Fa a lusu-paiman e frulusu wi?
Fa a lusu-paiman e frulusu wi?
„A sma di e bribi na ini a Manpikin, e kisi têgo libi. A sma di no e gi yesi na a Manpikin, no sa kisi libi, ma a bigi atibron fu Gado e tan na en tapu.”—YOH. 3:36.
1, 2. San na wán reide fu san ede a tijdschrift Zion’s Watch Tower ben tyari kon na doro?
WAN artikel na ini a tijdschrift Zion’s Watch Tower fu oktober 1879 ben taki: „Iniwan sma di e studeri Bijbel finifini kan si krin taki a dede fu Krestes prenspari srefisrefi.” Na a kaba fu na artikel dati, den seryusu wortu disi ben skrifi: „Meki wi luku bun nanga iniwan leri di e taki dati a dede fu Krestes no de wan srakti-ofrandi di e tapu den sondu fu libisma.”—Leisi 1 Yohanes 2:1, 2.
2 Wan reide fu san ede a tijdschrift disi ben tyari kon na doro na ini yuli 1879, ben de fu opo taki gi a Bijbel leri fu a lusu-paiman. A tijdschrift disi ben gi reti-ati sma „nyanyan na a reti ten”, fu di na ini den yari baka 1850, moro nanga moro sma di ben e kari densrefi Kresten bigin tweifri efu a dede fu Yesus ben kan de wan lusu-paiman gi den sondu fu wi (Mat. 24:45). Na a ten dati, furu sma ben e bigin bribi na evolutie-leri, wan leri di e tapu sma fu bribi taki libisma lasi a grani di den ben abi fu no abi sondu. Sma di e horibaka gi na evolutie-leri e taki dati libisma no abi yepi fanowdu fu tron moro bun sma, èn taki den no abi wan lusu-paiman fanowdu tu. Fu dati ede, a rai di na apostel Paulus ben gi Timoteyus, fiti srefisrefi. Paulus ben taki: „Sorgu bun gi a sani di yu kisi; no arki te sma e taki soso sani di e pori santa sani, èn no arki te sma e taki fu tori di no e agri nanga makandra, bika na den tori disi sma e kari ’sabi’, ma den na soso lei. Fu di son sma ben prodo nanga a sabi disi, meki den gowe libi a bribi.”—1 Tim. 6:20, 21.
3. Na sortu aksi wi sa poti prakseri?
3 A no de fu taki dati yu abi a fasti bosroiti fu no „gowe libi a bribi”. Fu dati ede, a ben o bun fu poti prakseri na den aksi disi: Fu san ede mi abi a lusu-paiman fanowdu? Fu san ede wi kan taki dati a lusu-paiman ben aksi furu fu Yehovah? Fa mi kan kisi wini fu a tumusi warti seti disi di kan yepi mi fu wai pasi gi na atibron fu Gado?
Wi kan wai pasi gi na atibron fu Gado
4, 5. San e sori taki Gado en atibron e tan tapu na ogri sistema disi?
4 Bijbel nanga den sani di pasa sensi libisma de na grontapu, e sori taki a sondu fu Adam meki taki na atibron fu Gado ’tan na tapu’ libisma (Yoh. 3:36). Disi de krin fu si, fu di te nanga now, nowan sma ben man wai pasi gi dede. A tiri fu Satan no ben man kibri libisma kwetikweti gi den rampu di e pasa doronomo. Boiti dati, nowan libisma tirimakti ben man gi libisma ala san den ben abi fanowdu trutru (1 Yoh. 5:19). Sobun, libisma e kisi fu du ete nanga orloku, ogridu, nanga pôtifasi.
5 A de krin taki Yehovah no feni na ogri sistema disi bun. Paulus ben taki dati ’Gado di de na hemel, e sori wi taki a e atibron trutru nanga ala ogridu’ (Rom. 1:18-20). Dati meki den wan di e tan libi na wan fasi di Gado no feni bun, sa musu tyari den bakapisi fu den sondu fu den. Na ini a ten disi, Gado e meki den krutu boskopu fu en bekènti na ini a grontapu fu Satan. Den boskopu disi de leki rampu di e miti a grontapu disi, èn den e sori krin taki Gado e atibron nanga a libisma famiri. Boiti dati, wi kan leisi fu den tori disi na ini furu fu den Bijbel publikâsi fu wi.—Openb. 16:1.
6, 7. Na ini sortu wroko salfu Kresten e teki fesi? Sortu okasi de ete gi sma di de wan pisi fu a grontapu fu Satan?
6 A sani disi wani taki dati sma no man komoto na ondro a tiri fu Satan èn taki den no man kon bun baka nanga Gado? Nôno, fu di den abi na okasi ete fu kon bun baka nanga Yehovah. Salfu Kresten, di de „boskopuman di e teki presi gi Krestes”, e teki fesi na ini a preikiwroko, èn den e gi sma fu ala kondre a kari disi: „Kon bun baka nanga Gado.”—2 Kor. 5:20, 21.
7 Na apostel Paulus ben taki dati Yesus „o frulusu wi fu a bigi atibron di e kon” (1 Tes. 1:10). Te Yehovah o puru atibron tapu libisma fu a lasti leisi, dan den sondusma di no wani sori berow sa kisi pori fu têgo (2 Tes. 1:6-9). Suma sa kisi frulusu? Bijbel e taki: „A sma di e bribi na ini a Manpikin, e kisi têgo libi. A sma di no e gi yesi na a Manpikin, no sa kisi libi, ma a bigi atibron fu Gado e tan na en tapu” (Yoh. 3:36). Iya, te a grontapu disi o kisi pori, dan ala sma di de na libi èn di e sori bribi na ini Yesus nanga a lusu-paiman fu en, sa kisi kibri te Gado o puru atibron tapu libisma fu a lasti leisi.
Fa a lusu-paiman e tyari wini kon gi wi?
8. (a) Sortu moi howpu Adam nanga Eva ben abi? (b) Fa Yehovah sori taki en na wan Gado di ala ten e du san reti?
8 Di Gado ben meki Adam nanga Eva, dan den no ben abi sondu. Efu den ben tan gi yesi na Gado, dan den ben o de na libi ete, èn den nanga den bakapikin fu den ben o libi wan koloku libi na ini a Paradijs. Ma a de wan sari sani taki wi fosi papa nanga mama trangayesi Gado fu espresi. Leki bakapisi fu dati, den dede èn den no o kisi libi moro. Boiti dati, Gado yagi den komoto na ini a Paradijs. Na a ten di Adam nanga Eva kisi pikin, sondu ben abi krakti kaba tapu libisma, èn te fu kaba a fosi man nanga uma kon owru èn den dede. Disi e sori taki Yehovah ala ten e du san a taki. Boiti dati, a de wan Gado di ala ten e du san reti. Yehovah ben warskow Adam taki te a ben o nyan fu a froktu di a no ben mag nyan, dan a ben o dede. Èn na dati pasa tu.
9, 10. (a) Fu san ede den bakapikin fu Adam e dede? (b) Fa wi kan wai pasi gi têgo dede?
9 Fu di wi na bakapikin fu Adam, meki wi kon abi wan sondu skin di e meki wi du sani di no bun, èn te fu kaba wi e dede. Aladi di wi no ben gebore ete, toku wi kisi sondu fu Adam. Dati meki wi e dede tu. Efu Yehovah ben o puru dede sondro taki a lusu-paiman ben pai, dan dati ben o sori taki a no e hori ensrefi na a wortu fu en. Fu taki en leti, a sani di Paulus taki abi fu du tu nanga wi alamala. A ben taki: „Wi sabi taki a Wet komopo fu Gado; ma mi e du sani soleki fa a sondu skin wani, iya, mi de leki wan srafu di seri na sondu. Ke, pôti fu mi! Suma sa frulusu mi fu a skin di e dede na a fasi disi?”—Rom. 7:14, 24.
10 Yehovah Gado wawan ben kan sorgu gi wan seti di ben o gi en a reti fu gi wi pardon fu sondu, èn fu fri wi fu têgo dede. A sani di a du, na taki a seni en lobi Manpikin komoto fu hemel fu gebore leki wan libisma di no abi sondu, èn di ben kan gi en libi leki wan lusu-paiman. Tra fasi leki Adam, Yesus tan sondro sondu. Iya, „a no du nowan sondu” (1 Petr. 2:22). Dati meki Yesus ben kan tron a papa fu wan libisma famiri di no abi sondu. Ma na presi fu du dati, a gi pasi taki den feanti fu Gado kiri en so taki a ben kan tron a papa fu den sondu bakapikin fu Adam. Na so a meki taki den wan di e poti bribi na ini en, kan kisi têgo libi. Bijbel e taki: „Wán Gado de, èn wán mindriman de na mindri Gado nanga libisma, iya, wan man di nen Krestes Yesus di gi ensrefi leki wan lusu-paiman fu pai gi ala sma.”—1 Tim. 2:5, 6.
11. (a) Nanga sortu situwâsi wi kan agersi den wini di a lusu-paiman e tyari kon gi wi? (b) Suma srefi sa kisi wini fu a lusu-paiman?
11 Fu man frustan sortu wini a lusu-paiman e tyari kon gi wi, dan wi sa luku na agersitori disi: Kande wan famiri-edeman e tron wan ogriman èn e kisi dedestrafu. A sani disi meki taki den pikin kon abi bigi paiman, èn den no sabi fa fu lusu a problema disi. A granpapa fu den di abi switifasi, e du wan sani fu yepi den. A e meki wan tra manpikin fu en pai a paiman so taki den granpikin kan kon abi wan nyun libi. Na wan srefi sortu fasi Yehovah Gado nanga en lobi Manpikin pai gi den sondu fu den bakapikin fu Adam, èn den du dati nanga yepi fu a brudu fu Yesus. Dati meki Yohanes a Dopuman ben kan taki fu Yesus: „Luku! A Pikin Skapu fu Gado di e puru a sondu fu grontapu!” (Yoh. 1:29) A no soso den wan di de na libi e kisi pardon fu sondu, ma sosrefi den dedewan.
O furu a ben aksi fu Yehovah nanga Yesus fu pai a lusu-paiman?
12, 13. San wi e leri te wi e luku fa Abraham ben de klariklari fu tyari Isak leki ofrandi?
12 Wi no man frustan soifri o furu a ben aksi fu wi hemel Tata nanga en lobi Manpikin fu pai a lusu-paiman. Ma Bijbel e fruteri ondrofenitori di kan yepi wi fu denki dipi fu a tori dati. Fu eksempre, prakseri fa Abraham ben musu firi di a ben teki waka dri dei langa fu go na Moria, so taki a ben kan gi yesi na a komando di Gado ben gi en. Gado ben taki: „Grantangi, teki Isak, a wan-enkri manpikin fu yu di yu lobi trutru. Dan go na a kondre Moria. Drape, na tapu wan fu den bergi di mi o sori yu, yu musu gi en leki wan bron-ofrandi.”—Gen. 22:2-4.
13 Te fu kaba, Abraham doro na a presi pe a ben musu go. Prakseri fa a ben e sari di a ben e tai Isak en anu nanga en futu, èn di a poti en didon na tapu na altari di ensrefi ben meki. A ben musu fu hati Abraham di a opo a nefi go na loktu fu kiri en manpikin! Prakseri fa Isak ben e firi di a ben e didon na tapu na altari e wakti teleki en papa kiri en nanga a nefi. Na engel fu Yehovah tapu Abraham biten. A sani di Abraham nanga Isak du na a okasi dati e yepi wi fu kon frustan san a ben aksi fu Yehovah fu gi pasi taki den bakaman fu Satan ben e kiri En Manpikin. A fasi fa Isak wroko makandra nanga Abraham, e sori krin taki Yesus ben de klariklari fu nyan pina èn fu dede gi wi.—Hebr. 11:17-19.
14. Sortu sani di ben miti Yakob, e yepi wi fu kon frustan o furu a ben aksi fu Yehovah fu pai a lusu-paiman?
14 Ete wan sani de di e sori taki a ben aksi furu fu Yehovah fu pai a lusu-paiman. Wi sa poti prakseri na wan sani di ben miti Yakob. Yakob ben lobi Yosef moro leki ala den tra manpikin fu en. Ma a sari fu taki, dati den brada fu Yosef ben e dyarusu na en tapu, èn den ben e teige en. Ma toku Yosef ben de klariklari fu go luku fa a ben de nanga den brada fu en, di en papa ben aksi en fu du dati. Na a ten dati, den brada fu en ben e luku den skapu fu Yakob, sowan 100 kilometer na a noordsei fu Hebron, pe den ben e tan. Prakseri fa Yakob ben e firi di den manpikin fu en drai kon baka na oso nanga a dyakti fu Yosef di ben lai nanga brudu! Yakob bari: „Na a langa krosi fu mi Manpikin! A musu de taki wan ogri meti nyan Yosef, priti en na pisipisi!” Ala den sani disi ben hati Yakob srefisrefi, èn wan heri pisi ten a ben e sari fu a sani di ben pasa nanga Yosef (Gen. 37:33, 34). Yehovah e handri heri tra fasi leki fa sondu libisma e handri na ini spesrutu situwâsi. Ma te wi e denki dipi fu a sani disi di ben miti Yakob, dan dati kan yepi wi pikinso fu kon frustan fa Gado ben musu fu firi di sma na grontapu handri so takru nanga en lobi Manpikin, èn di den kiri en.
Fa wi e kisi wini fu a lusu-paiman?
15, 16. (a) Fa Yehovah sori taki a ben feni a lusu-paiman bun? (b) Fa yu kisi wini fu a lusu-paiman?
15 Fu di Yesus ben tan gi yesi na Yehovah Gado, meki Yehovah gi en wan opobaka leki wan makti yeye (1 Petr. 3:18). Fotenti dei langa, Yesus di ben kisi wan opobaka, sori ensrefi na den disipel fu en fu tranga a bribi fu den èn fu sreka den gi a bigi preikiwroko di den ben o abi fu du. Baka dati a go na hemel. Drape a gi Gado a waarde fu a brudu fu en, so taki a ben kan tyari wini kon gi den tru bakaman fu en di ben e sori bribi na ini a frulusu-ofrandi. Yehovah Gado sori taki a ben feni a lusu-paiman fu Krestes bun, fu di a meki Yesus kanti En santa yeye na tapu den disipel fu en di ben kon makandra na ini Yerusalem na a Pinksterfesa fu a yari 33.—Tori. 2:33.
16 Den salfu bakaman fu Krestes di ben kon makandra na ini Yerusalem, wantewante bigin gi tra sma deki-ati fu sori berow gi den sondu fu den èn fu teki dopu na ini a nen fu Krestes. Na so fasi den ben o man wai pasi gi na atibron fu Gado. (Leisi Tori fu den Apostel 2:38-40.) Sensi a prenspari dei dati, teleki a dei fu tide, milyunmilyun sma fu ala kondre kon abi wan bun matifasi nanga Gado, fu di den sori bribi na ini a frulusu-ofrandi fu Yesus (Yoh. 6:44). Now di wi poti prakseri na ala den sani disi, dan a de fanowdu fu poti prakseri na ete tu aksi: A de so taki na fu di wi du bun wroko meki wi kisi a howpu fu libi fu têgo? Now di wi kisi a tumusi moi howpu disi, dan a de so taki wi kan lasi en?
17. Fa yu musu si a tumusi moi blesi di yu abi fu de wan mati fu Gado?
17 Wi no e frudini a lusu-paiman kwetikweti. Ma fu di milyunmilyun sma e poti bribi na ini a lusu-paiman disi, meki den tron mati fu Gado, èn den abi a howpu fu libi fu têgo na ini wan paradijs na grontapu. Ma te wi tron mati fu Yehovah, dan dati no e gi wi a dyaranti taki wi sa tan mati fu en. Efu wi wani wai pasi gi na atibron fu Gado na ini a ten di e kon, dan wi musu tan sori furu warderi gi „a lusu-paiman di Krestes Yesus pai”.—Rom. 3:24; leisi Filipisma 2:12.
Tan poti bribi na ini a lusu-paiman
18. San a wani taki tu fu poti bribi na ini a lusu-paiman?
18 A thema tekst fu na artikel disi, namku Yohanes 3:36, e sori taki te wi e poti bribi na ini Masra Yesus Krestes, dan dati wani taki tu dati wi e gi yesi na en. Te wi e abi warderi gi a lusu-paiman, dan wi sa libi na wan fasi di e kruderi nanga den leri fu Yesus, èn wi musu tyari wisrefi tu na wan fasi di e kruderi nanga den markitiki fu Gado (Mark. 7:21-23). „A bigi atibron fu Gado o kon” na tapu iniwan sma di e tan du hurudu, di e fruteri morsu lafutori, èn di e du „iniwan morsu” sani, soleki te wan sma e tan luku porno.—Ef. 5:3-6.
19. Sortu bun sani wi kan du fu sori taki wi e poti bribi na ini a lusu-paiman?
19 Te wi abi warderi gi a lusu-paiman, dan wi sa tan du sani di e sori taki wi e ’dini Gado na wan getrow fasi’ (2 Petr. 3:11). Meki wi poti ten na wan sei fu begi Gado doronomo nanga wi heri ati, fu studeri Bijbel, fu go na den konmakandra, fu studeri nanga wi osofamiri, èn fu teki prati fayafaya na a Kownukondre preikiwroko. Èn meki wi „no frigiti fu du bun èn fu prati sani nanga trawan, bika den sortu srakti-ofrandi dati e plisi Gado”.—Hebr. 13:15, 16.
20. Sortu blesi e wakti ala den sma di e poti bribi na ini a lusu-paiman?
20 Te Yehovah sa puru atibron na tapu na ogri sistema disi, dan wi sa breiti srefisrefi taki wi sori bribi na ini a lusu-paiman èn taki wi tan sori warderi gi a seti dati! Èn na ini a nyun grontapu di Gado pramisi wi, wi sa de nanga tangi fu têgo gi a tumusi moi seti disi di yepi wi fu wai pasi gi na atibron fu Gado.—Leisi Yohanes 3:16; Openbaring 7:9, 10, 13, 14.
San yu ben sa piki?
• Fu san ede wi abi a lusu-paiman fanowdu?
• San a ben aksi fu Yehovah nanga Yesus fu pai a lusu-paiman?
• Sortu wini a lusu-paiman e tyari kon gi wi?
• Fa wi e sori bribi na ini a lusu-paiman fu Yesus?
[Aksi fu a tori disi]
[Prenki na tapu bladzijde 13]
Libisma abi na okasi fu kon bun baka nanga Yehovah
[Prenki na tapu bladzijde 15]
Te wi e denki dipi fu den sani disi di miti Abraham, Isak, nanga Yakob, dan dati kan yepi wi fu kon frustan o furu a ben aksi fu Yehovah fu pai a lusu-paiman