Tan leri fu gebroiki yu frustan

TE YU e si fa wan sportman e dyompo drai moi salto na loktu, dan a sani dati moi fu si, a no so? Bijbel e gi Kresten deki-ati fu leri gebroiki den frustan, neleki fa wan sportman e oefen en skin.

Na ini a brifi di na apostel Paulus ben skrifi gi den Hebrewsma, a ben taki: „Tranga nyanyan na gi lepi sma, gi den sma di leri fa fu gebroiki den frustan [neleki fa wan sportman e oefen en skin] fu man si sani krin, so taki den kan sabi san bun èn san no bun” (Hebr. 5:14). Fu san ede Paulus ben taigi den Hebrew Kresten taki den ben musu leri fu gebroiki den frustan neleki fa wan koni sportman e oefen en skin? Fa wi kan leri fu gebroiki wi frustan?

„Unu ben musu de leriman”

Di Paulus ben e fruklari a posisi di Yesus abi leki ’granpriester neleki fa Melkiseidek ben de dati’, dan a skrifi: „Wi abi furu sani fu taki fu [Yesus], ma a muilek fu tyari disi kon na krin, bika un yesi kon lesi fu arki. Bika aladi unu ben musu de leriman someni langa kaba, toku a de fanowdu baka taki wan sma e kon leri unu den fosi santa sani di Gado taki; unu tron leki sma di abi merki fanowdu èn di no man nyan tranga nyanyan.”—Hebr. 5:10-12.

Soleki fa a sori, dan sonwan fu den Dyu Kresten fu a fosi yarihondro, no ben meki muiti fu kon frustan sani moro bun, èn den no ben go na fesi na ini a tru anbegi. Fu eksempre, a ben muilek gi den fu bribi den nyun sani di ben kon na krin fu a Wet èn fu a besnèi di sma ben musu besnèi (Tori. 15:1, 2, 27-29; Gal. 2:11-14; 6:12, 13). Son Kresten ben feni en muilek fu tapu nanga spesrutu gwenti. Den gwenti dati ben abi fu du nanga a Sabat di den ben e hori ibri wiki, èn nanga a seremonia di ben e hori na wan spesrutu dei ibri yari, so taki sma ben kan kisi pardon fu sondu (Kol. 2:16, 17; Hebr. 9:1-14). Fu dati ede, Paulus gi den a rai fu leri gebroiki a frustan fu den, fu kon sabi san bun èn san ogri. A ben taigi den tu fu „du muiti fu tron lepi sma” (Hebr. 6:1, 2). A musu fu de so taki a rai disi meki taki son sma bigin luku fa den ben e gebroiki den frustan. Kande na dati yepi den fu go na fesi na ini a tru anbegi. Fa a de nanga wi?

Leri fu gebroiki yu frustan

Fa wi kan leri fu gebroiki wi frustan so taki wi kan tron lepi Kresten? Paulus ben taki dati neleki fa sportman e oefen den skin fu du wan lo frekti sani nanga en, na so wi musu leri fu kon sabi san bun èn san ogri.

John Ratey, na wan professor di e wroko na a Harvard Medical School (wan heiskoro pe sma kan studeri fu tron datra). A man disi e ondrosuku fa a frustan fu libisma e wroko. A ben taki: „A moro bun sani di yu kan du gi yu frustan, na fu du sani di sa dwengi yu fu denki.” Gene Cohen, na a driktoro fu a Center on Aging, Health and Humanities na George Washington University (wan heiskoro pe sma e ondrosuku fa a du kon taki libisma e kon owru). A man disi ben taki: „Te wi e poti prakseri na muilek sani, dan dati e meki taki te fu kaba, wi edetonton e wroko moro bun.”

Dati meki a de wan koni sani te wi e gebroiki wi frustan fu kon sabi Gado Wortu moro bun. Na so wi o man du ’a volmaakti wani fu Gado’ moro bun.—Rom. 12:1, 2.

 Kon abi wan angri gi „tranga nyanyan”

Te wi e angri fu „tron lepi sma”, dan wi musu aksi wisrefi: ’Mi e meki muiti fu kon frustan den tru tori fu Bijbel moro bun? Tra sma e si mi leki wan lepi Kresten?’ Te wan beibi yongu ete, dan wan mama lobi fu gi a beibi dati merki nanga papa. Ma yu kan frustan taki a mama sa broko en ede te a e si taki baka wan tu yari, a pikin no wani nyan tranga nyanyan ete. Wi breiti tu te wi e si taki wan sma di wi e studeri Bijbel nanga en e gi ensrefi abra na Gado èn e teki dopu. Ma fa a de te a sma no e go na fesi baka dati? A sani dati no ben o meki yu lasi ati? (1 Kor. 3:1-4) A leriman e howpu taki baka wan pisi ten, a nyun disipel sa kon tron wan leriman tu.

Wan sma di wani gebroiki en frustan fu taki-go-taki-kon fu sani, musu denki dipi fu sani, èn a sma dati musu meki muiti fu du dati (Ps. 1:1-3). Wi no musu gi pasi taki sani e tapu wi fu denki dipi fu prenspari tori. Wan tu fu den sani dati na telefisi èn sosrefi sani di wi lobi du. Nofo tron wi no abi fu denki tumusi dipi te wi e du den sortu sani dati. Efu wi wani leri fu gebroiki wi frustan bun, dan wi musu kon abi na angri fu studeri Bijbel èn den publikâsi fu „a getrow èn kon srafu” (Mat. 24:45-47). Boiti taki wi e leisi Bijbel doronomo, wi musu poti ten na wan sei tu fu hori na Osofamiri Anbegi èn fu studeri Bijbel tori finifini.

Jerónimo, wan kring-opziener fu Meksikow, e taki dati ibri leisi te wan Waktitoren e kon na doro, a e studeri en wantewante. A e poti ten na wan sei tu fu studeri makandra nanga a wefi fu en. Jerónimo e taki: „Leki trowpaar wi abi a gwenti fu leisi Bijbel makandra ibri dei, èn wi e gebroiki publikâsi soleki a brochure di nen ’Zie het goede land.’” Wan Kresten di nen Ronald, e taki dati ala ten a e du a leisipisi fu Bijbel fu a gemeente. Boiti dati, a abi wán, noso tu sani di en wawan e studeri èn di o teki en wan moro langa pisi ten fu klari. Ronald e taki: „Den sani dati e meki taki mi no man wakti teleki a ten doro fu studeri moro fara.”

Fa a de nanga wi? Wi e gebroiki nofo ten fu studeri Bijbel èn fu denki dipi fu a Wortu fu Gado? Wi e leri fu gebroiki wi frustan? Wi e leri fa wi musu hori wisrefi na Bijbel gronprakseri te wi e teki bosroiti? (Odo 2:1-7) Meki wi tan du muiti fu tron wan lepi Kresten. Iya, meki wi du muiti fu kon abi sabi nanga koni, neleki den wan di leri fa fu gebroiki den frustan fu kon sabi san bun èn san ogri!

[Prenki na tapu bladzijde 23]

Wi „e leri fa fu gebroiki” wi frustan