Fa Yehovah feni en te sma e suku reide fu no du san a e fruwakti fu den?

„NA A uma di yu gi mi, na en gi mi a froktu fu a bon, dan mi nyan”, na so a man ben taki. Na uma piki: „Na a sneki kori mi, ne mi nyan.” Den sani disi di wi fosi papa nanga mama, Adam nanga Eva, ben taigi Gado, ben e sori krin taki den ben e suku reide fu no tyari frantwortu gi a sani di den ben du. Na so den ben bigin nanga wan sani di libisma ben o du hondrohondro yari langa teleki a dei fu tide.—Gen. 3:12, 13.

A strafu di Yehovah gi Adam nanga Eva fu di den ben trangayesi en fu espresi, ben sori taki a no ben feni a reide bun fu san ede den ben du dati (Gen. 3:16-19). Ma dati wani taki dati Yehovah noiti no e agri nanga den reide di wi abi fu no du san a e fruwakti fu wi? Fu man piki na aksi dati, dan meki wi go luku fosi fu san ede son sma e suku reide fu no tyari frantwortu gi spesrutu sani.

Nofo tron wan sma e suku reide fu no tyari frantwortu te a meki wan fowtu, te a du wan ogri, èn te a no man noso te a no wani du wan spesrutu sani. Disi a no a srefi leki te wan sma abi bun reide fu san ede a no ben man du wan spesrutu sani, noso te a sma e aksi pardon nanga en heri ati gi wan sani di a du. Ma neleki Adam nanga Eva, son sma e kon nanga ala sortu reide fu kori trawan. Èn son sma e suku reide fu no tyari frantwortu gi den sani di den du.

A no de fu taki dati te a abi fu du nanga a diniwroko fu Gado, dan wi no wani suku reide fu no du san A e fruwakti fu wi. Wi musu luku bun taki wi no e ’kori wisrefi nanga prakseri di no tru’ (Yak. 1:22). Dati meki wi o poti prakseri na wan tu Bijbel eksempre nanga gronprakseri di o yepi wi fu „tan ondrosuku san Masra feni bun”.—Ef. 5:10.

San Gado e fruwakti fu wi?

Na ini Gado Wortu wi e feni komando di e sori wi krin san wi leki a pipel fu Yehovah musu du. Fu eksempre, a komando di Krestes ben gi wi fu „go na sma fu ala kondre èn meki den tron disipel”, na wan sani di ala tru bakaman fu Krestes na ini a ten disi musu du (Mat. 28:19, 20). Fu taki en leti, a de tumusi prenspari taki wi e gi yesi na a komando dati, èn fu dati ede na apostel Paulus ben taki: „Helu fu mi efu mi no preiki a bun nyunsu!”—1 Kor. 9:16.

Ma toku a de so taki son sma di e studeri Bijbel nanga wi langa ten kaba, e tweifri ete fu preiki a bun nyunsu fu Gado Kownukondre (Mat. 24:14). Tra sma di ben e teki prati kaba na a preikiwroko, no e du dati moro. Sortu reide sma abi son leisi fu no teki prati na a preikiwroko? Fa Yehovah ben feni en di son sma fu owruten no ben de klariklari fu gi yesi na den komando fu en di ben e sori krin san den ben musu du?

Reide di Gado no feni bun

„A muilek tumusi.” Spesrutu den wan di e syensyen, ben kan feni en muilek fu teki prati na a preikiwroko. Ma luku san wi kan leri fu na eksempre fu Yona. A ben kisi wan wroko fu du, èn a ben feni taki a wroko dati ben muilek tumusi. Yehovah ben taigi en fu go meki bekènti taki Ninefei ben o kisi pori. Wi kan frustan heri bun fu san ede Yona ben feni en  muilek fu du a wroko dati. Ninefei ben de a mamafoto fu Asiria, èn den Asiriasma ben de wan tumusi ogri-ati pipel. Kande Yona ben aksi ensrefi: ’Mi o man nanga den sma dati? San den o du nanga mi?’ A no teki langa fosi Yona lon gowe. Ma Yehovah no ben feni a reide bun fu san ede Yona du dati. Na presi fu dati, Yehovah seni en baka fu go preiki gi den Ninefeisma. Disi leisi, Yona du a wroko nanga deki-ati, èn Yehovah meki sani waka bun.—Yona 1:1-3; 3:3, 4, 10.

Efu yu feni taki a muilek tumusi gi yu fu preiki a bun nyunsu, dan hori na prakseri taki „Gado man du ala sani” (Mark. 10:27). Yu kan de seiker taki Yehovah o gi yu krakti te yu e tan aksi en fu yepi yu, èn yu kan abi a dyaranti tu taki a o blesi yu te yu e teki deki-ati fu du a diniwroko fu yu.—Luk. 11:9-13.

„Mi no wani.” Ma fa a de te yu no e firi fu teki prati na a Kresten diniwroko? Hori na prakseri taki Yehovah kan yepi yu so taki yu e kisi na angri dati. Paulus ben taki: „Gado na a sma di e wroko na ini unu, fu di disi e plisi en; a e du disi so taki unu no sa wani fu handri wawan, ma taki unu sa handri trutru tu” (Fil. 2:13). Fu dati ede yu kan aksi Yehovah fu meki yu kisi na angri fu du a wani fu en. Na dati Kownu David ben du. A ben begi Yehovah: „Meki mi waka na wan reti fasi” (Ps. 25:4, 5). Yu kan du dati tu. Iya, yu kan begi Yehovah fayafaya fu yepi yu fu du san a feni bun.

A no de fu taki dati te wi weri noso te wi e firi brokosaka, dan wi sa musu dwengi wisrefi son leisi fu go na wan konmakandra na a Kownukondre zaal, noso fu teki prati na a diniwroko. Efu dati de so, dan wi musu denki taki wi no lobi Yehovah trutru? Kwetikweti. Na ini owruten, sma di ben e dini Gado nanga den heri ati, ben musu du tranga muiti tu fu du a wani fu Gado. Fu eksempre, Paulus ben taki dati a ben e ’kofu en skin’ na wan agersi fasi, fu man gi yesi na den komando fu Gado (1 Kor. 9:26, 27). Sobun, awansi wi musu dwengi wisrefi fu teki prati na a diniwroko, toku wi kan de seiker taki Yehovah o blesi wi. Fu san ede? Fu di wi e teki en leki wan plekti fu du a wani fu Yehovah, èn wi e du dati fu di wi lobi En. Na so wi e sori taki Satan ben lei di a taki dati den futuboi fu Gado ben o drai baka gi En te den ben o kisi tesi.—Yob 2:4.

„Mi no abi ten.” Efu yu no e teki prati na a diniwroko fu di yu feni taki yu no abi ten, dan a de tumusi prenspari taki yu e go luku san na den moro prenspari sani. Yesus ben taki: ’Fu dati ede, tan suku a kownukondre fosi’ (Mat. 6:33). Fu man hori yusrefi na a gronprakseri dati, dan a kan de fanowdu taki yu e tyari wan tu kenki kon na ini a fasi fa yu e libi. Noso kande yu no musu gebroiki so furu ten moro gi prisiriten, so taki yu kan abi moro ten fu teki prati na a diniwroko. A no de fu taki dati a bun fu abi prisiriten èn fu teki ten gi wi eigi afersi. Ma wi no musu gebroiki den sani dati leki reide fu no teki prati na a diniwroko. Wan futuboi fu Gado e poti Kownukondre afersi na a fosi presi na ini en libi.

 „Mi no bun nofo.” Kande yu feni taki yu no bun nofo fu de wan preikiman fu a bun nyunsu. Na ini Bijbel ten, son sma di ben e dini Yehovah nanga den heri ati ben feni taki den no ben bun nofo fu du spesrutu wroko di Yehovah ben gi den fu du. Teki Moses fu eksempre. Di Yehovah ben gi Moses wan spesrutu wroko fu du, dan Moses taki: „Ma Yehovah, mi no man taki grati. Noiti mi ben man taki grati, èn srefi now di yu e taki nanga yu futuboi, mi no man taki bun.” Aladi Yehovah ben gi en deki-ati taki a ben o man du a wroko, toku Moses piki en: „Grantangi, mi e begi yu Yehovah, seni wan tra sma fu du den sani di yu wani” (Ex. 4:10-13). San Yehovah du?

Yehovah no gi pasi taki Moses no du a wroko moro. Na presi fu dati, a poti Aron fu yepi Moses nanga a wroko (Ex. 4:14-17). Boiti dati, na ini den yari baka dati, Yehovah horibaka gi Moses, èn a gi en iniwan sani di a ben abi fanowdu fu man du den wroko di A ben e gi en. Na ini a ten disi yu kan abi a frutrow taki Yehovah o meki Kresten brada nanga sisa yepi yu tu fu du a diniwroko fu yu. San moro prenspari, na taki Gado Wortu e gi wi a dyaranti taki Yehovah o gi wi a koni di wi abi fanowdu fu man du a wroko di a gi wi fu du.—2 Kor. 3:5; luku a faki  „A moro moi ten fu mi libi”.

„Wan sma du wan hati sani nanga mi.” Son sma e tapu fu teki prati na a diniwroko noso den e tapu fu go na den gemeente konmakandra, fu di trawan hati den firi fu den. Den sma disi e denki taki Yehovah o feni taki den abi bun reide fu no teki prati moro na a  diniwroko. A no de fu taki dati nowan sma lobi en te trawan e hati den firi fu den. Ma a sani dati na wan bun reide fu no teki prati moro na a Kresten diniwroko? Di Paulus nanga en Kresten brada Barnabas ben abi wan kesekese, dan den „kisi bun bigi trobi”. A sani dati ben musu fu hati den tu man disi (Tori. 15:39). Ma a sani dati meki taki den tapu fu teki prati na a diniwroko? Kwetikweti!

Na so a de tu taki te wan tra Kresten hati den firi fu yu, dan yu musu hori na prakseri taki a no yu sondu Kresten brada na yu feanti, ma na Satan di wani swari yu. Ma Didibri no o man du dati te yu e ’kakafutu gi en èn te yu abi wan tranga bribi’ (1 Petr. 5:8, 9; Gal. 5:15). Efu yu abi a bribi dati, dan yu no sa „kisi syen” kwetikweti.—Rom. 9:33.

San wi musu du te wi no man du furu?

Soleki fa den eksempre disi sori, dan wi e si taki wi no abi bun reide fu no gi yesi na den komando fu Yehovah di e sori wi krin san wi musu du. Wi no abi bun reide tu fu no du a wroko di a gi wi fu preiki a bun nyunsu. Ma kande wi abi bun reide fu san ede wi no man du furu na ini a diniwroko fu wi. Kande wi abi spesrutu frantwortu di e meki taki wi no abi furu ten gi a preikiwroko. Boiti dati, a kan de so tu taki ten na ten wi weri tumusi noso taki wi siki tumusi fu du san wi ben o wani du na ini a diniwroko fu Yehovah. Ma Gado Wortu e gi wi a dyaranti taki Yehovah sabi taki wi e angri fu du moro, èn a e hori na prakseri tu taki wi no man du so furu.—Ps. 103:14; 2 Kor. 8:12.

Fu dati ede, wi musu luku bun taki wi no e krutu wisrefi noso trawan tumusi te a abi fu du nanga den sortu sani disi. Na apostel Paulus ben skrifi: „Suma na yu taki yu e krutu a futuboi fu wan tra sma? Na en eigi masra sa bosroiti efu a sa tanapu noso efu a sa fadon” (Rom. 14:4). Na presi taki wi e agersi a situwâsi fu wi nanga a di fu trawan, wi musu hori na prakseri taki „ibriwan fu wi o abi fu gi Gado frantwortu” (Rom. 14:12; Gal. 6:4, 5). Te wi e begi Yehovah èn te wi e taigi en fu san ede wi no man du san a e fruwakti fu wi, dan a bun te ibriwan fu wi e du dati nanga „wan krin konsensi”.—Hebr. 13:18.

Wi sa kisi prisiri te wi e dini Yehovah

Wi alamala kan dini Yehovah nanga trutru prisiri, fu di den sani di a e fruwakti fu wi, awansi san na a situwâsi fu wi, ala ten na bun sani èn sosrefi sani di wi man du. Fu san ede wi kan taki dati?

Gado Wortu e taki: „Tan du bun gi den wan di de na nowtu, te yu man du dati” (Odo 3:27). San na odo disi e sori yu te a abi fu du nanga den sani di Gado e fruwakti fu yu? Yehovah no e taigi yu fu pruberi fu du san yu brada noso sisa man du, ma a e taigi yu fu du san „yu man du”. Iya, ibriwan fu wi kan dini Yehovah nanga en heri ati, awansi o swaki noso o tranga wi de.—Luk. 10:27; Kol. 3:23.

[Faki/​Prenki na tapu bladzijde 14]

 „A moro moi ten fu mi libi”

Awansi wi e siki seryusu, noso awansi wi e firi brokosaka, toku wi no musu de gaw fu denki taki wi no o man teki prati dorodoro na a diniwroko. Luku san ben pasa nanga Ernest, wan Kresten brada na ini Kanada.

Ernest no ben man taki bun èn a ben e syensyen. Baka di a kisi seryusu mankeri na en baka, dan a no ben man tan du a bow-wroko fu en. Aladi a no ben man wroko, toku a no ben man gebroiki moro ten na ini a diniwroko. A deki-ati di a ben kisi na den gemeente konmakandra fu go dini leki yepipionier, ben meki a kisi na angri fu du a wroko disi. Ma a ben feni taki a no ben bun nofo fu du a wroko dati.

Fu overtoigi ensrefi taki a no ben o man du a pionierwroko, meki a poti en nen fu dini wán mun leki pionier. A fruwondru srefisrefi di a si taki a doro den yuru. Ne a prakseri na ensrefi: ’Mi sabi taki noiti moro mi o man du dati.’ Fu overtoigi ensrefi fu a sani dati, meki a poti en nen baka fu pionier ete wan mun, èn a doro den yuru baka.

Ernest dini leki yepipionier wán yari langa, ma a taki: ’Now mi sabi seiker taki noiti mi o man dini leki gewoon pionier’. Fu overtoigi ensrefi baka taki a ben abi leti, meki a gi en nen fu go dini leki gewoon pionier. A no ben man bribi di a dini leki gewoon pionier wan yari langa. A bosroiti fu tan pionier èn a ben breiti fu dini leki gewoon pionier tu yari langa, teleki a dede leki bakapisi fu a mankeri di a ben kisi na en baka. Ma di a ben de na libi ete, dan ala ten en ai ben e furu nanga watra te a ben e taigi den sma di ben e kon luku en: „A ten di mi ben e dini Yehovah leki pionier, ben de a moro moi ten fu mi libi.”

[Prenki na tapu bladzijde 13]

Wi kan pasa iniwan problema di ben kan tapu wi fu teki prati na a diniwroko

[Prenki na tapu bladzijde 15]

Yehovah lobi te wi e dini en nanga wi heri ati èn te wi e du ala san wi man awansi sortu situwâsi wi de na ini