Yonguwan, dini Yehovah nanga moro faya
Yonguwan, dini Yehovah nanga moro faya
„Memre yu Gran Mekiman na ini yu yongu yari.”—PREIK. 12:1.
1. Sortu kari den pikin fu Israel ben kisi?
SOWAN 3500 yari pasa, Moses, a profeiti fu Yehovah, gi den priester nanga den owruman fu Israel a komando disi: „Meki ala sma kon makandra, iya, ala mansma, ala umasma, ala pikin . . . . Meki den arki èn meki den leri ala den wet disi, so taki den kan abi frede gi Yehovah un Gado, èn so taki den kan du ala san skrifi na ini den wet disi” (Deut. 31:12). Luku suma ben kisi a rai fu kon makandra fu anbegi Gado: mansma, umasma, nanga pikin. Iya, srefi yonguwan ben musu arki, leri, èn teki rai fu Yehovah.
2. Fa Yehovah sori taki a ben e broko en ede nanga yonguwan na ini a fosi Kresten gemeente?
2 Na ini a fosi yarihondro, Yehovah tan sori taki a ben e broko en ede nanga den yonguwan na mindri a pipel fu en. Fu eksempre, na ini wan tu fu den brifi di a ben meki na apostel Paulus skrifi gi den gemeente, a ben meki Paulus skrifi rai di ben de spesrutu gi yonguwan. (Leisi Efeisesma 6:1; Kolosesma 3:20.) Yongu Kresten di ben e fiti den rai dati, ben e kisi moro warderi gi den sani di a lobi-ati hemel Tata fu den du, èn den kisi furu blesi.
3. Fa yonguwan e sori taki den e angri fu dini Gado?
3 A de so taki yonguwan na ini a ten disi kisi a kari fu anbegi Yehovah? Iya, den e kisi a kari! Dati meki a e gi a pipel fu Gado prisiri fu si taki so furu yongu futuboi fu Gado na heri grontapu e gi yesi na a rai di Paulus gi. A ben taki: „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko. No meki wi misi konmakandra, soleki fa son sma gwenti du, ma gi makandra deki-ati o moro unu e si a dei e kon krosibei” (Hebr. 10:24, 25). Boiti dati, furu pikin e preiki a bun nyunsu fu Gado Kownukondre makandra nanga den papa nanga mama (Mat. 24:14). Èn ibri yari, dusundusun yonguwan e sori taki den lobi Yehovah nanga den heri ati. Den yonguwan disi e teki dopu èn den e kisi blesi fu di den na disipel fu Krestes.—Mat. 16:24; Mark. 10:29, 30.
Teki a kari now
4. O ten yonguwan kan teki a kari di Gado e gi den fu dini en?
4 Preikiman 12:1 e taki: „Memre yu Gran Mekiman now na ini yu yongu yari.” Omeni yari yonguwan musu abi fu man teki a kari di den e kisi fu dini Yehovah? Bijbel no e taki omeni yari yu musu abi. Fu dati ede, no denki taki yu yongu tumusi fu arki Yehovah èn fu dini en. Awansi omeni yari yu abi, yu e kisi a deki-ati fu teki a kari wantewante.
5. Fa papa nanga mama kan yepi den pikin fu den fu go na fesi na ini a tru anbegi?
5 Furu fu unu e kisi yepi fu un papa nanga mama, noso fu wán fu den. Efu dati de so, dan yu de leki Timoteyus fu Bijbel ten. Di a ben de wan beibi, dan èn mama Enise, nanga en granmama Lowis, gi en leri fu den Santa Buku fu Bijbel (2 Tim. 3:14, 15). A kan taki yu papa nanga mama e gi yu leri na a srefi fasi. Kande den e studeri Bijbel nanga yu, kande den e begi nanga yu, kande den e tyari yu go na den gemeente konmakandra nanga den tra bigi konmakandra fu Gado en pipel. Kande den e teki prati tu makandra nanga yu na ini a preikiwroko. Iya, a leri di yu papa nanga mama e gi yu fu Gado, na wan tumusi prenspari frantwortu di den kisi fu Yehovah srefi. Yu abi warderi gi a lobi di den e sori gi yu, èn yu de nanga tangi taki den e broko den ede nanga yu?—Odo 23:22.
6. (a) Soleki fa Psalm 110:3 e sori, dan fa Yehovah wani taki wi musu anbegi en? (b) Na sortu sani wi sa poti prakseri now?
6 Ma te unu leki yonguwan e kon moro bigi, dan Yehovah wani taki unu e „kon sabi san na Gado en wani di bun, di e plisi en èn di de volmaakti”, neleki fa Timoteyus ben kon sabi dati tu (Rom. 12:2). Te yu e du a sani disi di Yehovah e aksi fu yu, dan yu sa teki prati na gemeente afersi. Yu no o du dati fu di yu papa nanga mama e aksi dati fu yu, ma fu di yu wani du a wani fu Gado. Yehovah sa breiti te yu e dini en nanga yu heri ati (Ps 110:3). Sobun, fa yu kan sori taki yu wani arki Yehovah trutru èn taki yu wani teki leri fu en? Wi sa poti prakseri na dri prenspari fasi fa yu kan du dati. Den abi fu du nanga a fasi fa yu e studeri, a fasi fa yu e begi, èn a fasi fa yu e tyari yusrefi. Meki wi luku ibriwan fu den sani disi.
Kon sabi Yehovah leki wan sma di e broko en ede nanga yu
7. Fa Yesus sori taki a ben e studeri den Buku fu Bijbel bun? San yepi en fu du dati?
7 A fosi sani di kan yepi yu fu dini Yehovah nanga moro faya, na te yu e leisi Bijbel ibri dei. Te yu e leisi Gado Wortu doronomo, dan yu o kon sabi Gado moro bun, èn yu o kon sabi den tumusi prenspari tori tu di skrifi na ini Bijbel (Mat. 5:3). Te a abi fu du nanga a tori disi, dan Yesus de wan eksempre gi wi. Di Yesus ben abi 12 yari, dan en papa nanga mama go feni en na ini a tempel, pe a ben „e sidon na mindri den leriman, e arki den èn e poti aksi gi den” (Luk. 2:44-46). Di Yesus ben pikin, dan a ben lobi den Buku fu Bijbel kaba, èn a ben wani kon frustan den moro bun. San ben meki taki a ben abi a lobi disi? A no de fu taki, dati en mama Maria, nanga en kwekipapa Yosef ben yepi en. Den tu sma dati ben de futuboi fu Gado di ben e gi Yesus leri fu Gado sensi di a ben de wan beibi.—Mat. 1:18-20; Luk. 2:41, 51.
8. (a) O ten papa nanga mama musu bigin yepi den pikin fu den fu kisi lobi gi a Wortu fu Gado? (b) Fruteri wan ondrofenitori di e sori o prenspari a de fu gi pikin leri frukufruku kaba.
8 Na ini a ten disi, papa nanga mama di abi frede gi Gado, sabi o prenspari a de fu yepi den pikin fu kon abi lobi gi den tru tori fu Bijbel frukufruku kaba (Deut. 6:6-9). Na dati Rubi, wan Kresten sisa ben du nanga Joseph, a fosi pikin fu en. Syatu baka di Joseph gebore, dan Rubi ben e leisi Mi buku nanga bijbel tori gi en ibri dei. Di Joseph ben e gro kon moro bigi, dan a yepi en fu leri difrenti Bijbeltekst na ede. Joseph ben kisi wini fu a leri dati? Syatu baka di a leri taki, a ben man fruteri furu Bijbel tori nanga en eigi wortu. Èn di a ben abi feifi yari, dan a hori en fosi taki na a Theokrasia Diniwroko-skoro.
9. Fu san ede a de prenspari fu leisi Bijbel èn fu denki dipi fu den sani di yu e leisi?
9 Efu unu leki yonguwan wani tan go na fesi na ini a tru anbegi, dan un musu kon abi a gwenti fu leisi Bijbel ibri dei. Èn un musu tan du dati srefi te unu tron bigisma (Ps. 71:17). Fu san ede a leisi di yu e leisi Bijbel o yepi yu fu go na fesi? Luku san Yesus ben taki di a ben e begi en Tata: „Efu sma wani kisi têgo libi, dan den musu tan leri sabi yu, a wan-enkri tru Gado” (Yoh. 17:3). Iya, te yu e kon sabi Yehovah moro bun, dan yu sa si moro krin taki a de wan sma di e broko en ede nanga yu, èn yu o kisi moro lobi gi en (Hebr. 11:27). Dati meki ibri leisi te yu e leisi wan pisi fu Bijbel, dan yu musu pruberi fu kon sabi moro fu Yehovah. Aksi yusrefi: ’San a tori disi e leri mi fu Yehovah? Fa a pisi tori disi na ini Bijbel e sori taki Gado lobi mi èn taki a e broko en ede nanga mi?’ Te yu e teki ten fu denki dipi fu den aksi dati, dan dati sa yepi yu fu kon sabi fa Yehovah e denki, fa a e firi, èn san a e fruwakti fu yu. (Leisi Odo 2:1-5.) Neleki a yonkuman Timoteyus, yu sa ’kon abi na overtoigi’ taki den sani di yu leri fu Bijbel, na tru tori. Boiti dati, yu o wani anbegi Yehovah nanga yu heri ati.—2 Tim. 3:14.
A fasi fa begi e tranga a lobi di yu abi gi Yehovah
10, 11. Fa begi e yepi yu fu dini Gado nanga moro faya?
10 A di fu tu sani di kan yepi yu fu dini Yehovah nanga moro faya, na te yu e taki nanga en na ini begi. Psalm 65:2 e taki: „Yu di e arki begi, na yu ala sortu sma o kon suku yepi.” Srefi na a ten di Israel ben abi wan frubontu nanga Gado, dan trakondre sma di ben e kon na a tempel fu Yehovah, ben kan taki nanga en na ini begi (1 Kow. 8:41, 42). Gado no lobi a wan sma moro a trawan. Den sma di e hori densrefi na den komando fu en abi a dyaranti taki a sa arki den (Odo 15:8). A no de fu taki dati den wortu „ala sortu sma” abi fu du tu nanga unu leki yonguwan.
11 Yu sabi taki trutru mati musu man taki bun nanga makandra. Kande yu lobi fu fruteri wan bun mati fu yu san yu e prakseri, san e gi yu broko-ede, èn fa yu e firi. Na so a de tu taki te yu e begi nanga yu heri ati, dan yu e fruteri yu Gran Mekiman fa yu e firi èn fa yu e denki fu sani (Fil. 4:6,7). Te yu e begi Yehovah, dan fruteri en ala san de tapu yu ati, neleki fa yu ben o du dati nanga wan lobi-ati papa, noso nanga wan bun mati. Fu taki en leti, a fasi fa yu e begi Yehovah, e sori krin o tranga yu lobi en. Sobun, o moro yu e kon krosibei na Yehovah, o moro dati o de fu si na den begi fu yu.
12. (a) Te wi e begi, dan fu san ede den sani di wi e taki a no ala? (b) San o yepi yu fu kon frustan taki Yehovah de krosibei fu yu?
12 Ma hori na prakseri, taki te yu e begi Yehovah, dan den sani di yu e taki a no ala. Den firi fu yu musu de na ini a tori tu. Te yu e begi, dan yu musu sori Yehovah taki yu lobi en trutru, taki yu abi bigi lespeki gi en, èn taki yu e frutrow na en tapu dorodoro. Te yu e si fa Yehovah e piki den begi fu yu, dan yusrefi sa kon si moro krin taki „Yehovah de krosibei fu ala den wan di e kari en” (Ps. 145:18). Iya, Yehovah sa kon krosibei na yu, a sa gi yu a krakti fu kakafutu gi Didibri, èn a sa yepi yu fu teki bun bosroiti.—Leisi Yakobus 4:7, 8.
13. (a) Fa wan sisa kisi wini fu di a abi wan bun matifasi nanga Gado? (b) Te yu abi wan bun matifasi nanga Gado, dan fa dati sa yepi yu fu kakafutu gi speri di e dwengi yu fu du sani di no e tyari trutru wini kon?
13 Luku fa Cherie kisi krakti fu di a abi wan bun matifasi nanga Yehovah. Di a ben de na middelbaar skoro, dan a wini difrenti prijs fu di a ben e leri bun, èn fu di a ben sabi prei sport heri bun tu. Di a klari a skoro, dan a kisi na okasi fu go teki heiskoro-leri. Cherie e taki: „A no de fu taki dati disi ben de wan moi grani, èn den trainer nanga den tra studenti ben e dwengi mi fu teki en.” Ma Cherie kon si taki te a ben o teki heiskoro-leri, dan a ben o abi fu gebroiki furu ten fu studeri èn fu sreka ensrefi gi den wega. Na so a no ben o abi nofo ten moro gi Yehovah. San Cherie du? A e taki: „Mi begi Yehovah, èn mi bosroiti fu no go na a heiskoro. Boiti dati, mi bigin dini leki gewoon pionier.” Now a e dini leki pionier feifi yari kaba. Cherie e taki: „A no e hati mi srefisrefi taki mi teki a bosroiti disi. Mi breiti fu di mi sabi taki mi teki wan bosroiti di Yehovah feni bun. Iya, efu yu e suku Gado Kownukondre fosi, dan yu sa kisi ala den tra sani tu.”—Mat. 6:33.
Te yu e tyari yusrefi na wan fasi di fiti, dan dati e sori taki yu abi wan „krin ati”
14. Fu san ede Yehovah feni en prenspari taki yu e tyari yusrefi na wan fasi di fiti?
14 A di fu dri fasi fa yu kan sori taki yu wani dini Yehovah nanga yu heri ati, na te yu e tyari yusrefi na wan fasi di fiti. Yehovah e blesi yonguwan di e tan tyari densrefi na wan krin fasi. (Leisi Psalm 24:3-5.) A yonkuman Samuel ben weigri fu teki na eksempre fu den manpikin fu granpriester Eli. Den manpikin disi ben e tyari densrefi na wan fasi di no ben fiti kwetikweti. Ma Gado ben si a bun fasi fa Samuel ben tyari ensrefi. Bijbel e taki: „Disiten a boi Samuel ben e gro kon bigi. Yehovah nanga tra sma ben kon lobi en moro nanga moro.”—1 Sam. 2:26.
15. San na wan tu reide fu san ede yu e tan tyari yusrefi na wan fasi di fiti?
15 Wi e libi na ini wan grontapu di lai nanga sma di lobi densrefi, di abi heimemre, di e trangayesi papa nanga mama, di no de nanga tangi, di no de loyaal, di e du sani nanga trawan na wan ogri-ati fasi, di abi bigimemre, èn di lobi prisiri na presi taki den lobi Gado. Disi na wan tu fu den fasi nomo di Paulus kari (2 Tim. 3:1-5). Dati meki a kan muilek srefisrefi gi unu leki yonguwan fu tan tyari unsrefi na wan fasi di fiti, aladi unu e libi na ini na ogri sistema disi. Ma ibri leisi te yu e du san bun, èn te yu e weigri fu du sani di Gado no feni bun, dan yu e sori taki yu e si Yehovah leki a Moro Hei Tiriman fu hemel nanga grontapu (Yob 2:3, 4). A e gi yu prisiri tu fu sabi taki yu e gi yesi na a moi kari di Yehovah e gi yu: „Mi manpikin, de koni èn meki mi ati prisiri, so taki mi kan gi wan piki na a sma di e spotu mi” (Odo 27:11). Boiti dati, te yu sabi taki Yehovah feni yu bun, dan yu o wani dini en nanga moro faya.
16. Fa wan sisa ben meki na ati fu Yehovah prisiri?
16 Wan Kresten sisa di nen Carol, tan hori ensrefi na Bijbel gronprakseri na skoro, di a ben de wan tini. Na so a du kon taki sma kisi lespeki gi a bun fasi fa a ben e tyari ensrefi. San ben pasa? Den pikin fu Carol en klas ben e spotu en fu di a ben weigri fu teki prati na fesadei èn na seremonia pe sma ben e sori taki den abi tranga lobi gi a kondre fu den. Carol en konsensi no ben gi pasi taki a ben teki prati na den sani dati, fu di a ben sabi san Bijbel e taki fu den sortu fesa dati. Te den ben e spotu Carol, dan son leisi dati ben e gi en okasi fu gi den kotoigi. Furu yari baka dati, Carol kisi wan karta fu wan uma di ben sidon nanga en na ini a srefi klas. Na uma dati ben skrifi: „Ala ten mi ben wani miti yu fu taigi yu tangi. Mi ben abi lespeki gi a fasi fa yu leki yongu Kresten ben tyari yusrefi, èn yu ben de wan bun eksempre gi mi. Wan tra sani di mi ben lespeki, na taki yu no ben frede fu weigri fu teki prati na den fesadei. Yu ben de a fosi Yehovah Kotoigi di mi kon leri sabi.” Na eksempre fu Carol ben naki na ati fu na uma disi so te, taki bakaten a bigin studeri Bijbel. Na ini a karta di a ben seni gi Carol, a skrifi taki a de wan dopu Kotoigi moro leki 40 yari kaba! Un yonguwan di no e frede fu tan hori unsrefi na Bijbel gronprakseri, kan gi reti-ati sma deki-ati fu kon leri sabi Yehovah, neleki fa Carol ben du dati.
Yonguwan, prèise Yehovah
17, 18. (a) Fa yu feni den yonguwan na ini a gemeente fu yu? (b) Sortu blesi den yonguwan di abi frede gi Gado, o kisi na ini a ten di e kon?
17 Wi alamala di de na ini na organisâsi fu Yehovah breiti fu si taki dusundusun yonguwan e teki prati fayafaya na a tru anbegi! Den yonguwan disi e leisi Bijbel ibri dei, den e begi doronomo, èn den e tyari densrefi na wan fasi di Gado feni bun. Disi e yepi den fu dini Gado nanga moro faya. Den yonguwan disi di de wan bun eksempre, e gi den papa nanga mama prisiri èn sosrefi a heri pipel fu Yehovah.—Odo 23:24, 25.
18 Na ini a ten di e kon, yonguwan di e tan gi yesi na Gado sa de na mindri den wan di o pasa go libilibi na ini a nyun grontapu fu Gado (Openb. 7:9, 14). Drape den sa kisi têgo blesi aladi den e tan kisi moro warderi gi den sani di Yehovah du gi den, èn den o man prèise en fu têgo.—Ps. 148:12, 13.
Yu kan tyari disi kon na krin?
• Fa yonguwan kan teki prati na a tru anbegi na ini a ten disi?
• Fu san ede yu musu denki dipi fu den sani di yu e leisi na ini Bijbel?
• Fa begi e yepi yu fu kon moro krosibei na Yehovah?
• Te wan Kresten e tyari ensrefi na wan fasi di fiti, dan sortu wini dati e tyari kon?
[Aksi fu a tori disi]
[Prenki na tapu bladzijde 5]
Yu abi a gwenti fu leisi Bijbel ibri dei?