Yehovah e arki den begi fu a sma di abi sakafasi

A KONI Kownu Salomo fu owruten Israel ben taki: „Ten nanga sani di [wi] no e fruwakti kan miti [wi] alamala” (Preik. 9:11). Te wan rampu noso wan hebi tesi miti wi, dan dati kan bruya wi libi trutru. Fu eksempre, te wan famiriman fu wan sma dede wantronso, dan a kan meki a sma dati firi brokosaka srefisrefi. Na ini den wiki nanga den mun baka dati, a sma ben kan firi sari srefisrefi èn a kan bruya tu. Wan sma kan bruya so te taki a e firi leki a no bun nofo fu begi Yehovah.

Te dati de so, dan trawan musu gi a sma disi deki-ati, den musu hori en na prakseri, èn den musu sori lobi gi en. A psalm skrifiman David e gi wi deki-ati fu di a ben e singi: „Yehovah e horibaka gi ala den wan di de fu fadon èn a e opo ala sma di e didon na gron, fu di den broko saka” (Ps. 145:14). Bijbel e taki dati „Yehovah e luku heri grontapu fu si san e pasa, so taki a kan du wan sani gi den sma di e dini en nanga den heri ati” (2 Kron. 16:9). A de ’nanga den sma di kisi kwinsi èn di e firi brokosaka, fu di mi o gi deki-ati na den sma di abi sakafasi, èn mi o gi krakti na den wan di kisi kwinsi’ (Yes. 57:15). Fa Yehovah e yepi èn e trowstu den wan di e kisi kwinsi èn di e firi brokosaka?

Te wan sma „e taki wan sani na a yoisti ten”

Wan fu den fasi fa Yehovah e yepi wi na a yoisti ten, na taki a e meki den Kresten brada nanga sisa fu wi gi wi deki-ati. Kresten e kisi a rai fu „taki na wan fasi di e trowstu den sma di lasi-ati” (1 Tes. 5:14). Te wan sma e firi sari, dan a sa kisi krakti baka te Kresten brada nanga sisa di e firi gi en e taigi en sani di e sori taki den e broko den ede nanga en èn taki den lobi en. Te trawan e taki sani fu trowstu wan sma di e firi brokosaka, dan dati kan gi en deki-ati kaba. Kande a sma di e taki den bun sani dati ben ondrofeni den srefi sari sani leki en. Noso kande wan mati di abi ondrofeni nanga den sortu situwâsi dati, e gi a sma di e sari wan tu koni rai. Nanga yepi fu den sani disi di Kresten brada nanga sisa e du, Yehovah kan meki wan sma di abi sakafasi, kisi krakti baka.

Luku a tori fu Alex, wan Kresten owruman di no ben trow so langa ete. Sondro taki a ben fruwakti dati, a wefi fu en kon dede fu di a ben abi wan takru siki. Wan kring-opziener di ben e firi gi Alex, bosroiti fu taki pikinso nanga en fu trowstu en. A brada disi en wefi ben dede tu, ma a ben trow baka. A kring-opziener ben fruteri fa a no ben sabi san fu du nanga den firi fu en. A ben e firi bun te a  ben de makandra nanga trawan na ini a diniwroko èn na den gemeente konmakandra. Ma te a ben e kon na oso èn a ben e tapu a doro, dan a ben e firi leki a ben de en wawan. Alex e taki: „A ben de wan frulekti gi mi trutru fu sabi taki noti no ben fowtu na a fasi fa mi ben e firi, èn taki tra sma ben abi den firi dati tu.” A no de fu taki, dati te „sma e taki wan sani na a yoisti ten”, dan dati kan trowstu wan sma.—Odo 15:23.

Wan tra Kresten owruman ben taki tu nanga Alex fu trowstu en. A brada disi ben sabi difrenti sma di lasi den trowpatna na ini dede. Fu di a ben e firi gi Alex, meki a sori en na wan lobi-ati fasi taki Yehovah sabi fa wi e firi èn san wi abi fanowdu. A ben taki: „Efu baka wan pisi ten yu feni taki yu abi wan trowpatna fanowdu, dan Yehovah e gi yu a moi okasi fu trow baka.” A no de fu taki dati a no ala sma di lasi den patna na ini dede èn di wani trow baka, man du dati. Ma Alex ben prakseri san a brada ben taigi en, èn a taki: „Di a brada meki mi kon frustan baka taki Yehovah e gi sma na okasi fu trow baka, dan dati yepi mi fu no denki moro taki mi no ben e hori misrefi na a pramisi di mi ben meki di mi trow.”—1 Kor. 7:8, 9, 39.

A psalm skrifiman David di ben kisi tesi nanga problema, ben taki: „Den ai fu Yehovah e si den reti-ati sma, èn den yesi fu en e yere te den e bari suku yepi na en” (Ps. 34:15). A no de fu taki dati te wan sma di abi sakafasi e begi Yehovah fu yepi en, dan Yehovah kan piki a begi dati na a yoisti ten. Iya, a kan gebroiki lobi-ati lepi Kresten fu trowstu a sma dati èn fu gi en deki-ati. A sani disi prenspari gi wi èn a de wan bigi yepi fu tru.

Den Kresten konmakandra e yepi wi

Wan sma di e firi brokosaka, makriki kan bigin denki takru fu sani, èn dati kan meki taki a e hori ensrefi aparti fu trawan. Ma Odo 18:1 e gi wi a warskow disi: „Wan sma di no e moksi nanga trawan, o prakseri en eigi lostu nomo. A e opo ensrefi te sma wani gi en koni rai.” Alex ben taki: „Te yu e lasi yu trowpatna na ini dede, dan wantronso yu sa bigin denki takru fu wan lo sani.” A e memre taki a ben e  denki na ensrefi: „’Kande mi no du son sani bun. Kande mi no ben sori nofo switifasi gi mi patna.’ Mi no ben wani de mi wawan. Mi no ben wani libi sondro trowpatna. A muilek srefisrefi fu no denki so, fu di ibri dei yu e si taki yu de yu wawan.”

A de prenspari srefi taki wan sma di e firi brokosaka trutru abi demakandra nanga bun kompe. A sa feni den kompe dati na den gemeente konmakandra. Drape wi e gi pasi taki den bun prakseri fu Gado abi krakti na wi tapu.

Kresten konmakandra e yepi wi fu abi a yoisti denki fu a situwâsi fu wi. Te wi e arki te trawan e leisi pisi fu Bijbel, èn te wi e denki dipi fu den pisi dati, dan wi no sa denki wi eigi problema nomo, ma wi sa poti prakseri na den tu afersi di prenspari moro ala tra sani: Wi sa hori na prakseri taki a musu kon na krin taki na Yehovah abi a reti fu tiri hemel nanga grontapu, èn taki a nen fu en musu kon santa. Boiti dati, te wi e kisi leri fu Yehovah na den Kresten konmakandra, dan wi e kisi deki-ati fu di wi sabi taki awansi trawan no sabi taki wi e sari noso awansi den no e frustan fa wi e firi, toku Yehovah sabi dati. Yehovah sabi taki „te na ati e sari, dan dati e meki wan sma firi brokosaka” (Odo 15:13). A tru Gado wani yepi wi èn a sani disi e gi wi deki-ati nanga krakti fu horidoro.—Ps. 27:14.

Di Kownu David ben e kisi hebi kwinsi fu den feanti fu en, dan a taigi Gado: „Mi lasi-ati srefisrefi. Mi ati kon lasi ala firi” (Ps. 143:4). Te problema e miti wan sma, dan nofo tron a sma e kon swaki, a e firi brokosaka, èn son leisi en ati e lasi ala firi srefi. Te wi siki noso te wi skin e kon swaki fu di wi kon owru, dan dati kan de wan tesi gi wi. Wi kan abi a dyaranti taki Yehovah o yepi wi fu horidoro (Ps. 41:1-3). Aladi Gado no e dresi sma na wan wondru fasi na ini a ten disi, toku a e gi a sma di e pina a koni nanga a krakti fu horidoro. Hori na prakseri taki di David ben e kisi hebi tesi, dan a suku yepi na Yehovah. A ben taki: „Doronomo mi e memre owruten. Mi denki dipi fu ala den sani di yu du. Mi poti prakseri na den sani di yu meki nanga yu eigi anu.”—Ps. 143:5.

Den sani disi di skrifi na ini Gado Wortu, e sori taki Gado e frustan fa wi e firi. Den wortu disi e gi wi a dyaranti taki Gado e arki den begi fu wi. Te wi e teki a yepi fu Yehovah, dan ’en srefi o horibaka gi wi’.—Ps. 55:22.

„Begi doronomo”

Yakobus 4:8 e taki: „Kon krosibei na Gado, èn a sa kon krosibei na unu.” Wan fasi fa wi kan kon krosibei na Gado, na te wi e begi en. Na apostel Paulus e gi wi a rai fu „begi doronomo” (1 Tes. 5:17). Awansi wi feni en muilek fu taki fa wi e firi, toku „a yeye srefi e taki gi wi te wi e geme, aladi dati no de fu yere” (Rom. 8:26, 27). A no de fu taki dati Yehovah e frustan fa wi e firi.

Monika di abi so wan bun matifasi nanga Yehovah, e taki: „Fu di mi e begi Gado, fu di mi e leisi Bijbel, èn fu di mi e studeri a Wortu fu en, meki mi kon si taki Yehovah na a moro bun mati di mi abi. Mi e frutrow so furu na en tapu, taki mi kan si fa a e yepi mi. A de wan trowstu gi mi fu sabi taki awansi mi no man fruklari fa mi e firi, toku Yehovah e frustan fa mi e firi. Mi sabi taki a o tan sori switifasi gi mi, èn taki a o tan blesi mi.”

Sobun, meki wi kisi wini fu den sani di wi Kresten brada nanga sisa e taigi wi fu trowstu wi. Boiti dati, meki wi fiti den rai di wi e kisi na den Kresten konmakandra, fu di den rai dati bun èn fu di den e tranga a bribi fu wi. Ala den sani disi di Yehovah du gi wi, e sori taki a e sorgu gi wi. Alex e taki san ensrefi ondrofeni. A e taki: „Te wi e meki muiti fu kisi wini fu ala den sani di Yehovah seti gi wi fu kan abi wan bun matifasi nanga en, dan wi o abi „krakti di bigi pasa marki” so taki wi kan pasa iniwan tesi di wi e kisi.”—2 Kor. 4:7.

[Faki/​Prenki na tapu bladzijde 18]

Trowstu gi den wan di abi sakafasi

Den psalm lai nanga wortu di e sori fa libisma e firi, èn nofo tron den psalm e gi wi a dyaranti tu taki Yehovah e arki te sma di abi sakafasi e suku yepi na en fu di den abi broko ede. Luku den vers disi:

„Di mi ben de na nowtu, mi tan kari Yehovah. Iya, mi tan kari mi Gado fu a yepi mi. A ben de na ini en tempel di a yere mi sten. A yere fa mi kari en fu a yepi mi.”—Ps. 18:6.

„Yehovah de krosibei fu den sma di lasi-ati. A e frulusu den wan di brokosaka.”—Ps. 147:3.

„[Yehovah] e dresi den sma di broko saka, èn a e tai den soro di e hati den.”—Ps. 147:3.

[Prenki na tapu bladzijde 17]

Te ’sma e taki wan sani na a yoisti ten’, dan dati kan de wan trowstu gi wi trutru te tesi e miti wi!