Wan kari gi ala sma!

PREI

Wan kari gi ala sma!

SORTU kari ala sma e kisi? Wan kari fu go luku wan fu den bijkantoro fu Yehovah Kotoigi, di furu sma sabi leki Bethel. Ala nanga ala 118 fu den kantoro disi de na ini difrenti kondre. Nofo tron, sma di e fisiti Bethel e taki dati den abi bigi warderi gi a wroko di e du drape.

Wan yonguman di ben e studeri Bijbel, ben go luku a bijkantoro fu Meksikow, èn di a si fa furu sma ben e wroko nanga prisiri, dan a sani dati naki en ati. A aksi den sma drape: „San mi musu du fu kon wroko dyaso?” Den taigi en: „Yu musu dopu fosi. Baka dati, a ben o bun fu pionier, noso fu tron wan furuten preikiman fu a Kownukondre.” A yonguman teki a rai disi, èn tu yari baka dati a kisi a kari fu go dini na Bethel fu Meksikow. A e dini drape 20 yari kaba.

San na Bethel?

Na ini Hebrewtongo a wortu „Bethel” wani taki „oso fu Gado” (Gen. 28:19). Na difrenti bijkantoro Bijbel nanga Bijbel publikâsi e druk èn den publikâsi disi e prati gi den moro leki 100.000 gemeente fu Yehovah Kotoigi na heri grontapu. Den publikâsi disi e yepi fu tranga a bribi fu den sma na ini den gemeente dati. Pikinmoro 20.000 sma e wroko na Bethel, pe den e du furuten diniwroko gi Yehovah, èn gi a bun fu den Kresten brada nanga sisa. Den mansma nanga den umasma dati di komoto fu difrenti kondre nanga kulturu, e du a wroko dati sondro fu suku den eigi bun. Den wan di e du a Kresten wroko disi furu yari kaba, e wroko makandra nanga yonguwan di de fayafaya. Son mofoneti èn tapu satra nanga sonde, den memre fu a Bethel famiri e konmakandra nanga gemeente fu Yehovah Kotoigi di de krosibei èn den e teki prati tu na a Kresten diniwroko. Boiti dati, den e gebroiki a fri ten di den abi fu studeri Bijbel, fu abi prisiriten, èn fu du den eigi sani.

Den memre fu a Bethel famiri e kisi pikinso moni ibri mun fu tapu spesrutu kostu. Den e nyan switi èn gosontu nyanyan, èn den e tan na ini moi krin kamra. Bethel no meki fu libi wan gudu libi, ma a meki na wan fasi di e gi den sma drape na okasi fu du den sani di den musu du. Te den sma di e fisiti Bethel e si den moi gebow nanga a moi dyari, èn te den e si fa sani orga na wan bun fasi, dan dati e naki den ati. Wan tra sani di e naki den ati, na te den e si fa den sma di e wroko na Bethel e sori switifasi gi trawan, èn fa den e wroko bun nanga makandra. Ala sma e wroko fayafaya, ma toku den e teki ten fu sori switifasi gi trawan. Na Bethel, nowan sma no hei moro wan trawan, awansi sortu wroko a e du. Ala wroko prenspari, awansi na krin den e krin a presi, awansi den e wroko na ini a dyari, awansi den e bori, awansi den e wroko na ini a drukkerij, noso na kantoro. Den sma di e wroko na Bethel, e wroko makandra leki wán man fu horibaka gi a wroko di Yehovah Kotoigi e du.—Kol. 3:23.

Kon leri sabi wan tu fu den sma di e wroko na Bethel

Meki wi leri sabi wan tu fu den sma fu a Bethelfamiri di de na heri grontapu. San meki taki den ben wani dini na Bethel? Luku a tori fu Mario. Na a ten di a tron wan Kotoigi fu Yehovah, dan Mario ben abi wan wroko na wan prenspari Doisri oto bedrijf. A ben e meki furu moni drape èn a ben kan kisi wan moro hei posisi. Syatu baka di a dopu, a go wroko wan wiki na Bethel fu a kondre fu en. A ben musu wroko na ini a drukkerij. Mario ben kan si a bigi difrenti na mindri den sma di e wroko na Bethel nanga den sma na a grontapuwroko fu en. Fu dati ede, a gi en nen fu go dini na Bethel. Furu fu den famiriman nanga den sma na en wrokope no ben man frustan fu san ede a teki so wan bosroiti. Ma toku Mario e dini now na Bethel na ini Doisrikondre, èn a de koloku.

Furu sma di e go dini na Bethel, no teki spesrutu skoroleri èn den no abi spesrutu koni. Na so a ben de nanga Abel, di e dini 15 yari kaba na Bethel fu Meksikow. A e taki: „Mi leri bun furu sani na Bethel. Mi leri fu wroko nanga kefalek drukpers. Mi sabi taki mi ben kan meki furu moni dorosei fu Bethel nanga a sabi di mi abi now, ma mi no ben o abi den sani di mi abi dyaso. Iya, mi no ben o abi wan koloku libi di de sondro den broko-ede nanga a strei di sma e strei na furu fu den wrokopresi fu grontapu. Mi feni taki mi kisi a moro bun leri di mi ben kan kisi èn a leri disi yepi mi fu go na fesi na ini a tru anbegi èn fu kon sabi nyun sani. Awansi mi ben go na a moro bun heiskoro, toku mi no ben o kisi den wini disi.”

Yu kan kisi deki-ati te yu e fisiti Bethel

Te wan sma e fisiti Bethel, dan dati kan meki kaba taki a e kon kisi wan moro bun matifasi nanga Gado. Na dati ben pasa nanga Omar di e libi na ini Meksikow. En mama ben leri en den tru tori fu Bijbel. Di Omar ben abi 17 yari, a no ben e go moro na den Kresten konmakandra èn a no ben e teki prati moro na a preikiwroko. Te fu kaba, a bigin du ogri èn a bigin feti baka gudu. Bakaten, di Omar ben e wroko gi wan bedrijf, dan en nanga wan tu tra wrokoman ben musu go na Bethel fu Meksikow fu sori den brada fa wan tu sani e wroko. Omar e taki: „Baka di wi sori den fa fu du dati, dan den brada sori wi a presi. Den sani di mi si èn a switi fasi fa den sma handri nanga mi, meki mi prakseri a fasi fa mi ben e libi. Mi ben de wan sma di ben drai baka gi Yehovah. Wantewante mi bigin go na den konmakandra baka èn mi bigin studeri Bijbel. Siksi mun baka di mi go luku Bethel, mi teki dopu. Mi e taki Yehovah tangi gi a deki-ati di mi kisi di mi go luku Bethel.”

Masahiko, di e libi na ini Yapan, ben kweki tu na ini wan Kotoigi osofamiri. Ma a bigin feni taki a libi fu wan Kresten lai nanga wet. A bigin teki prati fayafaya na ala sortu sani na skoro, a no ben e go moro na den konmakandra, èn a no ben e teki prati moro na a preikiwroko. Masahiko e taki: „Wan dei wi famiri nanga wan tu Kresten mati, bosroiti fu go luku Bethel. Fu di mi famiri ben de nomonomo taki mi go, meki mi go nanga den. Di mi ben e waka e luku a presi, dan dati gi mi deki-ati leki noiti bifo. A prisiri di mi ben kisi fu a demakandra di mi ben abi nanga tra Kresten, ben de wan sani di noiti mi ben ondrofeni nanga den mati fu mi di no ben de Kotoigi. Mi bigin kisi na angri moro nanga moro fu libi leki wan Kresten, èn mi bosroiti fu studeri Bijbel.” Now Masahiko e dini leki wan furuten dinari na ini a gemeente fu en.

Wan Kotoigi fu Fransikondre ben froisi go tan na Moskow fu wroko drape. Drape a no ben abi demakandra moro nanga Yehovah en pipel, èn a bribi fu en kon swaki. A bigin du sani di no fiti, èn te fu kaba a trow nanga wan man di no de wan Kotoigi. Bakaten, wan Kresten sisa fu Fransikondre ben kon luku en, èn den ala tu go na Sint Petersburg, na ini Rosiakondre fu go luku a Bethel-oso drape. A e skrifi: „Den sma na Bethel gi wi wan switikon, èn a sani dati naki mi ati. Ala sani ben e waka so tiri drape. Mi ben e firi taki a yeye fu Yehovah ben de drape. Fa mi ben kan meki a fowtu fu drifi gowe fu Yehovah en organisâsi? Baka di mi go luku Bethel, mi begi Yehovah fu yepi mi èn mi ben abi a fasti bosroiti baka fu tan gi mi pikin leri fu Bijbel.” Boiti a yepi di a Kotoigi disi ben kisi di a bribi fu en ben swaki, a sani di gi en furu deki-ati na di a go luku Bethel. Baka dati, a tan go na fesi na ini a tru anbegi.

Fa a de nanga sma di no sabi Yehovah Kotoigi èn di e fisiti Bethel? Na ini 1988, Alberto, di ben de fayafaya na ini politiek, go luku Bethel fu Brasyonkondre. Di a si fa a presi krin, fa sani e waka na wan orga fasi, èn spesrutu fa nowan sma ben e du sani kibrikibri, dan dati naki en ati trutru. Syatu bifo Alberto ben go luku Bethel, a ben go na wan skoro pe a masra fu en sisa ben e dini leki priester. Alberto si a difrenti. A e taki: „Sma ben e du ala sani kibrikibri drape.” Syatu baka di a fisiti Bethel, a bigin studeri Bijbel, a tapu nanga politiek, èn now a e dini leki owruman na ini wan gemeente.

Kon luku Bethel!

Furu sma meki ala sortu muiti fu fisiti a bijkantoro na ini a kondre fu den. Fu eksempre, Paulo nanga Eugenia di e libi na ini Brasyonkondre, ben e poti moni na wan sei tu yari langa fu man go na Bethel. Den ben o teki bus fu rèi 3000 kilometer go drape èn a ben o teki tu dei fu doro drape. Den e taki: „A no fu soso wi du a muiti dati. Now wi e frustan moro bun san na organisâsi fu Yehovah e du. Te wi e fruteri den Bijbelstudie fu wi sortu wroko sma e du na Bethel, dan sonwan fu den e aksi: ’Yu go na Bethel kaba?’ Now wi kan taki dati wi go drape.”

Wan bijkantoro nanga Bethel-oso de na ini a kondre fu yu noso na ini wan kondre krosibei? Wi e gi yu a kari fu go luku a presi. A no de fu taki, dati den sma na Bethel o gi yu wan switikon èn yu sa kisi deki-ati fu tan dini Yehovah.