San yu kan du te yu trowpatna no e libi bun nanga yu?

MARGARITA nanga en masra Raúl ben e dini Yehovah leki furuten dinari furu yari langa. * Ma syatu baka di a fosi pikin fu den gebore, Raúl gi pasi taki a matifasi di a ben abi nanga Yehovah kon swaki. Te fu kaba, Raúl bigin du hurudu, èn den brada puru en fu a Kresten gemeente. Margarita e taki: „Di ala den sani disi pasa, mi ben e denki taki mi ben o dede. Mi ben brokosaka srefisrefi, èn mi no ben sabi san fu du.”

Syatu baka di Jane trow, en masra du wan sani di meki taki a no ben man frutrow en moro, èn a ben muilek tu gi en fu sori lobi gi en. En masra bigin fon en. Jane e taki: „A fosi leisi di a naki mi wan kofu, mi no ben man bribi, èn mi ben e firi syen. A bigin teki en leki wan gwenti fu naki mi, èn ibri leisi a ben e begi mi fu gi en pardon. Leki Kresten, mi ben denki taki mi ben de fruplekti fu gi en pardon, èn fu no hori en na ati. Mi ben denki tu taki a no ben fiti fu taki nanga trawan fu a problema fu wi. Mi ben denki taki a no ben o fiti srefi fu fruteri den owruman na ini a gemeente fu wi. Na so mi masra tan fon mi furu yari langa, èn ibri tron baka mi ben e gi en pardon. A heri pisi ten dati, mi ben e denki taki wan sani musu de di mi ben kan du fu meki mi masra lobi mi. Di a gowe libi mi nanga na umapikin  fu wi te fu kaba, dan mi ben feni taki mi no ben de wan bun wefi. Mi ben feni taki mi ben musu du moro muiti fu sorgu taki a trowlibi no ben pori, noso kande mi ben musu taki moro.”

Kande yu masra no e libi bun nanga yu, neleki fa dati pasa nanga Margarita nanga Jane. Kande a sani dati meki taki yu e firi brokosaka, taki yu abi moni problema, èn kande a bribi fu yu kon swaki tu. Noso kande yu na wan masra di e firi brokosaka èn di abi problema fu di yu wefi du sutadu. A no de fu taki, dati wi e libi na ini ’muilek ten di tranga fu pasa’, soleki fa Bijbel ben taki na fesi. A profeititori disi e sori taki na ini „den lasti dei” osofamiri ben o kisi problema, èn furu sma no ben o abi lobi gi makandra. Son sma ben o taki dati den e dini Gado, aladi dati no tru (2 Tim. 3:1-5). Den problema disi e miti tru Kresten tu. Sobun, san yu kan du te yu trowpatna no e libi bun nanga yu?

Si yusrefi soleki fa Yehovah e si yu

Na ini a bigin, a kan muilek gi yu fu bribi taki wan sma di yu lobi, du so wan hati sani nanga yu. Kande yu sa feni srefi taki na yu meki taki yu trowpatna du a sondu dati.

Ma hori na prakseri taki srefi Yesus di no ben abi sondu, ondrofeni taki wan sma di a ben lobi, tori en. Yesus ben denki bun fosi a bosroiti suma a ben o teki leki den moro bun mati fu en, noso den apostel, èn a begi Gado tu fu yepi en fu teki wan bun bosroiti. Ala den 12 apostel ben de reti-ati futuboi fu Yehovah. Sobun, wi kan frustan taki Yesus ben e sari srefisrefi di Yudas ’kori en bakaten’ (Luk. 6:12-16). Ma Yehovah no ben feni taki Yesus ben de frantwortu gi san Yudas ben du.

A no de fu taki, dati nowan trowpatna na ini a ten disi de sondro sondu. Ala tu patna sa meki fowtu. Nanga yepi fu santa yeye, wan psalm skrifiman ben skrifi a tru tori disi: „Ke Yah, Yehovah, efu na fowtu yu ben e luku, dan suma ben o man tanapu na yu fesi?” (Ps. 130:3) Neleki Yehovah, ala tu trowpatna musu de klariklari fu gi makandra pardon gi den swakifasi fu den.—1 Petr. 4:8.

Ma „ibriwan fu wi o abi fu gi Gado frantwortu” (Rom. 14:12). Efu wan trowpatna kon abi a gwenti fu taigi en patna hati sani, noso fu naki en, dan na en sa musu gi frantwortu na Yehovah. Te sma e du ogri nanga trawan, èn te den e taigi trawan hati sani, dan Yehovah no feni dati bun kwetikweti. Sobun, nowan enkri reide no de taki wan sma e handri so takru nanga a patna fu en (Ps. 11:5; Ef. 5:33; Kol. 3:6-8). Fu taki en leti, efu wan Kresten e kisi faya atibron ibri tron baka, èn a no wani kenki, dan den brada musu puru en fu a Kresten gemeente (Gal. 5:19-21; 2 Yoh. 9, 10). Wan trowpatna no abi fu firi fruferi taki a fruteri den owruman taki en trowpatna e tyari ensrefi na a takru fasi dati. Iya, Yehovah e firi gi den wan di ondrofeni den ogri dati.

Te wan sma du sutadu, dan a no sondu teige en trowpatna wawan, ma a sondu tu teige Yehovah (Mat. 19:4-9; Hebr. 13:4). Efu a patna di no abi fowtu na ini a tori du ala san a man fu hori ensrefi na Bijbel gronprakseri, dan a no abi fu denki taki na en meki taki a patna fu en du sutadu.

Hori na prakseri taki Yehovah sabi fa yu e firi. A ben kari ensrefi a masra èn eiginari fu a pipel fu Israel. Boiti dati, a Wortu fu en abi furu moi pisi na ini di e sori fa a ben e sari di a pipel dati bigin anbegi tra gado (Yes. 54:5, 6; Yer. 3:1, 6-10). Yu kan abi a dyaranti taki Yehovah sabi heri bun fa yu e firi te a trowpatna fu yu no e libi bun nanga yu (Mal. 2:13, 14). A sabi taki yu abi trowstu nanga yepi fanowdu.

A fasi fa Yehovah e trowstu sma

Wan fu den sani di Yehovah e gebroiki fu trowstu sma, na a Kresten gemeente. Jane ben kisi a yepi dati. A e fruteri: „A kring-opziener ben kon na a gemeente na wan ten di mi ben e firi brokosaka srefisrefi. A ben sabi taki mi ben lasi-ati fu di mi masra ben wani broko trow nanga mi. A teki en ten fu taki nanga mi èn wan fu den tekst di a gebroiki fu gi mi deki-ati, na  1 Korentesma 7:15. Den Bijbeltekst nanga den sani di a taigi mi fu gi mi deki-ati, meki taki mi no ben e suku a fowtu moro na misrefi. A sani dati yepi mi tu fu kon abi wan korostu firi.” *

Margarita, di ben kari na a bigin fu na artikel, leri tu taki Yehovah e gebroiki a Kresten gemeente fu yepi den futuboi fu en. Margarita e taki: „Di mi kon frustan taki mi masra no ben wani sori berow, dan mi teki mi pikin èn mi froisi go na wan tra foto. Di mi doro drape, dan mi ben man yuru tu kamra. A dei baka dati, mi ben e puru den sani na ini den kofru fu mi, èn mi ben e sari so te. Na a momenti dati, wan sma naki na a doro. Mi ben denki taki a ben de na uma di ben yuru den kamra gi mi èn di ben e libi na sei. Mi ben fruwondru fu si taki a ben de a sisa di ben studeri Bijbel nanga mi mama, èn di ben yepi na osofamiri fu wi fu kon sabi a tru anbegi. A no ben fruwakti taki a ben o miti mi drape, ma a ben kon na a oso disi fu di a ben e studeri Bijbel nanga na uma di ben yuru den kamra gi mi. A sani disi ben de so wan frulekti gi mi taki mi bigin krei. Mi fruteri en san ben pasa nanga mi, èn ensrefi bigin krei tu. Wantewante a seti sani so taki wi ben kan go na a konmakandra a dei dati. Den sma na ini a gemeente gi wi wan switikon, èn den owruman seti sani fu yepi mi nanga mi osofamiri, so taki wi ben kan tan dini Yehovah.”

A fasi fa trawan kan yepi

Iya, memre fu a Kresten gemeente kan yepi wi na furu difrenti fasi. Fu eksempre, Margarita ben musu feni wan wroko now. Ten na ten, wan osofamiri na ini a gemeente e luku den pikin fu en te den ben komoto na skoro.

Margarita e taki: „A sani di mi ben e warderi trutru, na taki den brada nanga sisa ben de klariklari fu wroko na ini a preikiwroko makandra nanga mi èn nanga den pikin fu mi.” Te memre fu a gemeente e yepi makandra na a fasi disi, dan den e yepi fu „tyari den hebi fu makandra”, èn na so den e hori densrefi na „a wet fu Krestes”.—Gal. 6:2.

Den wan di e pina leki bakapisi fu den sondu di trawan du, e warderi en te den e kisi a sortu yepi dati. Di Monique en masra gowe libi en, dan a libi en nanga wan paiman fu 15.000 Amerkan dala, èn en wawan ben musu sorgu gi den fo pikin fu den. Monique e taki: „Den Kresten brada nanga sisa sori so furu lobi gi mi. Mi no sabi fa mi ben o du efu den no ben yepi mi. Brada di abi switifasi, teki ten fu yepi den pikin fu mi, èn mi ben e firi taki na Yehovah ben e yepi mi. Mi ben breiti fu si fa a sani dati yepi den pikin fu tron lepi Kresten. Mi  ben kan go na den owruman te mi ben abi rai fanowdu. Efu mi ben abi wan broko-ede, dan den ben e arki mi.”—Mark. 10:29, 30.

A no de fu taki, dati wan lobi mati sabi o ten a moro bun fu no taki nanga wan sma fu a sari sani di a ondrofeni (Preiki. 3:7). Margarita e taki: „Nofo tron te mi ben e taki nanga den sisa fu a nyun gemeente, dan mi ben lobi fu taki fu a preikiwroko, fu den Bijbelstudie fu wi, èn fu den pikin fu wi. Wi ben e taki fu ala sortu sani, boiti den problema fu mi. Mi ben warderi en taki den yepi mi fu frigiti den sani di ben pasa nanga mi, èn taki den yepi mi fu bigin wan nyun libi.”

Dwengi yusrefi fu no pai ogri nanga ogri

Kande yu no feni taki na yu de frantwortu gi den sondu fu yu trowpatna, ma kande yu e mandi taki yu musu pina so, leki bakapisi fu a sani di a du. Efu yu e tan atibron nanga yu patna, dan dati kan meki en muilek gi yu fu tan gi yesi na Yehovah. Fu eksempre, kande yu sa suku fasi fu pai ogri nanga ogri.

Efu yu e si taki yu wani pai ogri nanga ogri, dan kan de yu kan prakseri na eksempre fu Yosua nanga Kaleb. Den reti-ati man disi go luku a Pramisi Kondre kibrikibri, aladi den ben kan lasi den libi. Den tra man di ben go luku a kondre tu, no ben abi bribi, èn den meki taki a pipel trangayesi Yehovah. Di Yosua nanga Kaleb ben pruberi fu gi a pipel deki-ati fu tan gi yesi na Gado, dan sonwan fu den Israelsma ben wani fringi ston na den tapu (Num. 13:25–14:10). Leki bakapisi fu den sani di Israel du, Yosua nanga Kaleb ben musu waka lontu na ini a gran sabana 40 yari langa. Iya, den ben musu du dati aladi densrefi no ben du wan sondu, ma tra sma ben du dati.

Aladi Yosua nanga Kaleb ben e sari fu a sani disi, toku den no kisi bita-ati leki bakapisi fu a sondu fu den brada fu den. Den tan poti prakseri na a diniwroko di den ben musu du gi Yehovah. Na a kaba fu den 40 yari di den ben tan na ini a gran sabana, den nanga den Leifisma kisi a grani fu go libi na ini a Pramisi Kondre.—Num. 14:28-30; Yos. 14:6-12.

Te yu trowpatna du sutadu, dan dati kan meki yu firi sari wan heri pisi ten. Kande unu e broko trow, ma toku yu ben kan firi brokosaka bakaten, èn kande yu sa abi moni problema tu. Ma no denki takru fu sani, fu di dati kan tapu yu fu si sani soleki fa Yehovah e si sani. Na presi fu dati, hori na prakseri taki Yehovah sabi heri bun fa fu handri nanga sma di e pasa den markitiki fu en fu espresi. Den trangayesi Israelsma di ben e libi na ini a gran sabana, ben kon frustan dati tu.—Hebr. 10:30, 31; 13:4.

Yu kan horidoro!

Na presi taki yu e meki den takru denki fu yu gi yu broko-ede, a moro bun fu poti prakseri na a Wortu fu Yehovah. Jane e taki: „Fu di mi ben e arki den cassette-lolo fu A Waktitoren nanga na Ontwaakt!, meki mi ben man horidoro. Den konmakandra gi mi furu krakti tu. Mi ben e teki prati fayafaya na den konmakandra, èn dati yepi mi fu no prakseri den problema fu mi. A preikiwroko ben e yepi mi na a srefi fasi tu. Fu di mi ben e yepi trawan fu kon abi bribi na ini Yehovah, meki mi eigi bribi kon tranga. Èn fu di mi ben studeri Bijbel nanga sma, meki mi ben man tan poti prakseri na den moro prenspari sani.”

Monique di wi ben kari kaba, e taki: „Fu di mi tan go na den konmakandra doronomo, èn fu di mi ben e teki prati na a preikiwroko so furu leki mi man, meki mi ben man horidoro. Leki osofamiri, wi kon abi moro lobi gi makandra, èn wi e wroko skinskin makandra nanga a gemeente. A sari sani di miti mi, yepi mi fu kon sabi san na den swakifasi fu mi. Mi kisi tesi, ma Yehovah yepi mi fu horidoro.”

Yu kan horidoro tu te yu e kisi den sortu tesi disi. Awansi yu e sari fu di yu patna no e libi bun nanga yu, toku a bun te yu e du muiti fu gi yesi na a rai disi di Paulus e gi nanga yepi fu santa yeye: „No meki wi tapu fu du san bun, bika na a reti ten wi sa koti efu wi no kon weri.”—Gal. 6:9.

[Futuwortu]

[Prenki na tapu bladzijde 31]

Den wan di trowpatna gowe libi den, breiti taki sma e wroko makandra nanga den na ini a preikiwroko