Wi de wán fu di wi lobi makandra—Alayari konmakandra raportu

NA A mamanten fu 3 oktober 2009, moro leki 5000 sma ben konmakandra na ini a kongreshal fu Yehovah Kotoigi na ini a foto Jersey City, na ini a distrikt New Jersey, na Amerkankondre. Den sma disi ben de nanga prisiri fu di den ben kon makandra gi na alayari konmakandra fu a Watch Tower Bible and Tract Society of Pennsylvania. A konmakandra disi ben e hori fu a di fu 125 leisi. Sani ben seti, so taki dusundusun tra Kresten na den dri Bethel gebow na ini Amerkankondre, èn na Bethel fu Kanada ben kan arki noso luku a programa nanga yepi fu radio nanga telefisi. Ala nanga ala, 13.235 sma di de na ini wánfasi fu di den lobi Yehovah, kisi wini fu a konmakandra di ben teki dri yuru langa.

Geoffrey Jackson fu a Tiri Skin, ben de fesiman fu a programa. Na a bigin fu a programa, wan grupu fu sma di e dini na Bethel, singi wan tu fu den singi fu a nyun singibuku fu wi. David Splane, wan tra memre fu a Tiri Skin, ben e tiri a singi grupu, èn a fruteri syatu o prenspari poku de na ini a tru anbegi. Den sma di ben de na a konmakandra, ben kisi a kari fu singi dri nyun singi. A singi grupu ben e singi fosi, èn baka dati, den sma drape ben e singi makandra nanga a singi grupu. A singi grupu ben seti soso gi a spesrutu konmakandra disi. A no de so taki a sani disi musu pasa na gemeente konmakandra, na kring konmakandra, noso na distrikt kongres di o hori.

Nyunsu fu Bijkantoro

Memre fu feifi Bijkantoro komte ben de na a konmakandra, èn den fruteri nyunsu di ben komoto fu a bijkantoro fu den. Kenneth Little ben taki dati Kanada o bigin druk furu fu den tijdschrift fu Amerkankondre nanga Kanada. Na so a bijkantoro dati o druk tin tron so furu publikâsi leki fosi. Fu man du a wroko disi, wan nyun drukpers sa wroko 16 yuru langa wan dei, na presi fu aiti yuru nomo.

Reiner Thompson ben taki fu a Kownukondre wroko di e du na ini a Dominikan Republiek, èn Albert Olih ben taki fu a wroko di wi e du na ini Nigeria. Emile Kritzinger fu Mosambik, ben tyari kon na krin taki baka di sma frufolgu Yehovah Kotoigi furu yari langa, dan na ini 1992, lanti gi den a reti fu anbegi a Gado fu den fri. Na ini ala den dri kondre dati, a nomru fu preikiman kren srefisrefi. Viv Mouritz fu a bijkantoro fu Australia, ben fruteri fa a wroko e go na fesi na ini Oost-Timor, èn den brada na ini Australia e sorgu gi a kontren drape.

Den komte fu a Tiri Skin

Na ini 1976, den siksi komte fu a Tiri Skin, bigin tiri ala den afersi fu Yehovah Kotoigi. Bakaten, tra brada di no de fu a salfu grupu, kisi a frantwortu fu dini leki yepiman fu den brada fu a Tiri Skin. Now, 23 fu den brada disi e yepi nanga wroko di de fu du. Den ben interview siksi fu den. Makandra, den siksi brada disi du furuten diniwroko 341 yari kaba, èn dati na 57 yari gi ibriwan fu den.

Don Adams, di ben kon na Bethel na ini 1943, ben fruteri taki a Fesiman Komte abi fesiman fu den feifi tra komte fu a Tiri Skin. A Komte disi e sorgu taki ala den feifi komte e wroko bun nanga makandra. A Fesiman Komte e handri afersi di abi fu du nanga bigi nowtu, frufolgu, krutu afersi, rampu, nanga tra seryusu sani di e miti Yehovah Kotoigi na heri grontapu.

Dan Molchan ben taki fu a Wrokoman Komte di e sorgu gi den sani di den 19.851 memre fu den Bethelfamiri na heri grontapu abi fanowdu  fu man tan abi wan tranga bribi. A komte disi e sorgu tu taki sani e waka bun nanga ala den memre disi. David Sinclair ben fruteri fa a Buku Komte e tyari a frantwortu di den abi fu bai sani di den bijkantoro abi fanowdu. Baka dati, Robert Wallen di e dini na Bethel pikinmoro 60 yari kaba, fruteri fa a Diniwroko Komte e tiri a preikiwroko di a pipel fu Yehovah e du, èn a fruteri tu fa a komte disi e tiri a wroko di den gemeente e du. William Malenfant ben taki fu a tranga wroko di a Leri Komte e du fu sreka wan kongres programa. Te fu kaba, John Wischuk fruteri fa a Skrifi Komte e tyari a frantwortu di den abi fu luku taki publikâsi e sreka èn e tyari kon na doro na a yoisti fasi. *

A yaritekst fu 2010 e poti prakseri na lobi

Baka dati, dri memre fu a Tiri Skin hori wan lezing. Gerrit Lösch bigin a lezing fu en nanga na aksi disi: „Yu wani taki trawan lobi yu?” A brada disi tyari kon na krin taki ala sma abi lobi fanowdu, èn wi e firi koloku te trawan lobi wi. Na fu di Yehovah lobi wi, meki wi de na libi. A moro prenspari reide fu san ede wi e preiki a bun nyunsu èn fu san ede wi e gi sma leri, na fu di wi lobi Yehovah.

Wi no e sori trutru lobi soso gi sma di wi sabi, ma wi lobi sosrefi den feanti fu wi (Mat. 5:43-45). Den sma na a konmakandra ben kisi deki-ati fu prakseri san Yesus ben musu ondrofeni fu a bun fu wi. Sma ben wipi en, den ben spotu en, den ben spiti na en tapu, èn den ben dyuku en. Aladi den sani disi ben miti en, toku a begi gi den srudati di spikri en na wan postu. A sani disi e meki wi kisi moro lobi gi en, a no so? Baka dati, Brada Lösch meki bekènti taki a yaritekst gi 2010 na 1 Korentesma 13:7, 8: ’Lobi e horidoro awansi san e pasa. Lobi no e kaba noiti.’ Wi abi a howpu fu libi fu têgo na ini wan paradijs, èn taki ala sma drape o lobi makandra fu têgo tu.

Yu e lon drei?

Samuel Herd bigin a lezing fu en nanga wan agersitori. Kon meki wi taki dati wan mati fu yu e kon teki yu nanga oto fu go na wan presi di de 50 kilometer moro fara. Te yu e sidon na sei a mati fu yu, dan yu e si tapu a meter taki na oto o lon drei. Yu e taigi yu mati taki na oto o lon drei. Yu mati e taigi yu fu no broko yu ede, fu di sowan fo liter de ete na ini a tank. Ma syatu baka dati, na oto e lon drei. Yu denki taki a de wan koni sani fu meki na oto lon drei na pasi? A no de fu taki, dati a moro bun te a tank fu yu furu! Na wan agersifasi, wi musu sorgu tu taki a tank fu wi furu, èn na oli na ini e prenki a sabi fu Yehovah.

Dati meki wi musu tank oli doronomo, iya, wi musu tan kisi moro sabi fu Gado. Fo fasi de fa wi musu du disi. Na a fosi presi, wi musu leisi Bijbel ibri dei so taki wi e kon sabi en moro bun. Wan tra sani di wi musu du, na taki wi musu hori wi Osofamiri Anbegi na wan fasi di e tyari wini kon. Wi e teki ten ibri wiki fu furu a tank fu wi, noso  wi e poti pikinso oli nomo na ini? Ete wan sani di wi musu du, na taki wi musu sreka wisrefi gi den gemeente konmakandra, èn wi musu go na den konmakandra. Leki lasti wi musu suku okasi fu denki dipi fu den sani di wi e leri fu Yehovah, èn wi musu du dati sondro taki tra sani e puru wi prakseri. Psalm 143:5 e taki: „Doronomo mi e memre owruten. Mi denki dipi fu ala den sani di yu du.”

„Den regtfardikiwan sa brenki”

John Barr ben hori a di fu dri taki di ben de sosrefi a lastiwan. Na ini a taki dati, a fruklari na agersitori fu Yesus di e taki fu na aleisi nanga a takru wiwiri (Mat. 13:24-30, 38, 43). Na agersitori dati abi fu du nanga wan „kotiten” pe den „manpikin fu a kownukondre” tyari kon na wán èn den takru wiwiri e poti na wan sei so taki sma kan bron den.

Brada Barr ben tyari kon na krin taki sma no sa tyari kon na wán fu ala ten. A ben taki fu Mateyus 24:34 pe skrifi: „Den sma fu a ten disi no o dede kwetikweti, fosi den sani disi pasa.” A fruklari a tekst na a fasi disi: „Soleki fa a sori, dan Yesus ben wani meki wi frustan taki fosi sonwan fu den salfuwan di ben si a bigin fu a marki na ini 1914 ben o dede, dan tra salfuwan di ben o si a bigin fu a bigi banawtu, ben o de na libi kaba.” A taki den srefi wortu disi ete wan leisi. Wi no sabi soifri o langa a pisi ten de di abi fu du nanga den wortu „den sma fu a ten disi”, ma den wortu disi abi fu du nanga den tu grupu sma di a brada ben taki fu den. Aladi den salfuwan na sma fu difrenti yari, toku den sma fu den tu grupu na sma di e libi na wan srefi pisi ten na ini den lasti dei. A de wan trowstu trutru fu sabi taki den moro yongu salfuwan di e libi na ini a srefi ten fu den owru salfuwan di ben si a marki di bigin na ini 1914, no sa dede fosi a bigi banawtu e bigin!

„Den manpikin fu a kownukondre” e wakti fayafaya teleki den kan go na hemel. Ma wi alamala musu tan gi yesi na Gado, èn wi musu tan skèin leti te na a kaba. A no de fu taki, dati wi abi wan bigi grani fu si taki „na aleisi” e tyari kon na wán na ini a ten disi.

Na a kaba fu a programa, Brada Theodore Jaracz fu a Tiri Skin meki bekènti taki den gemeente owruman ben o kisi moro leri. Na alayari konmakandra ben gi den sma deki-ati trutru!

[Futuwortu]

[Faki na tapu bladzijde 5]

WAN SKORO GI DEN OWRUMAN

Na a alayari konmakandra, Anthony Morris, wan memre fu a Tiri Skin, meki bekènti taki den gemeente owruman ben o kisi moro leri. Na a bigin fu 2008, wan skoro bigin gi den owruman fu Amerkankondre. A skoro e hori na a Skoro Centrum na ini Patterson, na New York. A di fu 72 klas ben kon na wan kaba no so langa pasa, èn 6.720 owruman kisi leri kaba. Furu owruman musu kisi leri ete. Na ini Amerkankondre wawan, moro leki 86.000 owruman de. Sobun, a Tiri Skin gi primisi taki bigin nanga 7 december 2009, ete wan skoro o hori na ini Brooklyn, New York.

Tu mun langa, fo kring-opziener noso distrikt-opziener ben o kisi leri na Patterson, fu tron leriman. Baka dati, den ben o go na Brooklyn, fu gi tra owruman leri, èn fo trawan ben o kisi leri. Baka dati, den ben o hori a skoro na ini Brooklyn, èn den fosi fo opziener ben o go hori a skoro na kongreshal èn na Kownukondre zaal. A sani disi ben o pasa ibri tron baka teleki 12 leriman ben o de di ben o hori siksi skoro ibri wiki na ini Ingrisitongo na ini Amerkankondre. Fo brada ben o kisi leri fu hori a skoro na ini Spanyorotongo. A skoro disi no sa kon na ini a presi fu a Kownukondre Diniwroko-skoro. A marki fu a skoro disi na fu yepi den owruman fu tan go na fesi na ini a tru anbegi. Bijkantoro na heri grontapu sa bigin hori a skoro disi na kongreshal nanga Kownukondre zaal na ini a dienstyari fu 2011.

[Prenki na tapu bladzijde 4]

Na alayari konmakandra bigin nanga wan singi fu wi nyun singibuku di nen „Singi gi Yehovah”