’Den sani di a du go makandra nanga en’

TAPU 9 yuni 2010, THEODORE JARACZ dede. A brada disi ben de wan memre fu a Tiri Skin fu Yehovah Kotoigi. A ben abi 84 yari, èn a libi na baka en wefi Melita di ben trow 53 yari langa nanga en. Tra famiriman fu en di a libi na baka, na wan bigi sisa nanga en dri pikin.

Brada Jaracz ben gebore tapu 28 September 1925 na ini Pike Country, Kentucky, na Amerkankondre. Tapu 10 Augustus 1941, di a ben abi 15 yari, a gi ensrefi abra na Gado. Tu yari baka dati, di a ben abi 17 yari, a tron wan gewoon pionier. Na so a bigin nanga a furuten diniwroko di a ben o du sowan 67 yari langa.

Na ini 1946, di a ben abi 20 yari, Brada Jaracz go na a di fu seibi klas fu a Waktitoren Bijbel Skoro Gilead. Baka di Brada Jaracz klari a skoro, dan a kisi a grani fu go dini leki wan opziener di e rèis, na ini Cleveland, Ohio, wan foto na ini Amerkankondre. Na ini 1951, a ben kisi a grani fu go dini leki opziener na a bijkantoro fu Australia. A Jaarboek van Jehovah’s Getuigen 1984, ben taki dati Brada Jaracz „ben gi den brada na ini a heri kondre furu deki-ati, fu di a ben e sorgu taki sani ben e waka na wan orga fasi na ini den gemeente, èn fu di a ben e teki fesi na wan bun fasi na ini a preikiwroko.”

Baka di Brada Jaracz drai go baka na Amerkankondre, dan a trow nanga Melita Lasko tapu 10 december 1956. Baka di den trow, den bigin wantewante nanga a kringwroko, èn den dini na ini difrenti kring nanga distrikt. Na so den preiki na ini wan bigi pisi fu Amerkankondre. Na a kabapisi fu 1974, Brada Jaracz ben kisi a kari fu tron wan memre fu a Tiri Skin fu Yehovah Kotoigi.

Wi sa tan memre Brada Jaracz leki wan fayafaya futuboi fu Yehovah di ala ten ben e poti prakseri na afersi di abi fu du nanga na anbegi. A ben de wan lobi-ati masra èn a ben lobi Gado. Boiti dati, a no ben e suku en eigi bun (1 Kor. 13:4, 5). A ben e broko en ede trutru nanga trawan fu di a ben wani handri bun nanga ala sma èn a ben wani sori sari-ati tu gi ala sma. Boiti dati, te wi e luku fa a ben e du a diniwroko fu en so fayafaya, dan wi e si taki ala ten a ben e sori lobi gi sma èn taki a ben e broko en ede tu nanga trawan.

Wi e sari fu di wi lasi a brada disi di ben e wroko tranga èn di ben de wan lobi memre fu a Bethelfamiri. Ma aladi dati de so, toku wi e prisiri taki Brada Jaracz tan dini Yehovah furu tenti yari langa. Wi de seiker taki a ’tan getrow srefi te na dede èn taki a kisi pai nanga libi’ (Openb. 2:10). Wi de seiker tu taki ’den sani di a du go makandra nanga en’.—Openb. 14:13