Wan spesrutu kotoigiwroko na ini Bulgaria abi bun bakapisi

„A kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman fu go du a kotiwroko fu en.”—MAT. 9:37, 38.

DEN wortu disi di Yesus ben taki, trutru e fiti a situwâsi na ini Bulgaria, wan moi Balkan kondre na a zuid-owstusei fu Europa! Na ini a kondre dati, wrokoman de tranga fanowdu fu preiki a bun nyunsu gi den moro leki seibi milyun sma di e tan drape. Sowan 1700 preikiman de na ini Bulgaria, ma den no nofo fu preiki na ini a heri kondre. Dati meki a Tiri Skin gi primisi fu gi Kotoigi di ben e taki Bulgariatongo a kari fu kon yepi nanga wan spesrutu kotoigiwroko di du na ini 2009. Den Kotoigi disi ben e komoto fu difrenti kondre fu Europa. Den brada nanga sisa ben o preiki seibi wiki langa na ini a waran pisi ten fu a yari. Boiti dati, na a kaba fu a kotoigiwroko disi, a „Tan na ai!” Distrikt Kongres ben o hori na ini Sofia, tapu 14 te go miti 16 augustus 2009.

Bun furu Kotoigi e teki a kari

Den brada fu a bijkantoro na ini Sofia, ben e aksi densrefi omeni Kotoigi ben o teki a kari. Den ben kari brada nanga sisa fu Fransikondre, Doisrikondre, Grikikondre, Italiakondre, Polen, nanga Spanyorokondre. Den brada nanga sisa dati ben o abi fu pai den eigi kostu fu go na Bulgaria, èn den ben o abi fu gebroiki den fakansi dei fu teki prati na a kotoigiwroko. A ben moi fu si fa ibri wiki moro nanga moro sma ben e gi den nen, èn te fu kaba dati ben de 292 sma! Fu di so furu sma ben gi den nen, meki den brada ben kan seni den fu go wroko na ini dri foto fu Bulgaria. Dati ben de Kazanlak, Sandanski, nanga Silistra. Kring-opziener na ini Bulgaria gi den pionier nanga preikiman fu drape a kari fu yepi tu nanga a kotoigiwroko. Te fu kaba, 382 sma ben e preiki fayafaya na ini kontren pe sma ben preiki a bun nyunsu wanwan leisi nomo.

Brada fu den gemeente na ini a kontren dati, ben musu sreka tanpresi na fesi gi den preikiman. Den yuru kamra na sma èn na hotel di no ben diri. Den brada disi wroko bun tranga fu yepi den preikiman fu feni wan tanpresi, èn den sorgu tu gi den sani di den ben abi fanowdu. Na ini ala den dri foto, den brada yuru presi fu hori konmakandra. Den seti sani so taki den brada di ben e kon drape ben kan hori den konmakandra. A ben moi fu si taki na presi pe nowan enkri Kotoigi ben e tan, 50 preikiman ben e kon makandra fu prèise Yehovah.

Den Kresten brada nanga sisa di ben komoto fu tra kondre fu yepi nanga a kotoigiwroko, ben de fayafaya trutru. Na ini a waran pisi ten fu a yari, a weer na ini Bulgaria ben kan faya moro leki 40 graden Celcius. Ma noti ben kan tapu den brada nanga sisa disi. Silistra na wan foto di de na a Donauliba, èn moro leki 50.000 sma e tan drape. Na ini den fosi dri wiki den brada nanga sisa gi kotoigi na ini a heri foto dati. Baka dati, den brada go preiki na den dorpu krosibei fu a foto disi, èn den doro te na Tutrakan, di de sowan 55 kilometer go na a westsei fu Silistra. Nofo tron den ben e bigin preiki 9.30 mamanten. Te den ben nyan te brekten, dan furu tron den ben e wroko go doro teleki seibi yuru na neti, noso moro lati srefi. Na so a de tu taki fu di den preikiman disi ben de so fayafaya, meki den  preiki go te na den dorpu nanga den foto lontu Kazanlak nanga Sandanski.

San ben de a bakapisi?

Den preikiman gi wan tumusi moi kotoigi na ini den seibi wiki disi. Neleki fa sma ben taki na a ten fu den apostel, na so den sma fu den foto disi ben kan taki: ’Un panya a leri fu unu na ini a heri foto’ (Tori. 5:28). Den Kotoigi di ben e teki prati na a kotoigiwroko, prati pikinmoro 50.000 tijdschrift, èn den bigin 482 Bijbelstudie. A moi fu sabi taki bigin nanga 1 september 2009, wan gemeente seti na ini Silistra, èn grupu seti tu na ini Kazanlak nanga Sandanski. A e gi prisiri fu si fa sma di yere a bun nyunsu fu a fosi leisi na a ten fu a kotoigiwroko, e go na fesi moi na ini a tru anbegi.

Na ini a fosi wiki fu a kotoigiwroko, wan spesrutu pionier sisa di e taki Bulgariatongo èn di ben komoto fu Spanyorokondre, gi kotoigi na Karina, wan uma na ini Silistra. Na uma disi ben e seri koranti na strati. Karina ben wani sabi moro èn a kon na wan fu den konmakandra. A ben de klariklari fu studeri Bijbel. A masra fu en no e bribi na ini Gado, èn fu dati ede Karina aksi fu studeri Bijbel na wan presi pe sma e go koiri. Den tu umapikin fu en ben e teki prati tu na a studie. Daniela, a moro bigiwan fu den, ben abi furu warderi gi den tru tori fu Bijbel. A leisi a Bijbel leri-buku na ini wán wiki èn wantewante a fiti san a ben e leri fu Bijbel. A tapu fu gebroiki prenki nanga popki fu anbegi Gado. Baka dati, a bigin fruteri den mati fu en den tru tori fu Bijbel. Dri wiki nomo baka di a ben go na den gemeente konmakandra fu a fosi leisi, a taigi a sisa di ben e studeri nanga en: „Mi e firi leki mi na wan fu unu. San mi musu du fu kan bigin preiki tu?” Daniela e tan go na fesi moi, makandra nanga en mama nanga en pikin sisa.

Wan brada fu Bulgaria di ben e tan na ini Italiakondre, ben kon yepi tu nanga a kotoigiwroko na ini Kazanlak. A brada disi di nen Orlin, ben kaba preiki wan dei, èn a ben e waka go baka na a presi pe a ben e tan. Ne a miti tu yonguman di ben e sidon na tapu wan bangi na wan presi pe sma e go koiri. A gi kotoigi na den man disi, èn a gi den wan Bijbel leri-buku. Boiti dati, a meki mofo fu go na den a dei baka dati. Di Orlin go na den, dan a bigin wan Bijbelstudie nanga Svetomir, èn a tra dei fu en a go doro nanga a studie dati. Na ini neigi dei, Orlin studeri aiti leisi nanga Svetomir. Luku san Svetomir taki: „Tu dei fosi mi miti yu, mi ben begi Gado fu yepi mi fu kon sabi en. Èn mi pramisi en taki efu a ben o yepi mi, dan mi ben o gi mi libi abra na en.” Baka di Orlin drai go baka na Italiakondre, den brada fu Bulgaria studeri go doro nanga Svetomir, èn a e kon leri sabi den tru tori fu Bijbel moro bun.

 Den wan di gi densrefi kisi furu blesi

Soleki fa wi ben si kaba, dan den Kotoigi di ben go preiki a bun nyunsu na wan tra kondre, ben de klariklari fu gebroiki den fakansi dei èn fu pai gi den eigi kostu. Fa den ben e firi? Wan owruman di e dini na ini Spanyorokondre ben skrifi: „A kotoigiwroko meki taki den brada nanga sisa fu den Bulgariatongo gemeente na ini Spanyorokondre kon abi wan moro bun matifasi nanga makandra. A wroko disi ben abi bigi krakti tapu den brada nanga sisa di ben teki prati na en.” Wan trowpaar fu Italiakondre ben skrifi: „Disi ben de a moro moi mun fu wi libi!” Den ben taki moro fara: „A kotoigiwroko kenki wi libi! Wi tron tra sma now.” A trowpaar disi bigin denki seryusu efu den ben o man froisi go tan na ini Bulgaria fu dini na kontren pe moro preikiman de fanowdu. Carina di no trow, na wan gewoon pionier fu Spanyorokondre, èn a ben teki prati tu na a kotoigiwroko na ini Silistra. Baka dati, a libi a wroko fu en di a ben abi na ini Spanyorokondre, èn a froisi go na Bulgaria fu go yepi a nyun gemeente na ini Silistra. A ben poti nofo moni na wan sei fu man libi wán yari na ini Bulgaria. Luku san Carina e taki fu a bosroiti di a teki: „Mi breiti so te taki Yehovah e gi mi okasi fu dini na ini Bulgaria, èn mi howpu taki mi o man tan langa dyaso. Mi abi feifi Bijbelstudie kaba, èn dri fu den e kon na den konmakandra.”

Wan sisa fu Italiakondre ben wani teki prati tu na a kotoigiwroko, ma fu di a ben bigin nanga wan nyun wroko no so langa na fesi, meki a no ben abi fakansi dei. A sani disi no ben meki a lasi-ati, ma a aksi en wrokobasi efu a ben kan kisi wán mun fri, sondro pai. A ben de klariklari fu libi a wroko efu a no ben o kisi fri. A fruwondru di a wrokobasi fu en taigi en: „A bun, ma yu musu du wan sani gi mi: Yu musu seni wan karta gi mi te yu de na ini Bulgaria.” A no de fu taki dati a sisa ben firi taki Yehovah ben piki den begi fu en.

Stanislava na wan yongu sisa fu a foto Varna na ini Bulgaria. A sisa disi ben e wroko heri wiki, èn a wroko fu en ben e pai bun. A libi a wroko dati fu go teki prati na a kotoigiwroko na ini Silistra. Di a si fa den someni pionier ben de koloku, aladi den ben komoto fu so fara fu preiki a bun nyunsu na ini a kondre fu en, dan a sani dati meki en ai lon watra. A bigin prakseri san a ben e du nanga a libi fu en, fu di a ben abi wan grontapuwroko. Baka tu wiki a drai go baka na a foto pe a ben e tan, èn a libi a wroko fu en fu tron wan gewoon pionier. Now a de koloku trutru, èn a e memre en Mekiman na ini en yongu yari.—Preik. 12:1.

A de wan blesi trutru fu teki prati na a dini wroko fu Yehovah. A moro bun sani di yu kan du, na fu gebroiki yu ten nanga yu krakti fu teki prati na a prenspari wroko di wi abi fu gi sma leri èn fu preiki a bun nyunsu. Yu denki taki yu kan du moro na ini a wroko disi di e kibri sma libi? Kande kontren de na ini a kondre fu yu pe moro preikiman de fanowdu. Yu kan froisi go tan na so wan kontren? Noso kande yu kan leri wan tra tongo fu yepi sma na ini a kondre fu yu di e angri fu kon sabi den tru tori fu Bijbel. Awansi sortu kenki yu kan tyari kon fu du moro na ini a preikiwroko, yu kan abi a dyaranti taki Yehovah sa blesi yu bogobogo.—Odo 10:22.

[Faki/​Prenki na tapu bladzijde 32]

Wan dei di den no sa frigiti

Furu fu den sma di ben komoto fu tra kondre na ini Europa fu teki prati na a spesrutu kotoigi wroko na ini Bulgaria, ben seti sani fu go na a „Tan na ai!” Distrikt Kongres na ini Sofia. A ben de wan bigi deki-ati gi den brada nanga sisa fu drape fu miti so furu sma fu difrenti kondre. Na a kongres dati, 2039 sma ben de, èn Brada Geoffrey Jackson fu a Tiri Skin tyari a heri Nyun-Grontapuvertaling fu den Santa Buku fu Bijbel kon na doro na ini Bulgariatongo. A no de fu taki dati den sma drape ben breiti srefisrefi! A freida dati, ala den sma di ben de na a kongres tan naki anu fayafaya wan heri pisi ten. Furu fu den ben e krei srefi fu di den ben breiti so te. A soifri vertaling disi di makriki fu frustan, o yepi reti-ati Bulgariasma fu kon sabi Yehovah moro bun.

[Karta na tapu bladzijde 30, 31]

(Efu yu wani si pe den sani disi skrifi, luku a tijdschrift)

BULGARIA

SOFIA

Sandanski

Silistra

Kazanlak

[Prenki na tapu bladzijde 31]

Den gi wan tumusi moi kotoigi na ini den seibi wiki