„No frede. Misrefi o yepi yu”

YESUS ben gi den bakaman fu en a warskow disi: „Didibri o tan trowe sonwan fu unu na ini strafu-oso, so taki unu kan kisi tesi dorodoro èn so taki unu kan nyan pina tin dei langa.” Ma syatu bifo a warskow den, a ben taigi den: „No frede a pina di o miti yu.” Fu di Satan wani tapu a Kownukondre preikiwroko, meki a e tan gebroiki sma fu tapu skreki gi wi taki den o poti wi na strafu-oso. Dati meki wi musu hori na prakseri taki son tirimakti ben kan bosroiti fu frufolgu tru Kresten (Openb. 2:10; 12:17). Sobun, fa wi kan sreka wisrefi gi den triki fu Satan, so taki wi ’no e frede’ soleki fa Yesus ben taigi wi?

A no de fu taki, dati furu fu wi ondrofeni sani wan leisi di ben e meki wi frede. Ma toku Gado Wortu e gi wi a dyaranti taki Yehovah kan yepi wi so taki wi no e gi abra fu di wi e frede. Fa so? Wán fasi fa Yehovah e yepi wi fu kon sabi san wi musu du te wi e kisi gens, na taki a e sori wi sortu triki Satan nanga den bakaman fu en e gebroiki (2 Kor. 2:11). Fu man si fa Yehovah e du dati, dan meki wi poti prakseri na wan sani di ben pasa na ini Bijbel ten. Wi sa luku sosrefi wan tu eksempre fu reti-ati Kresten na ini a ten disi di ben e „tanapu kánkan gi den triki di Didibri e gebroiki”.—Ef. 6:11-13.

Wan kownu di abi bigi lespeki gi Gado e kakafutu gi wan ogri tiriman

Na ini a di fu aiti yarihondro bifo Krestes, Kownu Sanherib fu Asiria ben teki difrenti kondre abra, a wan baka a trawan. Fu di a bigin denki tumusi furu fu ensrefi, meki a ben de nomonomo fu teki Yerusalem abra. A foto disi ben de a mamafoto fu a pipel fu Gado, èn Heskia di ben abi bigi lespeki gi Gado, ben e tiri drape leki kownu (2 Kow. 18:1-3, 13). A no de fu taki, dati Satan ben e suku fu kisi wini fu a situwâsi dati, èn a gi Sanherib deki-ati fu du san a ben abi na prakseri. Na so Satan ben o man koti a tru anbegi puru na grontapu.—Gen. 3:15.

Sanherib seni wan grupu sma go na Yerusalem fu komanderi a pipel fu gi densrefi abra. Rabsakei ben de tu na ini a grupu dati, èn a ben de a moro prenspari sma di ben e taki gi a kownu (2 Kow. 18:17). * Rabsakei ben abi na prakseri fu meki den Dyu kon bruya, so taki den ben o gi abra sondro fu feti. Na sortu fasi Rabsakei pruberi fu tapu skreki gi den Dyu?

Den tan gi yesi na Gado aladi den ben de den wawan

Rabsakei ben taigi den wan di ben e teki presi gi Heskia a sani disi: „Disi na san a bigi kownu fu Asiria taki: ’Na tapu san yu e frutrow? Luku san yu du! Yu frutrow na tapu Egepte fu yepi yu. Ma Egepte de leki wan warimbo di broko èn di e boro wan sma anu te a e anga na en tapu’” (2 Kow. 18:19, 21). A sani di Rabsakei  ben taki dyaso no ben tru, fu di Heskia no ben sroto wan frubontu nanga Egepte. Ma toku a sani disi sori krin san Rabsakei ben wani den Dyu fu hori na prakseri, èn dati na: ’Nowan sma o yepi yu. Yu de yu wawan.’

Na ini a ten disi, gensman fu a tru anbegi ben wani tapu skreki gi tru Kresten na wan srefi sortu fasi. Den ben wani gi den Kresten a denki taki den ben de den wawan. Wan Kresten sisa di ben musu koti strafu fu di a e anbegi Gado, no ben man abi demakandra nanga tra Kresten furu yari langa. Bakaten, a sisa disi fruteri san yepi en fu no gi abra di sma ben e tapu skreki gi en. A sisa ben taki: „Na begi yepi mi fu kon moro krosibei na Yehovah . . . Mi ben e prakseri a dyaranti di wi e kisi na Yesaya 66:2, pe skrifi taki Gado e poti prakseri ’na den sma di e pina, èn di brokosaka’. A sani disi ala ten ben e gi mi krakti nanga trowstu.” Wan tra eksempre, na a di fu wan brada di den ben sroto en wawan na ini wan strafu-oso kamra. A brada disi ben taki: „Mi kon si taki aladi den ben sroto mi na ini wan pikin kamra, toku mi ben kan firi fri trutru, fu di mi ben abi wan bun matifasi nanga Gado.” Iya, fu di den tu Kresten disi ben abi wan bun matifasi nanga Yehovah, meki den feni a krakti fu horidoro aladi den ben de den wawan (Ps. 9:9, 10). Den frufolguman ben kan sorgu taki den Kotoigi di ben de na strafu-oso, no ben man abi demakandra moro nanga den famiriman fu den, nanga den mati, èn nanga den Kresten brada nanga sisa. Ma toku den Kotoigi dati ben sabi taki den gensman fu den noiti no ben o man prati den fu Yehovah.—Rom. 8:35-39.

Dati meki a prenspari srefisrefi taki wi e gebroiki ibri okasi fu kon abi wan moro bun matifasi nanga Yehovah! (Yak. 4:8) Wi musu aksi wisrefi a sani disi doronomo: ’Mi e si Yehovah leki wan trutru Sma? Den wortu fu en abi bigi krakti na mi tapu te mi e teki pikin bosroiti noso bigi bosroiti na ini mi aladei libi?’ (Luk. 16:10) Te wi e du ala muiti fu tan abi wan bun matifasi nanga Gado, dan wi no sa abi reide fu frede. A profeiti Yeremia di ben e taki gi den Dyu di ben e pina, ben taki: „Ke Yehovah, mi bari kari yu nen komoto fu a moro dipi olo di de.  . . A dei di mi ben e bari kari yu, yu kon krosibei. Yu taki: ’No frede.’”—Kragi. 3:55-57.

A pipel fu Yehovah no e tweifri na en

Rabsakei ben pruberi fu kori a pipel fu meki den tweifri. A ben taki: „We, suma broko den presi nanga den altari puru pe sma ben e anbegi [Yehovah]? A no Heskia srefi? . . . Na Yehovah taigi mi: ’Hari go feti nanga den sma fu a kondre dati èn pori en’” (2 Kow. 18:22, 25). Sobun, Rabsakei ben wani sori den taki Yehovah no ben o feti gi a pipel fu En, fu di a ben e mandi nanga den. Ma dati ben de wan lei. Yehovah ben breiti nanga Heskia èn nanga den Dyu di ben drai kon baka na a tru anbegi.—2 Kow. 18:3-7.

Na ini a ten disi, frufolguman di e suku fu kori wi ben kan fruteri wi sani di gersi tru tori, soso fu gi wi a denki taki den e agri nanga wi. Ma fu taki en leti, den e drai den tori dati na wan triki fasi, soso fu meki wi tweifri. Fu eksempre, son leisi sma taigi Kresten brada nanga sisa di ben de na strafu-oso, taki wan tra brada di ben e teki fesi na ini a kondre fu den, ben drai baka gi a tru anbegi. Sma ben taigi den tru Kresten disi taki a ben o moro bun te den drai baka tu gi a tru anbegi. Ma te Kresten man si sani krin, dan den sortu lei dati no e meki den tweifri.

Luku san ben pasa nanga wan Kresten sisa, na a ten fu a Di Fu Tu Grontapufeti. Di a sisa disi ben de na strafu-oso, dan sma sori en wan  papira di ben e sori taki wan brada di ben abi frantwortu, ben drai baka gi a bribi fu en. A sma di ben poti wan lo aksi gi a sisa disi, aksi en efu a ben e horibaka gi a Kotoigi dati. A sisa piki en: „A brada dati na wan sondu sma nomo.” A sisa ben taki moro fara dati solanga a brada ben e hori ensrefi na Bijbel gronprakseri, Gado ben e gebroiki en. A sisa ben taki sosrefi: „Ma fu di a brada taki sani di no e kruderi nanga Bijbel, meki mi no e si en leki mi brada moro.” A sisa dati di ben e tai hori na Gado, ben koni nofo fu hori ensrefi na a Bijbel rai disi: „No poti un frutrow na tapu heihei sma, noso na tapu iniwan tra libisma di no man frulusu unu.”—Ps. 146:3.

Te wi abi soifri sabi fu Gado Wortu èn te wi e fiti a rai fu Bijbel na ini wi libi, dan dati o yepi wi fu luku bun nanga lei di kan meki taki wi e lasi a krakti fu horidoro (Ef. 4:13, 14; Hebr. 6:19). Fu dati ede, wi musu si en leki wan prenspari sani fu leisi Bijbel ibri dei èn fu studeri Gado Wortu. Na so wi o man sreka wi srefi, so taki wi kan denki krin te wi e kisi tesi (Hebr. 4:12). Iya, now na a ten fu kon sabi moro fu Gado, so taki a bribi fu wi kan kon moro tranga. Wan brada di ben de en wawan na ini wan strafu-oso kamra furu yari langa, ben taki: „Mi wani gi ibriwan sma a rai fu sori warderi gi ala a yeye nyanyan di wi e kisi, fu di wi no sabi fa dati sa yepi wi bakaten.” Iya, te wi e studeri Gado Wortu finifini, èn sosrefi den publikâsi di a srafu-grupu e tyari kon na doro na ini a ten disi, dan te tesi e miti wi, santa yeye o ’meki wi memre’ den sani di wi leri.—Yoh. 14:26.

Den no e frede sma di e tapu skreki gi den

Rabsakei pruberi fu tapu skreki gi den Dyu. A ben taki: „Efu yu wani, dan yu kan hori wan strei nanga mi masra, a kownu fu Asiria. Ma awinsi mi gi yu tu dusun asi, toku wi sabi taki yu no o man feni sma fu rèi den asi disi . . . Dan fa yu o man feti nanga wan fu den moro lagiwan fu den granman fu mi masra?” (2 Kow. 18:23, 24) Te yu e luku en bun, dan Heskia nanga a pipel fu en no ben o man wini a makti legre fu Asiria den wawan.

Na ini a ten disi, a kan de so tu taki frufolguman abi bun furu makti, spesrutu te lanti e horibaka gi den. Na so a ben de nanga den Nazi srudati di ben e frufolgu a pipel fu Gado na a ten fu a Di Fu Tu Grontapufeti. Den sma disi pruberi fu tapu skreki gi furu fu den futuboi fu Gado. Wan brada fu wi di ben de na strafu-oso furu yari langa, fruteri bakaten fa den srudati tapu skreki gi en. Wán leisi wan ofsiri ben aksi en: „Yu no si fa den sutu a Kresten brada fu yu? San yu leri fu a sani dati?” A brada piki en: „Mi na wan Kotoigi fu Yehovah èn mi o tan wan Kotoigi fu Yehovah.” Na ofsiri piki en: „Dan na yu wi o sutu now.” Toku a brada fu wi tan hori ensrefi na a bosroiti fu en, èn den feanti no tapu skreki gi en moro langa. San yepi a brada disi fu tanapu kánkan di sma ben e tapu skreki gi en? A brada piki: „Mi frutrow na ini a nen fu Yehovah.”—Odo 18:10.

Fu di wi e frutrow dorodoro tapu Yehovah, meki a e kibri wi gi ala den sani di Satan e gebroiki fu pori a bribi fu wi (Ef. 6:16). Fu dati ede, a bun te wi e begi Yehovah fu yepi wi fu tranga a bribi fu wi (Luk. 17:5). Wi musu kisi wini tu fu den sani di a getrow srafu-grupu seti fu tranga a bribi fu wi. Te sma e tapu skreki gi wi, dan wi e kisi deki-ati te wi e prakseri a dyaranti di Yehovah ben gi a profeiti Esekièl di ben e kisi fu du nanga tranga-ede sma. Yehovah ben taigi en: „Mi meki yu fesi kon tranga neleki a fesi fu den, èn mi meki yu fesi-ede kon tranga neleki a fesi-ede fu den. Mi meki a fesi-ede fu yu tron leki dyamanti, iya, mi meki a tranga moro leki fayaston” (Esek. 3:8, 9). Te a de fanowdu, dan Yehovah kan yepi wi fu kon abi deki-ati, neleki fa Esekièl ben abi dati.

Wi musu kakafutu gi tesi

Nofo tron, gensman e pruberi ala sortu sani fu meki wan sma drai baka gi Gado, ma toku den no abi bun bakapisi. Ma den gensman disi sabi taki son leisi den kan meki wan sma drai baka gi Gado, te den e kori a sma dati taki a o kisi moi sani. Rabsakei pruberi a sani disi tu nanga den sma na ini Yerusalem. A ben taigi den: „A kownu fu Asiria taki: ’Gi unsrefi abra na mi  èn kon na dorosei . . . teleki mi kon fu tyari unu go na wan kondre di gersi a di fu unu. A kondre dati lai aleisi, nyun win, brede, droifidyari, olèifbon fu meki oli, èn a lai oni tu. Un kon nanga mi, so taki unu no abi fu dede’” (2 Kow. 18:31, 32). A ben musu fu de wan tesi gi den Israelsma fu prakseri taki den ben kan nyan switi brede èn dringi nyun win, na presi fu libi leki strafuman na baka den skotu fu a foto!

Na wan srefi sortu fasi sma pruberi fu swaki a bribi fu wan zendeling di ben de na strafu-oso. Den ben taigi a zendeling disi taki den ben o tyari en go na wan „moi oso” di ben abi wan „moi dyari”. A ben o tan drape siksi mun langa, so taki a ben o man denki fu sani. Ma a brada ben tan na ai, èn a tan hori ensrefi na Bijbel gronprakseri. San ben yepi en? Bakaten a fruteri: „Mi ben e si a Kownukondre leki a wan-enkri tru howpu. . . . Fu di den sani di mi ben e bribi fu Gado Kownukondre ben e gi mi krakti, meki mi noiti no tweifri wan momenti na den sani dati. Iya, den no ben man meki mi lasi bribi!”

Wi e si Gado Kownukondre leki wan trutru sani? A famiri-edeman Abraham, na apostel Paulus, nanga Yesus srefi, ben kisi hebi tesi. Ma ala den man disi ben man horidoro fu di den ben e si a Kownukondre leki wan trutru sani (Fil. 3:13, 14; Hebr. 11:8-10; 12:2). Te wi e tan poti a Kownukondre na a fosi presi na ini wi libi, èn te wi e tan hori den têgo blesi fu en na prakseri, dan wi no sa gi abra te sma e pramisi wi taki den o puru wi na ini tesi, fu di a frulusu dati ben o de fu wan pisi ten nomo.—2 Kor. 4:16-18.

Yehovah no sa gowe libi wi

Aladi Rabsakei pruberi fu tapu skreki gi den Dyu na ala sortu fasi, toku Heskia nanga a pipel fu en tan poti den frutrow tapu Yehovah (2 Kow. 19:15, 19; Yes. 37:5-7). Di a pipel ben begi Yehovah fu yepi den, dan Yehovah piki den begi dati. A seni wan engel fu kiri 185.000 fetiman na ini a kampu fu den Asiriasma, èn na engel du dati na ini wán neti nomo. Sanherib ben kisi syen, èn a dei baka dati, en nanga a pikin grupu srudati di ben tan abra, hasti densrefi go baka na Ninefei, a mamafoto fu den.—2 Kow. 19:35, 36.

A de krin taki Yehovah no ben gowe libi den wan di ben e frutrow na en tapu. Na ini a ten disi, Kresten brada nanga sisa fu wi tanapu kánkan tu di den ben e kisi tesi. Den eksempre fu den e sori taki Yehovah trutru no e gowe libi a pipel fu en. Fu dati ede, wi hemel Tata abi leti fu gi wi a dyaranti disi: „Mi, Yehovah, na yu Gado di e grabu yu reti-anu hori. Mi na a sma di e taigi yu: ’No frede. Misrefi o yepi yu.’”—Yes. 41:13.

[Futuwortu]

[Prenspari pisi na tapu bladzijde 13]

Na ini a Wortu fu en, Yehovah srefi e gi den futuboi fu en a dyaranti disi moro leki 30 tron: „No frede”

[Prenki na tapu bladzijde 12]

Fa den triki fu Rabsakei e kruderi nanga den wan di den feanti fu a pipel fu Gado e gebroiki na ini a ten disi?

[Prenki na tapu bladzijde 15]

Te wi abi wan bun matifasi nanga Yehovah, dan dati e yepi wi fu tan gi yesi na en te wi e kisi tesi