Yepi yonguwan fu kon sabi na organisâsi fu Yehovah moro bun

PIKIN-NENGRE lobi fu leri sani. Prakseri sortu aksi den pikin-nengre fu Israel di ben de na ini Egepte, ben poti na a neti fu a fosi Paskafesa. Kande den ben aksi: ’Fu san ede a pikin skapu ben musu dede?’ ’Fu san ede papa e poti brudu na a doropostu?’ ’Pe wi e go?’ Yehovah ben lobi den sortu aksi dati. Wi kan si dati te wi e luku san a ben taigi den papa fu Israel. Yehovah ben taigi den fu a Paskafesa di ben musu hori: „Te un manpikin aksi unu: ’Fu san ede unu e hori a fesa disi?’, dan un musu taigi den: ’Wi e srakti a Paska-ofrandi gi Yehovah, fu di a ben pasa den oso fu den Israelsma di den ben de na ini Egepte. A ben tyari rampu kon na tapu den Egeptesma, ma a ben kibri den osofamiri fu wi’” (Ex. 12:24-27). Bakaten, Yehovah ben memre den papa nanga mama fu Israel taki den musu piki den aksi di den pikin fu den ben abi fu „den wet, nanga den komando” di Yehovah ben gi den.—Deut. 6:20-25.

 A de krin fu si taki Yehovah ben wani taki pikin kisi bun piki tapu den aksi di den ben abi fu a tru anbegi. Den aksi dati ben o gi den deki-ati fu lobi Yehovah leki den Gado nanga Frulusuman. Na ini a ten disi, Yehovah wani a srefi gi den yonguwan fu wi. Wan fasi fa papa nanga mama kan meki taki den pikin kon lobi Gado nanga en pipel nanga den heri ati, na te den e yepi den fu kon sabi na organisâsi fu Yehovah moro bun. Den musu yepi den tu fu kon frustan sortu wini den kan kisi fu den seti fu na organisâsi. Fu dati ede, meki wi luku na sortu fasi wi kan yepi den yonguwan fu wi fu kon sabi na organisâsi fu Gado moro bun.

A gemeente pe den de

Yonguwan musu kon sabi a gemeente moro bun pe unu e go leki osofamiri. Fu man yepi den pikin fu unu, a ben o bun te unu leki papa nanga mama e tyari den go na den Kresten konmakandra. Na so yu e teki na eksempre fu den Israelsma di ben e gi yesi na a komando disi fu Yehovah: „Meki ala sma kon makandra, iya, ala mansma, ala umasma, ala pikin. . . . Meki den arki èn meki den leri ala den wet disi, so taki den kan abi frede gi Yehovah un Gado, èn so taki den kan du ala san skrifi na ini den wet disi. Den manpikin fu den di no sabi den wet disi, musu arki èn den musu leri fu abi frede gi Yehovah un Gado.”—Deut. 31:12, 13.

Pikin kan bigin leri sani fu Yehovah Wortu te den de yonguyongu ete. Na apostel Paulus ben taki fu Timoteyus: „Yu ben sabi den santa buku kaba sensi di yu ben de wan beibi” (2 Tim. 3:15). Srefi yonguyongu pikin kan bigin frustan a leri di wi e kisi na den konmakandra di e hori na a Kownukondre zaal, èn den kan kon sabi den Kownukondre  singi moro bun. Na den konmakandra den e leri fu abi lespeki gi den sani di skrifi na ini Bijbel èn fa fu handri na wan lespeki fasi nanga Bijbel publikâsi. Boiti dati, na den konmakandra fu wi den o si taki sma drape abi wan fasi di den tru bakaman fu Krestes abi, èn dati na trutru lobi. Yesus ben taki: „Mi e gi unu wan nyun komando, taki un musu lobi makandra; neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra” (Yoh. 13:34, 35). A trutru lobi nanga a korostu firi di den sma na ini a Kownukondre zaal abi, o naki na ati fu den pikin èn a o yepi den fu si den Kresten konmakandra leki wan tumusi prenspari sani na ini den libi.

Te yu abi a gwenti fu doro fruku na a Kownukondre zaal èn te yu e tan pikinso baka a konmakandra, dan yu pikin o abi na okasi fu meki mati. Na presi taki yu libi den pikin meki den bemui soso nanga yonguwan, a ben o bun fu meki den leri sabi tra brada nanga sisa, awansi na yonguwan noso owruwan. Te den yonguwan e kon leri sabi owruwan, dan den o si taki den owruwan disi ondrofeni furu moi sani èn taki den abi furu koni. Sakaria fu owruten ben „leri Usia fu abi lespeki gi a tru Gado” èn a ben de wan bun eksempre gi a yongu Usia, di ben de kownu fu Yuda. Na so a de tu taki den sma na ini a ten disi di e gi yesi na Yehovah furu yari langa kaba, na bun eksempre gi den yonguwan (2 Kron. 26:1, 4, 5). Te yu de na a Kownukondre zaal yu kan sori yu pikin tu fu san ede wan bibliotheek de, sori en fu san ede sani skrifi na tapu a bord pe sani e meki bekènti, èn yu kan sori den tra sani tu.

Na organisâsi na heri grontapu

Pikin musu kon frustan taki a gemeente pe den de na wán fu den moro leki 100.000 gemeente fu na organisâsi di de na heri grontapu. Fruteri den fa na organisâsi seti, fa a e wroko, èn fa pikin kan horibaka gi a wroko fu en. Sori den fu san ede yu lobi fu go na den kring konmakandra nanga den distrikt kongres, èn fu san ede yu lobi te a kring-opziener e kon luku a gemeente.—Luku a faki  „Tori di unu kan luku na a Osofamiri Anbegi”, na tapu bladzijde 28.

Efu a kan, dan kari kring-opziener, zendeling, sma fu Bethel, èn sosrefi tra furuten dinari fu kon nyan na yu oso. No denki taki den no abi ten gi yonguwan. Den furuten dinari disi e du furu muiti fu teki na eksempre fu Yesus, di ala ten ben kari pikin kon na en èn a ben e taki nanga den (Mark. 10:13-16). Te den pikin fu yu o yere den ondrofenitori fu den dinari fu Yehovah, èn te den o si o furu prisiri den abi na ini a santa diniwroko, dan den o wani poti en leki marki tu fu go na ini a furuten diniwroko.

Sortu tra sani unu leki osofamiri kan du fu yepi den pikin fu unu fu kon sabi na organisâsi fu Yehovah moro bun? Luku wan tu sani di yu kan du: Leisi a buku Jehovah’s Getuigen—Verkondigers van Gods koninkrijk. Taki fu den futuboi fu Yehovah di ben de fayafaya, di ben abi sakafasi, èn di ben tai hori na en. Sori den fa Yehovah gebroiki den futuboi disi fu panya a bun nyunsu na heri grontapu. Gebroiki video di na organisâsi fu Yehovah tyari kon na doro, fu leri den prenspari sani fu fositen èn fu a ten disi. Efu yu man, dan go luku a bijkantoro nanga Bethel fu yu kondre noso den wan fu tra kondre. Te yu e tyari yu pikin go na den sortu presi disi, dan den o frustan taki a getrow èn koni srafu e tiri na organisâsi fu Yehovah na grontapu. Den o kon frustan tu fa na organisâsi e gi den brada nanga sisa na heri grontapu yeye nyanyan, neleki fa dati ben e pasa na ini a fosi yarihondro.—Mat. 24:45-47; Tori. 15:22-31.

Leri yu pikin sani di den man frustan

Te yu e gi yu pikin leri, dan hori na prakseri fa Yesus ben gi den apostel fu en leri. Wan  leisi, a ben taigi den: „Furu sani de di mi musu taigi unu ete, ma unu no man tyari den now” (Yoh. 16:12). Yesus no ben leri den disipel fu en wan lo sani di den no ben man frustan ete. Na presi fu dati, a gi den leri safrisafri fu prenspari tru tori, so taki den ben o man frustan den sani dati bun. Yu no musu leri yu pikin sani tu di den no man frustan ete. Te yu e yepi den safrisafri fu kon sabi na organisâsi fu Yehovah moro bun, dan den o wani sabi moro èn den o lobi fu leri sani fu a Kresten gemeente. O moro den pikin fu yu e kon frustan sani, o moro sani yu o man leri den.

A Kresten gemeente na wan tumusi prenspari seti di e yepi wi fu kon abi wan tranga bribi. Boiti dati, yonguwan di e horibaka fayafaya gi a gemeente, man kakafutu moro bun gi a krakti fu a grontapu fu Satan (Rom. 12:2). Wi de seiker taki yu sa prisiri fu yepi yu pikin fu kon sabi na organisâsi fu Yehovah moro bun. Meki a de so taki a blesi den so taki den tai hori na a gemeente èn na a lobi-ati Gado di wi e dini.

[Faki/​Prenki na tapu bladzijde 28]

 Tori di yu kan luku na a Osofamiri Anbegi

Disi na wan tu tori di yu kan luku na a Osofamiri Anbegi, èn di abi fu du nanga na organisâsi fu Yehovah.

▪ Taki fu a fasi fa a gemeente ben seti. O ten a seti èn fa a seti? Sortu difrenti Kownukondre zaal a gemeente ben gebroiki? Te yu o taki fu a tori disi, dan a ben o bun fu kari wan sma kon na yu oso di de wan memre fu a gemeente langa ten kaba, so taki a kan gi piki tapu den aksi fu yu pikin.

▪ Fruteri den pikin fu san ede den difrenti gemeente konmakandra nanga bigi konmakandra e hori, èn fa den kan kisi wini fu den konmakandra dati.

▪ Taki fu san ede na organisâsi fu Yehovah seti den difrenti skoro. Fruteri ondrofenitori di e sori sortu bun bakapisi den sma di ben klari den skoro disi, ben abi.

▪ Yepi yonguwan fu kon si fu san ede a prenspari fu tron preikiman di e preiki a bun nyunsu doronomo. Sori den fa den kan horibaka gi a wroko, so taki dati kan teri tu na ini a raportu fu heri grontapu di de na ini a Jaarboek van Jehovah’s Getuigen.

▪ Poti prakseri na den difrenti sortu fasi fa yonguwan na ini na organisâsi fu Yehovah kan du furuten diniwroko. Yu kan leisi moro fu dati na ini kapitel 10 fu a buku Wi orga fu du a wani fu Yehovah.

▪ Yepi yonguwan fu frustan fu san ede den musu hori densrefi na spesrutu markitiki na ini a gemeente. Fruteri den fu san ede den no musu du nowan enkri sani di e sori taki den e weigri fu teki a tiri fu Yehovah en organisâsi. Sori den fa den kan yepi taki sani e waka na wan orga fasi na ini a gemeente te den e teki a rai fu den owruman.

[Prenki]

Den pikin fu yu o kisi wini te den e meki mati nanga sma di e dini Gado bun langa kaba

[Prenki na tapu bladzijde 26]

Neleki fa a ben de na ini owruten Israel, na so papa nanga mama na ini a ten disi e du furu muiti fu gi bun piki te den pikin e aksi den sani di abi fu du nanga Yehovah en organisâsi