Yu e memre disi ete?

Yu ben prisiri fu leisi den Waktitoren di kon na doro no so langa pasa? Luku efu yu kan gi piki tapu den aksi di e kon now:

• Fu san ede Gado no strafu Aron di a meki a gowtu pikin kaw?

Aron ben pasa a wet fu Gado di e taki dati sma no musu anbegi popki (Ex. 20:3-5). Ma toku Moses begi Gado fu gi Aron pardon, èn a begi fu en ben abi „furu krakti” (Yak. 5:16). Aron ben de wan sma di ben gwenti gi yesi na Gado. Èn aladi a pipel ben dwengi Aron fu meki a pikin kaw, toku a sori bakaten taki a no ben agri nanga a sondu di den sma ben du, fu di a teki a sei fu Yehovah makandra nanga den manpikin fu Leifi (Ex. 32:25-29).—15/5,  bladzijde 21.

• San kan yepi wan Kresten te a trowpatna fu en du sutadu?

Efu a patna di no abi fowtu ini a tori du ala san a man fu hori ensrefi na Bijbel gronprakseri, dan a no abi fu denki taki na en meki taki a patna fu en du sutadu. Gado sabi taki yu abi trowstu nanga yepi fanowdu. A kan gebroiki Kresten brada nanga sisa fu trowstu yu.—15/6, bladzijde 30, 31.

• San na wan tu sani di yu kan du fu yepi sma di lasi den trowpatna na ini dede?

Na ini den dei baka a dede fu wan lobiwan, a tra patna ben o feni en bun kande fu kisi yepi. Yu kan bori gi en, yu kan gi den famiriman di kon luku en wan presi fu tan, noso yu kan tan nanga a sma di e sari.—1/7, bladzijde 10.

• San yu kan du fu meki wan pikin tyari frantwortu bakaten?

Efu yu e pruberi fu kibri yu pikin ala ten gi muilek situwâsi, dan fu taki en leti, yu e tapu en fu kon sabi san a musu du na ini muilek situwâsi di e opo kon na ini a libi. Na presi fu dati, gi yu pikin deki-ati fu di yu e kweki en so taki a man tyari frantwortu. Te yu e du dati, dan dati sa de wan fu den moro warti kado di yu kan gi en.—1/7, bladzijde 18.

• San wi o kisi te wi e tan du sani di bun trutru?

Hori na prakseri taki wi o abi wan krin konsensi te wi e du san Gado wani, èn Gado o feni wi bun. Kownu David ben skrifi: „Yehovah, suma kan kon tan nanga yu na ini yu tenti? Suma kan kon tan na tapu yu santa bergi? Na a sma di e gi yesi na Gado ala ten, di e du san reti èn di e taki sani nanga wan krin ati” (Ps. 15:2).—1/7, bladzijde 25.

• Fa Paulus tron wan disipel fu Yesus?

Di Paulus ben de na pasi fu go na Damaskus fu grabu den disipel fu Yesus drape, dan wantronso wan faya koti komoto fu hemel èn a breni en. A yere wan sten di aksi en: „Saulus, Saulus, fu san ede yu e frufolgu mi?” Na Yesus ben e taki nanga en! A taigi Paulus fu go na Damaskus. Baka dati, Yesus seni Ananias, wan disipel fu en, fu go taki nanga Paulus, èn na so a tron wan disipel fu Yesus (Tori. 9:1-18).—1/7, bladzijde 27.

• Fa yu kan lusu problema di yu e kisi nanga a mama noso a papa fu yu trowpatna?

Yu kan lusu furu fu den problema di yu e kisi nanga a papa noso a mama fu yu trowpatna te yu e kon frustan fa den e denki, èn te yu no e meki problema tyari kesekese kon na mindri yu nanga yu trowpatna.—1/7, bladzijde 30.

• Fa yu kan yepi den pikin fu yu fu kon lobi leisi?

Te papa nanga mama e sori lobi gi den pikin èn te den e de wan bun eksempre gi den, dan den pikin o kon lobi leisi. Boiti dati, gi den buku fu leisi. Leisi gi den. Gi den deki-ati fu taki, èn taki fu den sani di yu e leisi. Meki yu pikin leisi gi yu, èn gi den deki-ati fu poti aksi.−15/7, bladzijde 26.