Yu sa kisi krakti baka te yu e du a wani fu Gado

„Teki mi tyatyari na un tapu . . . , èn unu sa kisi krakti baka.”—MAT. 11:29.

1. San Gado ben seti na Sinai-bergi, èn fu san ede a du dati?

DI A Wetfrubontu ben seti na Sinai-bergi, dan wan fu den komando na ini ben taki dati a pipel ben musu hori a sabat ibri wiki. Yehovah ben meki Moses, a takiman fu en, gi a pipel fu Israel a komando disi: „Un musu wroko siksi dei, ma a di fu seibi dei un no musu wroko, so taki un mankaw nanga un buriki kan rostu. Na so fasi a manpikin fu un umasrafu èn a trakondre sma di e tan na un mindri kan kisi krakti baka” (Ex. 23:12). Iya, fu di Yehovah ben e firi gi a pipel fu en di ben de na ondro a Wet, meki a seti sani so taki den ben abi wan dei fu rostu, so taki den ben kan „kisi krakti baka”.

2. Fa a pipel fu Israel ben e kisi wini fu di den ben e hori a sabat?

² A de so taki a sabat ben de wan dei fu rostu nomo? Nôno, a sabat ben de wan prenspari pisi fu na anbegi fu Yehovah. Te den Israelsma ben e hori a sabat, dan famiri-edeman ben e kisi okasi fu leri den osofamiri fu den fu du ’sani na wan reti fasi, soleki fa Yehovah wani’ (Gen. 18:19). Osofamiri nanga mati ben e kisi okasi tu fu kon makandra fu poti prakseri na den sani di Yehovah du, èn fu abi prisiri demakandra (Yes. 58:13, 14). San moro prenspari, na taki a sabat ben e sori go na wan ten te sma ben o kisi trutru krakti baka nanga yepi fu a Dusun Yari Tiri fu Krestes (Rom. 8:21). Ma fa a de na ini a ten disi? Pe tru Kresten di wani leri sabi den pasi fu Yehovah kan kisi krakti baka? Fa den kan kisi krakti baka?

Yu kan kisi krakti baka te yu abi demakandra nanga a gemeente

3. Fa den fosi Kresten ben e yepi makandra, èn san ben de a bakapisi?

³ Na apostel Paulus ben taki dati a Kresten gemeente na „wan pilari èn wan stonfutu fu a waarheid” (1 Tim. 3:15). Den fosi Kresten ben e gi makandra deki-ati èn den ben e sori lobi gi makandra. A sani dati ben de wan bigi yepi gi den (Ef. 4:11, 12, 16). Di Paulus ben de na ini Efeise, dan wan tu memre fu a gemeente Korente kon luku en, èn a sani dati gi en deki-ati. Luku san Paulus ben taki fu a sani dati: ’Mi breiti taki Stefanas nanga Fortunatus nanga Akaikus de dyaso, bika den gi mi nyun krakti’ (1 Kor. 16:17, 18). Di Titus ben go na Korente fu dini den Kresten brada nanga sisa fu en drape, dan Paulus skrifi wan brifi seni go gi a gemeente. A brifi dati ben taki: „Un alamala gi en nyun krakti baka” (2 Kor. 7:13). Na so a de tu na ini a ten disi taki Yehovah Kotoigi e kisi trutru krakti baka fu di den abi demakandra nanga tra Kresten brada nanga sisa.

4. Fa den gemeente konmakandra e gi wi krakti baka?

⁴ Yusrefi ondrofeni taki den gemeente konmakandra e gi furu prisiri. Drape ’ibriwan fu wi e kisi deki-ati fu a bribi fu trawan’ (Rom. 1:12). Wi Kresten brada nanga sisa a no sma nomo di wi e miti wanwan leisi, èn di wi no sabi bun. Den na trutru mati fu wi, wi lobi den, èn wi e lespeki den tu. Wi e kisi furu prisiri nanga trowstu fu di wi e kon makandra doronomo nanga den.—Fileim. 7.

5. Fa wi kan gi makandra deki-ati na den kongres nanga den tra bigi konmakandra?

 ⁵ Tra sani di e gi wi krakti baka, na den kongres nanga den tra bigi konmakandra di e hori ibri yari. Na den konmakandra dati, wi e kisi den tru leri fu Gado Wortu, Bijbel, èn den tru leri disi de leki watra di e gi libi. Ma den konmakandra dati e gi wi okasi tu fu ’opo wi ati’ gi trawan (2 Kor. 6:12, 13). Ma fa a de te wi e syensyen èn te wi feni en muilek fu abi demakandra nanga sma? Wan fasi fa wi kan leri sabi wi Kresten brada nanga sisa, na te wi e gi wisrefi fu yepi den te wi de na den kongres. Wan sisa ben e yepi brada nanga sisa di ben kon na wan internationaal kongres, èn a ben e yepi tu fu krin a presi. Baka dati a taki: „Boiti mi famiri nanga wan tu mati, mi no ben sabi furu sma drape. Ma di mi yepi fu krin a presi, dan mi leri sabi wan lo brada nanga sisa! A sani dati gi mi furu prisiri!”

6. San na wán fasi fa yu nanga yu osofamiri kan kisi krakti baka?

⁶ Ibri yari, den Israelsma ben e go na Yerusalem fu teki prati na den dri fesa di ben abi fu du nanga na anbegi (Ex. 34:23). Nofo tron dati ben wani taki dati den ben musu libi den gron nanga den wenkri fu den na baka, èn den ben musu teki waka omeni dei langa na tapu santi pasi. Ma toku a ben de so taki te den ben e go na a tempel, dan dati ben e gi den „furu prisiri” fu di den sma di ben de drape ben e „singi prèisesingi gi Yehovah” (2 Kron. 30:21). Na ini a ten disi, furu fu den futuboi fu Yehovah e prisiri te den nanga den osofamiri e go na Bethel, a bijkantoro fu Yehovah Kotoigi. Kande yu nanga yu osofamiri kan go drape tu wan leisi.

7. (a) Fa wi kan kisi wini fu prisiri demakandra? (b) Fa wi kan abi prisiri demakandra di e gi trawan trutru prisiri nanga deki-ati?

⁷ Te yu abi prisiri demakandra nanga famiriman nanga mati, dan dati kan gi wi deki-ati tu. A koni Kownu Salomo ben taki: ’A moro bun sani di wan libisma kan du fu dati ede, na fu nyan, dringi èn prisiri nanga a tranga wroko  fu en’ (Preik. 2:24). Boiti taki prisiri demakandra e gi wi krakti baka, den e meki tu taki wi e kon sabi wi Kresten brada nanga sisa moro bun, èn na so wi e kisi moro lobi gi den. Te wi abi prisiri demakandra, dan a moro bun fu no kari tumusi furu sma, èn wi musu sorgu tu taki sani e waka na wan orga fasi, spesrutu te sopi de fu dringi. Na so den okasi dati sa gi trawan trutru prisiri nanga deki-ati.

A diniwroko e gi wi krakti baka

8, 9. (a) Fa a boskopu fu Yesus ben de heri tra fasi leki a di fu den leriman fu Wet nanga den Fariseiman? (b) Fa wi e kisi wini te wi e prati a Bijbel boskopu gi sma?

⁸ Yesus ben e du a diniwroko fu en fayafaya, èn a ben e gi den disipel fu en deki-ati fu du a srefi. Wi e si dati te wi e luku a sani disi di a ben taki: „A kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman fu go du a kotiwroko fu en” (Mat. 9:37, 38). A boskopu di Yesus ben e tyari gi sma, ben e gi den krakti baka trutru. Iya, Yesus ben e tyari „bun nyunsu” gi sma (Mat. 4:23; 24:14). A nyunsu disi ben de heri tra fasi leki den wet fu den Fariseiman di ben de leki wan hebi gi a pipel.—Leisi Mateyus 23:4, 23, 24.

⁹ Te wi e prati a Kownukondre boskopu gi trawan, dan wi e yepi den fu kon sabi Yehovah. Na a srefi ten wi e kon frustan den tru tori fu Bijbel moro bun, èn wi e kisi moro warderi gi den. A psalm skrifiman ben abi leti di a taki: „Prèise Yah, un pipel, bika a bun fu singi prèisesingi gi wi Gado. A e gi wi prisiri” (Ps. 147:1). Fa yu kan prèise Yehovah nanga moro prisiri te yu e preiki gi trawan?

10. Te sma no e arki a boskopu fu wi, dan dati wani taki dati wi no abi bun bakapisi na ini a diniwroko? Fruklari dati.

¹⁰ A no de fu taki, dati a no na ini ala kontren sma de klariklari fu arki a bun nyunsu. (Leisi Tori fu den Apostel 18:1, 5-8.) Efu yu e libi na ini wan kontren pe furu sma no wani arki a Kownukondre boskopu, dan pruberi fu poti prakseri na den bun sani di yu e du kaba na ini a diniwroko. Hori na prakseri taki a muiti di yu e du doronomo fu meki Yehovah en nen bekènti, no de fu soso (1 Kor. 15:58). Boiti dati, te sma no e arki a bun nyunsu, dan dati no wani taki dati wi no abi bun bakapisi. Wi kan abi a dyaranti taki Yehovah sa sorgu taki reti-ati sma e kisi na okasi fu yere a Kownukondre boskopu.—Yoh. 6:44.

Na Osofamiri Anbegi e gi wi krakti baka

11. Sortu frantwortu Yehovah gi papa nanga mama, èn fa den kan tyari a frantwortu dati?

¹¹ Papa nanga mama di lobi Gado abi a frantwortu fu gi den pikin fu den leri fu Yehovah èn fu den fasi fu en (Deut. 11:18, 19). Efu yu na wan papa noso wan mama, dan yu e poti ten na wan sei fu leri den pikin fu yu kon sabi wi lobi-ati Tata moro bun? Yehovah wani yepi yu fu tyari a seryusu frantwortu disi èn fu poti prakseri na den sani di yu osofamiri abi fanowdu. Dati meki a gi wi bun furu leri nanga yepi fu buku, tijdschrift, video, nanga CD.

12, 13. (a) Fa osofamiri kan kisi wini fu na Osofamiri Anbegi? (b) Fa papa nanga mama kan sorgu taki na Osofamiri Anbegi e gi na osofamiri krakti baka?

¹² Boiti dati, a getrow èn koni srafu seti sani so taki wi abi wan neti fu studeri leki osofamiri. Ibri wiki, osofamiri e gebroiki a neti dati fu studeri Bijbel. Furu Kresten ondrofeni taki a seti disi meki taki den kon abi moro lobi gi makandra, èn a meki tu taki den kon abi wan moro bun matifasi nanga Yehovah. Ma fa papa nanga mama kan sorgu taki na Osofamiri Anbegi e gi na osofamiri fu den krakti baka?

¹³ Na Osofamiri Anbegi no musu de wan soi sani. Fu taki en leti, wi e anbegi „a koloku Gado” di wani taki wi e anbegi en nanga prisiri (1 Tim. 1:11; Fil. 4:4). A de wan blesi trutru taki wi abi ete wan neti fu taki fu den moi tru tori na ini Bijbel. Papa nanga mama kan pruberi fu hori a studie na so wan fasi taki den  pikin e kisi prisiri fu en. Luku san wan osofamiri du di den ben e studeri nanga a boi fu den di nen Brandon èn di abi 10 yari. Den meki a skrifi wan pisi tori di ben nen: „Fu san ede Yehovah gebroiki wan sneki fu prenki Satan?” A tori disi ben e dangra Brandon fu di a lobi sneki, èn a no ben feni en bun taki Bijbel e agersi Satan nanga wan sneki. Ten na ten, son osofamiri prei drama fu Bijbel tori, èn ibri memre fu na osofamiri ben e prei gi wan sma. Den e leisi komoto fu Bijbel san a sma dati e taki, noso na osofamiri e prei wan sani di ben pasa na ini Bijbel ten. Boiti taki den pikin e prisiri te den e kisi leri na a fasi disi, den e kisi okasi tu fu teki prati na a Osofamiri Anbegi. Na so den Bijbel gronprakseri sa doro den ati. *

Wai pasi gi sani di kan meki yu lasi-ati

14, 15. (a) Sortu problema moro nanga moro sma kisi na ini den lasti dei disi? (b) Sortu tra problema wi ben kan abi?

¹⁴ Na ini den lasti dei fu a sistema disi, sma e kisi moro nanga moro problema, èn den no abi wan howpu gi a tamara. Milyunmilyun sma no abi wroko èn den abi moni problema. Srefi den wan di abi wan wroko e si taki nofo tron a moni di den e meki no sari srefisrefi fu sorgu gi den osofamiri. (Luku Hagai 1:4-6.) Politiekman nanga tra tiriman no sabi san den musu du fu tyari wan kaba kon na a ogri di sma e du fu gens tirimakti. Furu sma e firi brokosaka fu di den abi swakifasi.—Ps. 38:4.

¹⁵ Tru Kresten e kisi fu du tu nanga den problema nanga broko-ede fu a grontapu fu Satan (1 Yoh. 5:19). Son leisi den disipel fu Krestes e kisi tra tesi tu fu di den wani tan gi yesi na Yehovah. Yesus ben taki: „Efu den frufolgu mi, dan den o frufolgu unu tu” (Yoh. 15:20). Ma awansi „den e frufolgu wi”, toku „a no de so taki Gado gowe libi wi” (2 Kor. 4:9). Fu san ede dati de so?

16. San kan yepi wi fu tan nanga prisiri?

¹⁶ Yesus ben taki: „Un kon na mi, un alamala di musu wroko hebi èn di musu tyari hebi lai, èn mi sa gi unu krakti baka” (Mat. 11:28). Te wi e frutrow dorodoro na ini a lusu-paiman fu Krestes, dan a de neleki wi e poti wisrefi na ini Yehovah en anu. Na so wi e kisi „krakti di bigi pasa marki” (2 Kor. 4:7). „A yepiman”, a santa yeye fu Gado, e tranga a bribi fu wi so te, taki wi kan horidoro te wi e kisi tesi, èn a e yepi wi fu tan nanga prisiri.—Yoh. 14:26; Yak. 1:2-4.

17, 18. (a) Nanga sortu denki wi musu luku bun? (b) San kan pasa te wi e suku nomo fu meki prisiri?

¹⁷ Na ini a ten disi, tru Kresten musu luku bun taki den no e teki a denki abra fu grontapusma di e suku nomo fu meki prisiri. (Leisi Efeisesma 2:2-5.) Efu wi no e luku bun nanga a sani dati, dan „a lostu fu a skin, a lostu fu den ai, èn a prodo di wan sma e prodo nanga den gudu di a abi”, kan meki wi du sani di no fiti (1 Yoh. 2:16). Noso kande wi e denki taki wi sa de koloku te wi e gi wisrefi abra na den lostu fu a skin (Rom. 8:6). Fu eksempre, son sma e gebroiki drugs, den e dringi tumusi furu sopi, den e luku porno, den e teki prati na sport di kan meki den lasi den libi, noso den e du difrenti tra sani di no fiti, soso fu abi prisiri. Den „triki” di Satan e gebroiki fu kori sma, na fu gi den a denki taki den de koloku, aladi dati no tru.—Ef. 6:11.

¹⁸ A no de fu taki, dati a no fowtu fu nyan, fu dringi, èn fu abi prisiriten di fiti, so langa  wi no e du den sani disi pasa marki. Ma wi no e meki den sortu sani dati tron den moro prenspari sani na ini wi libi. Fu di wi e libi na ini den lasti dei, meki wi musu sabi san na den moro prenspari sani, èn wi musu dwengi wisrefi. Te wi e poti tumusi furu prakseri na wi eigi afersi, dan dati kan gi wi so furu broko-ede taki wi e „tron sma di no e du noti èn di no e meki froktu, te a abi fu du nanga a soifri sabi fu wi Masra Yesus Krestes”.—2 Petr. 1:8.

19, 20. Fa wi kan kisi trutru krakti baka?

¹⁹ Te wi e hori wisrefi na den gronprakseri fu Yehovah, dan wi e si taki furu fu den prisiri fu a grontapu disi na fu wan syatu pisi ten nomo. Moses ben sabi dati, èn wi sabi dati tu (Hebr. 11:25). Fu taki en leti, wan sma sa de koloku trutru te a e du a wani fu wi hemel Tata. Iya, a sma dati sa firi prisiri dipi na ini en ati, èn a firi dati no sa de fu wan syatu pisi ten.—Mat. 5:6.

²⁰ Meki wi tan du a wani fu Gado so taki wi e kisi krakti baka. Te wi e du dati, dan wi no sa „ abi noti fu du nanga ogridu èn nanga den lostu fu grontapu. . . . Na a srefi ten, wi e wakti a kontru fu a tumusi moi howpu di wi abi èn wi e wakti sosrefi tapu a fasi fa a gran Gado fu wi, èn Krestes Yesus, wi Frulusuman, o sori densrefi nanga glori” (Tit. 2:12, 13). Sobun, meki wi tan saka wisrefi na ondro a tiri fu Yesus èn na so wi sa tan teki en tyatyari na wi tapu. Disi sa yepi wi fu de koloku trutru èn wi o kisi krakti baka!

[Futuwortu]

San yu ben sa piki?

• Fa a pipel fu Yehovah e kisi krakti baka na ini a ten disi?

• Fa a diniwroko e yepi wi èn den sma di wi e miti, fu kisi krakti baka?

• San osofamiri kan du fu sorgu taki na Osofamiri Anbegi e gi den krakti baka?

• Sortu sani kan gi wi broko-ede?

[Aksi fu a tori disi]

[Prenki na tapu bladzijde 26]

Te wi e teki Yesus en tyatyari na wi tapu, dan dati sa yepi wi fu kisi krakti baka