Yu e meki Yehovah poti aksi gi yu?

NA INI Bijbel, hondrohondro aksi skrifi di e yepi wi fu kon sabi san de na ini wi ati trutru. Fu taki en leti, Yehovah Gado srefi ben poti aksi gi sma fu leri den prenspari tru tori. Fu eksempre, Yehovah ben poti difrenti aksi gi Kain, fu warskow en taki a ben musu kenki den takru fasi fu en (Gen. 4:6, 7). Yehovah ben poti aksi tu gi Yesaya fu gi en deki-ati fu du san bun. Di Yehovah ben aksi a profeiti Yesaya: „Suma sa de wi boskopuman? Suma mi sa seni?”, dan Yesaya piki en: „Dya mi de! Seni mi.”—Yes. 6:8.

Yesus, a Bigi Leriman, ben sabi heri bun tu fa fu poti aksi gi sma. Na ini den Evangelietori, wi e feni moro leki 280 fu den aksi di Yesus ben poti gi sma. Son leisi, a ben e poti aksi gi sma di ben e krutu en, fu meki den tan tiri. Ma nofo tron te a ben e poti aksi gi sma, dan a ben e du dati fu doro na ati fu den sma dati, so taki den ben kan luku efu Gado ben feni den bun (Mat. 22:41-46; Yoh. 14:9, 10). Na apostel Paulus di ben skrifi 14 buku fu den Kresten Griki Buku fu Bijbel, ben poti aksi tu gi sma fu overtoigi den (Rom. 10:13-15). Fu eksempre, na ini a brifi di a ben skrifi gi den Romesma, wi kan leisi bun furu aksi di Paulus ben poti gi sma. Den aksi fu Paulus e gi sma di e leisi Bijbel, deki-ati fu kon sabi ’a bigi gudu nanga a koni nanga a sabi fu Gado di dipi pasa marki’.—Rom. 11:33.

Son aksi na fu gi piki na tapu, ma trawan na fu meki sma denki dipi fu sani. Na ini den Evangelietori wi e si taki Yesus ben poti furu aksi gi sma fu meki den denki dipi fu sani. Wan leisi, Yesus ben gi den disipel fu en a warskow disi: „Luku bun nanga a srudeki fu den Fariseiman èn nanga a srudeki fu Herodes.” Nanga dati a ben wani taigi den taki den ben musu luku bun nanga a hoigrifasi fu den man dati èn nanga den falsi leri fu den (Mark. 8:15; Mat. 16:12). Den disipel fu Yesus no ben e frustan san a ben wani taigi den, èn den bigin haritaki nanga makandra fu di den ben frigiti fu tyari brede. Luku sortu aksi Yesus ben poti gi den na ini a syatu takimakandra di den ben abi baka dati. „A taigi den: ’Na fu di unu no abi brede, meki unu e haritaki? Unu no e frustan a sani ete èn unu no e si ete san a wani taki? Na so a tranga gi unu fu frustan? „Unu abi ai, ma toku unu no e si. Unu abi yesi, ma toku unu no e yere.” . . . Unu no e frustan a sani ete?’” Yesus ben poti den aksi disi gi den disipel fu en fu gi den deki-ati fu go denki san den wortu fu en ben wani taki trutru.—Mark. 8:16-21.

„Meki mi poti aksi gi yu”

Yehovah Gado ben poti aksi gi en futuboi Yob fu meki a kenki a denki fu en. Yehovah poti furu difrenti aksi gi Yob fu leri en taki a ben de notinoti te a ben e agersi ensrefi nanga en Mekiman (Yob, kap. 38-41). Yehovah ben e fruwakti taki Yob ben o gi piki tapu ibriwan fu den aksi dati? Soleki fa a sori, dan dati no de so. A de krin taki aksi soleki „Pe yu ben de di mi ben e meki grontapu?”, ben de fu poti Yob na prakseri èn fu naki en ati. Baka di Gado ben poti wan tu fu den aksi disi gi Yob, dan pikinmoro Yob no ben sabi san fu taki. A ben taki nomo: „San mi sa piki yu? Mi e tapu mi mofo nanga mi anu” (Yob 38:4; 40:4). Yob ben frustan san Gado ben wani leri en, èn a sori sakafasi. Ma a no sakafasi wawan Yehovah ben wani leri Yob. Yob kenki a denki fu en tu. Fa so?

Aladi Yob ben de „wan bun man di lobi retidu”, toku den sani di a ben e taki son leisi, ben e sori taki a ben abi wan fowtu denki fu sani. Na dati Elihu ben tyari kon na krin di a piri-ai gi Yob fu di Yob „ben feni taki na en ben abi leti na presi fu Gado” (Yob 1:8; 32:2; 33:8-12). Na so den aksi di Yehovah ben poti gi Yob, yepi en fu kon frustan sani moro bun. Gado en sten ben de fu yere tu na ini wan tranga winti, di a  ben taigi Yob a sani disi: „Suma na a sma drape di e drai den wortu fu mi, fu di a e taki sani sondro fu sabi? Tai yu mindri leki wan tranga man, èn meki mi poti aksi gi yu, dan yu piki mi” (Yob 38:1-3). Nanga yepi fu aksi di a poti gi Yob, Yehovah meki Yob poti prakseri na a tumusi bigi koni nanga a krakti fu en, soleki fa dati de fu si na den wondru wroko fu en. Di Yob kon sabi den sani disi, dan dati gi en a frutrow taki a fasi fa Yehovah e denki èn e du sani, na a moro bun fasi. Na ondrofeni dati ben naki na ati fu Yob trutru. Iya, na Almakti Gado srefi ben poti aksi gi en!

Wi kan meki Yehovah poti aksi gi wi

Fa a de nanga wi? Wi kan kisi wini tu fu den aksi di skrifi na ini Bijbel? Iya, dati kan! Te wi e teki ten fu denki dipi fu den aksi dati, dan dati kan yepi wi fu kon moro krosibei na Gado. Den dipi aksi na ini Gado Wortu e meki tu taki a Wortu disi abi krakti na wi tapu. Iya, „a wortu fu Gado . . . abi krakti, . . . èn a man si krin san na ati e denki èn san a abi na prakseri” (Hebr. 4:12). Ma fu man kisi furu wini fu den aksi dati, dan wi musu si den leki aksi di Yehovah e poti gi wi (Rom. 15:4). Meki wi go luku wan tu eksempre.

„A sma di e krutu heri grontapu e du san reti, a no so?” (Gen. 18:25) Abraham ben poti na aksi dati gi Yehovah, na a ten di Gado krutu Sodom nanga Gomora. A no ben e fruwakti taki Gado ben o piki na aksi dati. Soleki fa Abraham ben e denki, dan a no ben kan de so noiti taki Yehovah ben o handri na wan fasi di no bun. Noiti A ben o kiri reti-ati sma makandra nanga ogrisma. Na aksi di Abraham ben poti gi Yehovah e sori krin taki a ben abi a tranga bribi taki Yehovah na wan Gado di lobi retidu.

Na ini a ten disi, son sma ben kan abi ala sortu denki te a abi fu du nanga a fasi fa Yehovah o krutu libisma na ini a ten di e kon. Kande wan sma e aksi ensrefi suma nanga suma o pasa Armagedon libilibi, noso suma nanga suma o kisi wan opobaka. Na presi taki wi e broko wi ede nanga den tori dati, wi kan memre na aksi fu Abraham. A ben sabi taki Yehovah na wan hemel Tata di lobi fu du bun gi sma. Boiti dati, a ben abi ala frutrow taki Yehovah na wan Gado di lobi retidu èn di abi sari-ati nanga sma. Te wi abi a srefi denki leki Abraham, dan wi no sa lasi wi ten nanga wi krakti fu broko wi ede nanga sani, wi no sa tweifri so furu moro, èn wi no sa haritaki nanga trawan fu den tori disi.

„Suma fu unu di e broko en ede nanga sani, kan meki en libi kon pikinso moro langa?” (Mat. 6:27) Yesus ben poti na aksi disi di a ben e taki nanga wan bigi grupu sma. Den disipel fu en ben de drape tu. A ben poti na aksi disi fu sori den krin taki den musu teki a lobi-ati tiri fu Yehovah. Den lasti dei fu na ogri sistema disi e gi  sma furu broko-ede, ma awansi wi e poti furu prakseri na den broko-ede disi, toku wi libi no o kon moro langa, èn a no o kon moro bun tu.

Ibri leisi te wi e broko wi ede nanga wan sani noso nanga den lobiwan fu wi, dan wi musu memre na aksi disi di Yesus ben poti. Dati kan yepi wi fu kon abi a yoisti denki fu sani. A sani dati kan yepi wi fu no broko wi ede moro. Boiti dati, wi no sa abi takru denki moro di e meki taki wi e firi brokosaka, di e meki taki wi e sari, èn di e meki tu taki wi e kon weri. Yesus ben gi wi a dyaranti taki wi hemel Tata di e gi den pikin-fowru fu hemel nyanyan, èn di e meki den bromki na ini a sabana so moi, sabi heri bun san wi abi fanowdu.—Mat. 6:26-34.

„Wan man kan poti faya na ini en borsu, sondro taki en krosi bron?” (Odo 6:27) Den fosi neigi kapitel fu Odo abi syatu pisi pe wan papa e gi en manpikin koni rai. Na aksi di skrifi na tapusei abi fu du nanga den takru bakapisi di sma e kisi te den du sutadu (Odo 6:29). Te wi e si taki wi e prei nanga den firi fu trawan, noso te wi abi sekslostu di no fiti, dan na aksi dati musu memre wi taki wi e du wan sani di kan tyari takru bakapisi kon gi wi. Fu taki en leti, wan sma kan memre na aksi dati, ibri leisi te a e kisi a firi fu du wan don sani. Na aksi disi e sori krin taki a Bijbel gronprakseri disi tru: ’San yu e sai, na dati yu sa koti’!—Gal. 6:7.

„Suma na yu taki yu e krutu a futuboi fu wan tra sma?” (Rom. 14:4) Na ini a brifi di Paulus ben skrifi gi den Romesma, a ben taki fu problema di ben opo kon na ini a Kresten gemeente fu a fosi yarihondro. Den Kresten na a ten dati ben de fu difrenti kulturu, èn sonwan fu den ben abi a gwenti fu krutu den bosroiti di den Kresten brada nanga sisa fu den ben e teki, èn den ben e krutu sosrefi den sani di den ben e du. Na aksi fu Paulus ben e memre den fu sori switifasi gi makandra èn fu libi en gi Yehovah fu krutu trawan.

Na so a de tu na ini a ten disi taki difrenti sortu sma e tron anbegiman fu Yehovah. Ma toku Yehovah tyari wi kon na wán, èn wi abi a tumusi moi grani fu dini en na ini wánfasi. Wi e yepi fu sorgu taki a wánfasi dati e tan? Kande wi de gaw fu taki dati wi no e agri nanga wan sani di wi brada du, aladi a brada dati handri nanga wan krin ati. Te wi abi a gwenti dati, dan a ben o bun fu memre na aksi fu Paulus di skrifi na tapusei!

Den aksi na ini Bijbel e hari wi kon moro krosibei na Yehovah

Den eksempre na ini na artikel disi e sori fa den aksi na ini Gado Wortu kan tyari kon na krin san de na ini wi ati. Te wi e luku den wortu di skrifi lontu ibriwan fu den aksi, dan dati kan yepi wi fu tyari kenki kon na ini a situwâsi fu wi. Èn te wi e leisi Bijbel, dan wi o si tra aksi di o de wan yepi gi wi.—Luku a faki na tapu bladzijde 14.

Te wi e meki den dipi aksi na ini Gado Wortu abi krakti tapu wi ati, dan dati sa yepi wi fu denki na wan fasi di e kruderi nanga den bun markitiki fu Yehovah. Baka di Yehovah poti aksi gi Yob, dan Yob piki en: „Mi ben yere fu yu, ma now mi eigi ai e si yu” (Yob 42:5). Iya, Yob ben kon sabi Yehovah moro bun, èn a ben de neleki Yehovah ben de leti na en fesi. Bakaten, a disipel Yakobus ben taki disi: „Kon krosibei na Gado, èn a sa kon krosibei na unu” (Yak. 4:8). Meki wi gi pasi taki ibri pisi fu Gado Wortu, sosrefi den aksi na ini, e yepi wi fu kon moro krosibei na Yehovah, so taki wi kan „si” en moro krin leki fosi!

[Faki na tapu bladzijde 14]

Te yu e memre den aksi disi, dan fa dati sa yepi yu fu kon si sani soleki fa Yehovah e si sani?

▪ „Yu denki taki bron-ofrandi nanga tra ofrandi e plisi Yehovah, moro leki te sma e gi yesi na Yehovah?”—1 Sam. 15:22.

▪ „Unu denki taki a sma di meki na ai, no man si?”—Ps. 94:9.

▪ „Efu sma e suku den eigi glori, dan fa dati kan de trutru glori?”—Odo 25:27.

▪ „Yu denki taki yu abi leti fu atibron so?”—Yona 4:4.

▪ „Sortu bun a sa du wan sma efu a abi heri grontapu, ma a e lasi en libi?”—Mat. 16:26.

▪ „Suma sa man puru wi fu a lobi fu Krestes?”—Rom. 8:35.

▪ „San yu abi di yu no kisi?”—1 Kor. 4:7.

▪ „San leti abi fu du nanga dungru?”—2 Kor. 6:14.

[Prenki na tapu bladzijde 15]

San Yob ben leri fu den aksi di Yehovah ben poti gi en?