Aksi fu leisiman

Fu san ede Yesus ben kan taigi wan uma di sma ben sabi leki wan sondari, taki a kisi pardon fu den sondu fu en?—Lukas 7:37, 48.

Di Yesus ben e didon e nyan na ini na oso fu wan Fariseiman di ben nen Simon, dan wan uma „go tanapu na baka Yesus na en futusei”. A nati Yesus en futu nanga en watra-ai, èn a drei en futu nanga en ede-wiwiri. Baka dati, a bosi Yesus futu na wan safri fasi èn a lobi switismeri oli gi den. Na Evangelietori e taki dati ’sma fu a foto ben sabi na uma disi leki wan sondari’. A no de fu taki dati ala sma na sondari, ma nofo tron Bijbel e gebroiki a wortu disi fu taki fu wan sma di du bigi sondu, noso di gwenti du sondu. A kan taki na uma ben de wan huru-uma. Na a uma disi Yesus ben taigi: „Yu kisi pardon fu yu sondu” (Luk. 7:36-38, 48). San Yesus ben wani taki nanga den wortu dati? Fa na uma ben kan kisi pardon fu den sondu fu en, efu a frulusu-ofrandi no ben pai ete?

Baka di na uma ben wasi den futu fu Yesus èn ben lobi oli gi den, dan Yesus gebroiki wan agersitori fu tyari wan prenspari sani kon na krin gi Simon di ben kari en kon na en oso. Na a ten dati, Yesus no ben gi na uma pardon ete. Na ini na agersitori dati, Yesus agersi sondu nanga wan paiman di bigi tumusi fu pai. A ben taigi Simon: „Tu man ben abi wan paiman na wan sma di ben leni den moni; a wan ben abi wan paiman fu feifi hondro denari, ma a trawan ben abi wan paiman fu feifitenti denari. Di den no ben abi noti fu pai a paiman baka, dan nanga en heri ati a man di ben leni den a moni taigi den taki den no ben abi fu pai a paiman moro. We, sortuwan fu den tu man o lobi en moro?” Simon piki Yesus: „Mi denki taki na a wan di no ben abi fu pai a bigi paiman moro.” Yesus taigi en: „Yu abi leti” (Luk. 7:41-43). Wi alamala musu gi yesi na Gado, ma te wi e trangayesi en èn e du sondu, dan wi no e pai Gado a paiman di wi abi na en. Na so a paiman dati e kon moro bigi. Ma Yehovah de leki wan sma di e leni trawan moni èn di de klariklari fu gi wi pardon fu di wi no man pai a paiman. Yesus ben taki fu den paiman fu wi di a gi den bakaman fu en a rai fu begi Gado èn fu aksi En: „Gi wi pardon fu den sondu fu wi leki fa wi e gi pardon na sma di du wan sondu teige wi.”—Mat. 6:12.

O ten Gado ben e gi sma pardon na ini a ten di pasa? Fu di Gado ala ten e du san reti, meki den wan di e du sondu musu dede. Fu dati ede, Adam dede fu di a ben sondu. Ma soleki fa a Wet di Gado ben gi a pipel fu Israel ben sori, dan wan sma di ben du wan sondu, ben kan kisi pardon te a ben tyari wan meti leki ofrandi gi Yehovah. Na apostel Paulus ben taki: „Pikinmoro ala sani kon krin nanga brudu soleki fa a Wet e taki, èn efu brudu no trowe, dan sma no kan kisi pardon” (Hebr. 9:22). Den Dyu no ben sabi nowan enkri tra fasi fa Gado e gi sma pardon fu den sondu fu den. Dati meki a no e fruwondru wi taki den sma di ben e luku san na uma ben e du, no ben e agri nanga a sani di Yesus ben taigi en. Den sma di ben e didon na a tafra makandra nanga Yesus, bigin aksi densrefi: „Suma na a man disi, taki a e gi sma pardon fu sondu?” (Luk. 7:49) Sobun, fa a du kon taki Yesus ben kan gi pardon na a uma disi di ben du bigi sondu?

A fosi profeititori di ben taki baka di den fosi tu libisma opo densrefi teige Gado, ben e sori taki Yehovah ben o meki wan „pikin” gebore di Satan nanga den „pikin” fu en ben o masi na en bakafutu (Gen. 3:15). A sani disi pasa di den feanti fu Gado kiri Yesus (Gal. 3:13, 16). A brudu fu Yesus ben de a lusu-paiman di e frulusu libisma fu sondu nanga dede. Di Yehovah ben taki den wortu di skrifi na Genesis 3:15, dan gi en a ben de leki a lusu-paiman ben pai kaba, fu di noti no kan tapu en fu du san a abi na prakseri. Now Yehovah ben kan gi pardon na den wan di ben e poti bribi na ini den pramisi fu en.

Na ini a ten fosi a Kresten bribi ben seti, Yehovah  ben e si son sma leki regtfardikisma. Wan tu fu den ben de Heinok, Noa, Abraham, Rakab, nanga Yob. Fu di den sma disi ben abi bribi, meki den ben e fruwakti a ten te den pramisi fu Gado ben o kontru. A disipel Yakobus ben skrifi: „Abraham ben bribi na ini Yehovah, èn fu dati ede Gado ben si en leki wan regtfardikisma.” Yakobus ben taki fu Rakab: „A no ben de so tu taki a huru-uma Rakab ben de regtfardiki fu den sani ede di a ben du?”—Yak. 2:21-25.

Kownu David fu owruten Israel ben du difrenti seryusu sondu, ma a ben abi wan tranga bribi na ini a tru Gado, èn a ben e sori trutru berow ibri leisi baka. Boiti dati, den Buku fu Bijbel e taki: „Gado poti Krestes leki wan ofrandi di e meki sma kon bun baka nanga Gado te den e bribi na ini a brudu fu Krestes. Gado du disi fu sori sma taki a de regtfardiki, bika a gi sma pardon fu den sondu di den du na ini a ten di pasa, iya, a pisi ten di a ben e frudrage den sma. Na so fasi Gado ben kan sori sma na ini a ten disi taki a de regtfardiki, so taki a ben o de regtfardiki te a o fruklari taki a sma di e bribi na ini Yesus, de regtfardiki” (Rom. 3:25, 26). Nanga yepi fu a frulusu-ofrandi di Yesus ben o tyari bakaten, Yehovah ben kan gi David pardon fu den sondu fu en, sondro taki a ben e pasa den regtfardiki markitiki fu En.

Soleki fa a sori, dan a situwâsi fu na uma di ben lobi oli gi Yesus en futu, ben de a srefi leki a situwâsi fu David. Na uma disi ben e libi wan yayolibi, ma a ben sori berow. A ben kon si taki a ben musu kisi pardon gi den sondu fu en, èn den sani di a du sori taki a ben abi warderi trutru gi a sma di Yehovah ben o gebroiki fu gi en pardon. Aladi a lusu-paiman no ben pai ete, toku sma neleki na uma disi ben kan kisi pardon fu den sondu fu den, fu di a lusu-paiman dati ben o pai seiker. Na fu dati ede meki Yesus ben taigi en: „Yu kisi pardon fu yu sondu.”

Soleki fa a tori disi e sori krin, Yesus no ben e wai pasi gi sondari. A ben e yepi den. Boiti dati, Yehovah de klariklari fu gi sma pardon te den e sori berow fu den sondu fu den. Dati na trutru wan moi dyaranti gi wi leki sondusma, èn a e gi wi deki-ati tu!

[Prenki na tapu bladzijde 7]

Gado ben e si den leki regtfardikisma