„A yeye e ondrosuku . . . den dipi sani fu Gado”

„A yeye e ondrosuku ala sani, iya, srefi den dipi sani fu Gado.”—1 KOR. 2:10.

1. Soleki fa Paulus e sori na ini 1 Korentesma 2:10, dan fa a santa yeye e wroko? Sortu aksi e opo kon leki bakapisi fu dati?

WI KAN de nanga tangi trutru gi a fasi fa a santa yeye fu Yehovah e wroko! Bijbel e taki dati a yeye na wan yepiman, èn wan presenti. Bijbel e taki tu dati a yeye e gi buweisi, èn taki a e taki gi wi (Yoh. 14:16; Tori. 2:38; Rom. 8:16, 26, 27). Na apostel Paulus ben poti prakseri na ete wan tumusi prenspari sani di a santa yeye e du. A ben taki: „A yeye e ondrosuku ala sani, iya, srefi den dipi sani fu Gado” (1 Kor. 2:10). Iya, Yehovah e gebroiki en santa yeye fu tyari dipi tru tori fu Bijbel kon na krin. Efu wi no ben e kisi a yepi disi, dan fa wi ben o frustan san Gado abi na prakseri fu du? (Leisi 1 Korentesma 2:9-12.) Ma difrenti aksi e opo kon, namku: Fa ’a yeye e ondrosuku den dipi sani fu Gado’? Nanga yepi fu suma Yehovah tyari den sani disi kon na krin na ini a fosi yarihondro? Fa a yeye e ondrosuku den dipi sani dati na ini a ten disi, èn nanga yepi fu suma a e du dati?

2. San na den tu fasi fa a yeye ben o wroko?

² Yesus ben sori taki a santa yeye ben o wroko na tu difrenti fasi. Syatu bifo Yesus dede, dan a ben taigi den apostel fu en a sani disi: „A yepiman, a santa yeye, di a Tata o seni kon na ini mi nen, o leri unu ala sani èn a o meki unu memre ala den sani di mi taigi unu” (Yoh. 14:26). Sobun, a santa yeye ben o de wan leriman èn a ben o yepi sma fu memre sani baka. Te a ben o wroko leki leriman, dan a ben o yepi Kresten fu kon frustan sani di den no ben e frustan fosi. Boiti dati, a santa yeye ben o yepi den Kresten tu fu memre den sani di den ben leri, èn fu fiti den sani dati na a yoisti fasi.

Na ini a fosi yarihondro

3. Sortu sani di Yesus ben taki e sori taki „den dipi sani fu Gado” ben o kon na krin safrisafri?

³ Yesus srefi ben leri den disipel fu en furu tru tori di den no ben sabi ete. Ma den ben musu leri furu tra sani ete. Yesus ben taigi den apostel fu en: „Furu sani de di mi musu taigi unu ete, ma unu no man tyari den now. Ma te a yepiman doro, namku a yeye fu waarheid,  dan a o leri unu a heri waarheid” (Yoh. 16:12, 13). Na so Yesus sori den taki safrisafri a santa yeye ben o yepi den fu kon sabi furu dipi sani fu Gado.

4. Fa a santa yeye ben wroko leki wan leriman na a dei fu a Pinksterfesa fu a yari 33, èn fa a yepi sma fu memre sani baka?

⁴ Na a dei fu a Pinksterfesa fu a yari 33, „a yeye fu waarheid” doro, èn a ben kon na tapu sowan 120 Kresten di ben kon makandra na ini Yerusalem. Sma ben si sani èn den ben yere sani tu di ben buweisi taki a santa yeye ben de na tapu den Kresten dati (Tori. 1:4, 5, 15; 2:1-4). Den disipel di ben e taki na ini difrenti tongo, ben e fruteri sma fu „den bigi sani di Gado du” (Tori. 2:5-11). A ten ben doro now taki wan nyun sani ben e kon na krin. A profeiti Yoèl ben taki na fesi taki a yeye ben o kon na tapu sma (Yoèl 2:28-32). Gi den sma di ben kon makandra na ini Yerusalem, a profeititori disi ben kon tru na wan fasi di den no ben fruwakti noiti. Boiti dati, na apostel Petrus ben teki fesi fu fruklari san ben pasa. (Leisi Tori fu den Apostel 2:14-18.) Na so a santa yeye ben wroko leki wan leriman, fu di a tyari kon na krin gi Petrus taki a sani di den disipel ben e ondrofeni, ben de wan kontru fu wan profeititori fu owruten. A santa yeye ben yepi Petrus tu fu memre sani baka, fu di Petrus no ben gebroiki soso den wortu di Yoèl ben taki, ma a ben gebroiki sosrefi wortu di David ben taki na ini tu psalm (Ps. 16:8-11; 110:1; Tori. 2:25-28, 34, 35). A no de fu taki, dati den sani di den sma drape ben si èn ben yere, trutru ben de dipi sani fu Gado.

5, 6. (a) Sortu prenspari aksi di ben abi fu du nanga a nyun frubontu ben musu kisi piki, baka a Pinksterfesa fu a yari 33? (b) Nanga yepi fu suma den tori disi ben tyari kon na fesi, èn sortu bosroiti ben teki?

⁵ Furu sani ben musu kon na krin ete gi den Kresten fu a fosi yarihondro. Fu eksempre, aksi ben opo kon di ben abi fu du nanga a nyun frubontu di ben kon abi krakti na a dei fu a Pinksterfesa. A de so taki a nyun frubontu ben abi fu du soso nanga den Dyu èn nanga sma di ben teki a Dyu bribi? A ben de so taki sma di no ben de Dyu ben kan kon tu na ini a frubontu so taki den ben kan tron salfuwan nanga yepi fu a santa yeye? (Tori. 10:45) A de so taki sma di no ben de Dyu ben musu besnèi fosi, èn a de so taki den ben musu hori densrefi na a Wet di Gado ben gi Moses? (Tori. 15:1, 5) Den aksi disi ben de prenspari aksi trutru. Den Kresten ben o abi a yeye fu Yehovah fanowdu fu ondrosuku den dipi tori disi. Ma nanga yepi fu suma a yeye disi ben o wroko?

⁶ Den sma di ben tyari ibriwan fu den afersi disi kon na fesi, ben de brada di ben abi frantwortu. Petrus, Paulus, nanga Barnabas ben de na a konmakandra fu a tiri skin èn den fruteri fa Yehovah ben handri nanga den sma di no ben de Dyu èn di no ben besnèi (Tori. 15:7-12). A tiri skin luku efu den buweisi disi ben e kruderi nanga den sani di ben skrifi na ini den Hebrew Buku fu Bijbel, èn den brada dati teki wan bosroiti nanga yepi fu a santa yeye. Baka dati, den skrifi brifi seni go gi den gemeente, fu meki den Kresten kon sabi sortu bosroiti den ben teki.—Leisi Tori fu den Apostel 15:25-30; 16:4, 5; Ef. 3:5, 6.

7. Na sortu fasi dipi tru tori ben e kon na krin?

⁷ Furu tra afersi ben tyari kon na krin nanga yepi fu brifi di ben skrifi nanga yepi fu santa yeye. Dati ben de brifi fu Yohanes, Petrus, Yakobus, nanga Paulus. Ma wan pisi ten baka di den Griki Buku fu Bijbel ben kaba skrifi, dan den Kresten no ben e kisi presenti moro fu man taki profeititori, èn den no ben e kisi sabi moro na wan wondru fasi (1 Kor. 13:8). A yeye ben o tan wroko leki leriman? A ben o tan meki sma memre sani baka? A ben o tan yepi Kresten fu ondrosuku den dipi sani fu Gado? Den profeititori ben e sori taki a yeye ben o tan du den sani dati.

Na a ten fu a kaba

8, 9. Suma ben o „skèin” na a ten fu a kaba, èn fa den ben o skèin?

⁸ Wan engel ben taki disi fu a ten fu a kaba:  „Den wan di man si a dipi fu wan tori, o skèin leki a krin leti na loktu. Boiti dati, den wan di e yepi furu sma fu kon de reti-ati sma, o kon de leki a leti fu stari di e skèin fu ala ten, iya, fu têgo. . . . Èn den o kon sabi bun furu tru tori” (Dan. 12:3, 4). Suma ben o de den wan di ben o man si a dipi fu wan tori, èn suma ben o skèin? Yesus yepi wi fu kon sabi dati di a fruteri na agersitori fu na aleisi èn a takru wiwiri. Disi na san a ben taki fu „a kaba fu wan grontapu sistema”: „Na a ten dati den regtfardikiwan sa brenki leki a son na ini a kownukondre fu den Tata” (Mat. 13:39, 43). Di Yesus fruklari na agersitori disi, dan a taki dati „den regtfardikiwan” na „den manpikin fu a kownukondre”, noso salfu Kresten.—Mat. 13:38.

⁹ A de so taki ala den salfu Kresten ben o „skèin”? Fu taki en leti, dati ben o de so, fu di ala den salfuwan ben o teki prati na a preikiwroko, den alamala ben o yepi fu meki disipel, èn den alamala ben o gi makandra deki-ati na den konmakandra. Na so den ben o de wan eksempre gi ala tra Kresten (Sak. 8:23). Ma boiti a sani dati, dipi sani ben o kon na krin na a ten fu a kaba. A profeititori di Danièl ben skrifi, ben ’tapu nanga wan stampu’, èn a no ben o kon na krin teleki a ten fu a kaba ben doro (Dan. 12:9). Fa a yeye ben o ondrosuku den  dipi sani disi, èn nanga yepi fu suma a ben o du dati?

10. (a) Nanga yepi fu suma a yeye e tyari dipi tru tori kon na krin na ini den lasti dei? (b) Fruklari fa den tru tori di abi fu du nanga a bigi agersi tempel fu Yehovah, tyari kon na krin.

¹⁰ Te a ten doro fu tyari wan Bijbel leri kon na krin na ini a ten disi, dan santa yeye e yepi den brada di e teki presi gi „a getrow èn koni srafu” fu kon frustan dipi tru tori di sma no ben e frustan fosi. Den brada disi e dini na a edekantoro (Mat. 24:45; 1 Kor. 2:13). Ala den brada fu a Tiri Skin e luku efu a de fanowdu fu tyari kenki kon na ini a fasi fa sani ben fruklari fosi (Tori. 15:6). Te den teki wan bosroiti, dan den sa tyari dati kon na doro te dati de fanowdu, so taki ala sma kan kisi wini fu en (Mat. 10:27). Baka wan pisi ten, a kan de fanowdu taki spesrutu tori e tyari kon na krin moro fini, èn den brada e tyari den tori disi kon na krin tu na wan soifri fasi.—Luku a faki  „Fa a yeye tyari kon na krin san na agersi tempel wani taki”.

Wi e kisi wini fu a santa yeye na ini a ten disi

11. Fa ala Kresten na ini a ten disi e kisi wini fu di a santa yeye e tyari den dipi sani fu Gado kon na krin?

¹¹ Ala reti-ati Kresten e kisi wini fu di a santa yeye e tyari den dipi sani fu Gado kon na krin. Neleki den fosi Kresten, wi na ini a ten disi e studeri Gado Wortu tu. Dati e yepi wi fu memre den sani baka di a santa yeye e yepi wi fu frustan, èn wi e fiti den sani dati tu na ini wi libi (Luk. 12:11, 12). Wi no abi fu de sma di teki heiskoro-leri, fu man frustan den dipi tru tori fu Gado di tyari kon na doro (Tori. 4:13). San wi kan du fu frustan den dipi sani fu Gado moro bun? Wi sa poti prakseri na wan tu fu den sani di wi kan du.

12. O ten wi musu begi Gado fu gi wi a santa yeye?

¹² Begi Gado fu gi yu en santa yeye. Te wi o poti prakseri na sani di abi fu du nanga Bijbel, dan wi musu begi Gado fosi fu tiri wi nanga yepi fu en santa yeye. Wi musu du dati awansi wi de wi wawan, èn awansi wi no abi furu ten fu studeri. Te wi e begi wi hemel Tata na a fasi disi, dan wi e sori taki wi abi sakafasi, èn A o breiti trutru. Soleki fa Yesus ben sori, Yehovah sa de klariklari fu gi wi en santa yeye te wi e aksi en dati nanga wi heri ati.—Luk. 11:13.

13, 14. Fu san ede wi musu sreka wisrefi gi den konmakandra, fu man frustan den dipi sani fu Gado?

¹³ Sreka yusrefi gi den konmakandra. Nanga yepi fu a srafu-grupu, wi e kisi „nyanyan na a reti ten”. A srafu e sreka Bijbel publikâsi gi wi, èn a e seti sani so taki wi kan studeri Gado Wortu èn so taki wi kan kisi leri na den konmakandra. A srafu abi bun reide fu aksi ’ala brada nanga sisa’ fu poti prakseri na spesrutu sani di a tyari kon na doro (1 Petr. 2:17; Kol. 4:16; Yud. 3). Te wi e du ala san wi man fu gi yesi na den rai di wi e kisi, dan na so wi e sori taki wi e wroko makandra nanga a santa yeye.—Openb. 2:29.

¹⁴ Te wi e sreka wisrefi gi Kresten konmakandra, dan a bun te wi e luku den Bijbeltekst di kari. Boiti dati, wi musu luku bun tu san ibriwan fu den tekst dati abi fu du nanga a tori di wi e studeri. Te wi abi a gwenti disi, dan  safrisafri wi o kon frustan Bijbel moro bun (Tori. 17:11, 12). Te wi e suku den tekst, dan wi e si pe den skrifi èn san den tekst dati e taki, èn a santa yeye kan yepi wi fu memre den. Èn a o moro makriki gi wi fu feni den tekst disi na ini Bijbel, te dati de fanowdu.

15. Fu san ede wi musu du muiti fu leisi ala den publikâsi di e tyari kon na doro? Fa yu kan du dati?

¹⁵ Du muiti fu leisi ala publikâsi. Aladi wi no e gebroiki ala publikâsi di e kon na doro na den konmakandra fu wi, toku den publikâsi dati sreka gi a bun fu wi. Srefi den tijdschrift fu wi di wi e prati gi sma na ini a preikiwroko, sreka gi a bun fu wi. Na ini a bruya grontapu disi, a de so nofo tron taki wi de na wan presi pe wi musu wakti tapu wan sma noso tapu wan sani. Te wi abi wan tijdschrift noso wan buku na wi di wi no leisi ete, noso di wi no kaba leisi, dan wi kan gebroiki den okasi dati fu leisi pikinso fu a publikâsi dati. Son sma e arki den publikâsi fu wi tapu CD noso tapu mp3 te den e waka noso te den e rèi oto. Den publikâsi disi di e taki fu tori di ondrosuku finifini, na gi ala sortu sma, èn den e yepi wi fu kisi warderi gi sani di abi fu du nanga Gado.—Hab. 2:2.

16. Sortu wini wi sa kisi te wi e skrifi den aksi fu wi na tapu papira èn te wi e ondrosuku den tori dati bakaten?

¹⁶ Denki dipi fu sani. Te yu e leisi Bijbel noso Bijbel publikâsi, dan teki ten fu denki dipi fu den sani di yu e leisi. Te yu e luku bun san a pisi di yu e leisi e tyari kon na krin, dan kande yu sa aksi yusrefi spesrutu sani. A bun fu skrifi den aksi dati na tapu papira, èn fu ondrosuku den tori dati bakaten. Nofo tron a de so taki na te wan spesrutu tori e hari wi, dan wi e ondrosuku en finifini. Den sani di wi e kon sabi, e kon de leki wan gudu gi wi èn wi o man kisi wini fu a gudu dati te dati de fanowdu.—Mat. 13:52.

17. Sortu sani yu e studeri yu wawan, noso nanga yu osofamiri?

¹⁷ Poti ten na wan sei fu studeri leki osofamiri. A Tiri Skin gi wi alamala deki-ati fu poti wan neti noso wan tra pisi ten na ini a wiki na wan sei fu studeri wi wawan, noso fu studeri nanga wi osofamiri. Den kenki di tyari kon na ini den konmakandra dei fu wi, e gi wi okasi fu fiti a rai disi. Sortu publikâsi yu e studeri na a Osofamiri Anbegi? Son sma e leisi Bijbel, den e ondrosuku den tekst di den no e frustan bun, èn den e skrifi syatu na ini den Bijbel san den sani dati wani taki. Furu osofamiri e luku fa den kan fiti den sani di den e studeri. Son osofamiri-edeman e poti prakseri na tori di o tyari wini kon gi na osofamiri fu den, noso na sani di na osofamiri wani kon sabi moro fini. A no de fu taki, dati te fu kaba, yu sa feni tra tori fu luku makandra nanga yu osofamiri. *

18. Fu san ede wi musu meki muiti fu studeri den dipi tru tori fu Gado Wortu?

¹⁸ Yesus ben taki dati a yeye ben o de wan yepiman. Sobun, wi musu du muiti fu studeri den moro dipi tru tori fu Gado Wortu. Den tru tori dati abi fu du nanga a tumusi warti „koni fu Gado”, èn wi e kisi a kari fu ondrosuku den tori dati. (Leisi Odo 2:1-5.) Den tori dati e meki wi kon sabi furu fu „den sani di Gado sreka gi den wan di lobi en”. Te wi e meki muiti fu kon sabi moro fu a Wortu fu Yehovah, dan santa yeye sa yepi wi fu di „a yeye e ondrosuku ala sani, iya, srefi den dipi sani fu Gado”.—1 Kor. 2:9, 10.

[Futuwortu]

San yu ben sa piki?

• San na den tu fasi fa a santa yeye e yepi wi fu ondrosuku „den dipi sani fu Gado”?

• Nanga yepi fu suma a santa yeye tyari tru tori kon na krin na ini a fosi yarihondro?

• Fa a santa yeye e tyari afersi kon na krin na ini a ten disi?

• San yu kan du fu kisi wini fu a fasi fa a santa yeye e wroko?

[Aksi fu a tori disi]

[Faki na tapu bladzijde 22]

 A fasi fa a yeye tyari kon na krin san na agersi tempel wani taki

Wan fu „den dipi sani fu Gado” di kon na krin na ini a fosi yarihondro, na taki a tabernakel, èn bakaten den tempel, ben e prenki wan moro bigi sani di abi fu du nanga na anbegi. Paulus ben kari a sani dati „a tru tenti di no de wan sani di libisma meki, ma di Yehovah meki” (Hebr. 8:2). Dati ben de a bigi agersi tempel, noso wan seti di ben gi sma okasi fu kon krosibei fu Gado. A sani disi ben kan pasa, fu di Yesus Krestes ben dede leki wan srakti-ofrandi, èn fu di a e dini leki priester.

„A tru tenti” kon de na ini a yari 29 di Yesus teki dopu, èn Yehovah teki en leki a sma di ben o tron wan srakti-ofrandi di ben bun dorodoro (Hebr. 10:5-10). Baka di Yesus dede èn a kisi wan opobaka, dan a go na ini a Moro Santa Presi fu na agersi tempel, èn a pristeri a waarde fu en srakti-ofrandi „na fesi Gado”.—Hebr. 9:11, 12, 24.

Na ini wan tra pisi fu Bijbel, na apostel Paulus skrifi taki salfu Kresten ’e gro teleki den kon tron wan santa tempel gi Yehovah’ (Ef. 2:20-22). A de so taki a tempel disi ben de a srefi leki „a tru tenti” di Paulus ben taki fu en bakaten na ini a brifi di a ben skrifi gi den Hebrewsma? Furu yari langa, den futuboi fu Yehovah ben e denki taki dati ben de so. Soleki fa den ben e bribi, dan Gado ben e sreka den salfu Kresten na grontapu fu dini leki „ston” na ini a hemel tempel fu Yehovah.—1 Petr. 2:5.

Ma krosibei fu a yari 1971, memre fu a srafu-grupu bigin si taki a tempel di Paulus ben e taki fu en na ini a buku Efeise, no ben kan de a bigi agersi tempel fu Yehovah. Efu „a tru tenti” ben abi fu du nanga salfu Kresten di kisi wan opobaka, dan a ben o kon de baka di den kisi wan opobaka na a ten fu „a denoya fu Masra” (1 Tes. 4:15-17). Ma Paulus ben skrifi disi fu a tabernakel: „A srefi tenti disi e prenki wan sani di abi fu du nanga a reti ten di doro kaba.”—Hebr. 9:9.

Fu di a srafu-grupu teki a tekst disi gersi nanga tra tekst, dan den kon si krin taki na agersi tempel no e bow nownowde, èn taki salfu Kresten a no „ston” di Gado e sreka na grontapu fu seti a tempel na hemel. Na presi fu dati, salfu Kresten e dini na ini a fesi dyari, èn na ini a Santa Presi fu na agersi tempel, pe den e tyari „wan srakti-ofrandi fu prèise” gi Gado, ibri dei.—Hebr. 13:15.

[Prenki na tapu bladzijde 23]

Fa wi kan kon frustan „den dipi sani fu Gado” moro bun?