Meki ’den wortu fu bun-ati’ de na tapu yu tongo

„A opo hem mofo nanga sabi; en dem woortoe foe boen-hati de na tapoe hem tongo.” —ODO 31:26, Da Bijbel na ini Sranantongo.

1, 2. (a) Sortu fasi den anbegiman fu Yehovah musu kweki? (b) Na sortu sani wi sa poti prakseri na ini na artikel disi?

A PRENSPARI boskopu di Kownu Lemuwel fu owruten ben kisi fu en mama ben e poti prakseri sosrefi na wan prenspari fasi di wan bun wefi musu abi. A boskopu ben taki: „ A opo hem mofo nanga sabi; en dem woortoe foe boen-hati de na tapoe hem tongo” (Odo 31:1, 10, 26, Da Bijbel). Te wan koni uma èn sosrefi tra sma wani taki Yehovah Gado feni den bun, dan a fiti taki den e taki sani di e sori taki den abi bun-ati. (Leisi Odo 19:22.) Ala tru anbegiman musu taki sani di e sori taki den abi bun-ati.

² San na bun-ati? Gi suma wi musu sori bun-ati? San o yepi wi fu poti ’den wortu fu bun-ati’ na tapu wi tongo? Te wi e du dati, dan fa dati o yepi wi fu feni en moro bun nanga famiriman èn nanga wi Kresten brada nanga sisa?

Trutru lobi e meki taki sma e sori bun-ati gi trawan

3, 4. (a) San na bun-ati? (b) San na a difrenti na mindri bun-ati nanga switifasi?

³ Soleki fa Bijbel e sori, dan wan sma di abi bun-ati e sori lobi nanga switifasi gi trawan. Fu di a sma dati abi switifasi, meki a e poti prakseri na trawan. Fu dati ede a e du bun sani gi trawan, èn a e taki sani di e gi den deki-ati. A sma di abi bun-ati abi lobi tu, èn a lobi dati e meki taki a e poti prakseri na trawan. Ma a Hebrew wortu di wani taki dati wan sma e sori bun-ati, no abi fu du nomo nanga a switifasi di sma e sori gi trawan fu di den lobi den. Te wan sma e sori bun-ati gi trawan, dan a de klariklari fu tan yepi den sma dati.

⁴ Ma ete wan reide de fu san ede bun-ati no de a srefi leki switifasi, fu di wan sma kan sori switifasi srefi gi den wan di a no sabi. Di a boto di ben tyari na apostel Paulus nanga den 275 sma ben sungu, dan den sma fu na èilanti Malta ben sori switifasi gi den, aladi den no ben sabi den srefisrefi (Tori. 27:37–28:2). Na a tra sei, sma di e sori bun-ati gi trawan, abi wan bun matifasi kaba nanga den sma dati, èn den e tan horibaka gi den. * Na a bun-ati dati den Kenietsma ben sori gi ’den Israelsma na a ten di den ben e komoto na Egepte’.—1 Sam. 15:6.

A de prenspari fu denki dipi fu sani èn fu begi

5. San o yepi wi fu basi wi tongo?

⁵ Son leisi, a no makriki fu sori bun-ati te wi e taki nanga trawan. A disipel Yakobus ben skrifi: „Nowan enkri libisma kan basi en tongo. A de wan ogri sani di sma no man basi, èn a man kiri sma trutru” (Yak. 3:8). San kan yepi wi fu basi wi tongo, aladi a no makriki fu du dati? Den sani di Yesus ben taigi den kerki fesiman fu a ten fu en, e yepi wi fu kon sabi fa wi kan du dati. Yesus ben  taki: „San furu na ati, na dati mofo e taki” (Mat. 12:34). Efu wi wani sori bun-ati te wi e taki nanga trawan, dan wi musu kweki a fasi dati na ini wi ati. Meki wi luku fa wi kan du dati te wi e denki dipi fu sani èn te wi e begi.

6. Fu san ede wi musu denki dipi fu a bun-ati di Yehovah sori gi libisma?

⁶ Bijbel e taki dati Yehovah Gado abi ’bun-ati pasa marki’ (Ex. 34:6). A psalm skrifiman ben singi: „Yehovah, a bun-ati fu yu de fu si na heri grontapu” (Ps. 119:64). Den Buku fu Bijbel abi furu tori na ini di e tyari kon na krin fa Yehovah sori bun-ati gi den anbegiman fu en. Te wi e teki ten fu denki dipi fu ’den sani di Yehovah du’, èn te wi e du dati na wan fasi di e sori taki wi abi warderi, dan dati kan meki wi kisi na angri fu kweki a fasi disi di Gado abi.—Leisi Psalm 77:13.

7, 8. (a) Fa Yehovah sori bun-ati gi Lot nanga en osofamiri? (b) Fa David ben e firi di Gado sori bun-ati gi en?

⁷ Fu eksempre, prakseri fa Yehovah frulusu Abraham en neef Lot nanga en osofamiri di A pori Sodom, a foto pe den ben e tan. Di a ten ben e doro fu pori a foto dati, dan den engel di ben kon na Lot, warskow en fu teki en osofamiri èn fu gowe libi a foto wantewante. Bijbel e taki: „Di Lot ben e tan draidrai, dan fu di Yehovah ben abi sari-ati nanga en, meki den engel grabu Lot, en wefi, nanga den tu umapikin hori na den anu, èn den tyari den go na dorosei fu a foto.” A e naki wi ati te wi e prakseri fa Gado frulusu Lot, a no so? A no de fu taki dati a sani disi e sori a bun-ati fu Gado.—Gen. 19:16, 19.

⁸ Luku sosrefi na eksempre fu Kownu David fu owruten Israel, di ben singi: „[Yehovah] e gi yu pardon fu ala yu sondu. A e lusu ala yu problema èn a e dresi ala yu siki.” A no de fu taki dati David ben musu de nanga tangi taki Gado ben gi en pardon fu a sondu di a ben du nanga Batseiba! A prèise Yehovah na a fasi disi: „Neleki fa hemel bigi moro grontapu taki yu no man marki en, na so yu no man marki a bun-ati di Gado e sori den sma di e anbegi en” (Ps. 103:3, 11). Te wi e denki dipi fu den Bijbel tori disi èn sosrefi fu trawan, dan dati e meki wi warderi a bun-ati fu Yehovah srefisrefi. Boiti dati, wi o prèise en èn wi o taki en tangi. O moro wi e warderi a bun-ati fu Gado, o moro wi o waka baka na eksempre fu a tru Gado.—Ef. 5:1.

9. Sortu bun reide den anbegiman fu Yehovah abi fu sori bun-ati na ini na aladei libi?

⁹ Den eksempre na ini Bijbel e sori taki Yehovah e sori bun-ati, noso trutru lobi gi den wan di abi wan bun matifasi nanga en kaba. Fa a de nanga den wan di no abi wan bun matifasi nanga Gado? A de so taki Yehovah no e sori switifasi gi den? Kwetikweti. Lukas 6:35 e taki: „Gado du bun gi den sma di no de nanga tangi èn gi den ogri sma.” „A e meki a son fu en opo gi takru sma èn gi bun sma; a e meki alen fadon gi regtfardiki sma èn gi sma di no regtfardiki” (Mat. 5:45). Bifo wi ben kon sabi den tru tori fu Bijbel, èn bifo wi bigin du den sani di wi leri, dan Gado ben e sori switifasi gi wi. Ma fu di wi na anbegiman fu Gado, meki a e lobi wi trutru, iya, a e tan sori bun-ati gi wi. (Leisi Yesaya 54:10.) Wi kan de nanga tangi gi dati trutru! Fu dati ede wi abi bun reide fu sori bun-ati te wi e taki èn e du sani na ini na aladei libi!

10. Fu san ede a de tumusi prenspari taki wi e begi Gado fu yepi wi fu kweki bun-ati?

¹⁰ Wan tumusi prenspari sani di e yepi wi fu kweki bun-ati, na a grani di wi abi fu begi. A sani disi de so fu di lobi nanga switifasi, di abi fu du nanga bun-ati, na pisi fu a froktu fu Yehovah en santa yeye (Gal. 5:22). Wi kan kweki bun-ati te wi e meki a yeye dati tiri wi. A moro makriki fasi fa wi kan kisi a  santa yeye fu Yehovah, na te wi e aksi en dati na ini begi (Luk. 11:13). A fiti taki wi e begi Gado doronomo fu gi wi a yeye fu en, èn wi musu teki a tiri tu di wi e kisi fu a yeye. Iya, a de prenspari taki wi e denki dipi fu sani èn taki wi e begi Gado, efu wi wani sori bun-ati te wi e taki.

Trowpatna musu sori bun-ati te den e taki nanga makandra

11. (a) Fa wi du sabi taki Yehovah e fruwakti taki masra e sori bun-ati gi a wefi fu den? (b) Fa wan masra di abi bun-ati o taki?

¹¹ Na apostel Paulus e gi masra a rai disi: „Tan lobi un wefi, neleki fa Krestes lobi a gemeente èn neleki fa a ben gi ensrefi gi a gemeente” (Ef. 5:25). Paulus ben memre den tu na san Yehovah ben taigi Adam nanga Eva. Na apostel ben skrifi: „Wan man sa gowe libi en papa nanga mama èn a sa tan nanga en wefi, èn a man nanga en wefi sa tron wán skin” (Ef. 5:31). A de krin taki Yehovah e fruwakti fu masra taki den e tan nanga a wefi fu den, èn taki den e sori bun-ati gi den ala ten. Wan masra di lobi en wefi trutru, no sa taki fu den fowtu fu en wefi na fesi trawan, èn a no sa taki takru fu en. Boiti dati, a sa de klariklari fu prèise en (Odo 31:28). Te problema e opo kon na ini a trowlibi, dan wan masra di abi bun-ati, no sa lagi en wefi.

12. Fa wan wefi di abi bun-ati e taki?

¹² Wan wefi musu sori bun-ati tu te a e taki. Den sani di a e taki no musu sori taki a denki fu a grontapu disi abi krakti na en tapu. Fu di a abi „dipi lespeki gi en masra”, meki a e taki bun fu en te a de nanga tra sma èn dati o meki taki sma o kon abi moro lespeki gi en masra (Ef. 5:33). Fu di a wefi disi no wani taki den pikin fu den e lasi lespeki gi a papa fu den, meki te den de makandra nanga den pikin, a no e haritaki nanga en masra. A e taki fu den tori dati te den de den wawan. Bijbel e taki: „Na uma di koni trutru, bow na osofamiri fu en” (Odo 14:1). Na oso fu en na wan presi pe en osofamiri e firi switi.

13. San na wan prenspari presi pe sma musu sori bun-ati gi makandra, èn fa den kan du dati?

¹³ Awansi trowpatna de den wawan na ini den oso, toku den musu taki na wan fasi di e sori taki den abi lespeki gi makandra. Paulus ben skrifi: „Un musu poti ala den sani disi na wan sei trutru, namku atibron, ogridu, nanga kosikosi, èn un no musu taki dotitaki moro.” A ben taki moro fara: „Un musu abi trutru sari-ati, bun-ati, sakafasi, safri-ati, nanga langa pasensi, èn den fasi disi musu de leki wan krosi na un skin. . . . Un musu abi lobi, èn a musu de leki wan krosi na un skin, bika lobi na wan volmaakti banti di e meki sma kon de wán” (Kol. 3:8, 12-14). Te pikin gwenti fu yere fa den papa nanga mama e taki na wan switi fasi nanga makandra, dan dati sa abi wan bun krakti na den tapu. Boiti dati, a sa moro makriki gi den fu taki soleki fa a papa nanga mama fu den e taki.

14. Fa osofamiri-edeman kan sorgu taki den sani di den e taki e trowstu na osofamiri fu den?

 ¹⁴ A psalm skrifiman ben skrifi fu Yehovah: „Mi e begi yu, tangitangi, meki a lobi [noso a bun-ati] fu yu trowstu mi” (Ps. 119:76). Wan tumusi moi fasi fa Yehovah e trowstu a pipel fu en, na taki a e gi den deki-ati èn a e tiri den (Ps. 119:105). Fa osofamiri-edeman kan trowstu na osofamiri fu den soleki fa wi hemel Tata e du dati? Den kan du dati fu di den e gi den osofamiri a rai nanga a deki-ati di den abi fanowdu. A no de fu taki dati na Osofamiri Anbegi na wan moi okasi fu kon sabi moro fu den tumusi prenspari tru tori di skrifi na ini Bijbel!—Odo 24:4.

Sori trutru lobi gi wi Kresten brada nanga sisa

15. Fa den sani di owruman nanga tra lepi Kresten e taki kan yepi trawan na ini a gemeente?

¹⁵ „Mi e begi yu fu du bun gi mi èn fu horibaka gi mi ala ten, so taki mi kan feni kibri”, na so Kownu David ben begi (Ps. 40:11). Fa Kresten owruman nanga tra lepi Kresten na ini a gemeente kan teki na eksempre fu Yehovah te a abi fu du nanga a tori disi? Te wi e taki sani fu sori san skrifi na ini Bijbel, dan a no de fu taki dati wi e sori bun-ati.—Odo 17:17.

16, 17. Fa den sani di wi e taki e sori taki wi abi bun-ati?

¹⁶ San wi musu du te wi e si taki wan Kresten e du wan sani di no e kruderi nanga Bijbel gronprakseri? Fu di wi abi bun-ati, meki wi sa gi en deki-ati fu tyari kenki kon, a no so? (Ps. 141:5) Efu wi e kon sabi taki wan Kresten brada noso sisa fu wi du wan seryusu sondu, dan a bun-ati di wi abi sa meki taki wi e gi a sma dati deki-ati fu „kari den owru man fu a gemeente kon na en”. Na so den owruman dati kan „begi gi en, èn lobi oli gi en na ini a nen fu Yehovah” (Yak. 5:14). Efu a sma di e du sondu no wani go taki nanga den owruman, dan wi no e sori lobi noso switifasi gi en te wi no e taigi den brada san pasa. Kande son brada nanga sisa e firi brokosaka, kande den e firi leki den de den wawan, kande den e firi leki den no warti noti, noso kande den e sari fu di sani no e waka soleki fa den wani. Wan moi fasi fa wi kan sori bun-ati, na te wi e taki sani di „e trowstu den sma di lasi-ati”.—1 Tes. 5:14.

¹⁷ San wi musu du te feanti fu Gado e fruteri takru sani fu wi Kresten brada nanga sisa? Na presi taki wi e bigin tweifri na wi brada noso sisa, wi no musu piki den sma  dati. Noso te a sma di taki den sani dati no e du muilek, dan wi kan aksi en efu a de seiker taki den sani di a e taki na tru tori. Efu den feanti fu a pipel fu Gado wani kon sabi pe wi Kresten brada nanga sisa de, soso fu kan du ogri nanga den, dan wi no sa taigi den dati fu di wi lobi wi brada nanga sisa trutru.—Odo 18:24.

A sma di „lobi fu du bun, o kisi libi”

18, 19. Fu san ede wi musu sori bun-ati te wi e taki nanga wi Kresten brada nanga sisa?

¹⁸ A fasi fa wi e handri nanga wi Kresten brada nanga sisa, musu sori ala ten taki wi lobi den trutru. Awansi wi de na ini muilek situwâsi, toku wi musu taki sani na wan fasi di e sori taki wi abi bun-ati. Di a bun-ati fu den manpikin fu Israel ben kon de „leki dow di e gowe esi-esi”, dan Yehovah no ben feni dati bun (Hos. 6:4, 6). Ma Yehovah e prisiri te a e si taki sma gwenti sori bun-ati gi trawan. Luku fa a e blesi den wan di e suku fu sori bun-ati gi trawan.

¹⁹ Odo 21:21 e taki: „A sma di e meki muiti fu du san reti èn di lobi fu du bun, o kisi libi. Trawan o du gi en san reti èn a o kisi glori tu.” Wán fu den blesi di so wan sma o kisi, na taki a sa kisi libi, èn a no sa libi fu wan syatu pisi ten, ma fu ala ten. Yehovah e yepi en fu „grabu a trutru libi hori bun steifi” (1 Tim. 6:12, 19). Sobun, meki wi „sori bun-ati . . . gi trawan”.—Sak. 7:9.

[Futuwortu]

Yu kan fruklari disi?

• San na bun-ati?

• San o yepi wi fu sori bun-ati te wi e taki?

• Fa trowpatna kan sori trutru lobi te den e taki nanga makandra?

• Te a abi fu du nanga wi Kresten brada nanga sisa, dan fa wi kan taki sani di e sori taki wi abi bun-ati?

[Aksi fu a tori disi]

[Prenki na tapu bladzijde 23]

David ben prèise a bun-ati fu Yehovah

[Prenki na tapu bladzijde 24]

Yu e hori na Osofamiri Anbegi doronomo?