Aksi fu leisiman

Yesus ben taigi den sma di ben e arki en: „Un musu de volmaakti, neleki fa un Tata na hemel de volmaakti.” Fa libisma na ini a ten disi kan de „volmaakti”?—Mat. 5:48.

Fu man piki na aksi disi, dan wi musu frustan san den wortu „volmaakti” nanga „volmaaktifasi” wani taki na ini Bijbel. A no ala ten te Bijbel e taki dati wan sani de „volmaakti”, dan a sani dati de sondro fowtu. A no de fu taki dati Yehovah volmaakti dorodoro. Sma noso sani no kan de volmaakti dorodoro. Na ini a Grikitongo nanga a Hebrewtongo fu Bijbel, a wortu di vertaal nanga „volmaakti”, nofo tron wani taki dati wan sani noso wan sma „bun dorodoro”, taki a „lepi”, noso taki „a de sondro fowtu” soleki fa spesrutu markitiki e sori.

Gado ben meki Adam nanga Eva na wan volmaakti fasi, te a abi fu du nanga a fasi fa den ben e libi, a fasi fa den ben e anbegi En, èn a fasi fa den ben meki. Den ben de volmaakti na wan fasi di ben e kruderi nanga den markitiki fu a Mekiman fu den. Fu di den ben trangayesi Gado, meki den no doro den markitiki dati, èn a sani dati meki taki den nanga den bakapikin fu den no ben kan de volmaakti moro. Sobun, na Adam meki taki sondu nanga dede kon na tapu libisma.—Rom. 5:12.

Ma na ini a Bergitaki, Yesus sori krin taki srefi sondusma kan de volmaakti. Na ini a taki dati, a sori san na trutru lobi. Na a lobi disi Gado e sori gi libisma. Yesus ben taki: „Tan lobi un feanti èn tan begi gi den sma di e frufolgu unu; dan sma kan si taki unu na manpikin fu un Tata di de na hemel, bika a e meki a son fu en opo gi takru sma èn gi bun sma; a e meki alen fadon gi regtfardiki sma èn gi sma di no regtfardiki” (Mat. 5:44, 45). Te den disipel fu Yesus ben o sori a trutru lobi dati, dan den ben o teki a volmaakti eksempre fu Gado.

Na ini a ten disi, Yehovah Kotoigi na heri grontapu e du tranga muiti fu sori a trutru lobi dati gi trawan. Den e angri fu yepi sma fu ala kulturu, ras, nanga bribi fu kon sabi den tru tori fu Bijbel. Nownowde, Kotoigi na ini 236 kondre e studeri Bijbel nanga moro leki 7.000.000 sma di wani kon sabi Gado.

Yesus ben aksi den sma: „Efu unu lobi den sma di lobi unu, sortu bun unu du dan? A no a srefi sani dati den sma e du di e teki belasting moni gi lanti? Èn efu unu e gi odi na den brada fu unu wawan, dan sortu spesrutu sani unu du dan? Den grontapusma no e du a srefi sani tu?” (Mat. 5:46, 47) Tru Kresten no e desko sma di no teki heiskoro leri, èn den no e desko sma tu di de fu wan spesrutu kulturu. A no de so tu taki den e sori lobi soso gi den wan di e sori lobi gi den. Na so Kresten kan sori lobi neleki fa Yehovah e du dati, èn na so den kan de volmaakti.

Oiti wi o kisi a volmaaktifasi baka di Adam ben lasi? Iya, libisma di e poti bribi na ini a frulusu-ofrandi fu Yesus, o kon de volmaakti dorodoro. Dati o pasa na a ten fu a Dusun Yari Tiri fu Krestes, te ’a Manpikin fu Gado e tyari wan kaba kon na den wroko fu Didibri’.—1 Yoh. 3:8.