Yepi den pikin fu yu fu kon lobi leisi èn studeri

WAN fu den moro prenspari fasi fa yu kan yepi yu pikin fu kon abi wan bun tamara, na fu leri den fu leisi èn fu studeri. Èn a no de fu taki, dati den sani disi e gi furu prisiri! A moro moi sani di son sma man memre fu den pikin-nengreten, na a leisi di a papa nanga mama fu den ben e leisi gi den. Te wi e leisi, dan dati kan gi wi furu prisiri, èn a kan tyari wini kon gi wi. Disi de so spesrutu gi futuboi fu Gado, fu di wi e kon abi wan moro bun matifasi nanga Gado te wi e studeri Bijbel. Wan Kresten papa ben taki: „Den sani di prenspari gi wi, na sani di abi fu du nanga a leisi di wi e leisi, èn nanga a studeri di wi e studeri.”

Te den pikin fu yu e studeri bun, dan dati kan yepi den fu kon abi wan moro bun matifasi nanga Gado (Ps. 1:1-3, 6). Aladi a no de fanowdu taki wan sma musu man leisi fu kan kisi frulusu, toku Bijbel e tyari kon na krin taki te wi man leisi, dan dati kan tyari furu blesi kon gi wi. Fu eksempre, Openbaring 1:3 e taki: „Koloku fu a sma di e leisi den wortu fu a profeititori disi nanga wan tranga sten; koloku fu den sma di e yere a profeititori disi.” Boiti dati, a prenspari tu taki wi e poti ala wi prakseri na den sani di wi e studeri. Wi kan si dati krin te wi e luku a rai di na apostel Paulus ben gi Timoteyus nanga yepi fu santa yeye. A ben taki: „Prakseri bun fu den sani disi; denki soso dati wawan.” Fu san ede Timoteyus ben musu du dati? Paulus taki moro fara: „So taki ala sma kan si taki yu e go na fesi.”—1 Tim. 4:15.

A no de fu taki, dati awinsi wan sma sabi fa fu leisi èn studeri, toku dati wawan no sa tyari wini kon gi en. Furu sma sabi fa fu leisi èn studeri, ma toku den no e du dati. Na presi fu dati, den e feti baka sani di no sa tyari furu wini kon gi den. Sobun, fa papa nanga mama kan yepi den pikin fu den fu kon abi na angri fu leri sani di o tyari wini kon gi den?

Sori lobi gi yu pikin, èn de wan bun eksempre gi den

Te papa nanga mama e studeri na wan lobi-ati fasi nanga den pikin fu den, dan te fu kaba den pikin o kon lobi studeri. Owen nanga Claudia, wan Kresten trowpaar, e taki disi fu den tu pikin fu den: „Den pikin fu wi no ben man wakti fu studeri, fu di den ben lobi te wi ben e studeri makandra. Te wi ben e studeri, dan den no ben e broko den ede nanga sani, èn den ben e firi switi tu. Na den okasi dati, den ben e firi taki wi lobi den.” Awinsi den pikin doro den muilek tini yari fu den, toku a lobi di den e firi te den e studeri leki osofamiri, sa abi krakti tapu a denki fu den. Den pikin fu Owen nanga Claudia e dini now leki pionier, èn te nanga now den lobi leisi èn studeri soleki fa a papa nanga mama fu den ben leri den.

Wan prenspari fasi fa papa nanga mama kan sori den pikin taki den lobi den, na te den de wan bun eksempre gi den. Te pikin-nengre e si taki den papa nanga mama abi a gwenti fu leisi èn studeri, dan nofo tron dati e yepi den fu kon si den gwenti dati leki prenspari sani. Ma efu yu leki papa noso mama no lobi leisi, dan fa yu o man de wan eksempre gi yu pikin? Kande yu sa  abi fu seti yu libi tra fasi, noso kande yu sa abi fu kenki a fasi fa yu e denki fu leisi (Rom. 2:21). Efu yu e si en leki wan prenspari sani fu leisi ibri dei, dan dati sa abi krakti tapu na ati fu den pikin fu yu. Te yu e meki tranga muiti, spesrutu fu studeri Bijbel, fu sreka yusrefi gi den konmakandra, èn fu studeri nanga yu osofamiri, dan den pikin o frustan krin taki den sani disi prenspari.

Sobun, te yu wani yepi den pikin fu yu fu kon lobi leisi, dan yu musu sori lobi gi den, èn yu musu de wan bun eksempre gi den. Ma sortu tra sani yu kan du fu gi den deki-ati fu leisi?

Yepi yu pikin fu kon lobi leisi

San na wan tu prenspari sani di yu musu du fu yepi den pikin fu yu fu kon lobi leisi? Gi den buku fu leisi te den de yonguyongu ete. Wan Kresten owruman kon lobi leisi fu di en papa nanga mama ben e gi en deki-ati fu leisi. A e gi a rai disi: „Meki den pikin fu yu kon gwenti nanga buku. Te den e du dati, dan buku e tron den mati, èn den o kon si buku leki sani di den abi fanowdu na ini den libi.” Na so pikin o bigin lobi buku di abi fu du nanga Bijbel, awansi den no sabi leisi ete. Wan tu fu den buku dati, na Teki leri fu a Bigi Leriman nanga Mi buku nanga Bijbel tori. Te yu e leisi den sortu buku disi nanga den pikin fu yu, dan yu no e leri den fu taki wawan, ma yu e leri den sosrefi „yeye afersi”, nanga „wortu di abi fu du nanga a yeye”.—1 Kor. 2:13.

Abi a gwenti fu leisi gi den pikin fu yu. Kon abi a gwenti fu leisi gi den pikin fu yu ibri dei. Te yu e du dati, dan den sa leri fu taki bun, èn den o kisi a gwenti tu fu leisi. A fasi fa yu e leisi prenspari tu. Te yu de fayafaya, dan den sa de fayafaya tu. Fu taki en leti, kande den pikin fu yu o aksi yu fu leisi a srefi tori ibri tron baka. A sani dati a no wan problema. Du san den e aksi fu yu. Baka wan pisi ten, den o wani taki yu leisi tra tori tu. Ma yu no musu dwengi den pikin fu leisi nanga yu. Yesus na wan bun eksempre gi wi, fu di a ben gi den arkiman fu en leri „solanga den ben man frustan en” (Mark. 4:33). Te yu no e dwengi den pikin fu yu, dan ibri tron baka, den o de fayafaya fu leisi. A sani dati sa meki taki safrisafri yu e yepi den pikin fu yu fu kon lobi leisi.

Gi den deki-ati fu taki, èn taki fu den sani di yu e leisi. Fosi yu denki, den yongu pikin fu yu o kon sabi furu wortu, den o man taki den wortu dati bun, èn den o frustan san den wortu dati wani taki. Disi sa gi yu furu prisiri. Te yu e taki fu den sani di yu e leisi, dan dati kan yepi den fu leri sani moro esi. Wan buku di e sori fa sma kan yepi pikin fu leisi bun, e taki dati te sma e taki nanga pikin-nengre, dan dati e yepi den „fu kon sabi wortu di den sa musu sabi èn sa musu frustan bakaten te den e leisi buku nanga tra sani”. A srefi buku e taki: „A prenspari fu taki nanga pikin-nengre di musu leri leisi ete, èn o moro yu e taki fu prenspari sani, o moro dati sa yepi den.”

Meki yu pikin leisi gi yu, èn gi den deki-ati fu poti aksi. A bun te yusrefi e poti aksi, èn te yu e sori den pikin san ben kan de a piki tapu den aksi dati. Na so fasi, den pikin e kon frustan taki den kan leri wan sani fu den buku di den e leisi, èn taki den wortu di den e leisi, wani taki wan sani tu. A sani disi na wan bigi yepi spesrutu te yu e leisi buku di abi fu du nanga Gado Wortu, a moro prenspari buku di de.—Hebr. 4:12.

Ma noiti no frigiti taki a no makriki fu leri leisi. A sani disi e teki ten, èn wan sma musu oefen furu fosi a e leri leisi bun. * Sobun, prèise yonguwan gi a muiti di den e meki, èn te fu kaba dati kan meki taki den e kon lobi leisi.

A e gi prisiri te wi e leisi, èn a e tyari wini kon gi wi

Te yu e leri yu pikin fa fu studeri, dan den o frustan fu san ede a bun fu leisi. Te wan sma e studeri, dan a e kon sabi sani, èn a e kon frustan san den difrenti sani dati abi fu du nanga makandra. A sma dati musu man sabi san den sani di a leri wani taki, a musu man memre den sani dati, èn a musu man gebroiki den. Te wan pikin kon sabi fa fu studeri, èn te a man si fa den sani di a e leri kan yepi en, dan dati o tyari wini kon gi en, èn a o gi en prisiri.—Preik. 10:10.

Leri den fa fu studeri. Te yu e hori na Osofamiri Anbegi, te yu e taki fu a deitekst, èn te yu e  studeri tra sani, dan dati na moi okasi fu leri den pikin fu yu fa fu studeri. Te pikin e sidon pî fu wan syatu pisi ten, aladi den e leisi noso studeri wan tori, dan dati sa leri den fu poti ala den prakseri na wan sani. A de prenspari taki den e du dati, efu den wani leri sani. Yu kan gi yu manpikin deki-ati tu fu fruteri yu san den sani di a leri, abi fu du nanga den sani di a sabi kaba. Na so a e leri fu teki sani gersi nanga makandra. Kande yu kan aksi yu umapikin fu fruteri syatu san a leisi, èn fu du dati nanga en eigi wortu. Disi sa yepi en fu frustan san a leisi, èn fu hori den sani dati na ede. Wan tra fasi fa yu kan leri yu pikin fu hori sani na ede, na fu poti prakseri baka na den sani di unu leisi na ini wan artikel. Disi wani taki dati yu e taki baka fu den prenspari tori di unu leisi, fu yepi a pikin fu kon frustan a tori bun. Yu kan leri srefi den yongu pikin fu yu fu skrifi wan tu syatu sani na tapu papira te yu e studeri nanga den, noso te unu de na wan gemeente konmakandra. Disi kan yepi den trutru fu poti ala den prakseri na den sani di den e yere! Den sani disi di no muilek fu du, sa yepi yu nanga den pikin fu yu fu studeri na wan fasi di e gi prisiri, èn a sa tyari wini kon tu gi unu.

Seti sani na wan fasi di e gi deki-ati fu studeri. Te a presi pe unu e studeri no waran tumusi, te nofo faya de, te a presi tiri, èn te a switi fu studeri drape, dan a sa de moro makriki gi den pikin fu poti ala prakseri na san den e studeri. A no de fu taki, dati papa nanga mama musu frustan taki a de fanowdu trutru fu studeri. Wan mama e taki: „A de tumusi prenspari fu studeri doronomo, èn fu abi a gwenti fu meki ten fu leisi èn studeri. Disi e yepi den pikin fu yu fu du sani na wan orga fasi. Den e leri fu si san den musu du, èn o ten den musu du den sani dati.” Furu papa nanga mama no wani taki den pikin fu den e du tra sani na a ten te den e studeri. Soleki fa wan sabiman e sori, dan disi na wan prenspari fasi fa yu kan leri pikin fu studeri bun.

Sori o prenspari a de fu studeri. Leki lasti, yepi yu pikin fu si fa den kan gebroiki den sani di den e leri. Te pikin e gebroiki den sani di den e leri, dan dati e yepi den fu si fu san ede a bun fu studeri. Wan yongu brada e taki: „Efu mi no man si fa mi kan gebroiki den sani di mi musu studeri, dan mi musu dwengi misrefi fu studeri den sani dati. Ma efu mi e studeri wan sani di mi man gebroiki na ini mi libi, dan mi wani kon frustan a sani dati moro bun.” Te yonguwan e si taki a e tyari wini kon gi den te den e studeri, dan den sa studeri fayafaya. Den o kon abi na angri fu studeri, neleki fa den ben kon abi na angri fu leisi.

A moro bun wini di yu ben kan kisi

A e tyari bun furu wini kon te yu e yepi yu pikin fu kon lobi leisi. Wan tu fu den wini dati, na taki den o wroko bun na skoro, den o man du a grontapuwroko fu den bun, den o abi bun matifasi nanga sma, èn den o man frustan a grontapu di wi e libi na ini. Boiti dati, te papa, mama, nanga pikin lobi leisi, dan dati e yepi den fu kon abi moro lobi gi makandra. Wan tra sani, na taki a e gi prisiri fu leisi èn fu studeri.

Ma san moro prenspari, na taki te den pikin fu yu lobi studeri, dan dati kan yepi den fu tron anbegiman fu Yehovah. Te den lobi studeri, dan „a bradi nanga a langa nanga a hei nanga a dipi” fu den tru tori na ini Bijbel sa abi krakti tapu den frustan, èn tapu den ati (Ef. 3:18). A no de fu taki, dati Kresten papa nanga mama musu leri den pikin fu den furu sani. Papa nanga mama di e poti furu prakseri na den pikin fu den, èn di e du ala san den man fu gi den pikin wan bun fondamenti na ini a libi, e du dati nanga a howpu taki te fu kaba, den pikin sa bosroiti fu tron anbegiman fu Yehovah. Te yu e leri den pikin fu yu fa fu studeri bun, dan dati sa yepi den fu kon abi wan bun matifasi nanga Gado, èn fu tan bun mati fu En. Fu dati ede, begi Yehovah fu blesi den muiti di yu e meki fu yepi den pikin fu yu fu kon lobi leisi èn studeri.—Odo 22:6.

[Futuwortu]

 [Faki/​Prenki na tapu bladzijde 26]

Gi den deki-ati fu leisi . . .

• Gi den buku fu leisi

• Leisi gi den

• Gi den deki-ati fu taki fu den sani di unu e leisi

• Taki nanga den fu den sani di unu e leisi

• Meki den leisi gi yu

• Gi den deki-ati fu poti aksi

Gi den deki-ati fu studeri . . .

• Unu leki papa nanga mama musu de wan bun eksempre

• Leri yu pikin . . .

○ fa fu poti ala den prakseri na wan sani

○ fu teki sani gersi nanga makandra

○ fu taki syatu fu san den leisi

○ fu poti prakseri baka na san den leisi

○ fu skrifi wan tu sani syatu

• Seti sani na so wan fasi taki den e kisi deki-ati fu studeri

• Sori den o prenspari a de fu studeri