No meki a santa yeye fu Yehovah sari
No meki a santa yeye fu Yehovah sari
„No meki Gado en santa yeye sari, a santa yeye disi ben poti na un tapu leki wan marki.”—EF. 4:30.
1. San Yehovah du gi milyunmilyun sma, èn sortu frantwortu den abi?
YEHOVAH du wan tumusi moi sani gi milyunmilyun sma di e libi na ini a bruya grontapu disi. Yehovah gi den na okasi fu kon krosibei na en nanga yepi fu en wan-enkri Manpikin, Yesus Krestes (Yoh. 6:44). Yu na wan fu den sma disi efu yu gi yusrefi abra na Gado èn efu yu e du san yu pramisi en. Leki wan sma di dopu na ini a nen fu a santa yeye, yu abi a frantwortu fu tyari yusrefi na wan fasi di e kruderi nanga a yeye dati.—Mat. 28:19.
2. Na sortu aksi wi sa poti prakseri?
2 Fu di wi na sma di e „du san a yeye wani”, meki wi e du muiti fu tron nyun sma (Gal. 6:8; Ef. 4:17-24). Ma na apostel Paulus e gi wi rai èn a e warskow wi fu no meki a santa yeye fu Gado sari. (Leisi Efeisesma 4:25-32.) Wi sa poti prakseri now na a rai di na apostel e gi wi. San Paulus ben wani taki di a gi Kresten a warskow fu no meki a yeye fu Gado sari? Fa wan sma di gi ensrefi abra na Yehovah ben kan meki a yeye fu En sari? Èn fa wi kan luku bun taki wi no e du dati?
San den wortu fu Paulus wani taki?
3. San den wortu na Efeisesma 4:30 wani taki?
3 Wi sa bigin fu poti prakseri na den wortu fu Paulus di skrifi na Efeisesma 4:30. Paulus ben skrifi: „No meki Gado en santa yeye sari, a santa yeye disi ben poti na un tapu leki wan marki gi a dei te unu sa kon fri nanga yepi fu wan lusu-paiman.” Paulus no ben wani taki den lobi Kresten brada nanga sisa ben e du wan sani di ben o pori a matifasi di den ben abi nanga Yehovah. A ben de nanga yepi fu Yehovah en yeye taki ’wan marki ben poti na den tapu gi a dei te den ben o kon fri nanga yepi fu wan lusu-paiman’. A santa yeye fu Gado ben de wan marki èn a de wan marki ete gi den salfuwan di e tan gi yesi na Gado. Fu taki en leti, a yeye disi de leki ’wan dyaranti fu a sani di den salfuwan musu kisi’ (2 Kor. 1:22). A marki e prenki taki den na fu Gado èn taki den o kisi a grani fu libi na hemel. Den wan di sa kisi a marki fu a lasti leisi, na wan grupu fu 144.000 sma.—Openb. 7:2-4.
4. Fu san ede a de prenspari taki wi no e meki a santa yeye fu Gado sari?
4 Te wan Kresten e meki a santa yeye fu Gado sari, dan dati kan meki te fu kaba taki a yeye dati no sa tiri en moro. A sani di David ben taki baka di a hurudu nanga Batseiba, e sori taki a sani disi tru. David ben sori berow èn a ben begi Yehovah: „Mi e begi yu fu no drai baka gi mi èn fu no puru yu santa yeye na mi tapu” (Ps. 51:11). Na soso den salfuwan di e „tan getrow srefi te na dede”, Gado „o pai” nanga libi na hemel, pe den no o dede noiti moro (Openb. 2:10; 1 Kor. 15:53). Kresten di abi a howpu fu libi na grontapu abi a santa yeye fanowdu tu fu man tan gi yesi na Gado èn fu man kisi libi. Den sa kisi libi fu di den poti bribi na ini a frulusu-ofrandi fu Krestes (Yoh. 3:36; Rom. 5:8; 6:23). Fu dati ede, wi alamala musu luku bun taki wi no e meki a santa yeye fu Yehovah sari.
Fa wan Kresten ben kan meki a yeye fu Gado sari?
5, 6. Fa wan Kresten ben kan meki a yeye fu Yehovah sari?
5 A de so taki wi leki Kresten di gi densrefi abra na Gado, man gi yesi na a rai di wi kisi fu no meki a santa yeye sari? Iya, dati kan. Wi o man du dati te wi e ’tan waka nanga a yeye èn te wi e meki a yeye tiri wi libi’. Na so a sondu skin fu wi no sa basi wi, èn wi no sa abi takru fasi (Gal. 5:16, 25, 26). Ma toku wi ben kan meki a yeye sari te safrisafri wi e bigin tyari wisrefi na wan fasi di no e kruderi nanga a Wortu fu Gado di skrifi nanga yepi fu santa yeye. Kande dati e pasa sondro taki wi sabi srefi.
6 Te wi e teki en leki wan gwenti fu du sani tra fasi soleki fa a santa yeye e tiri wi, dan wi ben o meki a yeye sari, èn sosrefi Yehovah, a Sma fu pe a yeye dati komoto. Wi sa poti prakseri na Efeisesma 4:25-32 fu si fa wi musu tyari wisrefi. Dati sa yepi wi fu no meki a yeye fu Gado sari.
Fa wi kan sorgu taki wi no e meki a yeye sari?
7, 8. Tyari kon na krin fu san ede wi musu taki san tru.
7 Wi musu taki san tru. Na Efeisesma 4:25, Paulus ben skrifi: „Now unu no e lei moro, èn dati meki ibriwan fu unu musu taki san tru te unu e taki nanga trawan, bika wi na wan pisi fu a srefi skin èn wi de fu makandra.” Fu di wi de na ini wánfasi leki ’pisi fu a srefi skin, èn fu di wi de fu makandra’, meki wi no musu suku fu bedrigi wi Kresten brada nanga sisa, èn wi no musu pruberi fu kori den. Te wan Kresten e tan du den sani dati, dan te fu kaba dati kan pori a matifasi di a abi nanga Gado.—Leisi Odo 3:32.
8 Te wi e taki noso e du sani fu bedrigi den Kresten brada nanga sisa fu wi, dan dati kan pori a wánfasi fu a gemeente. Fu dati ede, wi musu de leki a profeiti Danièl di ben de fu frutrow. Dati meki trawan no ben man feni fowtu na en tapu (Dan. 6:4). Èn wi no musu frigiti a rai di Paulus ben gi den Kresten di abi a howpu fu libi na hemel. A ben taigi den taki ala den pisi fu „a skin fu Krestes” de fu makandra, èn den alamala musu tan na ini wánfasi nanga den reti-ati salfu bakaman fu Yesus (Ef. 4:11, 12). Efu wi abi a howpu fu libi fu têgo na ini a Paradijs na grontapu, dan wi musu taki tu san tru. Na so wi sa yepi fu sorgu taki den Kresten brada nanga sisa fu wi na heri grontapu e tan na ini wánfasi.
9. Fu san ede a de prenspari taki wi e fiti a rai di skrifi na Efeisesma 4:26, 27?
9 Wi musu kakafutu gi Didibri, èn wi no musu gi en okasi fu pori a matifasi di wi abi nanga Gado (Yak. 4:7). A santa yeye e yepi wi fu kakafutu gi Satan. Fu eksempre, wi musu luku bun taki wi no e atibron so te, taki wi no man hori wisrefi moro. Paulus ben skrifi: „Unu kan kisi atibron, ma toku un no musu du sondu; no meki son dongo, dan unu e mandi ete; no gi Didibri okasi” (Ef. 4:26, 27). Efu wi abi reide fu atibron, dan a bun te wi e begi Gado wantewante na ini wi ati. Dati kan yepi wi fu ’no bruya esi-esi’, èn wi o man dwengi wisrefi na presi taki wi e handri na wan fasi di ben kan meki a yeye fu Gado sari (Odo 17:27). Sobun, wi no musu tan nanga atibron, fu di dati ben o gi Satan okasi fu kori wi so taki wi e du wan ogri (Ps. 37:8, 9). Wan fasi fa wi kan kakafutu gi Satan na te wi e lusu kesekese esi-esi, soleki fa Yesus e taigi wi fu du.—Mat. 5:23, 24; 18:15-17.
10, 11. Fu san ede wi no musu fufuru èn fu san ede wi no musu bedrigi trawan?
10 Wi no musu brokokindi gi iniwan tesi di wi e kisi fu fufuru noso fu bedrigi trawan. Paulus e gi wi a rai fu no fufuru, èn fu dati ede a e skrifi: „A sma di e fufuru, no musu fufuru moro, ma a musu wroko tranga, èn meki a du bun wroko nanga en anu, so taki a kan prati wan sani nanga sma di de na nowtu” (Ef. 4:28). Efu wan dopu Kresten ben o fufuru, dan fu taki en leti a ben o ’pori a nen fu Gado’ (Odo 30:7-9). Awansi wan sma pôti, toku a no mag fufuru. Den sma di lobi Gado nanga tra sma, sabi taki noiti a bun fu furufuru.—Mark. 12:28-31.
11 Paulus no e taigi wi nomo san wi no musu du, ma a e sori wi tu san wi musu du. Efu wi e meki a santa yeye tiri wi èn efu wi e waka nanga a yeye dati, dan wi sa wroko tranga so taki wi kan sorgu gi wi osofamiri. Boiti dati, wi o man „prati wan sani nanga sma di de na nowtu” (1 Tim. 5:8). Yesus nanga den apostel fu en ben poti moni na wan sei fu yepi den pôtiwan, ma a toriman Yudas Iskariot fufuru pikinso fu a moni dati (Yoh. 12:4-6). A de krin taki a santa yeye no ben e tiri en di a du dati. Fu di wi na sma di e teki a tiri fu a yeye fu Gado, meki wi e „du ala sani na wan opregti fasi”, soleki fa Paulus ben e du dati (Hebr. 13:18). Na so wi no sa meki a santa yeye fu Yehovah sari.
Tra fasi fa wi kan sorgu taki wi no e meki a yeye sari
12, 13. (a) Soleki fa Efeisesma 4:29 e sori, dan fa wi no musu taki? (b) Fa wi musu taki?
12 Wi musu luku bun nanga san wi e taki. Paulus ben taki: „No taki takru sani nanga un mofo, ma taki sani di bun, so taki unu kan gi sma deki-ati te a de fanowdu; na so fasi den sma di e arki, kan yere sani di bun gi den” (Ef. 4:29). Wi e si baka taki na apostel no e taigi wi nomo san wi no musu du, ma a e taigi wi san wi musu du. Te a yeye fu Gado e tiri wi, dan wi o ’taki sani di bun, so taki wi kan gi sma deki-ati te a de fanowdu’. Boiti dati, wi no musu taki „takru sani” nanga wi mofo. A Griki wortu di vertaal nanga „takru sani” abi fu du tu nanga froktu, fisi, noso meti di kon pori. Neleki fa wi e tegu gi den sortu nyanyan dati, na so wi musu tegu gi wortu di Yehovah no feni bun.
13 Wi musu taki na wan lespeki fasi, na wan switi fasi, èn wi musu gebroiki wortu „di abi sowtu” (Kol. 3:8-10; 4:6). Den sma di e arki wi musu man si taki wi de tra fasi leki grontapusma. Sobun, meki wi taki sani ’di e gi trawan deki-ati’. Èn wi musu firi leki a psalm skrifiman di ben taki: „Meki den sani di mi e taki nanga mi mofo nanga den sani di mi e prakseri dipi na ini mi ati, kon de sani di yu feni bun. Yehovah, yu na mi stonbergi. Yu na mi Frulusuman.”—Ps. 19:14.
14. Sortu fasi wi no musu abi, soleki fa Efeisesma 4:30, 31 e sori?
14 Wi no musu abi bita-ati, wi no musu atibron, wi no musu kosi, èn wi no musu du takru sani. Baka di Paulus warskow Kresten fu no meki a yeye fu Gado sari, dan a skrifi: „Puru ala takru bita-ati nanga mandi nanga atibron nanga babari nanga kosikosi na un mindri, èn sosrefi ala takrudu” (Ef. 4:30, 31). Leki sondu libisma, wi alamala musu du tranga muiti fu basi den denki fu wi èn wi musu dwengi wisrefi tu fu no du sani di Gado no feni bun. Efu wi e ’kisi bita-ati, efu wi mandi èn atibron’ sondro taki wi e pruberi fu dwengi wisrefi, dan wi ben kan meki a yeye fu Gado sari. Na so a de tu te wi e tan prakseri den ogri di trawan du nanga wi, te wi e tan nanga atibron, èn te wi e weigri fu meki sani bun baka nanga wan sma di ben hati den firi fu wi. Efu wi e bigin trangayesi den rai di Bijbel e gi wi, dan wi ben kan kisi fasi di te fu kaba sa meki wi sondu teige a yeye. A sani dati kan tyari takru bakapisi kon gi wi.
15. Efu wan sma du wan hati sani nanga wi, dan san wi musu du?
15 Wi musu abi switifasi, wi musu sori sari-ati gi trawan, èn wi musu de klariklari fu gi trawan pardon. Paulus ben skrifi: „Tron sma di e du bun gi makandra, èn sori sari-ati na wan lobi fasi; un musu gi makandra pardon nanga un heri ati neleki fa Gado e gi unu pardon nanga en heri ati tu nanga yepi fu Krestes” (Ef. 4:32). Awansi wan sma du wan trutru hati sani nanga wi, toku wi musu gi a sma dati pardon, neleki fa Gado e gi wi pardon (Luk. 11:4). Kon meki wi taki dati wan Kresten brada noso sisa taki wan takru sani fu wi. Fu di wi wani meki sani bun baka nanga a sma dati, meki wi e go taki nanga en. A sma disi e sori taki a e sari trutru fu a sani di pasa, èn a e aksi wi pardon. Wi e gi en pardon, ma dati a no ala san wi musu du. Lefitikus 19:18 e taki: „Unu no musu pai ogri fu ogri èn un no musu hori den kondreman fu unu na ati. Un musu lobi tra sma leki fa unu lobi unsrefi. Mi na Yehovah.”
Wi musu de na ai
16. Gi wan eksempre fu sori taki son leisi a de fanowdu fu tyari kenki kon so taki wi no e meki a yeye fu Yehovah sari.
16 Awansi wi de wi wawan, toku wi kan kisi tesi fu du wan sani di Gado no feni bun. Fu eksempre, kande wan brada ben e arki poku di no fiti. Te fu kaba, a konsensi fu en e bigin trobi en fu di a no gi yesi na a rai fu Bijbel di de fu leisi na ini den publikâsi fu „a getrow èn koni srafu” (Mat. 24:45). Kande a e begi Gado fu yepi en nanga a problema disi, èn kande a e memre a sani di Paulus e taki na Efeisesma 4:30. A abi a fasti bosroiti fu no du nowan enkri sani di kan meki a yeye fu Gado sari. Fu dati ede, a no sa arki poku moro di no fiti. Yehovah sa blesi a brada disi fu di a abi a denki disi. Fu dati ede, wi musu luku bun doronomo taki wi no e meki a yeye fu Gado sari.
17. San kan pasa te wi no de na ai èn te wi no e begi Gado doronomo?
17 Efu wi no de na ai, èn efu wi no e begi Gado doronomo, dan kande wi o bigin du wan sani di no fiti, noso kande wi sa du wan ogri. Na so wi ben kan meki a yeye sari. Fu di a santa yeye na a krakti di Yehovah e gebroiki fu du a wani fu en, meki ala ten a santa yeye e wroko soleki fa Yehovah e denki. Sobun, te wi e meki a santa yeye sari, dan wi e meki Yehovah sari tu. A no de fu taki, dati wi no wani tyari a frantwortu dati (Ef. 4:30). Na ini a fosi yarihondro, den Dyu skrifiman fu Wet ben du wan bigi sondu fu di den taki dati den wondru fu Yesus ben e komoto fu Satan. (Leisi Markus 3:22-30.) Den feanti dati di ben e gens Krestes, ’ben taki ogri fu a santa yeye’, èn na so den du wan sondu di den no ben o kisi pardon gi dati. Meki a sani dati noiti no pasa nanga wi!
18. Fa wi kan kon sabi efu wi du wan sondu di Gado no o gi wi pardon gi dati?
18 Iya, wi no wani denki srefi fu du wan sondu di o meki taki wi no kisi pardon. Dati meki wi musu hori a rai na prakseri di Paulus ben gi wi fu no meki a yeye sari. Ma fa a de te wi du wan seryusu sondu? Efu wi sori berow, èn efu wi kisi yepi fu den owruman, dan dati e sori taki Gado gi wi pardon, èn taki wi no sondu teige a santa yeye. Gado kan yepi wi fu sorgu tu taki wi no e du wan sani baka di sa meki a santa yeye sari.
19, 20. (a) San na wan tu sani di wi no musu du? (b) Sortu fasti bosroiti wi musu abi?
19 Gado e gebroiki en santa yeye fu sorgu taki a pipel fu en e sori lobi gi makandra, taki den de koloku, èn taki den de na ini wánfasi (Ps. 133:1-3). Fu dati ede, wi no musu taki ogri fu trawan, èn wi no musu taki sani tu di ben o meki taki sma no abi lespeki moro gi skapuman di kisi a frantwortu fu den nanga yepi fu santa yeye. Ala den sani disi ben kan meki a santa yeye sari (Tori. 20:28; Yud. 8). Na presi fu dati, wi musu gi makandra deki-ati fu de na ini wánfasi èn fu sori lespeki gi makandra na ini a gemeente. A no de fu taki dati wi no musu bemui nanga spesrutu sma nomo na ini a gemeente. Paulus ben skrifi: „Un brada, now mi e frumane unu na ini a nen fu wi Masra Yesus Krestes, taki den sani di iniwan fu unu e taki musu kruderi nanga makandra, èn nowan pratifasi musu de na un mindri, ma un musu abi a srefi denki soleki fa a fiti èn un musu de wán na ini a fasi fa unu e prakseri fu sani.”—1 Kor. 1:10.
20 Yehovah wani yepi wi so taki wi no e meki en santa yeye sari, èn a man du dati tu. Meki wi tan begi en fu gi wi a santa yeye fu en, èn meki wi abi a fasti bosroiti fu no meki a yeye dati sari. Iya, wi musu tan „du san a yeye wani”, èn wi musu teki a tiri fu a yeye dati now èn fu ala ten.
San yu ben sa piki?
• Te wan sma e meki a yeye fu Gado sari, dan san dati wani taki?
• Fa wan futuboi fu Yehovah ben kan meki a yeye fu En sari?
• Na sortu fasi wi musu sorgu taki wi no e meki a santa yeye sari?
[Aksi fu a tori disi]
[Prenki na tapu bladzijde 30]
Lusu kesekese esi-esi
[Prenki na tapu bladzijde 31]
Nanga sortu froktu yu kan agersi a fasi fa yu e taki?