Tan suku „En regtfardikifasi” fosi
Tan suku „En regtfardikifasi” fosi
„Fu dati ede, tan suku a kownukondre nanga En regtfardikifasi fosi, dan unu sa kisi ala den tra sani tu.”—MAT. 6:33.
1, 2. San na a regtfardikifasi fu Gado, èn nanga sortu sani a abi fu du?
’FU DATI EDE, tan suku a kownukondre fosi’ (Mat. 6:33). Na a rai disi Yesus Krestes ben gi den disipel fu en na ini a Bergitaki fu en. Yehovah Kotoigi na ini a ten disi, sabi a rai disi heri bun. Na ini ala afersi fu wi libi, wi e du muiti fu sori taki wi lobi a Kownukondre tiri dati èn taki wi wani tan horibaka en. Ma wi musu hori a di fu tu pisi fu a rai disi na prakseri tu, èn dati na taki wi musu suku „En regtfardikifasi”. San na a regtfardikifasi fu Gado, èn san a wani taki fu suku en fosi?
2 A regtfardikifasi fu Gado wani taki dati a e du san reti, èn a e du dati na wan fasi di e kruderi nanga den markitiki fu en. Leki Mekiman, Yehovah abi a reti fu bosroiti san bun èn san no bun, san reti èn san no reti (Openb. 4:11). Ma a regtfardikifasi noso a retidu fu Gado, no wani taki dati a no e hori den firi fu sma na prakseri, èn a no wani taki tu dati a e poti wan lo wet gi den. Na presi fu dati, a retidu fu Yehovah e sori sortu Gado a de, èn a e kruderi nanga a lobi fu en, a koni fu en, nanga a makti fu en. Sobun, a retidu fu Gado abi fu du nanga a wani fu en èn nanga den sani di a abi na prakseri. A abi fu du tu nanga san a e fruwakti fu den sma di wani dini en.
3. (a) San a wani taki fu suku Gado en regtfardikifasi fosi? (b) Fu san ede wi e hori wisrefi na den regtfardiki markitiki fu Yehovah?
3 San a wani taki fu suku Gado en regtfardikifasi fosi? Fu taki en leti, a wani taki dati wi musu du a wani fu Gado so taki a feni wi bun. Te wi e suku en regtfardikifasi, dan dati wani taki dati wi no e libi soleki fa wisrefi wani, ma wi e du muiti fu hori wisrefi na den markitiki fu en di bun dorodoro. (Leisi Romesma 12:2.) Iya, wi musu de regtfardiki efu wi wani abi wan bun matifasi nanga Yehovah. Disi no wani taki dati wi e gi yesi na den wet fu en soso fu di wi frede fu kisi strafu. Ma fu di wi lobi Gado meki wi e du muiti fu plisi en. Dati meki wi no e du sani soleki fa wisrefi wani, ma wi e hori wisrefi na den markitiki fu en. Wi sabi taki disi na a yoisti sani fu du, fu di na fu dati ede a meki wi. Neleki Yesus Krestes, a Kownu fu Gado Kownukondre, wi musu lobi retidu.—Hebr. 1:8, 9.
4. Fu san ede a de so prenspari fu suku Gado en regtfardikifasi?
4 O prenspari a de fu suku Yehovah en regtfardikifasi? Luku a tori disi: A tesi di Adam nanga Eva ben kisi na ini Eden, ben musu sori efu den ben o si Yehovah leki a sma di abi a reti fu poti markitiki gi den (Gen. 2:17; 3:5). Fu di den no du dati, meki wi leki bakapikin fu den e nyan pina èn wi e dede (Rom. 5:12). Na a tra sei Gado Wortu e taki: „A sma di e meki muiti fu du san reti èn di lobi fu du bun, o kisi libi. Trawan o du gi en san reti èn a o kisi glori tu” (Odo 21:21). Iya, te wi e suku Gado en regtfardikifasi fosi, dan wi o abi wan bun matifasi nanga Yehovah, èn te fu kaba dati o meki taki wi kisi frulusu.—Rom. 3:23, 24.
No denki taki yu bun moro trawan
5. San wi no musu du?
5 Di na apostel Paulus ben skrifi den Kresten na ini Rome, dan a taki fu wan sani di wi no musu du efu wi wani suku Gado en regtfardikifasi fosi. Luku san Paulus ben taki fu den Dyu: „Mi kan taki fu den taki den de fayafaya fu dini Gado, ma den no abi soifri sabi. Den no ben sabi a regtfardikifasi fu Gado, ma den ben suku den eigi regtfardikifasi; dati meki den no ben wani hori densrefi na a regtfardikifasi fu Gado” (Rom. 10:2, 3). Soleki fa Paulus ben taki, dan den anbegiman dati no ben frustan san a regtfardikifasi fu Gado wani taki, fu di den ben e pruberi nomo fu suku den eigi regtfardikifasi.
6. Sortu denki wi no musu abi, èn fu san ede?
6 Wan fasi fa wi ben kan fadon na ini a trapu disi, na te wi e si a diniwroko di wi e du gi Gado leki wan strei, fu di wi e teki wisrefi gersi nanga trawan. A sani disi kan meki taki wi e denki taki wi koni noso bun moro trawan. Ma fu taki en leti, efu wi ben o denki so, dan wi ben o frigiti a regtfardikifasi fu Yehovah (Gal. 6:3, 4). A yoisti reide fu san ede wi e du san reti, na fu di wi lobi Yehovah. Iniwan sani di wi e du fu sori taki wi bun moro trawan, ben kan sori taki wi no lobi Yehovah trutru.—Leisi Lukas 16:15.
7. Fa Yesus sori taki a no bun te wan sma e denki taki a bun moro trawan?
7 Yesus ben e broko en ede nanga „den sma di ben denki fu densrefi taki den ben de regtfardiki èn di ben si tra sma leki noti”. Yesus fruteri wan agersitori di e sori taki a no bun te wan sma e denki taki a bun moro trawan. A ben taki: „Tu man ben go na a tempel fu begi; a wan ben de wan Fariseiman èn a trawan ben de wan sma di ben teki belasting moni gi lanti. A Fariseiman go tanapu, dan a bigin begi na ensrefi, taki: ’Ke, mi Gado, mi e taigi yu tangi taki mi no de leki den tra sma, den sma di e bedrigi trawan, den sma di no de regtfardiki, den sutaman, noso srefi leki a man disi di e teki belasting moni gi lanti. Tu tron wan wiki mi e faste, mi e gi wan di fu tin pisi fu ala san mi e kisi.’ Ma a sma di e teki belasting moni gi lanti ben e tanapu farawe èn a no ben wani opo en ai srefi luku go na hemel, ma a ben tan naki nanga en anu na tapu en borsu èn a ben taki: ’Ke, mi Gado, abi sari-ati nanga mi di de wan sondari.’” Yesus ben taki moro fara: „Mi e taigi unu: di a man disi gowe na en oso, a ben de moro regtfardiki leki a tra man; bika den o saka a sma di e hei ensrefi, ma den o hei a sma di e saka ensrefi.”—Luk. 18:9-14.
No denki tu taki „yu na a moro bun sma di de”
8, 9. San a wani taki te wan sma e denki taki en „na a moro bun sma di de”, èn san kan de a bakapisi?
8 Preikiman 7:16 e taki fu ete wan sani di wi no musu du. A tekst e taki: „No denki taki yu na a moro bun sma di de. No denki taki yu sabi ala sani. Fu san ede yu musu pori yu libi?” Soleki fa vers 20 e sori, dan a Bijbel skrifiman e taigi wi fu san ede wi no musu abi a denki dati. A e taki: „Nowan reti-ati sma no de na grontapu, di e du bun ala ten, èn di no e sondu.” A sma di e denki taki en „na a moro bun sma di de”, e bosroiti gi ensrefi san reti èn a e krutu trawan na a fasi fa a e si sani. Fu taki en leti, a sma disi no sabi taki te a e du disi, a e sori taki den markitiki fu en bun moro den di fu Gado. A sani disi e meki taki Gado no feni en bun.
9 Wan sma di e denki taki en „na a moro bun sma di de” ben kan bigin krutu a fasi fa Yehovah e handri na ini son afersi. Ma wi musu hori na prakseri taki te wi e krutu den bosroiti di Yehovah teki, dan fu taki en leti wi e du leki wi regtfardiki moro Yehovah. A de neleki wi e krutu Yehovah na a fasi fa wi e si sani te a abi fu du nanga san bun èn san no bun. A no wi abi a reti fu bosroiti san bun, ma na Yehovah abi a reti dati!—Rom. 14:10.
10. Soleki fa a tori fu Yob e sori, dan san kan meki taki wi krutu Gado?
10 Aladi nowan fu wi wani krutu Gado fu espresi, toku dati kan pasa fu di wi na sondusma. Te wi no e agri nanga wan sani noso te problema e miti wi, dan makriki wi kan krutu Gado. Srefi a reti-ati man Yob, ben meki a fowtu dati. Na a bigin, Bijbel e taki dati Yob „ben de wan bun man di lobi retidu, a ben abi bigi lespeki gi Gado, èn a ben e wai pasi gi ogri” (Yob 1:1). Ma bakaten, wan lo rampu miti Yob, èn a no ben feni dati bun. Dati meki a ben feni taki „na en ben abi leti na presi fu Gado” (Yob 32:1, 2). Yob ben musu kenki a denki fu en. Sobun, a no musu fruwondru wi, efu son leisi wi e kon de na ini wan srefi sortu situwâsi. Efu dati pasa, dan san kan yepi wi fu kenki a denki fu wi?
A no ala ten wi sabi ala sani
11, 12. (a) Te wi no e agri nanga wan sani di pasa, dan san wi musu hori na prakseri? (b) Fu san ede son sma ben kan feni taki na agersitori fu den wrokoman na ini a droifidyari, e sori fa sma no e handri bun nanga trawan?
11 A fosi sani di wi musu hori na prakseri, na taki a no ala ten wi sabi ala sani. Na so a ben de nanga Yob. A no ben sabi taki den engel fu Gado ben kon makandra na hemel, èn taki Satan ben lei gi en (Yob 1:7-12; 2:1-6). Yob no ben sabi taki na Satan ben meki a kisi problema. Fu taki en leti, wi no sabi seiker efu Yob ben sabi suma na Satan trutru! Dati meki a ben abi a fowtu denki taki na Gado ben meki a kisi problema. Iya, a makriki fu kisi wan fowtu denki fu sani te wi no sabi ala sani.
12 Luku fu eksempre na agersitori fu Yesus, di e taki fu den wrokoman na ini a droifidyari. (Leisi Mateyus 20:8-16.) Na ini na agersitori disi Yesus e taki fu wan masra fu wan oso, di e pai ala den wrokoman fu en a srefi moni, awansi den ben wroko heri dei noso wán yuru nomo. Fa yu feni a sani dati? Yu feni dati bun? Kande yu e firi gi den wrokoman di ben e wroko heri dei na ini a faya son. Kande yu feni taki den musu kisi moro moni! Fu di yu e denki so, meki yu feni kande taki a masra fu na oso no abi lobi èn taki a no e handri bun nanga sma. Kande yu feni srefi taki den sani di a e taigi den wrokoman di ben e krutukrutu, e sori taki a no e broko en ede nanga den wrokoman fu en. Ma wi sabi ala sani finifini?
13. Na sortu tra fasi wi kan si na agersitori fu den wrokoman na ini a droifidyari?
13 Meki wi luku na agersitori disi na wan tra fasi. A no de fu taki dati a masra fu na oso na ini na agersitori, ben sabi taki ala den man disi ben musu sorgu gi den osofamiri. Na ini a ten fu Yesus, sma di ben e wroko na ini gron, ben e kisi pai ibri dei. Den osofamiri fu den ben abi a moni dati fanowdu ibri dei. Now di yu sabi disi, dan prakseri a situwâsi fu den wrokoman di a masra fu na oso ben feni moro lati a dei dati, so taki den ben wroko wán yuru nomo. Kande den no ben o man sorgu gi den osofamiri nanga a moni di den ben o meki te den wroko wán yuru nomo. Ma toku den ben de klariklari fu wroko èn den ben wakti heri dei fu feni wroko (Mat. 20:1-7). Den no ben man yepi taki den no ben feni wroko gi wan heri dei. Bijbel no e sori taki na fu espresi den no ben wani wroko. Fa yu ben o feni en efu yu ben musu wakti heri dei fu feni wroko, aladi yu sabi taki yu osofamiri abi a moni fanowdu di yu ben o meki a dei dati? A no de fu taki dati yu ben o breiti fu feni wan wroko èn yu ben o fruwondru trutru te yu ben o kisi nofo moni fu sorgu gi yu osofamiri!
14. Sortu prenspari sani wi e leri fu na agersitori fu a droifidyari?
14 Meki wi go luku baka fa a masra fu na oso ben handri. A no de so taki a no pai den wrokoman nofo moni. Na presi fu dati, a ben yepi ala den wrokoman fu di a ben sabi taki den alamala ben abi moni fanowdu fu sorgu gi den osofamiri. Fu di wrokoman ben lai, meki a masra fu na oso ben kan teki dati leki wan okasi fu pai den wrokoman pikinso moni nomo. Ma a no du dati. Ala den wrokoman fu en ben go na oso nanga nofo moni fu sorgu gi den osofamiri. Te wi e hori den sani disi na prakseri, dan kande wi sa denki tra fasi fu a masra fu na oso. A bosroiti di a teki e sori taki a ben abi lobi èn a no de so taki a no ben e broko en ede nanga den wrokoman fu en. San wi kan leri fu a tori disi? Wi e leri taki te wi sabi wan tu sani nomo fu wan tori, dan wi kan kisi wan fowtu denki fu sani. Iya, na agersitori disi e sori krin taki Gado e du san reti ala ten, èn a no e du sani soleki fa libisma e denki.
Kande wi abi wan fowtu denki fu sani
15. Fu san ede wi ben kan abi wan fowtu denki fu sani?
15 A di fu tu sani di wi musu hori na prakseri te wi no e agri nanga wan sani di pasa, na taki wi ben kan abi wan fowtu denki fu sani. Wi kan abi wan fowtu denki fu sani fu di wi na sondusma, fu di wi e krutu trawan sondro fu sabi den, èn fu di wi kweki na wan tra fasi. Wi kan abi wan fowtu denki fu sani tu, fu di wi no sabi soifri fu san ede wan sma du wan sani, èn wi no sabi san de na ini en ati. Ma Yehovah nanga Yesus no abi den sortu swakifasi dati.—Odo 24:12; Mat. 9:4; Luk. 5:22.
16, 17. San ben kan de a reide fu san ede Yehovah no ben de nomonomo fu krutu David nanga Batseiba na a fasi fa a wet fu en ben taki?
16 Meki wi luku a tori di e taki fu David di ben du sutadu nanga Batseiba (2 Sam. 11:2-5). Soleki fa a Wet di Gado ben gi Moses e sori, dan den ben musu kisi dedestrafu (Lef. 20:10; Deut. 22:22). Aladi Yehovah no strafu den, toku a no ben de nomonomo fu du san en eigi wet ben taki. A de so taki Yehovah no ben handri na wan reti fasi? A de so taki A ben sori taki a lobi David moro tra sma èn taki a no ben hori ensrefi na en eigi regtfardiki markitiki? Na dati son sma di e leisi Bijbel, feni.
17 Ma a wet disi di e sori taki sutadu no bun, ben komoto fu Yehovah èn a gi a wet dati na sondu krutuman di no sabi san de na ini sma ati. Awansi den no ben sabi ala sani, toku a wet dati ben yepi den fu krutu sma na wan reti fasi. Ma Yehovah man si sma ati (Gen. 18:25; 1 Kron. 29:17). Dati meki wi no musu denki taki Yehovah ben abi wan wet fanowdu di a ben meki gi sondu krutuman, fu man krutu sani na wan reti fasi. Efu dati ben de so, dan a ben o de neleki te sma e dwengi wan trawan di e si bun, fu weri wan bril di meki gi sma di no man si bun. Yehovah ben sabi san de na ini na ati fu David nanga Batseiba, èn a ben si taki den ben abi trutru berow. Fu di a ben hori a sani dati na prakseri, meki a sori sari-ati gi den, èn a krutu den na wan lobi-ati fasi.
Tan suku a regtfardikifasi fu Yehovah
18, 19. San o yepi wi fu no krutu Yehovah na a fasi fa wi e si sani te a abi fu du nanga retidu?
18 Kande wi e leisi wan pisi na ini Bijbel noso kande wi e ondrofeni wan sani, èn wi e feni taki Yehovah no handri bun. Efu dati de so, dan noiti wi musu krutu Yehovah na a fasi fa wi e si sani te a abi fu du nanga retidu. Hori na prakseri taki a no ala ten wi sabi ala sani èn taki wi ben kan abi wan fowtu denki fu sani. Noiti no frigiti taki „te wan sma abi bigi atibron, dan a no sa du sani di regtfardiki na ini Gado ai” (Yak. 1:19, 20). Na so wi ati noiti no o ’bron nanga Yehovah’.—Odo 19:3.
19 Neleki Yesus, wi musu agri ala ten taki Yehovah wawan abi a reti fu bosroiti san reti èn san bun (Mark. 10:17, 18). Du muiti fu kisi „soifri sabi” fu den markitiki fu en (Rom. 10:2; 2 Tim. 3:7). Te wi e teki den rai disi èn te wi e libi soleki fa Yehovah wani, dan wi e sori taki wi e suku „En regtfardikifasi” fosi.—Mat. 6:33.
Yu e memre disi ete?
• Fu san ede a de prenspari fu suku Yehovah en regtfardikifasi?
• San na tu denki di wi no musu abi?
• Fa wi kan suku Gado en regtfardikifasi fosi?
[Aksi fu a tori disi]
[Prenki na tapu bladzijde 9]
San wi e leri fu na agersitori fu Yesus di e taki fu den tu man di ben e begi na ini a tempel?
[Prenki na tapu bladzijde 10]
Yu feni en bun taki a masra fu na oso ben pai den wrokoman fu a lasti yuru, a srefi moni di a ben pai den wrokoman di wroko heri dei?