Mi e tan wroko tranga na ini Yehovah en organisâsi

Soleki fa Vernon Zubko fruteri

MI GRO kon bigi na wan burugron krosibei fu Stenen, wan dorpu na ini a distrikt Saskatchewan, na Kanada. Mi papa Fred nanga mi mama Adella, ben e du tranga muiti fu leri wi fu Yehovah èn fu sorgu gi wi. Wi ben de nanga feifi pikin, mi, mi bigi sisa Aurellia, nanga den moro yonguwan, Alvin, Allegra, nanga Daryl. Te nanga a dei fu tide wi de nanga tangi taki wi papa nanga mama leri wi den tru tori fu Bijbel.

Mi papa, di ben de wan salfu Kresten, ben de wan preikiman di ben e preiki sondro frede. A ben e wroko tranga fu sorgu gi wi, ma a ben e sorgu tu taki ala sma ben sabi taki en na wan Kotoigi. Ala ten a ben e taki fu a tru anbegi. Noiti mi sa frigiti a faya nanga a deki-ati di a ben abi. A ben gwenti taigi mi: „Tan wroko tranga na ini Yehovah en organisâsi, èn yu o man wai pasi gi furu problema.”

Wi ben e du stratiwroko furu tron na ini Stenen nanga den birti krosibei. A sani disi no ben makriki gi mi ala ten. Na ini ibri foto yu ben abi yonguwan di ben e lobi fu fruferi den pikin fu Kotoigi. Den ben kon na wi tapu fu spotu wi. Di mi ben abi aiti yari, dan wan grupu yonguwan lontu mi wan leisi di mi ben e tanapu na tapu wan uku nanga A Waktitoren nanga Ontwaakt! na ini mi anu. Den grabu mi nyun ati puru na mi ede èn den poti en na tapu wan postu sei mi. Koloku taki wan moro owru brada di ben de drape tu, ben si san ben e pasa. A waka kon èn taki: „Vern, san e pasa dyaso?” Wantewante den boi gowe. Aladi mi no ben lobi a sani di pasa, toku mi leri taki te mi e du stratiwroko mi no musu tan tanapu leki wan postu, ma mi musu waka go miti sma. Den sani disi di mi ben leri leki yonguwan, gi mi a deki-ati di mi ben abi fanowdu fu du na oso-fu-oso preikiwroko.

Mi nanga Alvin dopu na ini mei 1951. Na a ten dati mi ben abi 13 yari. Mi kan memre ete taki Brada Jack Nathan ben hori a dopu lezing, èn a ben gi wi deki-ati fu no meki wán mun pasa sondro fu gi kotoigi fu Yehovah. * Na ini wi osofamiri, wi ala ten ben e si a pionierwroko leki a moro bun wroko di wi ben kan du. Fu dati ede, na ini 1958, baka di mi klari skoro, mi froisi go na Winnipeg, Manitoba, fu go pionier. Aladi mi papa ben lobi en taki mi ben e yepi en fu skafu udu na ini a famiri bisnis fu wi, toku en nanga mi mama ben gi mi furu deki-ati fu go na ini a furuten diniwroko. Den ben feni en bun taki mi froisi go na Winnipeg.

Wan nyun tanpe nanga wan nyun patna

Na ini 1959, a bijkantoro gi sma wan kari  fu froisi go na Quebec, fu di preikiman ben de tranga fanowdu drape. Mi go pionier na ini Montreal. Dati ben de wan bigi kenki! A ben de heri tra fasi leki san mi ben gwenti, fu di mi ben musu leri Fransitongo èn mi ben musu fiti misrefi na wan tra kulturu. A kring-opziener ben taigi mi: „Noiti no taki: ’Na so wi gwenti du sani pe mi komoto.’” Dati ben de heri bun rai.—1 Kor. 9:22, 23.

Di mi ben froisi go na Quebec, mi no ben abi wan pionier patna. Ma wan pisi ten na fesi, mi ben miti Shirley Turcotte, na ini Winnipeg. Bakaten, a yongu sisa disi tron mi patna fu ala ten, fu di wi trow na ini februari 1961. A ben de fu wan famiri tu di lobi Yehovah. Na a ten dati, mi no ben frustan krin ete o furu deki-ati a ben o gi mi bakaten.

Wi e go preiki na ini a kontren fu Gaspé

Tu yari baka di wi trow, wi ben musu go wroko leki spesrutu pionier na ini Rimouski, na Quebec. Na a bigin fu a tra yari, a bijkantoro aksi wi fu go preiki na ini a heri kontren fu Gaspé, di ben de na a owstusei fu Kanada, krosibei fu a se. Wi ben musu sai so furu Kownukondre siri leki wi man (Preik. 11:6). Wi lai na oto fu wi nanga moro leki 1000 tijdschrift, nanga pikinmoro 400 buku, sosrefi nyanyan nanga krosi, èn wi go drape fu du a preikiwroko wán mun langa. Wi go na a wán pikin dorpu baka a trawan na ini Gaspé, teleki wi ben preiki na ini a heri kontren drape. A radio station fu a presi drape, ben warskow den sma taki den Kotoigi ben e kon èn den ben taigi sma fu no teki den publikâsi fu wi. Ma furu fu den sma no ben frustan a boskopu bun èn den ben denki taki na reklame den ben e meki gi den publikâsi fu wi, èn fu dati ede den teki den.

Na a ten dati, a ben de wan nyun sani na ini son kontren na Quebec taki den Kotoigi ben mag preiki fri, èn dati meki a ben e pasa son leisi taki skowtu ben e tapu a wroko fu wi. Disi ben pasa na ini wan foto pe wi ben e prati publikâsi na pikinmoro ibri oso. Wan skowtu ben aksi wi fu go nanga en na skowtu-post, èn wi du dati. Mi kon sabi taki na afkati fu a foto drape ben taigi den skowtu fu tapu wi fu preiki. Fu di na edeman fu skowtu no ben de a dei dati, meki mi gi na afkati wan brifi fu a bijkantoro na ini Toronto. A brifi dati ben e sori krin taki wi ben abi a reti fu preiki. Baka di na afkati leisi a brifi, a taki wantewante: „Luku, mi no wani nowan enkri problema. Na a priester taigi mi fu tapu unu fu preiki.” Fu di wi ben wani taki sma na ini a kontren frustan taki a wroko fu wi no ben de teige lantiwet, meki wi drai go baka wantewante na a kontren pe skowtu ben teki wi, èn wi go doro nanga a preikiwroko.

A tra mamanten wi go na a edeman fu skowtu, èn en ati ben bron di a yere taki den ben tapu wi fu preiki. Yu ben musu yere san a taigi na afkati na telefon! Na edeman fu skowtu taigi wi efu wi ben abi wan problema, wi musu bel en èn a ben o sorgu taki ala sani waka bun. Aladi wi no ben de fu a kontren drape èn wi no ben man taki Fransitongo so bun, toku sma ben e sori switifasi gi wi. Ma wi ben aksi wisrefi efu wan dei den sma disi ben o kon sabi den tru tori fu Bijbel. Wi kon sabi dati wan tu yari baka dati di wi drai go baka na Gaspé fu bow Kownukondre zaal na ini a heri kontren dati. Wi kon sabi taki furu fu den sma di wi ben preiki gi, tron brada nanga sisa fu wi now. Iya, na Yehovah e meki a wroko go na fesi.—1 Kor. 3:6, 7.

Wi e kisi wan gudu

Wi umapikin Lisa gebore na ini 1970. A gudu disi di komoto fu Yehovah, gi wi furu prisiri. Shirley nanga Lisa ben e wroko makandra nanga mi na den difrenti Kownukondre zaal di wi bow. Baka di Lisa klari a skoro fu en, a taki: „We, mama nanga papa fu di na mi meki taki unu ben musu tapu nanga a furuten diniwroko, meki now mi o go pionier.” Now, moro leki 20 yari baka dati, Lisa e pionier  ete èn a e du dati makandra nanga en masra, Sylvain. Den ben abi a grani fu yepi nanga a bow-wroko di du na tra kondre. Leki osofamiri, wi bosroiti fu no feti baka grontapu sani, ma fu gi wisrefi na ini a diniwroko fu Yehovah. Noiti mi frigiti a sani di Lisa ben taki di a bigin pionier. Fu taki en leti, na en gi mi deki-ati fu bigin baka nanga a furuten diniwroko na ini 2001. Te now ete mi e pionier. A pionierwroko e tan leri mi fu poti mi frutrow tapu Yehovah na ini ala san mi e du èn fu no feti baka grontapu sani. Na so mi e tan koloku.

Wi musu lobi Yehovah nanga wi heri ati fu man yepi nanga a bow-wroko

Yehovah leri mi taki te wi de klariklari fu du iniwan wroko di a gi wi, dan wi o kisi furu blesi. Mi e si en leki wan bigi grani fu dini na ini a Bowkomte èn fu wroko makandra nanga mi Kresten brada nanga sisa fu du bow-wroko na ini heri Quebec èn na tra presi.

Aladi sonwan fu den wrokoman no e hori kefalek lezing na tapu podium, toku den e du tumusi bun wroko te den e bow Kownukondre zaal. Den lobi brada nanga sisa disi e du a wroko nanga den heri ati, èn a de fu si taki den abi furu koni. Leki bakapisi fu dati, moi zaal bow di wi e gebroiki fu anbegi Yehovah.

Sma e aksi mi son leisi: „San na den moro prenspari fasi di wan sma musu abi fu man yepi bow Kownukondre zaal?” San mi sabi, na taki wan sma musu lobi Yehovah nanga en Manpikin èn sosrefi ala den Kresten brada nanga sisa (1 Kor. 16:14). A di fu tu sani, na taki a musu tan horibaka gi na organisâsi. Te sani no e waka soleki fa a wani, dan a sma disi o tan teki a tiri fu na organisâsi. Fu di a sma disi abi frutrow na ini na organisâsi, meki a o tan yepi nanga a bow-wroko di o de fu du.

Mi de Yehovah tangi

Aladi mi papa dede na ini 1985, mi noiti sa frigiti a rai di a ben gi mi fu tan wroko tranga na ini na organisâsi fu Yehovah. A no de fu taki dati a tan wroko tranga, neleki den trawan di kisi wan wroko na hemel leki memre fu Yehovah en organisâsi (Openb. 14:13). Now mi mama abi 97 yari. Fu di brudu ben naki en, meki a no man taki so bun moro leki fosi, ma a sabi en Bijbel bun ete. A e kari Bijbeltekst na ini den brifi di a e skrifi gi wi èn a e gi wi deki-ati fu tan dini Yehovah nanga wi heri ati. Wi leki pikin de nanga tangi trutru taki wi abi papa nanga mama di lobi wi so!

Mi de nanga tangi sosrefi taki Yehovah gi mi Shirley, mi wefi, di tan horibaka gi mi. Noiti a o frigiti a rai disi di en mama gi en: „Vern o abi furu fu du na ini a tru anbegi, èn yu o abi fu leri fu prati en nanga trawan.” Di wi trow 49 yari pasa, wi bosroiti taki wi ben o tan dini Yehovah makandra teleki wi kon owru, èn efu wi ala tu ben o pasa a kaba fu a sistema disi libilibi, dan mi nanga en o kon yongu baka èn wi o tan dini Gado fu têgo. Iya, wi ben „abi furu fu du na ini a wroko fu Masra” (1 Kor. 15:58). Yehovah fu en sei sorgu bun gi wi trutru èn a sorgu taki wi no ben mankeri nowan enkri bun sani.

[Futuwortu]

[Prenki na tapu bladzijde 31]

„Leki osofamiri, wi bosroiti fu no feti baka grontapu sani, ma fu gi wisrefi na ini a diniwroko fu Yehovah”