Den sani di wi Fesiman e du na ini a ten disi
Den sani di wi Fesiman e du na ini a ten disi
„A ben go fu feti a wan feti baka a trawan èn fu wini a feti fu en.”—OPENB. 6:2.
1, 2. (a) San Bijbel e taki fu a fasi fa Krestes e du sani sensi di a tron Kownu na 1914? (b) Sortu sani Krestes du sensi di a tron kownu?
NA INI 1914, Krestes tron Kownu fu a Mesias Kownukondre fu Yehovah. Fa wi e si a kownu dati? Wi e si en leki wan kownu di e sidon na tapu en kownusturu e denki fu sani, aladi a e fringi ai kon na grontapu wanwan leisi fu luku fa sani e waka nanga a gemeente fu en? Efu na so wi e si en, dan wi musu kenki a fasi fa wi e denki. Den Psalm nanga a buku Openbaring e sori taki Yesus na wan fayafaya kownu di e rèi na tapu wan asi, èn a e go „feti a wan feti baka a trawan”, teleki ’a wini den feanti fu en’.—Openb. 6:2; Ps. 2:6-9; 45:1-4.
2 A fosi sani di Krestes du baka di a tron kownu, na taki a wini a feti nanga „a bigi kaiman nanga den engel fu en”. Leki a gran engel Mikael e tiri den engel fu en, Krestes fringi Satan nanga den ogri yeye fu en komoto na den santa hemel kon na grontapu, pe den no man komoto moro (Openb. 12:7-9). Baka dati, di Yesus ben de Yehovah en „boskopuman fu a frubontu”, a kon luku na agersi tempel makandra nanga en Papa (Mal. 3:1). Yesus krutu Krestenhèit, a moro ogri pisi fu „Babilon a Bigiwan”, fu di a kiri furu sma èn fu di a e teki prati na a politiek fu a grontapu disi.—Openb. 18:2, 3, 24.
A e krin den srafu fu en na grontapu
3, 4. (a) Sortu wroko Krestes du leki „boskopuman” fu Yehovah? (b) San kon na krin di Yesus nanga Yehovah go luku a tempel? (c) San Yesus leki Edeman fu a gemeente seti fu tiri den futuboi nanga den tra skapu fu en?
3 Di Yehovah nanga en „boskopuman” kon luku a tempel fu en, dan a kon na krin tu taki wan grupu tru Kresten ben de na ini a fesi dyari fu na agersi tempel. Den Kresten disi no ben de memre fu den kerki fu Krestenhèit. Ma srefi den salfu Kresten disi, noso „den Leifisma”, ben musu kon krin. Na a sani disi a profeiti Maleaki ben taki na fesi: „[Yehovah] o sidon leki wan sma di e krin solfru, dan a o meki den Leifisma kon krin. A o krin den leki gowtu èn leki solfru, dan den o tyari wan ofrandi gi Yehovah nanga wan reti ati” (Mal. 3:3). Yehovah gebroiki en „boskopuman fu a frubontu”, Krestes Yesus, fu krin den Kresten disi di ben de fu na Israel fu Gado.
4 Ma Krestes kon si taki den salfu Kresten disi ben e tan gi yesi na Gado, èn den ben e du ala san den man fu gi den anbegiman fu Gado nyanyan na a reti ten. Sensi 1879, den e tyari tru tori fu Bijbel kon na doro na ini a tijdschrift The Watchtower, èn den tan du dati aladi a situwâsi ben muilek son leisi. Den Bijbel tru tori dati abi fu du nanga Gado Kownukondre. Yesus ben taki wan profeititori di ben e sori taki te a „doro” fu luku den futuboi fu en na „a kaba fu a grontapu sistema”, dan wan srafu ben o de di ben e gi den „nyanyan na a reti ten”. A ben o taki dati a srafu dati na wan koloku srafu, èn a ben o ’poti en fu luku ala den sani di a abi’ na grontapu (Mat. 24:3, 45-47). Leki Edeman fu a Kresten gemeente, Krestes gebroiki a „getrow èn koni srafu” disi fu luku den Kownukondre afersi fu en na grontapu. A poti wan Tiri Skin fu tiri den salfu „futuboi” nanga den „tra skapu”.—Yoh. 10:16.
A e koti a nyanyan fu grontapu
5. Sortu sani a Kownu du, soleki fa na apostel Yohanes ben si dati na ini wan fisyun?
5 Na apostel Yohanes ben kisi wan fisyun fu wan tra sani di a Mesias Kownu ben o du baka te a tron kownu na ini 1914. Dati ben o pasa na ini „a dei fu Masra”. Yohanes ben skrifi: „Mi si wan weti wolku, èn na tapu a wolku wan sma ben e sidon di gersi wan manpikin fu libisma; a ben abi wan gowtu kownu-ati na tapu en ede èn a ben hori wan srapu grasinefi na ini en anu” (Openb. 1:10; 14:14). Yohanes ben yere fa wan engel fu Yehovah ben taigi a Sma di e koti nyanyan, fu teki en grasinefi èn fu koti, fu di „a nyanyan fu grontapu lepi kaba”.—Openb. 14:15, 16.
6. San ben o pasa na ini a gron bifo a kotiten doro?
6 A koti di a Mesias e koti „a nyanyan fu grontapu” e meki wi prakseri na agersitori fu Yesus di e taki fu na aleisi nanga a takru wiwiri. Yesus ben agersi ensrefi nanga wan man di sai aleisi siri na ini a gron fu en, fu di a ben wani koti bogobogo aleisi. Na aleisi dati e prenki „den manpikin fu a kownukondre”, noso tru Kresten di salfu fu tiri makandra nanga Krestes na ini en Kownukondre. Ma na neti, wan feanti, noso „Didibri” sai takru wiwiri na mindri na aleisi. Den takru wiwiri dati e prenki „den manpikin fu na ogriwan”. A gronman e taigi den wrokoman fu meki na aleisi gro makandra nanga a takru wiwiri, teleki a kotiten doro ’na a kaba fu a grontapu sistema’. Na a ten dati, a ben o seni den engel fu en fu prati na aleisi fu den takru wiwiri.—Mat. 13:24-30, 36-41.
7. Fa Krestes e du a kotiwroko fu „a nyanyan fu grontapu”?
7 Leki wan kontru fu a fisyun di Yohanes ben kisi, Yesus e teki fesi na ini wan kotiwroko di e du na heri grontapu. Yesus bigin koti „a nyanyan fu grontapu” di a bigin tyari den wan kon makandra di ben tan abra fu den 144.000 „manpikin fu a kownukondre”, noso „na aleisi” na ini na agersitori fu Yesus. Baka a Fosi Grontapufeti, a difrenti na mindri tru Kresten nanga falsi Kresten kon de krin fu si. A difrenti kon de so krin fu si, taki a ben moro makriki fu tyari den tra skapu kon na wán. Dati ben de a di fu tu pisi fu a kotiten fu „a nyanyan fu grontapu”. Den tra skapu disi no de „den manpikin fu a kownukondre”, ma na presi fu dati, den de „wan bigi ipi” fu sma di de klariklari fu saka densrefi na ondro a tiri fu a Kownukondre. Den sma disi komoto fu ala „den pipel, nanga den sma di de fu difrenti kondre èn di e taki difrenti tongo”. Den e saka densrefi na ondro a tiri fu a hemel Kownukondre di Krestes Yesus e tiri makandra nanga den 144.000 „salfuwan”.—Openb. 7:9, 10; Dan. 7:13, 14, 18.
A e tiri den gemeente
8, 9. (a) San e sori taki Krestes no e si soso fa a heri gemeente de, ma taki a e si tu fa ibri memre fu a gemeente tyari ensrefi? (b) Soleki fa a prenki na tapu bladzijde 26 e sori, dan gi sortu „dipi sani fu Satan” wi musu wai pasi?
8 Na ini na artikel na fesi, wi si taki Krestes luku bun fa a situwâsi fu ibri gemeente ben de na ini a fosi yarihondro. Na ini a ten disi, Krestes wi Fesiman e tiri leki Kownu, èn a abi „ala makti na ini hemel èn na grontapu”. Boiti dati, a e tiri ala den gemeente na heri grontapu, èn a e tiri sosrefi den opziener fu den gemeente dati (Mat. 28:18; Kol. 1:18). Yehovah „meki a tron edeman fu ala sani gi a bun fu a gemeente” fu salfuwan (Ef. 1:22). Na so Yesus man si ala sani di e pasa na ini den moro leki 100.000 gemeente fu Yehovah Kotoigi.
9 Yesus ben seni a boskopu disi gi na owruten gemeente fu Tiatira: „A Manpikin fu Gado, a sma di abi ai di de leki faya, . . . e taki disi: ’Mi sabi den sani di yu e du’” (Openb. 2:18, 19). A piri-ai gi a gemeente dati fu di den ben e libi na wan fasi di no fiti, èn fu di den ben e suku nomo fu plisi den eigi lostu. A ben taigi den: „Mi na a sma di e ondrosuku den niri nanga den ati, èn mi o pai ibriwan fu unu fu den sani di unu du” (Openb. 2:23). Den wortu dati e sori taki Krestes no e si soso fa ibri gemeente de, ma a e si tu fa ibri memre fu a gemeente e tyari ensrefi. Yesus ben prèise den Kresten na ini Tiatira fu di den „no ben kon sabi den sani di sma e kari ’den dipi sani fu Satan’” (Openb. 2:24). Na ini a ten disi, a de so tu taki Yesus lobi yonguwan nanga owruwan di no e poti prakseri na „den dipi sani fu Satan”. Iya, den sma disi no e go tapu Internet fu luku sani di no fiti, den no e prei ogri-ati video game, èn den no abi den eigi denki fu sani. Yesus breiti srefisrefi fu si fa so furu Kresten na ini a ten disi e du ala muiti fu teki a tiri fu en na ini ala afersi fu den libi.
10. Fa a buku Openbaring e agersi a fasi fa Krestes e tiri den gemeente owruman? Ma san den owruman musu sabi?
10 Krestes e tiri den gemeente fu en na grontapu na wan lobi-ati fasi, èn a e du dati nanga yepi fu den owruman di a poti (Ef. 4:8, 11, 12). Na ini a fosi yarihondro, ala den opziener ben de salfu brada. A buku Openbaring e agersi den man disi nanga stari di de na ini Krestes en reti-anu (Openb. 1:16, 20). Na ini a ten disi, furu fu den gemeente owruman de fu den tra skapu. Nanga yepi fu begi èn nanga yepi fu a santa yeye, den kisi a frantwortu fu de owruman. Fu dati ede, wi kan si den tu leki man di e kisi tiri fu Krestes (Tori. 20:28). Ma den owruman disi sabi taki Krestes e gebroiki wan pikin grupu salfu Kresten brada fu dini leki wan Tiri Skin di e tiri den disipel fu en na grontapu.—Leisi Tori fu den Apostel 15:6, 28-30.
„Kon, Masra Yesus”
11. Fu san ede wi wani taki wi Fesiman kon heri esi?
11 Na ini na openbaring di na apostel Yohanes ben kisi, Yesus ben taki wan tu leisi taki a ben o kon heri esi (Openb. 2:16; 3:11; 22:7, 20). A ben taki dati fu sori taki a ben o kon fu krutu Babilon a Bigiwan nanga den tra pisi fu na ogri sistema fu Satan (2 Tes. 1:7, 8). Fu di na owru apostel Yohanes ben e angri fu si a kontru fu den tumusi moi sani dati, meki a bari taki: „Amen! Kon, Masra Yesus.” Wi di e libi na a kabapisi fu na ogri sistema disi, wani tu taki wi Fesiman nanga Kownu fu a Kownukondre kon heri esi fu santa a nen fu en Papa, èn fu sori taki na en Papa abi a reti fu tiri ala sani.
12. Sortu wroko Krestes o klari fosi a lusu den winti di o pori a sistema fu Satan?
12 Fosi Yesus o pori na organisâsi fu Satan na grontapu, den wan di tan abra ete fu den 144.000 memre fu na Israel fu Gado, o kisi wan marki fu a lasti leisi. Bijbel e sori krin taki den winti di o pori a sistema fu Satan no sa lusu fosi ala den 144.000 salfuwan kisi wan marki.—Openb. 7:1-4.
13. Fa Krestes o sorgu taki a denoya fu en de krin fu si na a bigin fu a „bigi banawtu”?
13 Furu sma na grontapu no sabi taki a „denoya” fu Krestes bigin sensi 1914 (2 Petr. 3:3, 4). Ma heri esi Krestes o meki sma kon sabi taki a e tiri kaba leki Kownu, fu di a o krutu den difrenti pisi fu a sistema fu Satan, soleki fa Yehovah wani dati. Te „a sma di e du kruktudu”, noso den kerki fu Krestenhèit, o kisi pori, dan ’a denoya fu Masra o de krin fu si’. (Leisi 2 Tesalonikasma 2:3, 8.) A sani disi o sori krin taki Yesus na a Krutuman fu Yehovah. (Leisi 2 Timoteyus 4:1.) Te a moro ogri pisi fu Babilon a Bigiwan o kisi pori, dan dati o sori taki heri esi na ogri grontapumakti fu falsi anbegi o kisi pori tu. Yehovah o meki den politiek tiriman pori a huru-uma disi (Openb. 17:15-18). Dati sa de a bigin fu a „bigi banawtu”.—Mat. 24:21.
14. (a) Fu san ede Gado o syatu den dei fu a bigi banawtu? (b) San „a marki fu a Manpikin fu libisma” o wani taki gi a pipel fu Yehovah?
14 Yesus ben taki dati Gado o syatu den dei fu a bigi banawtu dati, so taki „den sma di a kari”, noso den salfu Kresten di de ete na grontapu, no kisi pori (Mat. 24:22). Yehovah no sa gi pasi taki a pori di falsi anbegi o kisi, tyari wan kaba kon na salfu Kresten nanga den tra skapu. Yesus ben taki tu dati „baka a banawtu fu a ten dati”, marki o de fu si na a son, a mun, nanga den stari. Te dati pasa, „dan a marki fu a Manpikin fu libisma o kon de fu si na hemel”. A sani disi o meki den pipel fu grontapu „sari èn krei”. Ma a sa de tra fasi nanga den salfuwan di abi a howpu fu go na hemel, èn nanga den tra skapu di abi a howpu fu libi na grontapu. Den o ’opo tanapu leti-opo èn den o opo den ede luku go na loktu, bika a frulusu fu den de krosibei’.—Mat. 24:29, 30; Luk. 21:25-28.
15. Sortu wroko Krestes o du te a kon?
15 Fosi a Manpikin fu libisma wini a feti fu en, a o kon na ete wan fasi. A ben taki na ini wan profeititori: „Te a Manpikin fu libisma kon nanga en glori, makandra nanga ala den engel, dan a o go sidon na tapu en gran kownusturu. Den o tyari ala pipel kon na en fesi, èn a o prati den sma neleki fa wan skapuman e prati den skapu fu den bokoboko. A o poti den skapu na en reti-anusei, ma den bokoboko a o poti na en kruktu-anusei” (Mat. 25:31-33). Disi e sori taki Krestes o kon leki Krutuman fu prati „ala pipel” na ini tu grupu. Dati na „den skapu”, noso den wan di horibaka fayafaya gi den salfu Kresten na grontapu, èn „den bokoboko”, noso den sma „di no e gi yesi na a bun nyunsu fu wi Masra Yesus” (2 Tes. 1:7, 8). Den skapu di Bijbel e kari „regtfardiki sma o kisi têgo libi” na grontapu, ma den bokoboko „o dede fu têgo”.—Mat. 25:34, 40, 41, 45, 46.
Yesus e wini a feti fu en
16. Fa Krestes wi Fesiman o wini a feti fu en?
16 Te ala den kownu-priester kisi wan marki èn te Krestes poti den skapu na en reti-anusei fu kisi frulusu, dan a kan go doro fu „wini a feti fu en” (Openb. 5:9, 10; 6:2). Leki fesiman fu wan legre fu makti engel èn fu den brada fu en di kisi wan opobaka, Krestes o pori Satan en heri politiek sistema, en srudati sistema, nanga a bisnis sistema fu en (Openb. 2:26, 27; 19:11-21). Krestes o wini a feti fu en te a pori na ogri sistema fu Satan. Baka dati, a o fringi Satan nanga den ogri yeye na ini wan dipi peti pe den o tan wan dusun yari langa.—Openb. 20:1-3.
17. Pe Krestes o tyari den tra skapu fu en go na a ten fu a Dusun Yari Tiri? Sortu fasti bosroiti wi musu abi?
17 Di na apostel Yohanes ben taki fu a „bigi ipi” fu tra skapu di o pasa a bigi banawtu libilibi, dan a taki na ini wan profeititori taki „a Pikin Skapu di de krosibei fu a kownusturu o tiri den, èn a o tyari den go na den peti di abi watra di e gi libi” (Openb. 7:9, 17). Iya, na a ten fu a Dusun Yari Tiri fu en, Krestes o go doro fu tiri den tra skapu di e gi yesi na en, èn a o tyari den go na têgo libi. (Leisi Yohanes 10:16, 26-28). Meki wi abi a fasti bosroiti fu tan teki a tiri fu wi Fesiman nanga Kownu. Meki wi du dati now èn te na ini a nyun grontapu di Yehovah pramisi wi!
Luku baka san wi leri
• San Krestes du baka di a tron Kownu?
• Suma Krestes e gebroiki na grontapu fu tiri den gemeente?
• Na sortu tra fasi Krestes wi Fesiman o kon ete?
• Fa Krestes o go doro fu tiri wi na ini a nyun grontapu?
[Aksi fu a tori disi]
[Prenki na tapu bladzijde 29]
Te na ogri sistema fu Satan kisi pori, sma o kon sabi taki Krestes e tiri leki kownu