Tan gi a gemeente deki-ati
Tan gi a gemeente deki-ati
„Tan trowstu makandra èn tan gi makandra deki-ati.”—1 TES. 5:11.
1. Sortu blesi wi e kisi fu di wi na memre fu a Kresten gemeente, ma sortu problema e miti wi ete?
A NO DE FU TAKI, dati a de wan bigi grani fu de wan memre fu a Kresten gemeente. Yu abi wan bun matifasi nanga Yehovah. Fu di yu e teki a tiri fu a Wortu fu en, meki yu no e kisi den takru bakapisi di sma e kisi te den no e libi leki Kresten. Yu abi furu mati di abi a bun fu yu na prakseri. Iya, den blesi di yu e kisi furu srefisrefi. Ma furu Kresten abi problema. Kande sonwan fu den abi yepi fanowdu fu kon frustan den dipi sani fu Gado Wortu moro bun. Trawan fu den siki, noso den lasi-ati dorodoro. A kan de so tu taki trawan abi problema fu di den no ben teki koni bosroiti. Boiti dati, wi alamala e libi na ini wan ogri grontapu.
2. San wi musu du te wi brada nanga sisa abi problema, èn fu san ede wi musu du dati?
2 Nowan fu wi lobi te den Kresten brada nanga sisa fu wi e pina fu di den abi problema. Na apostel Paulus ben agersi a gemeente nanga wan skin, èn a ben taki dati „efu wán pisi fu a skin e pina, ala den tra pisi e pina tu” (1 Kor. 12:12, 26). Te dati e pasa, dan wi alamala musu du muiti fu yepi wi brada nanga sisa. Wan tu tori na ini Bijbel e sori fa memre fu a gemeente ben yepi trawan di ben abi problema. Wi sa poti prakseri na ibriwan fu den tori dati. Te wi e du dati, dan prakseri fa yu ben kan yepi trawan na wan srefi sortu fasi. Fa yu kan yepi yu brada nanga sisa fu tan dini Yehovah, so taki a gemeente fu en kan tan go na fesi?
„Den tyari en go na den oso”
3, 4. Na sortu fasi Akwila nanga Preskela yepi Apolos?
3 Di Apolos go tan na ini Efeise, a ben de wan fayafaya preikiman kaba. A buku Tori fu den Apostel e taki: „Fu di a ben de fayafaya, meki a bigin taki nanga sma, èn na wan yoisti fasi a bigin leri sma sani di abi fu du nanga Yesus; ma a ben sabi soso a dopu fu Yohanes.” Apolos no ben sabi noti fu a dopu di sma ben e dopu „na ini a nen fu a Tata, fu a Manpikin, èn fu a santa yeye”. Kande dati ben kon fu di den sma di ben gi en kotoigi ben de disipel fu Yohanes a Dopuman, noso bakaman fu Krestes di ben e preiki a bun nyunsu na ini a pisi ten fosi a Pinksterfesa fu a yari 33. Aladi Apolos ben de fayafaya, toku a no ben frustan wan tu prenspari sani bun. Fa a demakandra di a ben abi nanga tra Kresten yepi en?—Tori. 1:4, 5; 18:25; Mat. 28:19.
4 Akwila nanga Preskela, wan Kresten trowpaar, ben yere fa Apolos ben e taki sondro frede na ini a snoga. Den tyari en go na den oso, èn den yepi en fu kon frustan sani moro bun. (Leisi Tori fu den Apostel 18:24-26.) A sani di den du e sori taki den ben abi lobi gi en. A no de fu taki, dati Akwila nanga Preskela ben sori lespeki gi Apolos èn den sori en tu taki den ben wani yepi en. Den no gi en a firi taki den ben suku fowtu na en tapu. A ben de so nomo taki Apolos no ben sabi ete fa a fosi Kresten gemeente ben seti. Èn a no de fu taki, dati Apolos ben breiti taki den nyun mati fu en fruteri en den prenspari tori dati. Fu di Apolos ben kon sabi den tori dati, meki a ben man „du furu fu yepi” den brada fu en na ini Akaya, èn a gi den wan krakti kotoigi.—Tori. 18:27, 28.
5. Fa dusundusun Kownukondre preikiman e yepi sma, èn san na a bakapisi?
5 Na ini a ten disi, furu sma na ini a Kresten gemeente de nanga tangi taki trawan yepi den fu kon frustan Bijbel moro bun. Bun furu Kresten di gi trawan leri fu Bijbel, tron bun mati nanga den sma dati. Nofo tron, a de so taki te wi wani yepi wan sma fu kon frustan den tru tori fu Bijbel, dan wi musu meki ten fu studeri doronomo nanga den sma dati. A sani disi kan teki wan tu mun srefi. Ma Kownukondre preikiman de klariklari fu du dati, fu di den sabi taki sma libi de na ini a tori (Yoh. 17:3). Èn a e gi prisiri trutru fu si taki sma e kon frustan den tru tori fu Bijbel, taki den e fiti den sani di den e leri, èn taki den e gebroiki den libi fu du a wani fu Yehovah!
’Den brada ben e taki soso bun sani fu en’
6, 7. (a) Fu san ede Paulus ben teki Timoteyus fu go du zendelingwroko makandra nanga en? (b) Fa Paulus yepi Timoteyus fu go na fesi?
6 Di den apostel Paulus nanga Silas go na Listra fu go du zendelingwroko fu a di fu tu leisi, dan den miti wan yonkuman di ben nen Timoteyus. Kande yonkuman disi ben abi sowan 20 yari. „Den brada na Listra nanga Ikonium ben e taki soso bun sani fu en.” Timoteyus en mama Enise, nanga en granmama Lowis, ben de fayafaya Kresten, ma en papa no ben de na bribi (2 Tim. 1:5). Kande Paulus ben kon sabi na osofamiri disi di a ben de na a kontren drape a fosi leisi, wan tu yari na fesi. Ma disi leisi, na apostel ben e poti spesrutu prakseri na Timoteyus fu di a ben de wan yonkuman di ben abi tumusi moi fasi. Dati meki, di den owruman drape ben feni en bun, dan Timoteyus kisi a grani fu wroko makandra nanga Paulus na ini a zendelingwroko.—Leisi Tori fu den Apostel 16:1-3.
7 Timoteyus ben musu leri furu sani ete fu Paulus di ben owru moro en. Ma toku a teki leri, èn a go na fesi so te, taki te fu kaba Paulus ben kan seni en go na tra gemeente leki wan brada di ben e teki presi gi en. Na ini den sowan 15 yari di Timoteyus ben e wroko makandra nanga Paulus, a go na fesi srefisrefi. Fosi, Timoteyus no ben abi ondrofeni èn a kan taki a ben e syensyen. Ma bakaten, a tron wan tumusi bun owruman.—Fil. 2:19-22; 1 Tim. 1:3.
8, 9. Sortu deki-ati memre fu a gemeente kan gi yonguwan? Gi wan eksempre.
8 Na ini a ten disi, furu yonkuman nanga yongu-uma na ini a Kresten gemeente abi fasi nanga koni di den ben o man gebroiki fu dini a gemeente. Efu den yonguwan disi e kisi deki-ati nanga leri fu Kresten di de wan bun eksempre na ini a gemeente, dan kande den sa suku fu kisi moro frantwortu na mindri a pipel fu Yehovah. Luku lontu na ini a gemeente fu yu! Yu e si yonguwan di ben kan gi densrefi fu dini trawan, neleki fa Timoteyus ben du dati? Te yu e yepi den, èn te yu e gi den deki-ati, dan kande den o tron pionier, kande den sa go dini na Bethel, kande den o tron zendeling, noso opziener di e go luku tra gemeente. Fa yu kan yepi den yonguwan disi fu suku fu doro den marki dati?
9 Martin, di de wan memre fu a Bethelfamiri 20 yari kaba, e taki dati a de nanga tangi taki wan kring-opziener ben poti prakseri na en sowan 30 yari pasa. A kring-opziener disi ben wroko makandra nanga en na ini a preikiwroko. A kring-opziener ben e taki fayafaya fu a wroko di a ben e du na Bethel di a ben moro yongu. A gi Martin deki-ati fu luku efu a ben kan dini na a srefi fasi fu meki na organisâsi fu Yehovah go na fesi. Martin e taki dati a deki-ati di a brada ben gi en ben abi furu krakti tapu den bosroiti di a ben teki bakaten. Yu no sabi noiti sortu bakapisi a kan abi te yu e gi den yongu mati fu yu deki-ati fu poti marki na ini a diniwroko fu Yehovah.
„Taki na wan fasi di e trowstu den sma di lasi-ati”
10. Fa Epafroditus ben e firi, èn fu san ede dati ben de so?
10 Epafroditus ben naki a langa pasi fu Filipi go na Rome fu go luku na apostel Paulus di ben de na strafu-oso fu di a ben de wan Kresten. A gemeente fu Filipi ben seni Epafroditus go na Paulus. Boiti taki a ben tyari a presenti fu den gi na apostel, a bosroiti fu tan nanga Paulus fu yepi en na ini a muilek situwâsi fu en. Ma di Epafroditus ben de na ini Rome, dan a kon siki „èn a ben de fu dede srefi”. Fu di a ben feni taki a no ben man du a wroko fu en bun, meki a lasi-ati dorodoro.—Fil. 2:25-27.
11. (a) Fu san ede a no musu fruwondru wi taki son sma na ini a gemeente lasi-ati dorodoro? (b) Sortu rai Paulus ben gi a gemeente na ini a tori fu Epafroditus?
11 Difrenti sani e meki taki sma na ini a ten disi lasi-ati dorodoro. Na organisâsi fu gosontu afersi na heri grontapu (WHO), meki wan raportu di e sori taki fu ibri feifi sma na grontapu, wán sma sa firi lasi-ati dorodoro wan pisi ten na ini en libi. A sani dati e pasa tu nanga a pipel fu Yehovah. Den sani di kan meki taki wan sma lasi-ati dorodoro, na te a no man sorgu en osofamiri bun, te a e siki, te a e firi brokosaka fu di a abi swakifasi, noso te a abi tra problema. Fa den brada nanga sisa na ini Filipi ben kan yepi Epafroditus? Paulus ben skrifi: „Gi en wan switikon leki wan dinari fu Masra soleki fa unu gwenti èn du dati nanga ala prisiri; tan abi furu lespeki gi den sortu man dati, bika na fu a wroko fu Masra meki pikinmoro a dede di a tyari en libi kon na ini kefar, èn a du disi so taki a kan du ala den sani di unsrefi no kan du gi mi, fu di unu no de dyaso.”—Fil. 2:29, 30.
12. San kan de wan trowstu gi den wan di lasi-ati dorodoro?
12 Te den brada nanga sisa fu wi e firi brokosaka noso te den lasi-ati dorodoro, dan wi musu gi den deki-ati tu. A no de fu taki dati wi kan feni bun sani fu taki fu a diniwroko di den e du gi Yehovah. Kande den tyari bigi kenki kon na ini den libi fu man tron Kresten noso fu man dini na ini a furuten diniwroko. Wi abi warderi gi a muiti di den meki, èn wi kan gi den a dyaranti taki Yehovah e warderi a muiti dati tu. Kande son Kresten di e dini Gado nanga den heri ati, no man du so furu moro leki fosi fu di den kon owru, noso fu di den siki. Aladi dati de so, toku wi musu sori bigi lespeki gi den fu di e den dini Yehovah furu yari kaba. Awansi fa a no fa, Yehovah taigi ala Kresten di e dini en nanga den heri ati: „Taki na wan fasi di e trowstu den sma di lasi-ati, fu yepi den swakiwan, èn fu abi langa pasensi nanga ala sma.”—1 Tes. 5:14.
’De klariklari fu gi en pardon èn trowstu en’
13, 14. (a) Sortu seryusu bosroiti a gemeente Korente ben teki, èn fu san ede den du dati? (b) San pasa di den brada puru a man fu a gemeente?
13 A gemeente Korente fu a fosi yarihondro ben kisi fu du nanga wan man di ben du hurudu, sondro fu sori berow. A fasi fa a ben e tyari ensrefi ben kan pori a krinfasi fu a gemeente, èn srefi sma di no ben de Kresten ben e si a sani disi leki wan syen tori. Fu dati ede, a ben fiti taki Paulus taigi a gemeente taki den ben musu puru a man fu a gemeente.—1 Kor. 5:1, 7, 11-13.
14 A trangaleri di Paulus ben gi a gemeente, tyari bun bakapisi kon. A krinfasi fu a gemeente no pori, èn di den meki a man kon frustan taki a ben du wan sondu, dan a sori trutru berow èn a du sani tu fu sori dati. Dati meki di Paulus seni a di fu tu brifi fu en gi a gemeente dati, dan a taigi den brada fu teki a man baka na ini a gemeente. Ma den ben musu du moro ete. Paulus taigi a gemeente taki den ben musu ’de klariklari fu gi a man di ben sori berow pardon, èn den ben musu trowstu en so taki a no ben o firi sari teleki a lasi-ati’.—Leisi 2 Korentesma 2:5-8.
15. Fa wi musu handri nanga sma di abi berow fu den sondu fu den èn di tron memre baka fu a gemeente?
15 San wi e leri fu a tori disi? Wi e sari srefisrefi te den brada musu puru sma fu a gemeente. Kande den sma disi gi Gado porinen, èn kande den gi a gemeente syen. Kande den du wan sondu srefi teige wi. Te den owruman si taki a sma sori berow èn taki a e hori ensrefi baka na den markitiki fu Yehovah, dan den kan bosroiti taki a sma dati mag tron wan memre baka fu a gemeente. Te den e du dati, dan dati e sori taki Yehovah gi a sma pardon (Mat. 18:17-20). Wi musu pruberi fu de leki Yehovah, a no so? Iya, te wi abi bita-ati, èn te wi e weigri fu gi trawan pardon, dan fu taki en leti wi e gens Yehovah. Efu wi wani taki vrede nanga wánfasi de na ini a gemeente, èn efu wi wani taki Yehovah feni wi bun, dan wi musu ’sori taki wi lobi’ den wan di sori trutru berow èn di tron memre baka fu a gemeente.—Mat. 6:14, 15; Luk. 15:7.
„A kan yepi mi”
16. Fu san ede Paulus ben mandi nanga Markus?
16 Wan tra Bijbel tori e sori taki wi no musu denki takru fu den wan di du wan sani di e hati den firi fu wi. Fu eksempre, Yohanes Markus ben du wan sani di hati den firi fu Paulus srefisrefi. Fa so? Di Paulus nanga Barnabas go du zendelingwroko fu a fosi leisi, dan Markus go nanga den fu yepi den. Ma baka wan pisi ten, Yohanes Markus gowe libi den tu brada disi èn a drai go baka na oso. Bijbel no e taki fu san ede a du dati. A sani disi hati den firi fu Paulus so te, taki di den ben musu bosroiti efu Markus ben o go baka nanga den fu a di fu tu leisi, dan en nanga Barnabas kisi trobi fu a sani disi. A sani di ben pasa a fosi leisi di den ben go du zendelingwroko, meki taki Paulus no ben wani taki Markus go nanga den.—Leisi Tori fu den Apostel 13:1-5, 13; 15:37, 38.
17, 18. Fa wi du sabi taki Paulus nanga Markus meki sani bun baka, èn san wi kan leri fu a tori disi?
17 Soleki fa a sori, dan Markus no brokosaka tumusi di Paulus no ben wani taki a go nanga den, bika a tan du a zendelingwroko na ini wan tra kontren makandra nanga Barnabas (Tori. 15:39). A sani di Paulus skrifi fu Markus wan tu yari baka dati, e sori taki Markus ben e dini Gado nanga en heri ati, èn taki a ben de fu frutrow. Na a ten dati, Paulus ben de na strafu-oso na ini Rome, èn a seni wan brifi gi Timoteyus fu kari en kon. Na ini a srefi brifi dati Paulus taki: „Tyari Markus kon nanga yu, bika a kan yepi mi nanga a diniwroko” (2 Tim. 4:11). Iya, Paulus ben si taki Markus ben go na fesi trutru.
18 Wi kan leri wan sani fu a tori disi. Markus gro kon tron wan bun zendeling. A no naki futu di Paulus ben weigri fu wroko makandra nanga en. En nanga Paulus ben de lepi brada, èn den no ben e hori makandra na ati. Na presi fu dati, Paulus taki bakaten dati Markus ben de wan bigi yepi gi en. Te brada di ben abi problema nanga makandra e meki sani bun baka nanga makandra, dan a yoisti sani fu du na fu libi a sani èn fu yepi trawan fu go na fesi na ini a tru anbegi. Te wi abi wan bun denki fu sani, dan dati e gi a gemeente deki-ati.
Yu kan de wan yepi gi sma na ini a gemeente
19. Fa ala den memre fu a Kresten gemeente kan yepi makandra?
19 Na ini den ’muilek ten disi di tranga fu pasa’, yu abi a yepi fanowdu fu yu brada nanga sisa na ini a gemeente. Ma den abi a yepi fu yu fanowdu tu (2 Tim. 3:1). Kande son Kresten no sabi ala ten san na a yoisti sani fu du na ini a situwâsi fu den. Ma Yehovah sabi. Èn a kan gebroiki difrenti memre fu a gemeente fu yepi trawan fu du san bun. A kan gebroiki yu tu (Yes. 30:20, 21; 32:1, 2). Sobun, gi yesi na a rai fu na apostel Paulus! Iya, tan „trowstu makandra èn tan gi makandra deki-ati, soleki fa unu e du dati kaba”.—1 Tes. 5:11.
San yu ben sa piki?
• Fu san ede a de fanowdu taki wi e gi trawan deki-ati na ini a Kresten gemeente?
• Sortu yepi trawan ben kan abi fanowdu?
• Fu san ede wi abi yepi fanowdu fu den brada nanga sisa na ini wi gemeente?
[Aksi fu a tori disi]
[Prenki na tapu bladzijde 11]
Te wan Kresten brada noso sisa fu wi de na ini wan muilek situwâsi, dan wi kan yepi en
[Prenki na tapu bladzijde 12]
Na ini a ten disi, furu yonkuman nanga yongu uma na ini a Kresten gemeente abi fasi nanga koni di den ben o man gebroiki fu dini a gemeente