Feni kibri na mindri a pipel fu Gado
Feni kibri na mindri a pipel fu Gado
„Mi o prèise yu na mindri ala den sma di kon makandra.”—PS. 35:18.
1-3. (a) San ben kan meki taki son Kresten lasi a matifasi di den abi nanga Yehovah (b) Pe a pipel fu Gado kan feni kibri?
JOE nanga en wefi ben de nanga fakansi, èn den go swen na wan presi pe ala sortu moi fisi ben de fu si na ondro watra. Den swen go pikinso moro fara fu go luku san ben de fu si drape. Di Joe en wefi si taki a watra ben kon moro dipi wantronso, dan a taki: „Mi denki taki wi swen go tumusi fara.” Joe piki en: „Yu no abi fu frede, mi sabi san mi e du.” Ma Joe e taki dati syatu baka dati, a bigin aksi ensrefi pe ala den fisi ben de. A skreki srefisrefi di a kon frustan fu san ede fisi no ben de fu si moro. Wantronso a si wan bigi sarki e swen langalanga kon na en tapu. Joe no ben man swen go nowan sei. Di a sarki doro moi krosibei fu en, dan wantronso a bigi fisi disi drai èn a swen gowe.
2 Wi kan agersi a sistema fu Satan nanga watra pe ogri kan miti wi. Den sani fu a sistema disi ben kan hari wan Kresten so te, taki te fu kaba a no e si moro taki ogri kan miti en. Wan tu fu den sani dati, na prisiriten, a wroko di sma e du, nanga gudu. Joe di de wan Kresten owruman, e taki: „A sani di mi ondrofeni e meki mi prakseri den mati di wi abi. Fu taki en leti, wi musu swen pe ogri no sa miti wi, èn pe wi sa abi prisiri, sobun wi musu abi demakandra nanga den sma na ini a gemeente!” Yu no musu go swen pe a dipi, iya, yu no musu meki den sani fu a grontapu hari yu komoto fu a gemeente, fu di dati kan tyari takru bakapisi kon gi yu. Efu oiti dati e pasa nanga yu, dan wantewante yu musu swen go baka na a pisi pe ogri no sa miti yu. Dati wani taki dati yu musu abi demakandra baka nanga a gemeente. Te yu no e du dati, dan te fu kaba yu ben kan lasi a matifasi di yu abi nanga Yehovah.
3 Na ini a ten disi, grontapu na wan presi pe ogri kan miti Kresten (2 Tim. 3:1-5). Satan sabi taki a no abi langa moro, èn a e suku fu swari den wan di no de na ai (1 Petr. 5:8; Openb. 12:12, 17). Ma wi e kisi kibri. Yehovah gi a pipel fu en wan kibripresi fu yepi den fu tan abi wan tranga bribi, èn dati na a Kresten gemeente.
4, 5. Fa furu sma e denki fu a tamara fu den, èn fu san ede den e denki so?
4 A grontapu disi no e gi sma kibri dorodoro, fu di ogri e tan miti sma, èn fu di furu sma no de koloku. Na ini a ten disi, ogridu lai, a libi diri, èn furu rampu e pasa. A sani disi e meki taki furu sma no abi a dyaranti taki sani sa waka bun nanga den. Wi alamala e kisi fu du nanga problema, fu di wi e kon owru èn fu di wi e siki. Èn den sma di abi wan grontapuwroko, wan oso, nofo moni, nanga wan bun gosontu, ben kan aksi densrefi o langa dati o tan so.
5 Na so a de tu taki furu sma no abi wan korostu firi. Milyunmilyun sma ben howpu taki den ben o abi wan koloku trowlibi èn wan koloku osofamiri libi. Ma a sari fu taki dati sani no waka soleki fa den ben fruwakti. Furu kerkisma lasi-ati èn den bruya, fu di den no e agri nanga a tiri di den e kisi fu den kerki fesiman fu den. Dati de so spesrutu te den e si fa den kerki fesiman disi e tyari densrefi na wan fasi di no fiti, èn te den e prakseri den falsi leri di den e kisi. Fu dati ede, furu sma feni taki a wan-enkri sani di den kan du, na fu poti howpu na ini sabiman èn na ini a bun-ati fu libisma. Dati meki a no e fruwondru wi taki sma na wi lontu no abi a dyaranti taki sani sa waka bun nanga den. Fu dati ede, den no wani broko den ede tumusi nanga a tamara fu den.
6, 7. (a) Fa a du kon taki den sma di e dini Gado abi wan heri tra denki leki den wan di no e dini en? (b) Na sortu sani wi sa poti prakseri?
6 Ma den memre fu a Kresten gemeente de heri tra fasi leki den sma fu a grontapu disi! Aladi wi leki a pipel fu Yehovah e kisi fu du nanga furu fu den srefi afersi nanga problema di e miti tra sma, toku wi abi wan tra denki fu sani. (Leisi Yesaya 65:13, 14; Maleaki 3:18.) Fu san ede? Fu di Bijbel e tyari kon na krin na wan tumusi moi fasi fu san ede libisma de na ini so wan takru situwâsi. Boiti dati, wi sabi san fu du te wi e kisi tesi nanga problema na ini a libi. Dati meki wi no e broko wi ede tumusi nanga a ten di e kon. Leki anbegiman fu Yehovah, wi e kisi deki-ati fu no teki denki abra di no e kruderi nanga Bijbel èn fu no du sani di no fiti. Disi e kibri wi gi furu ogri. Na so den memre fu a Kresten gemeente abi wan korostu firi di trawan no abi.—Yes. 48:17, 18; Fil. 4:6, 7.
7 Wan tu eksempre sa yepi wi fu kon si fu san ede den futuboi fu Yehovah abi a dyaranti taki sani sa waka bun nanga den, èn fu san ede grontapusma no abi a dyaranti dati. Den eksempre disi kan gi wi deki-ati fu ondrosuku a fasi fa wi e denki èn a fasi fa wi e tyari wisrefi. Wi sa luku tu efu wi musu meki moro muiti fu fiti den rai di Gado e gi wi so taki wi kan feni kibri.—Yes. 30:21.
„Mi futu ben kon krosibei fu fadon”
8. San den futuboi fu Yehovah ben musu du ala ten?
8 Sensi a bigin di Gado meki libisma, den sma di bosroiti fu dini Yehovah èn fu gi yesi na en, ben e suku fu wai pasi gi den wan di no e gi yesi na Gado. Iya, Yehovah ben sori taki den anbegiman fu en ben o de feanti fu den sma di ben e teki a tiri fu Satan (Gen. 3:15). Fu di a pipel fu Gado abi a fasti bosroiti fu hori densrefi na den gronprakseri fu Gado, meki den handri tra fasi leki den sma na den lontu (Yoh. 17:15, 16; 1 Yoh. 2:15-17). A no ben makriki ala ten fu du dati. A tru taki son futuboi fu Yehovah ben e tweifri son leisi efu a de wan koni sani taki wan sma e gi ensrefi abra na Gado.
9. Fruklari sortu tesi ben miti a skrifiman fu Psalm 73.
9 Wan fu den futuboi fu Yehovah ben e aksi ensrefi efu a ben teki koni bosroiti. A futuboi dati ben de a skrifiman fu Psalm 73, èn a kan taki a ben de wan bakapikin fu Asaf. A psalm skrifiman ben aksi fu san ede a ben gersi leki den ogrisma ben abi bun bakapisi. A ben aksi fu san ede a ben gersi leki den de koloku, èn fu san ede a ben gersi leki den gudu, aladi trawan di e pruberi fu dini Gado e kisi fu du nanga problema.—Leisi Psalm 73:1-13.
10. Fu san ede den afersi di a psalm skrifiman tyari kon na fesi, prenspari gi yu?
10 Oiti yu aksi yusrefi den sani disi di a psalm skrifiman ben taki? Efu dati de so, dan yu no abi fu firi fruferi tumusi, èn yu no abi fu denki taki a bribi fu yu kon swaki. Fu taki en leti, wan lo fu den futuboi fu Yehovah ben abi a denki dati. Dati ben de so tu nanga wan tu fu den sma di Yehovah gebroiki fu skrifi Bijbel (Yob 21:7-13; Ps. 37:1; Yer. 12:1; Hab. 1:1-4, 13). Iya, ala sma di wani dini Yehovah, musu kon frustan a piki tapu wan spesrutu aksi, èn den musu bribi a piki dati tu. Disi na a aksi: A de wan koni sani fu dini Gado èn fu gi yesi na en? A sani disi e meki wi denki na afersi di opo kon na ini a dyari fu Eden, di Satan opo ensrefi teige Gado. Na afersi disi musu tyari kon na krin suma abi a reti fu tiri hemel nanga grontapu (Gen. 3:4, 5). Dati meki a bun te wi alamala e poti prakseri na a tori di a psalm skrifiman tyari kon na fesi. Wi musu dyarusu tapu ogrisma di e meki bigi èn di gersi leki den abi wan switi libi? Wi musu ’fadon’ komoto fu Yehovah, èn teki na eksempre fu den sma disi? Na dati Satan ben o wani taki wi du.
11, 12. (a) San yepi a psalm skrifiman fu no tweifri moro, èn san wi e leri fu na eksempre fu en? (b) San yepi yu fu kon abi a srefi denki leki a psalm skrifiman?
11 San yepi a psalm skrifiman fu no tweifri moro? Aladi a ben agri taki pikinmoro a komoto na tapu a pasi fu regtfardikifasi, toku a kon abi wan tra denki fu sani di a go na ini a „santa presi fu Gado”. Dati pasa di a go na a tabernakel noso a tempel. Drape a ben e kon makandra nanga sma di ben lobi Gado, fu poti prakseri na a wani fu Gado. Ne a psalm skrifiman kon si taki a no ben wani taki den srefi sani di ben o miti den ogrisma, miti en. A ben kan si taki den sani di den ben e du èn den bosroiti di den ben e teki, ben e meki den tanapu na tapu wan „grati presi”. Ala den sma di e drai baka gi Yehovah fu di den e du hurudu, sa kon na wan kaba, fu di „skreki sani” sa miti den. Ma Yehovah sa yepi den wan di e dini en. (Leisi Psalm 73:16-19, 27, 28.) A no de fu taki, dati yu si taki den wortu dati tru. Kande furu sma feni en moro bun fu libi gi densrefi nomo, sondro taki den e hori densrefi na den wet fu Gado. Ma a no de fu taki, dati den sma disi sa kisi takru bakapisi trutru.—Gal. 6:7-9.
12 Sortu tra sani wi e leri fu na eksempre fu a psalm skrifiman? Fu di a ben de na mindri a pipel fu Gado, meki a kon abi a dyaranti taki sani ben o waka bun nanga en, èn a ben kon abi koni. Di a go na a presi pe sma ben e anbegi Yehovah, dan dati yepi en fu denki moro krin èn fu si sani na a yoisti fasi. Te wi de na den gemeente konmakandra na ini a ten disi, dan wi kan feni sma tu di kan gi wi bun rai, èn wi kan kisi bun leri fu Gado. Fu dati ede, Yehovah abi bun reide fu taigi den futuboi fu en fu go na den Kresten konmakandra. Drape den sa kisi deki-ati, èn den sa handri nanga koni.—Yes. 32:1, 2; Hebr. 10:24, 25.
Suku yu mati nanga koni
13-15. (a) San miti Dina, èn san wi e leri fu a tori dati? (b) Fu san ede a de wan kibri gi wi te wi abi demakandra nanga wi Kresten brada nanga sisa?
13 Dina, na umapikin fu Yakob, ben de wan sma di kisi seryusu problema fu di a ben abi demakandra nanga grontapusma. A buku Genesis e sori taki Dina ben gwenti fu abi demakandra nanga den yongu uma fu Kanan di ben e libi na ini a kontren pe en osofamiri ben e libi. Den Kanansma no ben e hori densrefi na den srefi hei markitiki fu den anbegiman fu Yehovah. Na presi fu dati, den sani di sabiman feni, e sori taki a fasi fa den Kanansma ben e libi, meki taki a kondre kon lai nanga afkodrei nanga hurudu. Boiti dati, falsi anbegiman ben e teki prati na fisti seks gwenti, èn den ben e du wan lo ogri (Ex. 23:23; Lef. 18:2-25; Deut. 18:9-12). Luku san pasa fu di Dina ben e moksi nanga den sma disi.
14 Wan man fu Kanan, di Bijbel e kari „a moro lespekiwan na ini en papa oso”, ben si Dina. A man disi di ben nen Sikem, ’grabu Dina, èn a dwengi en fu sribi nanga en’ (Gen. 34:1, 2, 19). Dati ben de wan sari sani trutru! Yu denki taki oiti Dina ben prakseri taki so wan sani ben o miti en? Kande a ben wani de mati nomo fu den yonguwan fu drape, èn kande a no ben denki taki den man disi ben o du en ogri. Ma a sani dati kori Dina trutru.
15 San wi e leri fu a tori disi? Wi e leri taki wi no kan abi demakandra nanga sma di no e anbegi Yehovah, aladi wi e denki taki ogri no sa miti wi. Bijbel e taki dati „takru kompe e pori bun gwenti” (1 Kor. 15:33). Ma te yu abi demakandra nanga sma di abi a srefi bribi leki yu, di e hori densrefi tu na den hei markitiki fu Yehovah, èn di lobi Yehovah tu, dan dati sa de wan kibri gi yu. Den bun mati dati sa gi yu deki-ati fu handri nanga koni.—Odo 13:20.
„Unu wasi kon krin”
16. San na apostel Paulus ben taki fu wan tu sma na ini a gemeente Korente?
16 A Kresten gemeente yepi furu sma fu tapu nanga takru gwenti. Di na apostel Paulus ben skrifi en fosi brifi gi a gemeente na ini Korente, dan a taki fu den kenki di den Kresten drape ben tyari kon fu man libi soleki fa Gado wani. Fosi, sonwan fu den ben e du hurudu, den ben e anbegi kruktu gado, den ben e du sutadu, mansma ben abi seks nanga mansma, den ben de fufuruman, drunguman, èn so moro fara. Paulus ben taigi den: „Unu wasi kon krin.”—Leisi 1 Korentesma 6:9-11.
17. Fa Bijbel gronprakseri yepi furu sma fu kenki den libi?
17 Sma di no abi bribi, no e hori densrefi na gronprakseri di e tiri den na wan yoisti fasi. Den e libi soleki fa densrefi wani, noso den e libi wan yayolibi. Na so a ben de nanga sonwan fu den sma na ini owruten Korente, bifo den ben tron bribiman (Ef. 4:14). Ma ala sma di e kon kisi soifri sabi fu Gado Wortu èn fu den sani di a o du, o man kenki a libi fu den te den e fiti den rai fu Bijbel (Kol. 3:5-10; Hebr. 4:12). Na ini a ten disi, furu sma di de memre fu a Kresten gemeente, kan fruteri yu taki fosi den ben kon leri sabi den regtfardiki markitiki fu Yehovah èn fosi den ben bigin hori densrefi na den markitiki dati, den ben e libi wan yayolibi. Ma toku den no ben de koloku. Na soso di den bigin abi demakandra nanga a pipel fu Gado èn den bigin hori densrefi na Bijbel gronprakseri, dan fosi den kon abi wan korostu firi.
18. San wan yongu sisa ben ondrofeni, èn san dati e sori?
18 Ma son sma di ben bosroiti fu gowe libi a Kresten gemeente, e sari trutru fu di den ben teki a bosroiti dati. Wan sisa di wi sa kari Tanya, e taki dati a ben „sabi pikinso fu a tru anbegi”, ma di a ben abi 16 yari, a gowe libi a gemeente fu „feti baka grontapu sani”. Wan fu den takru bakapisi di a kisi, na taki a kon de nanga bere sondro taki a ben wani dati, èn a puru bere. Now a e taki: „Na ini den dri yari di mi no ben abi demakandra nanga a gemeente, furu hati sani miti mi di mi no sa frigiti noiti moro. Wan sani di e hati mi te nanga now, na taki mi kiri a pikin di ben e gro na ini mi bere. . . . Ala den yonguwan di e angri fu ’tesi’ a grontapu awinsi na fu wan syatu pisi ten nomo, mi wani taigi unu: ’No du!’ Kande a o switi na ini a bigin, ma a o bita srefisrefi bakaten. Grontapu no abi noti fu gi unu. Na soso hati ede unu o kisi. Mi sabi. Mi tesi en. Tan na ini na organisâsi fu Yehovah! Dati na a wan-enkri fasi fu libi di sa meki yu de koloku.”
19, 20. Sortu kibri wi e kisi na ini a Kresten gemeente, èn fa dati e pasa?
19 Prakseri san ben o pasa nanga yu efu yu ben o gowe libi a Kresten gemeente pe yu e kisi kibri. Furu sma e memre taki fosi den ben teki a tru anbegi, den no ben abi nowan marki na ini a libi. Ma now den no wani prakseri a libi dati srefisrefi (Yoh. 6:68, 69). Te yu e tan abi demakandra nanga yu Kresten brada nanga sisa, dan yu sa tan abi a dyaranti taki sani o waka bun nanga yu. Boiti dati, yu no sa ondrofeni den sari sani nanga den problema di furu sma na ini a grontapu fu Satan e ondrofeni. Te yu abi demakandra nanga yu Kresten brada nanga sisa, èn te yu e go na den gemeente konmakandra doronomo, dan yu sa tan hori na prakseri taki den regtfardiki markitiki fu Yehovah e tyari wini kon gi yu. Boiti dati, yu sa kisi deki-ati fu hori yusrefi na den markitiki dati. Yu abi ala reide fu ’prèise Yehovah na mindri ala den sma di kon makandra’, neleki fa a psalm skrifiman ben e du dati.—Ps. 35:18.
20 A no de fu taki, dati ten na ten ala Kresten e ondrofeni sani di e meki en muilek gi den fu tan gi yesi na Gado. Kande wan sma musu sori den nomo san na a yoisti pasi. San yu, èn sosrefi tra sma fu a gemeente, kan du fu yepi Kresten brada nanga sisa di e ondrofeni den sortu sani dati? Na ini a tra artikel wi sa luku fa yu kan ’tan trowstu yu brada nanga sisa, èn fa yu kan tan gi den deki-ati’.—1 Tes. 5:11.
San yu ben sa piki?
• San wi e leri fu na eksempre fu a skrifiman fu Psalm 73?
• San wi e leri fu a sani di Dina ondrofeni?
• Fu san ede yu kan kisi kibri na ini a Kresten gemeente?
[Aksi fu a tori disi]
[Prenki na tapu bladzijde 7]
Swen pe ogri no sa miti yu; sobun, tan abi demakandra nanga a gemeente!