo hebi lai. Disi sa yepi yu fu du bun wroko, fu no kisi mankeri, èn fu wroko switi.

Den wan di e bow Kownukondre zaal musu de na ai ala ten. Situwâsi e kenki esi. Fu eksempre, kande a gron stampu na wan spesrutu presi. Ma a kan taki tra leisi, wan olo de na a srefi presi dati. Kande tra wrokoman skoifi wan trapu, wan planga, noso wan emre nanga ferfi. Efu yu no de na ai, dan yu kan kisi mankeri makriki. Nofo tron a de fanowdu taki wrokoman e weri sani fu sorgu taki den no kisi mankeri. Te yu e weri wan spesrutu bril, wan helm, nanga den yoisti susu, dan dati kan sorgu taki yu no kisi mankeri na a presi pe yu e wroko. Ma den sani dati o man yepi yu, soso te yu e sorgu taki den tan bun èn te yu e weri den.

Aladi a gersi leki furu wrokosani makriki fu gebroiki, toku yu musu leri fa fu gebroiki den nanga koni. Efu yu no sabi wroko nanga wan wrokosani, dan taigi a brada di e teki fesi. A sa seti sani so taki wan sma kan leri yu fa fu gebroiki a wrokosani dati. A bun srefisrefi te wan sma abi sakafasi, noso te a sabi san a man du èn san a no man du. Fu taki en leti, yu musu abi sakafasi efu yu no wani kisi mankeri, noso efu yu no wani taki trawan kisi mankeri na a wrokopresi.—Odo 11:2.

Wan fasi fa sma e kisi bigi mankeri, na te den e fadon. Fosi yu kren wan trapu, noso fosi yu go tanapu na tapu wan hei sani, dan luku efu ala sani seti bun, èn efu den wrokosani dati bun fu tanapu na tapu. Efu yu musu tanapu na tapu hei sani te yu e wroko, noso efu yu musu wroko na tapu wan daki, dan kande yu sa abi fu fasi titei na wan presi èn tai den na yu skin, fu sorgu taki yu no e fadon. Noso kande den brada sa abi fu poti wan pikin skotu na a lanki fu a daki noso fu a hei presi pe yu e wroko. Efu yu wani sabi moro fini fa fu wroko na hei presi, dan aksi a brada di e teki fesi na ini a wroko dati. *

Fu di moro nanga moro sma na heri grontapu e tron anbegiman fu Yehovah, meki a de fanowdu taki wi e bow moro Kownukondre zaal nanga tra presi di abi fu du nanga a tru anbegi. Den wan di e teki fesi na ini a wroko di e du fu bow Kownukondre zaal nanga tra presi di abi fu du nanga a tru anbegi, abi a frantwortu fu sorgu taki den wan di e wroko na den ondro no e kisi mankeri. Den musu du dati fu di Yehovah lobi den sma disi (Yes. 32:1, 2). Efu yu abi a grani fu teki fesi na ini wan bow-wroko, dan noiti no frigiti o prenspari a de fu sorgu taki nowan sma kisi mankeri. Sorgu taki a wrokopresi krin, èn taki wrokosani nanga materiaal no e didon na ala sei. Te son sma no e luku bun nanga a fasi fa den e wroko, dan sori den krin san den musu hori na prakseri, èn du dati na wan switi fasi. No meki wrokoman di yongu èn di no abi ondrofeni wroko na presi pe den kan kisi mankeri makriki. Prakseri na fesi sortu mankeri wrokoman ben kan kisi te den ben o du wan spesrutu wroko, èn leri den fa fu du a wroko dati sondro taki den e kisi mankeri. Hori na prakseri, taki wi wani klari a wroko sondro taki sma kisi mankeri.

A prenspari fu abi lobi

Te wi e bow Kownukondre zaal nanga tra gebow di de fanowdu gi a tru anbegi, dan sma kan kisi mankeri. Fu dati ede, den wan di e yepi fu du a wroko disi musu de na ai. Te yu e gi yesi na Bijbel gronprakseri, te yu e hori yusrefi na den rai di e sori fa fu du a wroko, èn te yu e gebroiki yu frustan, dan yu no sa kisi mankeri èn tra wrokoman no sa kisi mankeri tu.

Fu san ede wi e du ala san wi man fu sorgu taki sma no e kisi mankeri? Fu di wi abi lobi. Iya, fu di wi lobi Yehovah, meki wi e si a libi soleki fa en e si a libi. Èn fu di wi lobi tra sma, meki wi e wroko na so wan fasi, taki den no e kisi mankeri (Mat. 22:37-39). Fu dati ede, meki wi du ala san wi man fu sorgu taki ’noti no e pasa’ nanga den wan di e yepi fu du a bow-wroko fu wi.

[Futuwortu]

[Faki/​Prenki na tapu bladzijde 30]

Fa fu wroko na tapu wan trapu sondro taki yu e kisi mankeri

Na ini wan fu den yari di pasa, moro leki 160.000 wrokoman na ini Amerkankondre kisi mankeri fu di den fadon fu trapu. Boiti dati, sowan 150 wrokoman di fadon fu trapu, lasi den libi. Wi sa poti prakseri na wan tu rai di kan yepi yu fu sorgu taki yu no e fadon fu wan trapu. Yu sa kisi wini fu den rai disi, awansi pe yu e libi èn awansi pe yu e wroko.

◇ No gebroiki wan trapu di e sekiseki noso di no bun, èn no meki so wan trapu baka. Broko en, èn trowe en gowe.

◇ A no ala trapu man tyari a srefi lai. Gebroiki wan trapu di man tyari yu nanga den wrokosani di yu e gebroiki.

◇ Poti a trapu fu tanapu na tapu wan gron di steifi èn di plata dorodoro. No poti en tanapu na tapu wan sani di no steifi, soleki wan hei presi di meki fu wroko na tapu. No poti en tanapu tu na tapu emre noso kisi.

◇ Te yu e kren a trapu, noso te yu e saka fu en, dan ala ten yu musu luku go na a sei fu a trapu.

◇ Noiti no tanapu noso sidon na tapu den tu tapusei tren fu wan trapu.

◇ Te yu o gebroiki wan trapu fu kren go noso fu kren komoto fu wan daki noso wan tra hei presi, dan a pisi fu a trapu di e pasa a daki noso a presi pe yu musu kren go na tapu, musu langa awinsi 1 meter. Tai na ondrosei fu a trapu, noso spikri wan planga na en fesi, so taki den futu fu en no e skoifi. Efu yu no man du den sani dati, dan aksi wan sma fu hori a trapu gi yu te yu e wroko na en tapu. Tai a trapu bun na tapusei, so taki a no e grati go na wan sei.

◇ No poti planga na tapu den tren fu wan trapu fu tanapu wroko na en tapu.

◇ Te yu e langa yu anu noso yu futu te yu wroko na tapu a trapu, dan a trapu kan anga go na wan sei. Te yu de na tapu wan trapu, dan no langa yu anu tumusi fara fu du wan wroko. Skoifi a trapu ibri leisi te dati de fanowdu, so taki yu de leti na a presi pe yu e wroko.

◇ Efu yu musu wroko na tapu wan trapu di de na fesi wan doro di tapu, dan skrifi wan sani poti na tapu a doro so taki sma kan sabi taki yu de drape, èn sroto a doro. Efu yu no kan sroto a doro, dan aksi wan sma fu tanapu na a doro fu warskow trawan taki yu e wroko drape.

◇ Efu a trapu no meki gi tu sma, dan wán sma nomo musu tanapu na en tapu. *

[Futuwortu]

[Faki/​Prenki na tapu bladzijde 29]

A Wet di Gado ben gi Moses ben e sori taki den Israelsma ben musu meki wan pikin skotu na a lanki fu a daki fu den oso