Yu e memre disi ete?

Yu ben prisiri fu leisi den Waktitoren di kon na doro no so langa pasa? Luku efu yu kan gi piki tapu den aksi di e kon now:

• Fu san ede a Mesias ben musu dede?

Tu reide de fu san ede dati de so. A fosiwan, na taki nanga yepi fu a dede fu en, Yesus ben man sori taki wan volmaakti sma man tan gi yesi na Gado, awansi sortu tesi e kon na en tapu. Wan tra reide na taki Yesus pai a lusu-paiman so taki wi kan kon fri fu a sondu di wi kisi fu Adam, èn na so fasi wi kan kisi têgo libi.—15/12, bladzijde 22, 23.

• Fu san ede Yosef ben prakseri fu gi Maria wan brokotrow papira aladi den ben meki mofo nomo?

Den Dyu ben e si tu sma di ben meki mofo, leki sma di trow kaba. Soleki fa a sori, dan Yosef ben musu prakseri san ben o pasa nanga Maria te sma ben o kon sabi taki a de nanga bere. Aladi Yosef ben wani tyari a tori go na fesi krutu, toku a no du dati fu di a no ben wani taki ogri miti Maria, èn taki a kisi syen.—1/1, bladzijde 9.

• Fa yu kan taki bun nanga den pikin fu yu?

Yu no musu taki nomo nanga yu pikin, ma yu musu poti aksi tu gi den, èn yu musu arki nanga pasensi te den e piki yu. Furu osofamiri kon si taki te den e nyan nanga makandra, dan dati na wan bun okasi fu taki bun nanga makandra.—15/1, bladzijde 18, 19.

• A de so trutru taki na dri koniman ben go luku a beibi Yesus?

Den Evangelietori fu Mateyus nanga Lukas e sori taki na soso den skapuman ben go luku Yesus di a gebore. Den kownu noso koniman, soleki fa sma e kari den, no ben de kownu èn Bijbel no e taki omeni fu den ben de. Den man disi trutru ben de lukuman di e ondrosuku den stari fu sabi san o pasa na ini a ten di e kon.—1/1, bladzijde 15.

• O ten wan sma ben kan prakseri fu teki dopu baka?

Wan sma ben kan du dati efu na a ten di a teki dopu, a ben e libi na wan fasi di no fiti, sondro taki trawan ben sabi fu dati, noso kande a ben abi wan takru gwenti. Efu a sma disi ben de wan sma di ben dopu kaba na wan fasi di ben e kruderi nanga den markitiki fu Gado, dan den sondu dati di a ben du ben kan meki taki den puru en fu a gemeente.—15/2, bladzijde 22.

• San wi e leri fu a tweifri di Petrus bigin tweifri?

Efu wi e tan poti prakseri na den sani di e meki wi frede, na den sani di e meki wi lasi-ati, èn na den sani di e puru wi prakseri na Yehovah nanga en Manpikin, dan wi sa tweifri moro nanga moro. Ma efu wi e tan poti prakseri na Yehovah nanga en Manpikin, na den sani di den ben du, den sani di den e du now, èn na den sani di den o du gi den sma di lobi den, dan wi sa tan abi wan tranga bribi.—1/1, bladzijde 21.

• San a bun siri e prenki na ini na agersitori di Yesus ben fruteri fu na aleisi nanga a takru wiwiri?

Di a Manpikin fu libisma, Yesus, ben de na grontapu fu du en diniwroko, dan a sreka a gron. Èn sensi a Pinksterfesa fu a yari 33, Yesus bigin sai a bun siri, di Kresten ben salfu leki den manpikin fu Gado, noso den manpikin fu a Kownukondre.—15/3, bladzijde 20.

• Fa na agersi aleisi tyari kon na wán na ini a maksin fu Yehovah? (Mat. 13:30)

A sani disi kon tru na a pisi ten fu a kaba fu a grontapu sistema. Den salfu manpikin fu a Kownukondre, di de na agersi aleisi, tyari kon na ini a maksin fu Yehovah, fu di den tron memre fu a Kresten gemeente. Noso te den e kisi wan opobaka na hemel.—15/3, bladzijde 22.

• San Yesus ben wani taki di a taigi den leriman fu Wet nanga den Fariseiman taki den gersi „grebi di sma meki kon weti”?

Den Dyu ben abi a gwenti fu moi den grebi, fu di den ben meki den kon weti nanga karki. Yesus ben sori taki den kerki fesiman di ben gens en, ben e hoigri fu di den ben de tra fasi leki san sma ben si na dorosei.—1/1, bladzijde 9.