Teki prati dorodoro na a bigi kotiwroko
Teki prati dorodoro na a bigi kotiwroko
„Abi furu fu du na ini a wroko fu Masra.”—1 KOR. 15:58.
1. Sortu kari Yesus ben gi den disipel fu en?
NA A kaba fu a yari 30, di Yesus ben e teki waka na ini a kontren fu Samaria, dan a go rostu pikinso na wan peti krosibei fu a foto Sikar. Drape a taigi den disipel fu en: „Opo un ai luku den gron, dan unu o si taki a nyanyan lepi kaba fu koti” (Yoh. 4:35). Yesus no ben e taki fu wan trutru kotiwroko, ma fu wan agersi kotiwroko. Na ini a kotiwroko dati, a ben o tyari reti-ati sma kon na wán di ben o tron bakaman fu en. Fu taki en leti, a ben e gi den disipel fu en a kari fu abi wan prati na a kotiwroko disi. Furu wroko ben de fu du, èn pikinso ten nomo ben de fu du a wroko dati.
2, 3. (a) Sortu sani e sori taki wi e libi na ini a ten fu a kotiwroko? (b) Na sortu sani wi sa poti prakseri na ini na artikel disi?
2 Den sani di Yesus ben taki fu a kotiwroko, prenspari gi wi na ini a ten disi. Wi e libi na ini wan ten pe na agersi gron na heri grontapu „lepi kaba fu koti”. Ibri yari, milyunmilyun sma e kisi a kari fu kon leri sabi den tru tori di e gi libi, èn dusundusun nyun disipel e teki dopu. Wi abi a grani fu teki prati na a moro bigi kotiwroko di du oiti, èn Yehovah Gado na a Masra fu a kotiwroko disi. Yu abi „furu fu du” na ini a kotiwroko disi?—1 Kor. 15:58.
3 Na ini den dri nanga afu yari di Yesus ben dini na grontapu, a sreka den disipel fu en gi a kotiwroko di den ben o du. Na ini na artikel disi wi sa poti prakseri na dri fu den someni prenspari sani di Yesus ben leri den disipel fu en. Ibriwan fu den sani dati e poti prakseri na wan fasi di wi musu abi fu man teki prati fayafaya na a wroko di wi e du fu meki disipel na ini a ten disi. Meki wi poti prakseri na ibriwan fu den fasi disi.
Wi musu abi sakafasi
4. Fa Yesus sori taki a de prenspari fu abi sakafasi?
4 Luku a situwâsi disi: A no langa di den disipel kaba krutu nanga makandra suma fu den na a moro bigiwan. Kande a de fu si ete na den fesi taki den no e frutrow makandra èn taki den e atibron nanga makandra. Fu dati ede, Yesus e kari wan yongu pikin fu kon tanapu na den mindri. Yesus e poti prakseri na a yongu pikin èn a e taki: „Efu wan sma abi sakafasi neleki a yongu pikin disi, dan a sma dati na a moro bigiwan na ini a kownukondre fu hemel.” (Leisi Mateyus 18:1-4.) Den disipel no ben musu de leki grontapusma di feni taki na soso te wan sma abi makti, gudu, noso biginen, dan a sma dati e teri. Na presi fu dati, den disipel ben musu frustan taki te den ben „abi sakafasi”, dan na so den ben o sori taki den bigi. Yehovah ben o blesi den èn a ben o gebroiki den soso te den ben e sori trutru sakafasi.
5, 6. Fu san ede yu musu abi sakafasi fu man teki prati dorodoro na a kotiwroko? Gi wan eksempre fu dati.
5 Te nanga a dei fu tide, furu sma na grontapu de nomonomo fu kon abi makti, gudu, nanga biginen. Dati meki den no abi ten fu leri sabi Gado èn fu dini en (Mat. 13:22). Ma tra fasi leki grontapusma, a pipel fu Yehovah de klariklari fu ’sori sakafasi’ te den e handri nanga sma. Dati meki a Masra fu a kotiwroko sa blesi den, èn a sa feni den bun. —Mat. 6:24; 2 Kor. 11:7; Fil. 3:8.
6 Luku na eksempre fu Francisco di e dini leki owruman na ini Zuid-Amerika. Di a ben de wan yonkuman, dan a gowe libi na universiteit fu go pionier. A e fruteri: „Bakaten di mi ben meki mofo fu trow, dan mi ben kan feni wan wroko di ben o meki taki mi nanga mi wefi ben o abi moro moni. Na presi fu dati, wi bosroiti fu libi soso nanga den sani di wi abi fanowdu trutru, èn wi ala tu go na ini a furuten diniwroko. Bakaten, wi kisi pikin, èn a sani dati meki taki wi kon abi tra problema. Ma Yehovah yepi wi fu tan du san wi ben bosroiti fu du.” Francisco e taki moro fara: „Moro leki 30 yari langa, mi abi a grani fu dini leki owruman, èn mi kisi furu tra grani tu. Noiti a hati wi taki wi ben teki a bosroiti fu libi soso nanga den sani di wi abi fanowdu trutru.”
7. Na sortu fasi yu pruberi fu fiti a rai di skrifi na Romesma 12:16?
7 Efu yu no e feti baka den „bigi sani” fu a grontapu disi, èn efu yu e „suku fu du wroko di sma e si leki pikin sani”, dan yu kan fruwakti tu fu kisi furu tra blesi nanga grani na ini a kotiwroko.—Rom. 12:16; Mat. 4:19, 20; Luk. 18:28-30.
Wi sa kisi blesi te wi e wroko fayafaya
8, 9. (a) Taki syatu fu na agersitori di Yesus ben gi fu den talenti. (b) Gi sortu sma spesrutu na agersitori disi sa de wan deki-ati?
8 Wan tra fasi di wi musu abi fu man teki prati dorodoro na a kotiwroko, na taki wi musu de fayafaya. Yesus ben tyari disi kon na krin na ini na agersitori fu den talenti. * Na agersitori dati abi fu du nanga wan man di ben o go na wan tra kondre, èn di gi dri srafu a frantwortu fu luku den sani fu en. A fosi srafu kisi feifi talenti, a di fu tu srafu kisi tu talenti, èn a di fu dri srafu kisi wán talenti. Baka di a masra fu den gowe, dan den fosi tu srafu wroko fayafaya, èn wantewante den „du bisnis” nanga den talenti fu den. Ma a di fu dri srafu ben „lesi”. A kibri a talenti fu en na ondro gron. Di a masra drai kon baka na oso, dan a blesi den tu srafu fu di a poti den „fu luku furu sani”. A teki a talenti baka di a ben gi a di fu dri srafu, èn a yagi a srafu dati puru na ini en oso.—Mat. 25:14-30.
9 A no de fu taki, dati yu wani de fayafaya neleki den srafu na ini na agersitori fu Yesus. A no de fu taki tu, dati yu wani teki prati fayafaya na a wroko di wi e du fu meki disipel. Ma fa a de te a situwâsi fu yu e tapu yu fu du moro na ini a diniwroko? Kande na ekonomia fu a kondre no e drai bun srefisrefi, èn dati meki yu musu wroko moro langa fu man sorgu yu osofamiri. Noso kande yu no steifi moro leki di yu ben yongu, èn kande yu no de so gosontu moro tu. Efu dati de so, dan na agersitori fu den talenti sa gi yu deki-ati.
10. Fa a masra na ini na agersitori fu den talenti e sori taki a e hori den srafu na prakseri, èn fu san ede a sani disi e gi yu deki-ati?
10 Luku taki a masra na ini na agersitori ben sabi taki ibriwan fu den srafu fu en ben abi den eigi koni nanga fasi. A ben sori dati di a ben gi den talenti „akruderi san den ben man du” (Mat. 25:15). A fosi srafu ben du moro a di fu tu srafu, soleki fa a masra ben fruwakti. Ma a masra ben si a tranga muiti di ala tu srafu ben meki, èn fu dati ede a kari den „bun èn getrow” srafu. Boiti dati, a gi den a srefi pai (Mat. 25:21, 23). Na so a de tu taki Yehovah Gado, a Masra fu a kotiwroko, sabi taki a situwâsi fu yu e meki taki yu no man du so furu na ini a diniwroko. A o si a tranga muiti di yu e du fu dini en, èn a o blesi yu gi dati.—Mark. 14:3-9; leisi Lukas 21:1-4.
11. Gi wan eksempre di e sori taki wan sma kan kisi furu blesi te a e du a diniwroko fayafaya, aladi a situwâsi fu en muilek.
11 Luku na eksempre fu Selmira, wan Kresten sisa di e libi na ini Brasyonkondre. Na eksempre disi e sori taki wan sma kan dini Gado fayafaya, awansi a situwâsi fu en muilek. Twenti yari pasa, wan tu man di ben go fufuru na wan presi, sutu Selmira en masra kiri. A sani disi meki taki Selmira wawan ben musu sorgu gi den dri yongu pikin fu den. Fu di a ben e krin oso gi sma, meki a ben e wroko furu yuru wan dei. Boiti dati, a ben musu go bun fara, èn ala ten den bus di a ben e feni ben lai nanga sma. A sani disi ben meki taki a ben weri srefisrefi. Aladi a ben abi den problema disi, toku a seti en libi na so wan fasi taki a ben man dini leki pionier. Bakaten, tu fu den dri pikin fu en bigin pionier makandra nanga en. Selmira e taki: „Na ini den yari di pasa, mi studeri Bijbel nanga moro leki 20 sma, èn fu taki en leti, mi e si den leki mi eigi famiriman. Te nanga a dei fu tide mi e kisi wini fu di den lobi mi èn fu di den de mi mati. A sani dati na wan gudu di moni no man bai.” A no de fu taki, dati a Masra fu a kotiwroko blesi Selmira fu di a ben e du a diniwroko fayafaya!
12. Fa wi kan du a preikiwroko fayafaya?
12 Efu a situwâsi fu yu e meki taki yu no man du so furu na ini a diniwroko, dan toku yu kan du muiti fu abi moro bun bakapisi. Te yu e du muiti fu fiti den rai di yu e kisi na a alawiki Diniwroko Konmakandra, dan yu o man preiki nanga moro koni. Boiti dati, yu o pruberi fu preiki na tra fasi tu (2 Tim. 2:15). Kande yu kan tapu fu du spesrutu sani, noso kande yu kan du den sani dati na wan tra ten. Na so yu o man go na ini a preikiwroko doronomo makandra nanga a gemeente.—Kol. 4:5.
13. San kan yepi yu fu dini Gado fayafaya, èn fa yu kan tan de nanga faya?
13 Hori na prakseri taki te wan sma e wroko fayafaya na ini a preikiwroko, dan dati e kon fu di a lobi Yehovah èn fu di a abi warderi gi den sani di Yehovah du gi en (Ps. 40:8). A di fu dri srafu na ini a agersitori fu Yesus, ben frede a masra fu en èn a ben e si en leki wan sma di ben e aksi tumusi fu trawan. Fu dati ede, a srafu kibri a talenti fu en na ondro gron, na presi taki a gebroiki en fu meki den gudu fu en masra kon moro furu. Efu wi no wani de leki a srafu dati, dan wi musu kon abi wan bun matifasi nanga Yehovah, a Masra fu a kotiwroko, èn wi musu tan krosibei fu en. Poti ten na wan sei fu studeri Bijbel, èn fu denki dipi fu den moi fasi fu en, namku lobi, pasensi, nanga sari-ati. Na so yu sa kon abi na angri fu dini en fayafaya.—Luk. 6:45; Fil. 1:9-11.
„Un musu de santa”
14. Sortu prenspari markitiki den sma di wani teki prati na a kotiwroko, musu doro?
14 Na apostel Petrus ben gebroiki wortu di ben skrifi na ini den Hebrew Buku fu Bijbel, fu sori san Gado wani taki den futuboi fu en na grontapu ben musu du. Petrus ben taki: „Neleki fa a Sma di kari unu de santa, na so unu musu kon santa tu na ini ala san unu e du, bika Gado Buku taki: ’Un musu de santa, bika mi santa’” (1 Petr. 1:15, 16; Lef. 19:2; Deut. 18:13). Den wortu disi e sori taki den wan di e teki prati na a kotiwroko musu tyari densrefi na wan krin fasi, èn den musu anbegi Gado na wan krin fasi tu. Wi kan doro a prenspari markitiki dati te wi e du san de fanowdu fu tron sma di krin na wan agersi fasi. Fa wi kan du dati? Wi kan du dati nanga yepi fu den tru tori na ini Gado Wortu.
15. Fa den tru tori fu Gado Wortu kan yepi wi?
15 Bijbel e agersi den tru tori fu Gado nanga watra di e krin sani. Fu eksempre, na apostel Paulus ben skrifi taki a gemeente fu salfu Kresten krin na ini Gado ai. A ben taki dati a gemeente disi di ben o tron a wefi fu Krestes de leki wan trowmisi di krin fu di Krestes wasi en ’nanga watra, nanga yepi fu Gado wortu so taki a kan de santa èn sondro fowtu’ (Ef. 5:25-27). Wan tu yari na fesi, di Yesus ben meki a wortu fu Gado bekènti, dan a ben taki tu dati a Wortu disi abi a krakti fu krin sma. Di Yesus ben e taki nanga den disipel fu en, dan a taigi den: „Den sani di mi taigi unu, meki taki unu krin kaba” (Yoh. 15:3). Sobun, den tru tori na ini Gado Wortu man yepi sma fu tyari densrefi na wan krin fasi, èn a man yepi den tu fu anbegi Gado na wan krin fasi. Na soso te wi e gi pasi taki den tru tori fu Gado Wortu krin wi na a fasi dati, dan fosi Gado sa feni na anbegi fu wi bun.
16. Fa wi kan tan anbegi Gado na wan krin fasi, èn fa wi kan tan tyari wisrefi na wan krin fasi tu?
16 Sobun, efu wi wani teki prati na a kotiwroko fu Gado, dan wi musu tapu nanga ala sani di Gado e si leki sani di no krin. Iya, efu wi wani tan abi a grani fu du a wroko disi, dan wi musu du ala san wi man fu hori wisrefi na den hei markitiki fu Gado, èn wi musu tan anbegi en na wan krin fasi. (Leisi 1 Petrus 1:14-16.) Neleki fa wi e hori wi skin krin doronomo, na so wi musu meki den tru leri fu Gado Wortu krin wi doronomo tu. Disi wani taki dati wi musu leisi Bijbel èn wi musu go na den Kresten konmakandra. Boiti dati, wi musu meki ala muiti fu fiti den rai fu Gado na ini wi libi. Te wi e du dati, dan wi o man basi den sondu firi fu wi èn wi o man kakafutu gi a krakti fu grontapu di kan pori wi (Ps. 119:9; Yak. 1:21-25). Iya, a de wan trowstu trutru fu sabi taki den tru tori fu Gado Wortu kan ’wasi wi kon krin’ srefi fu seryusu sondu!—1 Kor. 6:9-11.
17. Efu wi wani tan krin, dan na sortu rai fu Bijbel wi musu gi yesi?
17 Yu e gi pasi taki den tru leri fu Gado Wortu krin yu libi? Fu eksempre, fa yu feni en te yu e kisi rai fu luku bun nanga a takru prisiriten fu a grontapu disi? (Ps. 101:3) Yu e sorgu taki yu no e moksi tumusi nanga pikin na skoro noso nanga sma na yu wrokope di no abi a srefi bribi leki yu? (1 Kor. 15:33) Yu e du ala muiti fu basi den swakifasi fu yu di kan meki taki Yehovah no e si yu moro leki wan sma di krin? (Kol. 3:5) Yu e tan fara fu den politiek afersi fu a grontapu disi? Yu e sori taki yu no de leki den sma di abi tranga lobi gi a kondre fu den, neleki fa dati de fu si na ini furu sport? —Yak. 4:4.
18. Te wi no e bribi falsi leri, èn te wi e tyari wisrefi na wan fasi di Gado feni bun, dan fa dati e yepi wi fu abi bun bakapisi na ini a kotiwroko?
18 Te yu e tan gi yesi na Gado te a abi fu du nanga den sortu afersi dati, dan dati o tyari furu wini kon gi yu. Yesus ben e agersi den salfu disipel fu en nanga taki fu wan droifibon. A ben taki: „[Mi Papa] o puru ibri taki fu mi di no e meki froktu, èn a o krin ibri taki di e meki froktu, so taki den kan meki moro froktu” (Yoh. 15:2). Te yu e meki a watra fu den tru tori fu Bijbel krin yu, dan yu o gi moro froktu srefi.
Den blesi di wi sa kisi now èn na ini a ten di e kon
19. Sortu blesi den disipel fu Yesus kisi fu di den ben e wroko fayafaya na ini a kotiwroko?
19 Bakaten, den reti-ati disipel di ben e teki leri fu Yesus, kisi krakti fu a santa yeye tapu a Pinksterfesa fu a yari 33. Den ben gi kotoigi „na den moro farawe presi fu grontapu” (Tori. 1:8). Baka dati, den dini leki memre fu a tiri skin, leki zendeling, leki owruman di ben e go luku difrenti gemeente, èn den ben e du furu fu preiki a bun nyunsu „gi ala sma na grontapu” (Kol. 1:23). A no de fu taki, dati den kisi furu blesi, èn taki den yepi trawan fu de koloku!
20. (a) Sortu blesi yu kisi fu di yu teki prati dorodoro na a kotiwroko? (b) Sortu fasti bosroiti yu abi?
20 Iya, te wi abi sakafasi, te wi de fayafaya, èn te wi e hori wisrefi na den hei markitiki fu a Wortu fu Gado, dan wi sa tan teki prati dorodoro na a bigi kotiwroko di e du now. Furu sma na ini a grontapu disi e sari èn e bruya fu di den e feti baka gudu èn fu di den e suku nomo fu abi prisiri. Ma wi e prisiri trutru èn wi de koloku (Ps. 126:6). Ma san moro prenspari, na taki ’a wroko di wi e du gi Masra no de fu soso’ (1 Kor. 15:58). Yehovah Gado, a Masra fu a kotiwroko, sa blesi wi fu têgo gi ’a wroko fu wi èn gi a lobi di wi e sori gi a nen fu en’.—Hebr. 6:10-12.
[Futuwortu]
^ paragraaf 8 Na a fosi presi, na agersitori fu den talenti e sori fa Yesus e handri nanga den salfu disipel fu en. Ma ala Kresten kan leri wan sani fu na agersitori disi.
Yu e memre disi ete?
• Fu san ede yu musu abi sakafasi fu man teki prati dorodoro na a kotiwroko?
• Fa yu kan teki prati fayafaya na a kotiwroko èn san o yepi yu fu tan du dati?
• Fu san ede yu musu tan tyari yusrefi na wan krin fasi, èn fu san ede yu musu tan anbegi Gado na wan krin fasi tu?
[Aksi fu a tori disi]
[Prenki na tapu bladzijde 17]
Te wi abi sakafasi, dan dati kan yepi wi fu poti Kownukondre afersi na a fosi presi na ini wi libi