Yu fosi e bigin sori lespeki gi yu kresten brada nanga sisa?

„Neleki fa brada lobi makandra, na so un musu abi dipi firi gi makandra. Unu fosi musu bigin sori trawan lespeki.”—ROM. 12:10.

1, 2. (a) Sortu rai Paulus e gi na ini a brifi di a ben skrifi gi den Romesma? (b) Na sortu aksi wi sa poti prakseri?

NA INI a brifi di na apostel Paulus ben skrifi gi den Romesma, a ben sori krin o prenspari a de taki wi leki Kresten e sori lobi na ini a gemeente. A e memre wi taki wi musu sori lobi „sondro fu hoigri”. A e taki tu dati wi musu lobi makandra „neleki fa brada lobi makandra”, èn taki wi musu abi „dipi firi gi makandra”.—Rom. 12:9, 10a.

² A no de fu taki dati te wi lobi trawan neleki fa brada lobi makandra, dan dati a no wan firi nomo di wi abi na ini wi ati. Wi musu du sani tu fu sori trawan taki wi lobi den. Fu taki en leti, efu wi no e sori trawan taki wi lobi den, dan den no o sabi dati. Fu dati ede, Paulus e gi wi a rai disi: „Unu fosi musu bigin sori trawan lespeki” (Rom. 12:10b). San a wani taki fu sori lespeki gi trawan? Fu san ede a de prenspari taki wi fosi e bigin sori lespeki gi wi Kresten brada nanga sisa? Fa wi kan du dati?

San a wani taki fu sori lespeki gi trawan?

3. San a wortu di vertaal nanga „lespeki” wani taki na ini Hebrewtongo nanga Grikitongo?

³ A Hebrew wortu di vertaal nanga „lespeki”, trutru wani taki dati wan sma e si wan trawan leki wan prenspari sma. A Griki wortu di vertaal nanga „lespeki” na ini Bijbel, e sori taki wan sma abi warderi gi wan trawan èn taki a lobi a sma dati srefisrefi (Luk. 14:10). Iya, wi e sori lespeki gi sma fu di wi lobi den èn fu di wi e warderi den.

4, 5. San a wani taki fu sori lespeki gi trawan? Gi wan eksempre.

⁴ San a wani taki fu sori lespeki gi trawan? Te wi e sori lespeki gi wi Kresten brada nanga sisa, dan dati no wani taki nomo dati wi e du spesrutu sani fu sori den taki wi e lespeki den. A tru taki a fasi fa wi e handri nanga trawan kan sori efu wi abi lespeki gi den. Ma a sani di e sori efu wi abi trutru lespeki gi wi Kresten brada nanga sisa, na a fasi fa wi e denki fu den.

⁵ Fa wan Kresten kan sori trutru lespeki gi den brada nanga sisa fu en efu a no e si den leki sma di warti fu kisi lespeki? (3 Yoh. 9, 10) Neleki fa wan bromki o tan gro bun te a prani na ini bun gron, na so wi o tan sori trutru lespeki gi trawan te wi e lespeki den nanga wi heri ati. Te wan sma no e lespeki trawan nanga en heri ati, dan a no o teki langa fosi a kon na krin fa a e denki trutru fu den sma disi (Tori. 5:1-5). Dati meki, fosi Paulus ben gi den Kresten a rai fu sori lespeki gi makandra, a ben taki krin: „Lobi trawan sondro fu hoigri” (Rom. 12:9). A no de fu taki dati wi kan frustan fu san ede a ben du dati.—Leisi 1 Petrus 1:22.

Sori lespeki gi den wan di meki „leki Gado”

6, 7. Fu san ede wi musu abi lespeki gi trawan?

⁶ Soleki fa wi si, dan wi musu lespeki sma nanga wi heri ati, fu man handri na wan lespeki fasi nanga den. Dati meki noiti wi musu frigiti fu san ede wi musu lespeki ala wi Kresten brada nanga sisa, soleki fa Bijbel e  leri wi. Fu dati ede, wi o luku tu fu den reide dati.

⁷ Tra fasi leki meti, libisma meki „leki Gado” (Yak. 3:9). Fu dati ede wi abi den fasi fu Gado, èn wan tu fu den na lobi, koni, nanga retidu. Luku ete wan sani di wi kisi fu wi Mekiman. A psalm skrifiman e taki: „Yehovah . . . te na ini hemel den e taki fu a glori fu yu ibri leisi baka. . . . Boiti dati, yu meki libisma pikinso moro lagi leki den engel, dan yu gi den furu glori nanga grani” (Ps. 8:1, 4, 5; 104:1). * A fasi fa Gado gi libisma grani, na taki a meki den na so wan fasi taki den abi lespeki gi densrefi èn taki den e si densrefi leki warti sma. Sobun, te wi e sori lespeki gi wan tra sma, dan fu taki en leti wi e sori lespeki gi Yehovah, fu di na En meki libisma na so wan fasi. Dati meki, efu wi abi bun reide fu sori lespeki gi tra sma, dan a no de fu taki dati wi abi moro reide fu sori lespeki gi wi Kresten brada nanga sisa!—Yoh. 3:16; Gal. 6:10.

Wi na memre fu wán osofamiri

8, 9. Soleki fa Paulus e sori, dan sortu reide wi abi fu lespeki wi Kresten brada nanga sisa?

⁸ Paulus ben taki fu ete wan reide fu san ede wi musu sori lespeki gi makandra. Leti bifo a ben gi den Kresten a rai fu sori lespeki gi makandra, a ben taki: „Neleki fa brada lobi makandra, na so un musu abi dipi firi gi makandra.” Den Griki wortu di vertaal nanga „dipi firi” abi fu du nanga a trutru lobi di den memre fu wan osofamiri abi gi makandra, èn a lobi disi e meki taki den de na ini wánfasi. Sobun, den wortu dati di Paulus gebroiki, e sori krin taki neleki fa a de na ini wan osofamiri, na so den memre fu a gemeente musu abi trutru lobi gi makandra, so taki den kan de na ini wánfasi (Rom. 12:5). Boiti dati, hori na prakseri taki Paulus ben skrifi den wortu dati gi den salfu Kresten di ben tron pikin fu a srefi Tata, Yehovah. Sobun, a de krin fu si taki den Kresten disi trutru ben de wan osofamiri di ben de na ini wánfasi. Fu dati ede, salfu Kresten na ini a ten fu Paulus trutru ben abi bun reide fu sori lespeki gi makandra. Na so a de tu nanga den salfuwan na ini a ten disi.

⁹ Fa a de nanga den wan di de fu den „tra skapu”? (Yoh. 10:16) Aladi den no tron pikin fu Gado ete, toku a fiti taki den e kari makandra brada nanga sisa fu di den de na ini wánfasi leki wan Kresten famiri na heri grontapu (1 Petr. 2:17; 5:9). Sobun, efu den wan fu den „tra skapu” e frustan krin san a wani taki fu kari makandra „brada” noso „sisa”, dan den sosrefi abi bun reide fu lespeki den Kresten brada nanga sisa nanga den heri ati.—Leisi 1 Petrus 3:8.

Fu san ede a de so prenspari fu sori lespeki gi trawan?

10, 11. Fu san ede a de so prenspari taki wi e sori lespeki gi trawan?

¹⁰ Fu san ede a de so prenspari fu sori lespeki gi trawan? We, te wi e sori lespeki gi wi Kresten brada nanga sisa, dan wi e yepi fu sorgu taki sani e waka bun na ini a gemeente èn taki a gemeente e tan na ini wánfasi.

¹¹ A no de fu taki dati wi sabi taki a bun matifasi di wi abi nanga Yehovah èn a yepi di wi e kisi fu a santa yeye fu en, na den moro prenspari fasi fa wi leki tru Kresten e kisi krakti (Ps. 36:7; Yoh. 14:26). Na a srefi ten, wi e kisi deki-ati te wi Kresten brada nanga sisa e sori taki den e warderi wi (Odo 25:11). Wi e firi bun te wan sma e taki noso e du wan sani di e sori taki a e lespeki wi. Disi e gi wi moro krakti fu tan waka nanga prisiri na tapu a pasi di e tyari wi go na libi. A no de fu taki dati yu srefi ondrofeni dati.

12. Fa ibriwan fu wi kan yepi fu sorgu taki lobi de na ini a gemeente?

¹² We, fu di Yehovah sabi o prenspari a de taki trawan sori lespeki gi wi, meki a e gi wi deki-ati na ini a Wortu fu en fu „sori trawan  lespeki. [Èn fu] de wan eksempre ini dati gi makandra”. (Rom. 12:10, Nyun Testamenti; leisi Mateyus 7:12.) Ala Kresten di e gi yesi na a tumusi prenspari rai dati, e yepi fu sorgu taki lobi de na mindri wi leki Kresten brada nanga sisa. Fu dati ede, a ben o bun fu aksi wisrefi: ’O ten ben de a lasti leisi di mi taki noso du wan sani fu sori taki mi abi trutru lespeki gi wan brada noso wan sisa na ini a gemeente?’—Rom. 13:8.

Wi alamala musu de gaw fu sori lespeki gi trawan

13. (a) Suma fosi musu bigin sori lespeki gi trawan? (b) San den wortu fu Paulus di skrifi na ini Romesma 1:7 e sori?

¹³ Suma fosi musu bigin sori lespeki gi trawan? Na ini a brifi di Paulus ben skrifi gi den Hebrewsma, a ben taki dati Kresten owruman na „den wan di e teki fesi na un mindri” (Hebr. 13:17). A tru taki owruman e teki fesi na ini furu sani. Ma fu di den na skapuman fu na ipi, meki a no de fu taki dati den fosi musu sori lespeki gi trawan na ini a gemeente, èn sosrefi gi den tra owruman. Fu eksempre, te owruman e kon makandra fu luku san a gemeente abi fanowdu fu man go na fesi, dan den e sori lespeki gi makandra te den e arki bun te iniwan fu den e taki. Wan tra fasi fa den e sori lespeki gi makandra, na taki fosi den e teki wan bosroiti, den e hori na prakseri fa ibriwan fu den e denki fu wan tori èn san den taki fu a tori dati (Tori. 15:6-15). Ma wi musu hori na prakseri taki a brifi di Paulus skrifi gi den Romesma, no ben de gi den owruman wawan, ma a ben de gi a heri gemeente (Rom. 1:7). Sobun, a rai di Paulus gi Kresten taki den fosi musu sori lespeki gi trawan, na gi wi alamala na ini a ten disi.

14. (a) Gi wan agersitori di e sori san na a difrenti te wi e sori lespeki gi trawan èn te wi fosi e bigin sori lespeki. (b) Sortu sani wi musu aksi wisrefi?

¹⁴ Luku ete wan sani di a rai fu Paulus e sori wi. A no ben gi den Kresten na ini Rome deki-ati nomo fu sori lespeki gi trawan, ma a ben taigi den taki den fosi ben musu bigin sori lespeki gi trawan. Fu san ede den tu sani disi e difrenti fu makandra? Luku na eksempre disi: Te wan grupu studenti sabi leisi kaba, dan yu denki taki wan skoromisi ben o gi den deki-ati fu leri leisi? Nôno, dati no ben o de fanowdu moro. Na presi fu dati, a skoromisi ben o wani yepi den studenti fu leisi moro bun. Na so a de tu taki wi leki tru Kresten e sori lobi kaba gi makandra, èn dati e meki taki wi e sori lespeki gi makandra (Yoh. 13:35). Ma neleki fa studenti di man leisi kaba, kan go na fesi fu di den e leri leisi moro  bun, na so wi kan go na fesi tu fu di wi fosi e bigin sori lespeki gi trawan (1 Tes. 4:9, 10). Ibriwan fu wi musu du dati. A bun te wi e aksi wisrefi a sani disi: ’Mi fosi e bigin sori lespeki gi trawan na ini a gemeente?’

Sori lespeki gi „den mofinawan”

15, 16. (a) Te wi e sori lespeki gi trawan, dan suma wi no musu frigiti, èn fu san ede wi no musu frigiti den? (b) San o sori efu wi abi trutru lespeki gi ala wi brada nanga sisa?

¹⁵ Te wi e sori lespeki gi trawan, dan sortu sma na ini a gemeente wi no musu frigiti? Gado Wortu e taki: „A sma di e du bun gi den mofinawan, e leni Yehovah èn A o pai a sma dati baka gi den bun di a du” (Odo 19:17). Fa a gronprakseri disi musu tiri wi te wi fosi e du muiti fu sori lespeki gi trawan?

¹⁶ Yu sa agri taki furu sma de klariklari fu sori lespeki gi trawan di abi wan moro hei posisi leki den. Ma kande den srefi sma disi no e sori lespeki gi den wan di den e si leki sma di lagi moro den. Ma Yehovah no de so. A e taki: „Mi sa gi grani na den sma di e gi mi grani” (1 Sam. 2:30; Ps. 113:5-7). Yehovah e gi grani na ala den sma di e dini en èn di e sori lespeki gi en. A no e frigiti den mofinawan, noso den „potiwan”. (Leisi 1 Samuel 2:8, Da Bijbel na ini Sranantongo; 2 Kron. 16:9.) A no de fu taki dati wi wani teki na eksempre fu Yehovah. Sobun, te wi wani kon sabi efu wi e sori trutru lespeki gi trawan, dan a ben o bun fu aksi wisrefi: ’Fa mi e handri nanga den sma di no abi frantwortu na ini a gemeente?’ (Yoh. 13:14, 15) A piki tapu na aksi dati e sori o furu lespeki wi abi trutru gi trawan.—Leisi Filipisma 2:3, 4.

Wi e sori lespeki gi trawan te wi e meki ten gi den

17. San na wan prenspari fasi fa wi fosi kan bigin sori lespeki gi trawan, èn fu san ede dati de so?

¹⁷ San na wan prenspari fasi fa wi fosi kan bigin sori lespeki gi ala sma na ini a gemeente? Na te wi e meki ten gi trawan. Fu san ede dati de so? Leki Kresten, wi abi bun furu fu du, èn den someni prenspari sani di wi musu du na ini a gemeente e teki furu fu wi ten. Dati meki, ten na wan prenspari sani gi wi. Fu dati ede, wi e frustan tu taki a no bun te wi e dwengi wi brada nanga sisa fu meki furu ten gi wi. Wi e warderi en tu te trawan na ini a gemeente no e fruwakti fu wi taki wi e meki furu ten gi den.

18. Soleki fa a prenki na tapu bladzijde 18 e sori, dan fa wi kan sori taki wi de klariklari fu meki ten gi wi Kresten brada nanga sisa?

¹⁸ Awansi fa a no fa, wi (spesrutu den wan di e dini leki skapuman na ini a gemeente) e frustan tu taki te wi de klariklari fu tapu nanga wan sani di wi e du na a momenti dati, soso fu meki ten gi wi brada nanga sisa, dan wi e sori taki wi e lespeki den. Fa so? Te wi e tapu nanga wan sani di wi e du na a momenti dati, soso fu meki ten gi wi brada noso sisa, dan fu taki en leti wi e taigi den: ’Yu warti so te gi mi taki mi feni en moro prenspari fu meki ten gi yu, leki fu go doro nanga san mi e du’ (Mark. 6:30-34). Ma efu wi no wani tapu nanga wan sani di wi e du na a momenti dati, fu meki ten gi wi brada noso sisa, dan wi ben kan gi den a firi taki den no warti gi wi. A tru taki son leisi wi no man tapu wantewante nanga wan tumusi prenspari sani di wi e du. Ma te wi de klariklari fu meki pikinso ten gi wi brada nanga sisa, noso te wi no wani du dati, dan disi e sori trutru o furu lespeki wi abi gi den.—1 Kor. 10:24.

 Abi a fasti bosroiti fu sori lespeki gi trawan

19. Na sortu tra fasi wi kan sori lespeki gi wi brada nanga sisa, boiti taki wi e meki ten gi den?

¹⁹ Tra prenspari fasi de fa wi kan sori lespeki gi wi brada nanga sisa. Fu eksempre, te wi e meki ten gi den, dan wi musu poti prakseri tu na den. Yehovah e gi wi na eksempre tu te a abi fu du nanga a tori disi. A psalm skrifiman David ben taki: „Den ai fu Yehovah e si den reti-ati sma, èn den yesi fu en e yere te den e bari suku yepi na en” (Ps. 34:15). Wi e du muiti fu teki na eksempre fu Yehovah, fu di wi e luku wi brada nanga sisa te den e taki nanga wi èn wi e arki den bun. Iya, wi e poti ala wi prakseri na den. Wi e du dati spesrutu nanga den wan di e kon suku yepi na wi. Na so wi e sori lespeki gi den.

20. Te a abi fu du nanga a sori di wi musu sori lespeki gi trawan, dan sortu sani wi musu hori na prakseri?

²⁰ Soleki fa wi si kaba, dan wi wani hori bun na prakseri fu san ede wi musu sori trutru lespeki gi wi Kresten brada nanga sisa. Boiti dati, wi e suku okasi fu sori lespeki gi ala sma èn fu no wakti teleki den fosi sori lespeki gi wi. Iya, wi e sori lespeki tu gi den mofinawan. Te wi e du den sani disi, dan wi e yepi fu sorgu taki a lobi nanga a wánfasi na ini a gemeente e kon moro tranga. Fu dati ede, meki wi alamala tan sori lespeki, èn meki wi fosi bigin sori a lespeki disi gi trawan. Yu abi a fasti bosroiti fu du dati?

[Futuwortu]

Yu e memre disi ete?

• San a wani taki fu sori lespeki gi trawan?

• Sortu reide wi abi fu sori lespeki gi wi brada nanga sisa?

• Fu san ede a de prenspari fu sori lespeki gi makandra?

• Na sortu fasi wi kan sori lespeki gi wi brada nanga sisa?

[Aksi fu a tori disi]

[Prenki na tapu bladzijde 18]

Fa wi kan sori lespeki gi wi brada nanga sisa?