TE WAN sma e du yu wan bun, dan yu e sori en taki yu de nanga tangi? Luku fa den srudati edeman na ini Israel ben sori taki den ben de nanga tangi, baka di den ben feti nanga den Midiansma. Den ben feti a feti disi baka di den Israelsma ben sondu fu di den ben go anbegi Bâal fu Peor. Gado ben meki a pipel fu en wini a feti, èn den prati den gudu fu den feanti na mindri den 12.000 srudati nanga den tra Israelsma. Soleki fa Yehovah ben taki, den srudati gi den priester wan pisi fu den gudu fu den, èn den tra Israelsma ben gi den Leifisma wan pisi fu dati tu.—Num. 31:1-5, 25-30.

Ma den srudati edeman ben wani gi moro. Den taigi Moses: „Den dinari fu yu teri ala den fetiman na ini den grupu fu den. Nowan fu den dede.” Den bosroiti fu gi Yehovah gowtu nanga warti sani. Ala nanga ala, den gowtu sani ben wegi moro leki 190 kilo.—Num. 31:49-54.

 Na ini a ten disi, furu sma e sori tu taki den de nanga tangi gi san Yehovah du gi den. Boiti dati, a no den futuboi fu Gado wawan e firi so. Luku na eksempre disi: Na ini 2009, wan man di ben e rèi bus, ben e tyari wan grupu Kotoigi fu dorosei kondre go na wan stadion fu de na a Internationaal kongres di ben e hori na ini Bologna, na Italiakondre. A man disi ben e rèi bun, èn a ben abi switifasi. Dati meki den Kotoigi di ben e rèi nanga en bosroiti fu skrifi wan karta fu taigi en taki den ben de nanga tangi. Den gi en wan moni tu èn sosrefi a buku San Bijbel e leri wi trutru. A man di ben rèi a bus ben taki: „Mi breiti nanga a karta nanga a buku, ma mi no o teki a moni. Mi wani gi a moni leki bijdrage so taki un kan tan du a wroko di unu e du. Aladi mi a no wan Yehovah Kotoigi, toku mi wani gi a bijdrage disi fu di mi si taki unu e du sani fu di unu lobi trawan.”

Efu yu de nanga tangi gi den sani di Yehovah du gi yu, dan wán fasi fa yu kan sori dati, na te yu e gi bijdrage fu horibaka gi a wroko di Yehovah Kotoigi e du na heri grontapu (Mat. 24:14). A faki na ondrosei e sori na sortu fasi sma e gi bijdrage.