Hori yusrefi te yu e atibron ’fu kan tan wini na ogri’
Hori yusrefi te yu e atibron ’fu kan tan wini na ogri’
„No teki refensi, mi lobiwan, . . . ma tan du bun fu kan wini na ogri.”—ROM. 12:19, 21.
1, 2. Fa wan tu Kotoigi ben de wan bun eksempre gi trawan di den ben e go na wan presi?
DI WAN bijkantoro ben o gi abra na Gado, dan wan grupu fu 34 Yehovah Kotoigi ben de na pasi fu go drape. Ma di den ben de na loktu kaba, dan na opolani di den ben de na ini ben musu saka baka, fu di a ben abi wan problema. Den ben fruwakti taki na opolani ben o tan na gron wán yuru nomo fu lai oli, ma a heri sani teki 44 yuru langa. Den ben saka na wan farawe opolani presi, den no ben abi nofo nyanyan nanga watra, èn bun toilet no ben de. Furu sma kisi atibron èn den ben wani feti nanga den wrokoman na a opolani presi. Ma den brada nanga sisa no ben meki dyugudyugu.
2 Te fu kaba, di den Kotoigi doro na a bijkantoro di ben o gi abra na Gado, dan a lasti pisi fu a programa ben e hori. Aladi den ben weri, toku den no gowe wantewante, ma den tan drape fu abi demakandra nanga den brada nanga sisa. Bakaten, den yere taki sma ben feni en moi fu si taki den ben hori pasensi èn taki den no ben kisi atibron di den ben de na a opolani presi. Wan fu den sma na ini na opolani ben taigi den sma fu a bedrijf di ben e frei na opolani: „Efu den 34 Kresten di ben de na ini na opolani no ben tyari densrefi na a fasi dati, dan wan bigi feti ben o pasa na a opolani presi.”
Wi e libi na ini wan grontapu pe sma e kisi atibron esi-esi
3, 4. (a) Sortu takru bakapisi a tyari kon fu di sma e kisi faya atibron? O langa dati de so kaba? (b) A de so taki Kain ben kan hori ensrefi? Fruklari dati.
3 Den problema fu a libi na ini na ogri sistema disi kan meki sma kisi atibron (Preik. 7:7). Nofo tron a sani disi e meki taki sma e kisi bita-ati gi trawan, èn den e bigin du ogri nanga tranga. Difrenti kondre e feti nanga makandra, èn sosrefi pipel di e libi na ini a srefi kondre e feti nanga makandra. Fu di famiriman no man feni en nanga makandra, meki wánfasi no de na ini furu osofamiri. Na atibron di sma abi èn na ogri di den e du, a no wan sani fu tide. Kain, a fosi manpikin fu Adam nanga Eva, ben kiri en pikin brada Abel, fu di a ben e dyarusu na en tapu. Kain du a bigi sondu disi aladi Yehovah ben gi en a rai fu luku bun nanga na atibron fu en. Yehovah ben pramisi en tu taki a ben o blesi en efu a ben hori ensrefi.—Leisi Genesis 4:6-8.
4 Aladi Kain ben gebore leki sondusma, toku a ben kan bosroiti san a ben o du. A ben kan bosroiti fu hori ensrefi. Ma fu di a no du dati, meki a ben musu tyari a frantwortu gi na ogri di a ben du. Fu di wi na sondu libisma tu, meki a muilek gi wi fu no atibron èn fu no handri nanga atibron. Tra seryusu problema de tu di e gi wi moro broko-ede na ini den „muilek ten” disi (2 Tim. 3:1). Fu eksempre, moni problema kan meki en muilek gi wi fu hori wisrefi. Skowtu nanga organisâsi di e yepi osofamiri, e taki dati den moni problema di sma abi, e meki taki den e kisi atibron moro nanga moro èn a e meki tu taki den e du ogri nanga den memre fu den osofamiri.
5, 6. Fa wi kan kon de leki den grontapusma te a abi fu du nanga na atibron di den e atibron?
5 Boiti dati, furu sma di wi e miti, na sma di „lobi densrefi nomo” di abi „heimemre”, èn di e „du sani nanga trawan na wan ogri-ati fasi”. A kan pasa makriki taki wi e teki den takru fasi disi abra èn taki wi e kisi atibron (2 Tim. 3:2-5). Fu taki en leti, felem nanga telefisi programa e gi sma a denki taki a bun fu pai ogri nanga ogri, èn taki a fiti taki sma e du ogri fu lusu problema. Furu felem e meki sma angri gi a momenti te na ogriman o „kisi en pai”, èn nofo tron dati wani taki dati a bun sma na ini a felem sa kiri na ogriman na wan ogri-ati fasi na a kabapisi fu a felem.
6 Den sortu felem disi no e leri sma den fasi fu Gado, ma den e gi sma deki-ati fu kon abi „a yeye fu grontapu” èn a denki fu Satan, a tiriman fu grontapu di de nanga bigi atibron (1 Kor. 2:12; Ef. 2:2; Openb. 12:12). A yeye dati e plisi den lostu fu a sondu skin, èn a no e kruderi srefisrefi nanga a santa yeye fu Gado èn nanga a froktu fu a yeye. Iya, wan prenspari leri fu a Kresten bribi, na taki wi no musu pai ogri nanga ogri. (Leisi Mateyus 5:39, 44, 45.) Fa wi kan fiti den leri fu Yesus moro bun?
Bun eksempre nanga takru eksempre
7. San ben pasa fu di Simeon nanga Leifi no ben hori densrefi?
7 Na ini Bijbel wi e feni furu rai di e yepi wi fu hori wisrefi te wi e atibron. Èn Bijbel abi moi eksempre tu di e sori san kan pasa te wi e gi yesi na den rai dati èn te wi no e gi yesi na den. Luku san pasa di Simeon nanga Leifi, den manpikin fu Yakob, du ogri nanga Sikem fu di a ben sribi nanga Dina, a sisa fu den. A sani dati ben „hati den trutru èn den ati bron srefisrefi” (Gen. 34:7). Dati meki den tra manpikin fu Yakob go feti nanga den sma fu a foto fu Sikem. Den fufuru sani na ini a foto, èn den teki den umasma nanga pikin tyari go na ini katibo. Den no du den sani disi soso fu di wan ogri ben miti Dina, ma a kan tu taki den ben handri so fu di a ben hati den taki den ben kisi syen. Den ben feni taki Sikem ben afrontu den nanga den papa Yakob. Ma fa Yakob ben feni a sani di den ben du?
8. San a tori fu Simeon nanga Leifi e leri wi te a abi fu du nanga a pai di sma e pai ogri nanga ogri?
8 A sari sani di ben miti Dina ben musu fu hati Yakob. Ma toku a no ben feni en bun taki den manpikin fu en ben pai ogri nanga ogri. Ma toku Simeon nanga Leifi pruberi fu sori Yakob taki den ben abi leti fu handri so. Den ben taigi en: „Wi ben musu meki den teki wi sisa leki wan huru-uma dan?” (Gen. 34:31) Ma a tori no ben kaba ete, bika Yehovah no ben agri nanga san den man disi ben du. Furu yari baka dati, Yakob taki dati na fu di Simeon nanga Leifi ben du ogri, meki den bakapikin fu den ben o panya na mindri den lo fu Israel. (Leisi Genesis 49:5-7.) Iya, Gado no ben feni en bun taki den ben lasi densrefi di den ben atibron, èn a papa fu den no ben feni en bun tu.
9. Na sortu okasi David pikinmoro lasi ensrefi?
9 Ma Kownu David ben handri heri tra fasi. Furu okasi ben de pe a ben kan pai ogri nanga ogri, ma a no du dati (1 Sam. 24:3-7). Ma wán leisi, pikinmoro a lasi ensrefi di a ben e atibron. Wan guduman di ben nen Nabal, ben kosi den man fu David, aladi den man dati ben hori wakti gi den meti nanga den skapuman fu Nabal. A kan taki a sani disi ben afrontu David, spesrutu fu di den man fu en ben kisi syen. Dati meki David ben de kaba fu pai ogri nanga ogri. Di David nanga den man fu en ben de na pasi fu go du ogri nanga Nabal nanga en osofamiri, dan wan yonkuman taigi Abigail, a koni wefi fu Nabal, san ben o pasa. A yonkuman disi begi Abigail fu du wan sani. Wantewante na uma disi tyari wan lo sani kon na wán fu gi David, èn a hari go miti en. A aksi David pardon gi a don sani di Nabal ben du, èn a begi en fu abi frede gi Yehovah èn fu no pai ogri nanga ogri. David kisi ensrefi, èn a taki: ’Blesi fu yu, fu di yu meki taki mi no poti misrefi na brudu-paiman tide.’—1 Sam. 25:2-35.
A fasi fa Kresten musu handri
10. Fa Kresten musu handri te sma e du ogri nanga den?
10 A sani di pasa nanga Simeon nanga Leifi, èn a sani di pasa na mindri David nanga Abigail, e sori krin taki Yehovah no feni en bun taki sma e lasi densrefi te den e atibron. Wi e si tu taki a e blesi a muiti di sma e du fu meki sani bun baka nanga trawan. Na apostel Paulus ben skrifi: „Efu a kan, efu a e didon na unu, dan libi na ini vrede nanga ala sma. No teki refensi, mi lobiwan, ma libi en gi na atibron fu Gado; bika Gado Buku taki: ’Na mi o teki refensi; mi o pai den baka gi den ogri di den du, na so Yehovah taki.’ Ma ’efu angri e kiri a feanti fu yu, gi en nyanyan; efu watra e kiri en, gi en wan sani fu dringi; bika te yu e du disi, dan dati sa safu en ati, iya, a sa de neleki yu poti wan ipi faya krofaya na tapu en ede’. No meki ogri wini yu, ma tan du bun fu kan wini na ogri.”—Rom. 12:18-21. *
11. Fa wan sisa leri fu hori ensrefi te a ben e atibron?
11 Wi kan fiti a rai dati tu. Fu eksempre, wan sisa ben go kragi na wan owruman taki a basi fu en no ben e handri bun nanga en, èn taki a no ben abi switifasi. A sisa disi ben atibron nanga na uma èn a ben wani gowe libi a wroko. Na owruman taigi en taki a no ben musu hasti ensrefi fu teki a bosroiti dati. A kon si taki na fu di a sisa ben e kisi atibron te a basi fu en no ben handri bun nanga en, meki a situwâsi ben e kon moro ogri (Titus 3:1-3). Na owruman sori en taki awansi a ben o feni wan tra wroko te fu kaba, toku a ben o abi fu handri tra fasi te sma no ben e handri bun nanga en. A gi a sisa deki-ati fu fiti a rai fu Yesus èn fu handri nanga a basi fu en soleki fa ensrefi ben o wani taki trawan handri nanga en. (Leisi Lukas 6:31.) A sisa taki dati a ben o pruberi fu du san na owruman ben taigi en fu du. San ben de a bakapisi? Baka wan pisi ten, a basi bigin handri na wan switi fasi nanga a sisa, èn a taigi en tangi srefi gi a wroko di a ben e du.
12. Fu san ede a e hati wi spesrutu te wi Kresten brada nanga sisa no e handri bun nanga wi?
12 Kande a no e fruwondru wi te wi e kisi den sortu problema dati nanga sma di no de memre fu a Kresten gemeente. Wi sabi taki na ini a sistema fu Satan, furu sani no e waka na wan reti fasi. Wi sabi tu taki wi musu luku bun taki wi no e kisi atibron te ogrisma no e handri bun nanga wi (Ps. 37:1-11; Preik. 8:12, 13; 12:13, 14). Ma te wi e kisi problema nanga wan Kresten brada noso sisa, dan a sani dati kan hati wi moro srefi. Wan sisa ben taki: „Di mi kon na ini a tru anbegi, dan a moro bigi problema di mi ben abi, na taki mi ben musu kon frustan taki a pipel fu Yehovah e meki fowtu tu.” Di wi drai baka gi wan grontapu pe sma no abi firi gi trawan, èn pe sma no e broko den ede nanga trawan, dan wi ben e howpu taki ala den sma na ini a gemeente sa sori switifasi gi makandra soleki fa a fiti Kresten. Sobun, efu wan tra Kresten, spesrutu wan di abi grani na ini a gemeente, e handri sondro fu denki, noso e du wan sani di no fiti gi wan Kresten, dan dati kan hati den firi fu wi, noso a kan meki wi kisi atibron. Kande wi sa aksi wisrefi: ’Fa den sortu sani disi kan pasa na mindri a pipel fu Yehovah?’ Fu taki en leti, den sortu sani dati ben e pasa srefi na mindri salfu Kresten na ini den dei fu den apostel (Gal. 2:11-14; 5:15; Yak. 3:14, 15). San wi musu du te den Kresten brada nanga sisa fu wi no e handri bun nanga wi?
13. Fu san ede wi musu du muiti fu lusu kesekese, èn fa wi musu du dati?
13 A srefi sisa dati ben taki: „Mi leri fu begi gi iniwan sma di ben hati den firi fu mi. A sani dati e yepi ala ten.” Soleki fa wi ben leisi kaba, dan Yesus leri wi fu begi gi den wan di e frufolgu wi (Mat. 5:44). Dati meki wi abi moro reide fu begi gi wi Kresten brada nanga sisa! Neleki fa wan papa wani taki den pikin fu en lobi makandra, na so Yehovah wani taki den futuboi fu en na grontapu musu man feni en nanga makandra. Wi abi a howpu fu libi na ini vrede nanga makandra èn fu de koloku fu têgo. Boiti dati, Yehovah e leri wi fu du dati nownow kaba. A wani taki wi musu wroko makandra fu du a bigi wroko di a gi wi fu du. Sobun, meki wi lusu kesekese, meki wi ’no prakseri’ den fowtu fu trawan, èn meki wi tan na ini wánfasi. (Leisi Odo 19:11.) Na presi taki wi e hari wisrefi puru fu trawan, wi musu yepi makandra fu tan na mindri a pipel fu Gado, pe Yehovah en ’anu sa de fu têgo na wi ondro’ fu yepi wi.—Deut. 33:27.
Sani sa waka bun te wi e sori safri-ati gi ala sma
14. Fa wi kan kakafutu gi a denki fu Satan di e tyari prati kon?
14 Satan nanga den ogri yeye fu en wani tapu pasi gi wi fu meki a bun nyunsu bekènti. Dati meki den e du ala muiti fu tyari bruya kon na ini koloku osofamiri èn na ini gemeente. Den e pruberi tu fu tyari prati kon fu di den sabi taki te wánfasi no de, dan sani no sa waka bun (Mat. 12:25). Efu wi no wani taki a takru denki fu den abi krakti na wi tapu, dan wi musu teki a rai disi di Paulus ben gi wi: „Wan srafu fu Masra no abi fu meki trobi, ma a musu abi switifasi gi ala sma” (2 Tim. 2:24). Hori na prakseri taki wi „no e feti nanga libisma, ma . . . nanga den ogri yeye.” Efu wi wani wini a feti disi, dan wi musu weri ala den fetisani di Gado gi wi fu feti, èn wán fu den na „a bun nyunsu fu vrede”.—Ef. 6:12-18.
15. San wi musu du te sma di no de memre fu a gemeente e du takru sani nanga wi?
15 Den feanti fu Yehovah e du wan lo takru sani fu meki en muilek gi a pipel fu en di lobi vrede. Sonwan fu den feanti disi e du ogri nanga den Kotoigi fu Yehovah. Trawan fu den e fruteri ogri-ati lei fu wi na ini nyunsu nanga koranti, noso na krutubangi. Yesus ben taigi den bakaman fu en taki den ben kan fruwakti dati (Mat. 5:11, 12). San wi musu du? Wi noiti no musu taki noso du wan sani di e sori taki wi wani ’du ogri baka nanga wan sma di du wi ogri’.—Rom. 12:17; leisi 1 Petrus 3:16.
16, 17. Sortu fruferi sani ben miti wan gemeente?
16 Awansi san Didibri e tyari kon na wi tapu, te wi e „tan du bun fu kan wini na ogri”, dan wi kan gi wan bun kotoigi. Fu eksempre, wan gemeente na tapu wan fu den èilanti na ini a Stille Oceaan, ben yuru wan presi fu hori a Memrefesa. Di den kerki fesiman fu drape kon sabi dati, dan den taigi den sma fu a kerki fu den fu kon makandra na ini a presi dati. Den ben o hori kerki na a srefi ten di a Memrefesa ben o hori. Ma na edeman fu skowtu gi den kerki fesiman a komando fu sorgu taki a presi ben fri so taki Yehovah Kotoigi ben kan hori a konmakandra fu den. Ma di a ten dati doro, dan a presi ben lai nanga kerkisma, èn den bigin hori kerki.
17 Na a ten di skowtu ben e sreka sani fu puru den sma nanga tranga na ini a presi, dan a fesiman fu a kerki kon na wan fu den owruman fu wi, èn a aksi en: „Unu ben o hori wan spesrutu konmakandra tideneti?” Di a brada taigi en fu a Memrefesa, dan a man piki en: „O, mi no ben sabi!” Di a taki dati, dan a skowtu piki en: „Ma wi taigi yu di mamanten!” A kerki fesiman drai luku a brada, dan a lafu wan doti lafu èn a taki: „San yu o du now? A heri presi lai nanga sma. Yu wani taigi mi taki yu o meki skowtu yagi wi?” A ben seti sani na wan triki fasi fu meki a gersi leki den Kotoigi na den wan di no e handri bun nanga trawan! San den brada ben o du?
18. San den brada du di den kerki fesiman ben meki sani muilek gi den, èn san ben de a bakapisi?
18 Den Kotoigi gi den kerkiman na okasi fu hori kerki wan afu yuru langa, èn baka dati den ben o hori a Memrefesa. Den hori kerki pasa wan afu yuru, ma baka di den kerkisma komoto na ini a presi, dan den brada bigin hori a Memrefesa. A tra dei fu en, Gran Lanti sreka wan komte di ben musu ondrosuku san ben pasa trutru. Baka di den kon sabi san ben pasa, dan a komte fruplekti a kerki fu meki bekènti taki a no den Kotoigi ben tyari a problema kon, ma na a fesiman fu a kerki. Den sma fu a komte taigi Yehovah Kotoigi tangi tu taki den ben hori pasensi na ini a muilek situwâsi dati. Fu di den Kotoigi ben du muiti fu „libi na ini vrede nanga ala sma”, meki sani ben waka bun.
19. Sortu tra sani kan yepi wi fu libi na ini vrede nanga trawan?
19 Wan tra fasi fa wi kan tan libi na ini vrede nanga trawan, na te wi e taki na wan switi fasi. Na ini a tra artikel wi sa luku san dati wani taki, èn fa wi kan leri fu taki na a fasi dati.
[Futuwortu]
^ paragraaf 10 Den wortu „faya krofaya” abi fu du nanga wan gwenti di sma fu owruten ben abi fu smèlter isri noso kopro puru na ini ston. Sma ben e poti faya na ondrosei èn na tapusei fu den ston, so taki na isri noso a kopro ben kan komoto na ini. Te wi e sori switifasi gi den wan di no e handri bun nanga wi, dan dati kan safu na ati fu den, èn kande den sa sori switifasi gi wi.
Yu kan tyari disi kon na krin?
• Fu san ede sma na ini a ten disi e atibron so?
• Sortu eksempre na ini Bijbel e sori san kan pasa te wi e hori wisrefi te wi e atibron èn te wi no e du dati?
• San wi musu du te wan Kresten brada noso sisa e hati den firi fu wi?
• San wi musu du te sma di no de memre fu a gemeente e du wan lo takru sani nanga wi?
[Aksi fu a tori disi]
[Prenki na tapu bladzijde 16]
Simeon nanga Leifi drai kon baka na oso, baka di den ben puru atibron tapu trawan
[Prenki na tapu bladzijde 18]
Te wi e sori switifasi gi trawan, dan dati kan meki taki den sori switifasi gi wi