Wi o man feni en bun nanga trawan, te wi e taki na wan switi fasi

„Un musu taki na wan switi fasi ala ten.”—KOL. 4:6.

1, 2. Sortu bun bakapisi wan brada ben abi fu di a ben taki na wan switi fasi?

WAN brada ben fruteri: „Di mi ben e preiki oso fu oso, dan mi miti wan man di ben e atibron so te, taki en mofo nanga en heri skin ben e beifi. Na wan tiri fasi mi pruberi fu taki go taki kon nanga en nanga yepi fu Bijbel, ma a sani dati meki taki a kisi moro bigi atibron. En wefi nanga den pikin fu en bigin kosi mi tu. Na a momenti dati mi ben sabi taki mi ben musu gowe fu drape. Mi sori na osofamiri krin taki mi no ben kon fu meki trobi. Mi sori den Galasiasma 5:22 nanga 23, di e taki fu lobi, safri-ati, a dwengi di wi musu dwengi wisrefi, nanga vrede. Ne mi gowe.

² Bakaten, di mi ben e preiki na den oso na a tra sei fu a strati, dan mi si taki na osofamiri ben e sidon na tapu a stupu fu den oso. Den kari mi kon. Mi aksi misrefi: ’San den o du now?’ A man ben abi wan bigi kan nanga kowru watra, èn a aksi mi efu mi ben wani pikinso. A man aksi mi pardon fu di a ben taki so grofu nanga mi, èn a prèise mi fu di mi abi wan tranga bribi. Wi meki en bun baka nanga makandra, èn mi gowe.”

3. Fu san ede wi no musu gi pasi taki trawan e meki wi kisi atibron?

³ Fu di a grontapu disi lai nanga problema, meki awinsi san wi e du, wi e kisi fu du nanga sma di e atibron. Wi e kisi fu du nanga den sortu sma disi sosrefi na ini a preikiwroko. Te dati e pasa, dan a de tumusi prenspari taki wi e taki nanga den sma disi „na wan safri fasi, èn nanga bigi lespeki” (1 Petr. 3:15). Efu a brada di ben kari na a bigin ben atibron fu di na ososma ben abi bita-ati èn fu di a ben e taki grofu nanga en, dan a man no ben o sori switifasi gi en. Kande a ben o kisi moro atibron srefi. Fu di a brada ben hori ensrefi, èn fu di a ben e taki na wan switi fasi, meki sani waka bun.

O ten wi kan taki dati wan sma e taki na wan switi fasi?

4. Fu san ede wi musu taki na wan switi fasi?

⁴ Na apostel Paulus ben gi Kresten a rai disi: „Un musu taki na wan switi fasi ala ten, iya, den wortu fu unu musu abi sowtu” (Kol. 4:6). A de prenspari trutru taki wi e fiti a rai disi, awinsi wi e kisi fu du nanga grontapusma, nanga sma di de memre fu a gemeente, noso nanga den memre fu wi osofamiri srefi. Efu wi wani feni en bun nanga trawan, dan wi musu taki na wan switi fasi, èn na wan fasi di fiti.

5. Te wi e taki bun nanga trawan, dan san dati no wani taki? Gi wan eksempre.

⁵ Wan sma di man taki bun nanga trawan, no gaw fu taki iniwan sani di a e denki èn e firi. A e luku bun nanga a sani dati, spesrutu te a e mandi. Bijbel e sori taki te wan sma no e hori ensrefi te a e atibron, dan a sma dati no tranga, ma a swaki. (Leisi Odo 25:28; 29:11.) Moses, „a moro safri-ati sma” fu a ten fu en, ben gi pasi taki a tranga-ede pipel Israel meki a lasi ensrefi, èn a sani dati meki taki a no gi Gado glori. Moses ben e taki krin fa a ben firi, ma Yehovah no ben feni dati bun. Aladi Moses ben de fesiman fu den Israelsma 40 yari langa, toku a no kisi a grani fu tyari den go na ini a Pramisi Kondre.—Num. 12:3; 20:10, 12; Ps. 106:32.

6. Te wan sma e luku bun san a e taki, dan san dati wani taki?

⁶ Bijbel e prèise sma di e hori densrefi, èn di e luku bun san den e taki. Wan odo e taki: „Wan  sma di e taki tumusi furu, e meki fowtu makriki, ma wan sma di e hori en mofo, e du wan koni sani” (Odo 10:19; 17:27). Ma te wan sma e luku bun san a e taki, dan dati no wani taki dati noiti a e taki fa a e firi. Na presi fu dati, a sma dati e taki „na wan switi fasi”, èn a e gebroiki en tongo fu gi trawan deki-ati, na presi fu hati den firi fu den.—Leisi Odo 12:18; 18:21.

„Wan ten de fu tan tiri èn wan ten de fu taki”

7. Sortu sani wi no musu du, èn fu san ede wi no musu du dati?

⁷ Soleki fa wi si kaba, dan wi musu hori wisrefi èn wi musu taki na wan switi fasi nanga sma na wi wrokope, èn nanga sma di wi e miti na ini a preikiwroko. Ma wi musu du a srefi tu nanga sma fu a gemeente, èn nanga den sma fu wi osofamiri. Te wi e puru atibron tapu trawan sondro fu prakseri sortu bakapisi dati kan tyari kon, dan dati kan swaki a bribi fu wi, a kan meki wi lasi-ati, èn wi kan kon siki seryusu. Wi kan meki den srefi sani disi pasa tu nanga trawan (Odo 18:6, 7). Fu di wi na sondu libisma, meki son leisi wi e atibron èn wi e kisi bita-ati. Ma wi musu basi den firi dati. A no bun fu kosi trawan, a no bun fu spotu trawan, a no bun fu wisiwasi trawan, èn a no bun fu abi bigi atibron (Kol. 3:8; Yak. 1:20). Te wi ben o du den sani dati, dan dati kan pori a matifasi di wi abi nanga trawan èn nanga Yehovah. Yesus ben leri wi: „Iniwan sma di e tan atibron nanga en brada, sa musu gi frantwortu na fesi krutu; ma a sma di e kosi en brada fu lagi en, sa musu gi frantwortu na fesi Gran Krutu; ma a sma di e taki: ’Yu wisiwasi lawman yu!’, sa musu go na ini a faya fu Gehena.”—Mat. 5:22.

8. O ten wi musu taki fa wi e firi, èn fa wi musu du dati?

⁸ Ma son leisi wi ben kan bosroiti taki a ben o moro bun fu taki fa wi e firi. Efu wan brada taki noso du wan sani di e hati yu so te taki yu no man libi a tori, dan yu no musu kisi bita-ati (Odo 19:11). Efu wan sma meki yu ati bron, dan wakti teleki yu ati kon kowru, èn baka dati, du san de fanowdu fu lusu a problema. Paulus ben skrifi: „No meki son dongo, dan unu e mandi ete.” Fu di a problema e tan moro yu, meki a bun fu taki fu en na wan ten di fiti, ma du dati na wan switi fasi. (Leisi Efeisesma 4:26, 27, 31, 32.)  Taki krin nanga yu brada fu a problema, ma du dati na wan switi fasi, èn du ala san de fanowdu fu meki en bun baka nanga en.—Lef. 19:17; Mat. 18:15.

9. Fu san ede wi musu wakti teleki wi ati kon kowru, bifo wi e go taki nanga wan sma di hati den firi fu wi?

⁹ A no de fu taki, dati yu musu suku a yoisti okasi fu taki fu a problema. Bijbel e taki: „Wan ten de fu tan tiri èn wan ten de fu taki” (Preik. 3:1, 7). Bijbel e taki moro fara: „Na ati fu a reti-ati sma e prakseri dipi fu sani, so taki a kan gi piki” (Odo 15:28). Kande wi sa abi fu wakti bifo wi e taki fu wan problema. Te wi e taki fu wan problema aladi wi e mandi ete, dan a situwâsi kan kon moro ogri. Ma wi no musu wakti tumusi langa tu.

Wi o man feni en bun nanga trawan te wi e handri na wan switi fasi

10. Te yu e handri na wan switi fasi nanga trawan, dan fa dati kan yepi yu fu feni en moro bun nanga den?

¹⁰ Te wi e taki na wan switi fasi nanga trawan èn te wi e taki krin nanga den, dan wi o man feni en bun nanga den sma dati. Fu taki en leti, te wi e du ala san wi man fu kon moro bun nanga trawan, dan dati kan yepi wi fu taki moro bun nanga den. Te wi e du bun sani gi sma nanga wi heri ati, dan dati o yepi wi tu fu feni en bun nanga trawan. Wi kan suku okasi fu yepi den, kande wi kan gi den wan kado, noso kande wi kan kari den kon na wi oso. A sani disi sa de neleki te wi e „poti wan ipi faya krofaya” na tapu wan sma en ede. Kande a sma dati sa sori switifasi gi wi, so taki a o moro makriki fu lusu a problema.—Rom. 12:20, 21.

11. Fa Yakob suku fu meki sani bun baka nanga Esau, èn san ben de a bakapisi?

¹¹ A famiri-edeman Yakob ben sabi dati. En twelengi brada Esau ben atibron nanga en so te, taki Yakob lowe fu di a ben frede taki Esau ben o kiri en. Furu yari baka dati, Yakob drai go baka na a kondre fu en. Esau hari go miti en makandra nanga 400 man. Yakob begi Yehovah fu yepi en. Baka dati, a seni wan bigi ipi meti go na fesi leki presenti gi Esau. A sani dati yepi. Di Esau miti Yakob, dan Esau en ati ben kon safu kaba, èn a lon go brasa Yakob.—Gen. 27:41-44; 32:6, 11, 13-15; 33:4, 10.

Taki na wan switi fasi nanga trawan fu gi den deki-ati

12. Fu san ede wi musu taki na wan switi fasi nanga wi Kresten brada nanga sisa?

¹² Kresten no e anbegi tra libisma, ma den e anbegi Gado. Aladi dati de so, toku wi lobi te trawan e denki bun fu wi. Te wi e taki na wan switi fasi nanga den Kresten brada nanga sisa fu wi, dan dati kan lekti den lai fu den. Ma te wi e krutu trawan na wan ogri-ati fasi, dan dati kan meki den lai fu den kon moro hebi, èn sonwan fu den ben kan aksi densrefi efu Yehovah feni den bun ete. Sobun, meki wi taigi trawan sani di e gi den deki-ati, èn meki wi du dati nanga wan krin ati. Iya, meki wi ’taki sani di bun, so taki wi kan gi sma deki-ati te a de fanowdu, èn na so fasi den sma di e arki, kan yere sani di bun gi den’.—Ef. 4:29.

13. San owruman musu hori na prakseri te (a) den e gi sma rai? (b) te den e skrifi brifi gi trawan?

¹³ Spesrutu owruman musu abi „switi fasi” èn den musu handri na wan lobi-ati fasi nanga a ipi (1 Tes. 2:7, 8). Te owruman musu gi rai, dan den musu du dati „nanga safri-ati”, srefi te den e taki nanga den wan „di no wani arki” (2 Tim. 2:24, 25). Den owruman musu sori switifasi tu te den e skrifi brifi gi owruman fu wan tra gemeente, noso gi a bijkantoro. Den musu hori den firi fu trawan na prakseri, èn den musu skrifi sani di fiti. Na so fasi den e hori densrefi na a gronprakseri di skrifi na Mateyus 7:12.

Taki na wan switi fasi nanga den sma fu yu osofamiri

14. Sortu rai Paulus ben gi masra, èn fu san ede a du dati?

¹⁴ Son leisi wi no sabi sortu krakti den sani di wi e du abi tapu trawan. Kande wan sma no man nanga den sani di wi e taki, nanga a fasi fa wi e poti wi fesi, noso nanga den sani di wi e meki nanga wi skin. Fu eksempre, son mansma no e frustan o furu krakti den sani di den e taki abi tapu umasma. Wan sisa ben taki: „Mi frede te mi  masra e opo en sten gi mi te a e atibron.” Te wan man e taki hati sani, dan dati kan abi moro krakti tapu wan uma, leki tapu wan man. Boiti dati, kande na uma no sa man frigiti den sani dati makriki (Luk. 2:19). Spesrutu te wan uma lobi a masra fu en èn te a wani lespeki en, dan a masra dati musu luku bun taki a no e taigi en hati sani. Paulus ben gi masra a rai disi: „Tan lobi un wefi èn no abi bita-ati gi den.”—Kol. 3:19.

15. Gi wan eksempre fu sori fu san ede wan masra musu handri na wan switi fasi nanga a wefi fu en.

¹⁵ Wan brada di trow furu yari kaba, e sori fu san ede wan man musu handri nanga en wefi neleki fa a ben o handri nanga wan „moro swaki prapi”. A brada e taki: „Te yu e hori wan diri grasi sani, dan yu musu hori en bun, so taki a no e broko. Efu a broko, dan awansi yu meki en baka, toku yu o man si taki a ben broko wan leisi. Efu wan masra e taigi en wefi hati sani, dan dati kan meki a wefi fu en sari srefisrefi. A sani disi kan tyari problema kon na ini a trowlibi, èn kande den problema dati no o man lusu makriki.”—Leisi 1 Petrus 3:7.

16. Fa wan wefi kan gi en osofamiri deki-ati?

¹⁶ Ma den sani di trawan e taki, kan gi masra deki-ati tu, noso den kan meki den lasi-ati. Srefi den sani di wefi e taki abi krakti tapu a masra fu den. „Wan koni wefi”, noso wan wefi di a masra fu en kan „frutrow” trutru, e hori den firi fu en masra na prakseri, neleki fa a wani taki en masra du nanga en (Odo 19:14; 31:11). Iya, wan wefi kan gi en osofamiri deki-ati, noso a kan broko en saka. Bijbel e taki: „Na uma di koni trutru, bow na osofamiri fu en, ma a don uma e broko en nanga en eigi anu.”—Odo 14:1.

17. (a) Fa yonguwan musu taki nanga den papa nanga mama? (b) Fa bigisma musu taki nanga yonguwan, èn fu san ede den musu du dati?

¹⁷ Papa, mama, nanga pikin musu taki na wan switi fasi tu nanga makandra (Mat. 15:4). Te wi e taki nanga yonguwan, dan wi musu hori den firi fu den na prakseri, èn na so wi no sa „tanteri” den (Kol. 3:21; Ef. 6:4). Srefi efu den pikin musu kisi trangaleri, dan papa nanga mama, èn sosrefi den owruman musu taki na wan lespeki fasi nanga den. Na so den bigisma sa meki en moro makriki gi yonguwan fu kenki den fasi fu den èn fu tan abi wan bun matifasi nanga Gado. A moro bun fu handri na a fasi dati, na presi taki wi e gi den a firi taki wi lasi howpu gi den. Te wi e gi yonguwan a firi dati, dan kande den sa denki taki den no o man kenki moro. Kande yonguwan no sa  memre ala den rai di den kisi, ma den sa memre fa sma ben taki nanga den.

Taki bun sani nanga wan krin ati

18. San wi kan du fu no abi bita-ati?

¹⁸ Soleki fa wi si, dan wi musu hori wisrefi te wi e atibron. Ma dati no wani taki nomo dati wi no musu swa wi fesi. A no de so taki na hori wi musu hori wisrefi nomo fu no atibron. Te wi e du neleki wi no e mandi, aladi wi e kuku na ini wi ati, dan dati no bun gi a gosontu fu wi. A de neleki wi e trapu na tapu a rem fu wan oto, aladi wi e gi gas na a srefi ten. A sani dati no bun srefisrefi gi a oto, èn a oto kan broko. Sobun, no meki yu ati kuku fu di dati kan meki taki yu lasi yusrefi bakaten. Begi Yehovah fu yepi yu fu no abi bita-ati. Meki a yeye fu Yehovah kenki yu ati nanga yu frustan, so taki yu kan du a wani fu en.—Leisi Romesma 12:2; Efeisesma 4:23, 24.

19. San wi kan du te wi de na ini wan situwâsi pe wi musu hori wisrefi?

¹⁹ Du san de fanowdu fu basi den firi fu yu. Efu yu de na ini wan fruferi situwâsi, èn yu e si taki yu e bigin atibron, dan kande a moro bun fu gowe, èn fu wakti te leki yu ati kon kowru (Odo 17:14). Efu a sma di yu e taki nanga en e bigin atibron, dan du tranga muiti fu taki na wan switi fasi nanga en. Hori a sani disi na prakseri: „Wan safri piki e kowru bigi atibron, ma te wan sma e taki sani fu hati trawan, dan dati e meki sma kisi atibron” (Odo 15:1). Te wi e taki hati sani, dan dati e poti oli na tapu a faya, awansi wi e taki nanga wan switi sten (Odo 26:21). Sobun, te yu de na ini wan situwâsi pe yu musu hori yusrefi, dan yu no musu de ’gaw fu taki èn yu no musu atibron esi-esi’. Begi Yehovah fu gi yu a yeye fu en so taki yu no e taki hati sani, ma bun sani.—Yak. 1:19.

Gi sma pardon nanga yu heri ati

20, 21. San kan yepi wi fu gi trawan pardon, èn fu san ede wi musu du dati?

²⁰ A sari fu taki dati nowan fu wi man basi wi tongo dorodoro (Yak. 3:2). Awansi omeni muiti den e meki, toku wi famiriman, noso wi lobi-ati brada nanga sisa kan taki sani son leisi di kan hati den firi fu wi. Na presi taki wi de gaw fu atibron, a moro bun fu hori pasensi èn fu luku san meki taki den taki den sani dati. (Leisi Preikiman 7:8, 9.) Kande den ben abi tumusi furu sani na den ede, kande den ben e frede, kande den no ben e firi bun, noso kande den abi wan problema di yu no sabi fu en.

²¹ Ma awansi den sortu sani disi e gi sma broko-ede, toku dati no wani taki dati den abi leti fu puru atibron na sma tapu. Te wi e hori den sortu sani dati na prakseri, dan dati kan yepi wi fu kon frustan fu san ede sma e taki èn e du sani di e afrontu wi. Kande dati sa meki en moro makriki tu gi wi fu gi den pardon. Wi alamala taki èn du sani di hati den firi fu trawan, èn wi e howpu taki den sma dati sa gi wi pardon nanga den heri ati (Preik. 7:21, 22). Yesus ben taki dati efu wi wani taki Gado gi wi pardon, dan wi musu gi trawan pardon (Mat. 6:14, 15; 18:21, 22, 35). Fu dati ede, wi no musu draidrai fu aksi sma pardon èn wi musu de klariklari tu fu gi trawan pardon. Na so fasi lobi sa tan na ini na osofamiri èn na ini a gemeente, bika lobi na wan „volmaakti banti di e meki sma kon de wán”.—Kol. 3:14.

22. Fu san ede a bun te wi e meki muiti fu taki na wan switi fasi?

²² O moro wi e doro a kaba fu a sistema disi, a sa kon moro muilek gi wi fu de koloku èn fu libi na ini wánfasi. Te wi e gi yesi na den bun rai na ini Gado Wortu, dan dati sa yepi wi fu taki sani di e gi trawan deki-ati, na presi fu taki sani di e hati den firi fu den. Wi sa man feni en moro bun nanga sma na ini a gemeente èn na ini wi osofamiri, èn na eksempre fu wi sa gi trawan wan bun kotoigi fu wi „koloku Gado”, Yehovah.—1 Tim. 1:11.

Yu kan tyari disi kon na krin?

• Fu san ede wi musu suku a yoisti okasi fu taki fu problema?

• Fu san ede den sma na ini wan osofamiri musu taki „na wan switi fasi” nanga makandra ala ten?

• San kan yepi wi fu no taki hati sani?

• San kan yepi wi fu gi trawan pardon?

[Aksi fu a tori disi]

[Prenki na tapu bladzijde 21]

Wakti teleki yu ati kon kowru, èn baka dati suku a yoisti okasi fu taki

[Prenki na tapu bladzijde 23]

Ala ten wan man musu taki na wan switi fasi nanga a wefi fu en