Tan krosibei fu Yehovah aladi yu e sorgu gi wan famiriman di siki

BAKA di datra kon si taki wan sani ben e gro krosibei fu Kim en bakabonyo, den a kon na krin taki Kim ben abi kanker. * Kim na wan Kotoigi fu Yehovah. En masra, Steve, e taki: „Baka di datra koti a sani puru di ben e gro na en baka, dan Kim kisi difrenti sortu datrayepi ete. Leki bakapisi fu dati, a ben kon swaki trutru. A ben kon muilek srefisrefi gi en fu waka.”

Prakseri fa Steve ben e sari fu si fa en lobi wefi ben e feti nanga a siki disi di ben e swaki en moro nanga moro. Kande wan sma na ini yu osofamiri e pina fu di a abi wan siki di e swaki en, noso fu di a kon owru (Preik. 12:1-7). Efu dati de so, dan yu sabi taki efu yu wani sorgu bun gi a lobiwan fu yu, dan yu musu sorgu yusrefi bun tu. Efu yu lasi faya gi a diniwroko, dan dati kan meki yu lasi-ati, èn a gosontu fu yu kan go na baka. Kande yu no o man gi a famiriman fu yu a yepi di a abi fanowdu. Fa yu kan tan tyari den Kresten frantwortu fu yu, aladi yu e sorgu gi wan famiriman di siki, noso di kon owru? San tra memre fu a Kresten gemeente kan du fu sori taki den e broko den ede nanga den wan di siki?

Fiti yusrefi na a situwâsi fu yu

Fu man tan krosibei fu Yehovah, èn fu man tan gosontu aladi yu e sorgu gi wan famiriman di siki, dan yu musu fiti yusrefi na a situwâsi fu yu. Boiti dati, yu musu gebroiki yu ten nanga yu krakti na wan koni fasi. Odo 11:2 e taki: „Sma di abi sakafasi, na koni sma.” Te a abi fu du nanga a tori disi, dan a wortu „sakafasi” wani taki dati wan sma sabi san a man du èn san a no man du. Fu sorgu taki yu no e pruberi fu du moro leki san yu man du, dan yu musu luku fa a libi fu yu seti, èn sortu frantwortu yu abi.

Steve luku sortu wroko a ben abi fu du. A sani disi sori taki a koni èn taki a e hori na prakseri san a man du èn san a no man du.  Boiti taki a ben abi wan grontapuwroko, a ben e dini leki fesiman fu den owruman na ini wan fu den gemeente fu Yehovah Kotoigi na ini Ierland. A ben de sosrefi a dienst-opziener fu a gemeente dati. Boiti dati, a ben de wan memre fu na Ati-oso Kontakti Komte gi a kontren pe a ben e dini. Steve e taki: „Noiti Kim kragi taki mi no ben abi ten gi en fu di mi ben e poti tumusi furu prakseri na den frantwortu disi. Ma mi ben sabi taki mi ben e du tumusi furu.” San Steve du? A e taki: „Baka di mi denki a tori, dan mi begi Gado fu tiri mi. Mi bosroiti fu no dini moro leki fesiman fu den owruman fu a gemeente. Mi tan dini leki owruman. Ma fu di mi meki trawan tyari wan tu fu den frantwortu di mi ben abi na ini a gemeente, meki mi ben abi moro ten gi Kim.”

Bakaten, a ben e go moro bun nanga a gosontu fu Kim. Steve nanga Kim luku a situwâsi fu den baka, èn Steve kon si taki a ben man teki den tra frantwortu baka di a ben abi fosi na ini a gemeente. En wefi ben e horibaka tu gi en. Steve e taki: „Wi ala tu leri fu libi nanga a siki. Mi de nanga tangi trutru taki Yehovah yepi mi, èn taki mi wefi tan horibaka gi mi sondro fu kragi, aladi a no ben e go bun nanga a gosontu fu en.”

Luku sosrefi na ondrofenitori fu wan kring-opziener di nen Jerry, nanga en wefi, Maria.  Den ben abi wan marki na prakseri, ma den kenki prakseri fu di den ben musu sorgu gi Jerry en papa nanga mama di kon owru. Maria e taki: „Mi nanga mi masra ben abi leki marki fu dini leki zendeling na ini wan kontren pe sma e taki wan tra tongo. Ma Jerry no abi brada nanga sisa, èn a ben de fanowdu taki wan sma sorgu gi en papa nanga mama. Dati meki wi bosroiti fu tan na ini Ierland fu sorgu gi den. Fu di wi du dati, meki wi ben man de nanga Jerry en papa a heri pisi ten di a ben de na ati-oso bifo a dede. Now wi e poti prakseri na Jerry en mama ibri dei, èn efu a abi yepi fanowdu, dan wi no de fara fu en. A gemeente pe Jerry en mama e go, de wan bigi yepi gi wi, èn a sani dati meki taki Jerry man tan dini leki kring-opziener.”

Fa trawan kan yepi?

Na apostel Paulus ben e taki fu den sani di ben musu seti gi den uma na ini a gemeente di ben kon owru, èn di ben lasi den masra na ini dede. A ben skrifi: „Efu wan sma no e sorgu den sma fu en, spesrutu den sma fu en osofamiri, dan a drai en baka gi a bribi, èn a takru moro leki wan sma di no e bribi.” Paulus ben memre den Kresten brada nanga sisa fu en taki efu den ben wani taki ’Gado feni den bun’, dan den ben musu sorgu gi den papa nanga mama di ben kon owru. Den ben musu sorgu tu gi den granpapa nanga granmama (1 Tim. 5:4, 8). Ma trawan na ini a gemeente kan yepi na tra fasi tu, èn den musu du dati.

Luku na ondrofenitori fu Hakan nanga Inger, wan owru trowpaar di e libi na ini Sweden. Hakan e taki: „Di datra kon si taki mi wefi abi kanker, wi ala tu skreki. Ala ten Inger ben gosontu èn ala ten a ben krakti. Now wi musu go na ati-oso ibri dei so taki a kan kisi datrayepi, èn den dresi di a ben e kisi ben e swaki en moro nanga moro. Na a pisi ten dati, Inger no ben man go na den konmakandra, èn mi ben musu tan na oso tu fu sorgu gi en.” Fa a gemeente yepi Hakan nanga Inger?

Den owruman na ini a gemeente seti sani so taki a trowpaar ben kan arki den Kresten konmakandra nanga yepi fu telefon. Boiti dati, den brada nanga sisa ben e tan bèl den èn den ben e go luku den na oso. Den ben e seni brifi nanga karta tu gi den. Hakan e taki: „Wi kisi yepi fu ala den brada nanga sisa èn fu Yehovah. A du wi bun taki den poti prakseri na wi na a fasi disi, fu di dati yepi wi fu tan abi wan tranga bribi. Wi breiti taki Inger kon betre now, èn wi man go baka na den Kresten konmakandra di e hori na ini a Kownukondre zaal.” Te memre fu a gemeente e du san den man fu yepi den wan di siki èn di kon owru, dan den e sori taki den na ’trutru mati di e sori lobi ala ten, èn sosrefi brada di en mama meki fu yepi sma te nowtu de’.—Odo 17:17.

Yehovah abi warderi gi a muiti di yu e meki

A no makriki srefisrefi fu sorgu gi wan famiriman di siki. Toku Kownu David ben skrifi: „Koloku fu a sma di e yepi den mofinawan”, soleki den wan di abi yepi fanowdu fu di den kon siki.—Ps. 41:1.

Fu san ede den wan di e sorgu gi siki sma èn gi sma di abi yepi fanowdu, kan de koloku? Odo 19:17 e taki: „A sma di e du bun gi den mofinawan, e leni Yehovah èn A o pai a sma dati baka gi den bun di a du.” A tru Gado e poti spesrutu prakseri na den reti-ati futuboi fu en di siki, èn a e blesi den wan di e du bun gi den. A psalm skrifiman David ben singi: „Yehovah o yepi [so wan sma] te a e didon siki na tapu en bedi. Yu o sorgu en te a siki” (Ps. 41:3). Wi kan de seiker taki efu wan sma di e sorgu na wan lobi-ati fasi gi wan sikiwan e kisi fu du nanga problema noso rampu, dan Yehovah o yepi en.

Yehovah Gado e si a muiti di wi e meki fu sorgu gi wan famiriman di siki, èn a feni a sani dati bun. A e gi wi deki-ati fu di wi sabi dati. Aladi wi musu meki muiti fu yepi so wan sma, toku Bijbel e gi wi a dyaranti taki „den sortu srakti-ofrandi dati e plisi Gado”.—Hebr. 13:16.

[Futuwortu]

[Prenki na tapu bladzijde 18]

Tan krosibei fu Yehovah èn teki a yepi di trawan wani gi yu