Yehovah na wi Moro Hei Masra!
Yehovah na wi Moro Hei Masra!
„Na a Moro Hei Masra Yehovah mi e si leki mi kibripe.”—PS. 73:28.
1. San Paulus ben wani taki nanga den wortu fu en di skrifi na 1 Korentesma 7:31.
„A KOMEDI-PREI fu grontapu e kenki.” Na so na apostel Paulus ben taki (1 Kor. 7:31). Soleki fa a sori, dan a ben e agersi den sani di e pasa na grontapu, nanga wan komedi-prei pe bun sma noso takru sma e kon fu prei a pisi fu den, èn baka dati den e gowe fu meki presi gi trawan.
2, 3. (a) Nanga sortu sani wi kan agersi a tyalensi di a tirimakti fu Yehovah e kisi? (b) Na sortu aksi wi o poti prakseri?
2 Na ini a ten disi, wan tumusi prenspari komedi-prei e prei, èn a prei disi abi fu du nanga yu! A abi fu du spesrutu nanga a reti di Yehovah Gado abi fu tiri ala sani. Wi kan agersi a komedi-prei disi nanga wan situwâsi fu wan kondre. Na a wan sei yu abi a tirimakti di abi a reti fu tiri èn di e sorgu taki sani e waka na wan orga fasi. Na a tra sei, yu abi wan organisâsi fu ogrisma di e bedrigi trawan, di e du ogri nanga tranga, èn di e kiri sma. A kruktu organisâsi dati e tyalensi a tirimakti di abi a reti fu tiri, èn a e tesi ala den borgu di e tan horibaka gi a tirimakti dati.
3 Wan srefi sortu situwâsi de na heri grontapu. Yu abi a tirimakti fu „Yehovah, a Moro Hei Masra”, di abi a reti fu tiri (Ps. 71:5). Ma now wan organisâsi fu ogrisma e suku fu du ogri nanga libisma, èn a fesiman fu na organisâsi dati na a sma di Bijbel e kari „na ogriwan” (1 Yoh. 5:19). Na organisâsi dati e tyalensi a tirimakti fu Gado di abi a reti fu tiri, èn a e tesi ala sma di e tan si Gado leki a Moro Hei Masra. Fa a situwâsi disi du kon? Fu san ede Gado e gi pasi taki a de ete? San ibriwan fu wi kan du na a situwâsi disi?
Afersi di abi fu du nanga a komedi-prei
4. Nanga sortu tu afersi a komedi-prei abi fu du?
4 A komedi-prei disi di e prei na heri grontapu abi fu du nanga tu afersi. Den tu afersi disi na a reti di Yehovah abi fu tiri ala sani, èn a gi di libisma musu tan gi yesi na Gado. Den tu afersi disi abi fu du nanga makandra. Bijbel nofo tron e kari Yehovah „a Moro Hei Masra”. A psalm skrifiman fu eksempre, di ben abi bigi frutrow na ini Yehovah, ben taki: „Na a Moro Hei Masra Yehovah mi e si leki mi kibripe” (Ps. 73:28). Wi abi bun reide fu si Yehovah Gado leki a Moro Heiwan.—Dan. 7:22.
5. Fu san ede wi musu horibaka gi Yehovah, a Moro Hei Tiriman?
5 Leki a Mekiman, Yehovah Gado na a Moro Hei Tiriman fu hemel nanga grontapu. (Leisi Openbaring 4:11.) Yehovah na sosrefi wi Krutuman, a Sma di e gi wi wet, èn wi Kownu (Yes. 33:22). Fu di na Gado meki wi èn fu di wi abi en fanowdu fu man tan na libi, meki wi musu si en leki a Moro Hei Masra. Wi sa horibaka gi a hei posisi fu en te wi e tan hori na prakseri taki „Yehovah seti en kownusturu steifi na ini hemel fu ala ten. A de kownu fu ala sani di de.”—Ps. 103:19; Tori. 4:24.
6. San a wani taki te wan sma e tan du san reti?
6 Fu man horibaka gi Yehovah di abi a reti fu tiri, dan wi musu tan gi yesi na en, noso wi musu du san reti. Wan sma di e tan du san reti, na wan sma di lobi du san bun. A famiri-edeman Yob, ben de so wan man.—Yob 1:1.
A fasi fa a komedi-prei bigin
7, 8. Fa Satan krutu Yehovah fu meki sma tweifri efu na En abi a reti fu tiri ala sani?
7 Sowan 6000 yari pasa, wan engel krutu Yehovah fu meki sma tweifri efu na En abi a reti fu tiri ala sani. Na engel disi di ben e denki ensrefi nomo, ben wani taki sma anbegi en, èn na dati meki taki a tyalensi Gado. A kori a fosi trowpaar, Adam nanga Eva, fu drai baka gi a moro hei tiriman. Boiti dati, fu di a ben wani pori a nen fu Yehovah, meki a gi sma a denki taki Yehovah ben lei. (Leisi Genesis 3:1-5.) Na so na engel disi tron a moro bigi Feanti, sosrefi Satan (Gensman), Didibri (Ogri-ati leiman), sneki (bedrigiman), nanga bigi kaiman.—Openb. 12:9.
8 Satan tron wan tiriman di e gens Yehovah. San a Moro Hei Masra ben o du now? A ben o kiri Satan, Adam, nanga Eva wantewante fu di den ben opo densrefi teige en? A no de fu taki dati Yehovah ben man du dati, èn dati ben o sori krin taki na En abi ala makti. A sani disi ben o sori tu taki Yehovah no ben lei di a ben taki sortu strafu den ben o kisi fu di den ben pasa a wet fu en. Fu san ede Gado no kiri den?
9. Sortu lei Satan fruteri fu Yehovah èn fu libisma?
9 Di Satan lei èn kori Adam nanga Eva fu drai baka gi Gado, dan na so a meki sma tweifri efu Yehovah abi a reti fu fruwakti taki den gi yesi na en. Boiti dati, di Satan kori a fosi trowpaar fu trangayesi Gado, dan nanga dati a ben wani sori taki libisma nanga den engel no ben o tan gi yesi na Yehovah fu ala ten. Soleki fa a tori fu Yob e sori, dan Satan ben feni taki a ben kan meki ala sma drai baka gi Gado.—Yob 2:1-5.
10. San ben de a bakapisi di Gado no kiri Satan fu sori taki na En abi a reti fu tiri ala sani?
10 Fu di Yehovah no kiri Satan wantewante fu sori taki na En abi a reti fu tiri ala sani, meki a gi Satan ten fu sori efu a ben abi leti. Gado gi libisma na okasi tu fu sori taki den e tan horibaka gi en. San pasa na ini den hondrohondro yari baka dati? Satan seti wan makti organisâsi di e du ogridu. Te fu kaba Yehovah o pori na organisâsi disi èn a o pori Didibri tu. Dati o sori taki na Gado abi a reti fu tiri ala sani. Fu di Yehovah Gado ben de so seiker taki sani ben o waka soleki fa a ben wani, meki a taki san ben o pasa di sma opo densrefi teige en na ini Eden.—Gen. 3:15.
11. Fa furu sma sori taki den horibaka gi a Moro Hei Tiriman Yehovah?
11 Furu sma sori bribi na ini Yehovah, a Moro Hei Tiriman, èn den tan gi yesi na en. Na so den meki a nen fu en kon santa. Wan tu fu den sma dati na Abel, Heinok, Noa, Abraham, Sara, Moses, Rut, David, nanga Yesus. Wan tu trawan na den fosi disipel fu Krestes, èn sosrefi milyunmilyun sma na ini a ten disi di e tan gi yesi na Gado. Den sma dati di e tan gi yesi na Yehovah, a Moro Hei Masra, e sori taki Satan na wan leiman. Boiti dati, den e krin a nen fu Yehovah, fu di den e sori taki Satan ben lei di a fruteri taki a ben o man meki ala sma drai baka gi Gado.—Odo 27:11.
Wi sabi fa a komedi-prei o kon na wan kaba
12. Fu san ede wi kan abi a dyaranti taki Gado no sa tan gi pasi taki sma e du ogri?
12 Wi kan abi a dyaranti taki heri esi, Yehovah sa tyari kon na krin taki na en abi a reti fu tiri ala sani. Dati de so fu di a no sa gi pasi taki sma du ogri fu ala ten. Boiti dati, wi sabi taki wi e libi na ini den lasti dei. Yehovah ben strafu den ogrisma na a ten fu a Frudu. A pori Sodom nanga Gomora, èn sosrefi Farao nanga den legre fu en. Sisera nanga a legre fu en, sosrefi Sanherib nanga den Asiria srudati fu en, no ben man kakafutu gi a Moro Heiwan (Gen. 7:1, 23; 19:24, 25; Ex. 14:30, 31; Krut. 4:15, 16; 2 Kow. 19:35, 36). Fu dati ede, wi kan abi a frutrow taki Yehovah Gado no sa tan gi pasi taki sma pori en nen èn taki den e handri takru nanga den Kotoigi fu en. Boiti dati, wi e si a marki now fu a denoya fu Yesus, èn wi e si tu taki wi e libi na a kabapisi fu na ogri sistema disi.—Mat. 24:3.
13. San wi kan du fu sorgu taki wi no e kisi pori makandra nanga den feanti fu Yehovah?
13 Fu sorgu taki wi no e kisi pori makandra nanga den feanti fu Gado, dan wi musu tan horibaka gi Yehovah, a Moro Hei Tiriman. Fa wi kan du dati? Wi no musu abi noti fu du nanga na ogri-ati tiri fu Satan, èn wi no musu meki den futuboi fu en tapu skreki gi wi (Yes. 52:11; Yoh. 17:16; Tori. 5:29). Na so wawan wi o man horibaka gi wi hemel Tata di de a Moro Hei Tiriman. Te wi e du dati, dan wi sa abi a howpu fu kisi frulusu te a o krin en nen èn te a o sori taki na en na a Tiriman fu hemel nanga grontapu.
14. San den difrenti pisi fu Bijbel e tyari kon na krin?
14 Na ini a heri Bijbel, wi e feni tori di abi fu du nanga a libisma famiri èn nanga a reti di Yehovah abi fu tiri ala sani. Den fosi dri kapitel e fruteri wi fa Gado meki ala sani, èn fa a du kon taki libisma tron sondusma. Den lasti dri kapitel e fruteri fa libisma o tron volmaakti sma baka. Den tra pisi fu Bijbel e fruteri san a Moro Hei Masra Yehovah du fu meki den sani di a abi na prakseri gi libisma, gi grontapu, èn gi hemel, kon tru. A buku Genesis e sori fa Satan kon abi krakti tapu libisma, èn fa ogridu bigin. Ma a lasti pisi fu Openbaring e sori fa Didibri o kisi pori, èn fa a wani fu Gado o pasa na grontapu, soleki fa dati e pasa na hemel. Iya, Bijbel e sori fa sondu nanga dede du kon, èn fa wan kaba o kon na den sani disi. Na so libisma di e tan du san reti sa de koloku dorodoro èn den sa libi fu têgo.
15. San ibriwan fu wi musu du fu man kisi wini te a e kon na krin suma abi a reti fu tiri?
15 Heri esi, a situwâsi na grontapu o kenki dorodoro. A komedi-prei di e prei hondrohondro yari langa kaba, èn di musu tyari kon na krin suma abi a reti fu tiri ala sani, o kon na wan kaba. Satan no o tiri moro, a o kisi pori te fu kaba, èn a no de fu taki dati a wani fu Gado o kon tru seiker. Ma efu wi wani kisi wini fu den someni blesi di Gado Wortu e taki dati wi kan kisi, dan wi musu horibaka nownow gi Yehovah di abi a reti fu tiri. Wi no kan tan sondro fu teki wan bosroiti. Fu man taki: „Yehovah de na mi sei”, dan wi musu tan na en sei.—Ps. 118:6, 7.
Wi man tan gi yesi na Gado!
16. Fu san ede wi kan abi a dyaranti taki libisma man tan gi yesi na Gado?
16 Wi kan horibaka gi Yehovah di abi a reti fu tiri, èn wi kan tan gi yesi na en, fu di na apostel Paulus ben skrifi: „Nowan tesi kon na un tapu, boiti den sani di gwenti fu miti libisma. Ma Gado de getrow, èn a no sa meki unu kisi tesi di hebi moro leki san unu man frudrage; ma te tesi miti unu, dan a sa tyari wan frulekti kon, so taki unu man horidoro” (1 Kor. 10:13). Pe a tesi di Paulus e taki fu en e komopo èn fa Gado e tyari wan frulekti kon gi wi?
17-19. (a) Gi sortu tesi den Israelsma ben brokokindi na ini a gran sabana? (b) Fu san ede wi man tan gi yesi na Yehovah?
17 Soleki fa den sani di Israel ben ondrofeni na ini a gran sabana e sori, dan spesrutu situwâsi kan tron wan tesi gi wi, fu di den kan meki taki wi pasa a wet fu Gado. (Leisi 1 Korentesma 10:6-10.) Den Israelsma ben o man kakafutu gi tesi, ma den no du dati. Dati e kon fu di den ben e angri fu „du ogri” di Yehovah gi den fowru na wan wondru fasi, so taki den ben abi nyanyan gi wan heri mun. A pipel no ben abi meti wan pisi ten, ma Gado ben gi den nofo mana fu nyan. Toku den naki futu fu di den ben gridi tumusi di den ben e tyari den fowru kon na wan.—Num. 11:19, 20, 31-35.
18 Wan pisi ten na fesi, di Moses ben e kisi a Wet na tapu Sinaibergi, dan den Israelsma teki prati na falsi anbegi, fu di den bigin anbegi wan pikin kaw. Boiti dati, den ben e meki prisiri fu plisi den tranga lostu fu den. Fu di a fesiman fu den no ben de drape, meki den no ben man kakafutu gi a tesi dati (Ex. 32:1, 6). Syatu bifo den Israelsma go na ini a Pramisi Kondre, dan den uma fu Moab kori dusundusun fu den, so taki den du hurudu nanga den uma disi. Na a okasi dati, dusundusun Israelsma dede fu di den ben du a sondu dati (Num. 25:1, 9). Son leisi, a pipel fu Israel di ben e opo densrefi teige Moses, ben e krutukrutu, èn wan leisi den krutu Moses, èn Yehovah srefi! (Num. 21:5) A pipel fu Israel ben e krutukrutu tu fu di Korak, Datan, Abiram, nanga den kompe fu den ben kisi pori. Den ben abi a fowtu denki taki Gado no ben abi leti fu kiri den sma disi. A sani dati meki taki 14.700 Israelsma dede fu di Gado strafu den.—Num. 16:41, 49.
19 Den tesi di wi taki fu den no ben hebi so te taki den Israelsma no ben man kakafutu gi den. A pipel ben brokokindi gi tesi fu di den ben lasi bribi na ini Yehovah, èn fu di den ben frigiti en. Den ben frigiti tu taki a ben sorgu na wan lobi-ati fasi gi den, èn taki ala ten a ben e du san reti. Soleki fa na eksempre fu den Israelsma e sori, dan den tesi di e miti wi, na tesi di e miti ala sma. Te wi e du tranga muiti fu kakafutu gi den tesi dati, èn te wi abi a frutrow taki Gado o yepi wi, dan wi o man tan gi yesi na en. Wi kan bribi a sani disi fu di „Gado de getrow”, èn a no sa gi pasi taki wi e „kisi tesi di hebi moro leki san wi man frudrage”. Yehovah noiti no sa libi wi meki wi kon na ini situwâsi di sa meki en muilek gi wi fu du a wani fu en.—Ps. 94:14.
20, 21. Te wi e kisi tesi, dan fa Gado e „tyari wan frulekti kon”?
20 Yehovah e „tyari wan frulekti kon” fu di a e gi wi krakti fu kakafutu gi tesi. Fu eksempre, kande sma di e frufolgu wi sa fon wi fu meki wi drai baka gi a bribi fu wi. Te sma e handri so nanga wi, dan kande wi sa prakseri fu du san den wani, so taki den no e fon wi moro, noso taki den no e kiri wi. Ma a dyaranti di Paulus gi wi na 1 Korentesma 10:13, e meki wi frustan taki a tesi di wi e kisi sa de fu wan syatu pisi ten nomo. Yehovah no sa gi pasi taki wi e kisi tesi teleki wi no man gi yesi moro na en. Gado kan tranga a bribi fu wi èn a kan gi wi a deki-ati di wi abi fanowdu fu tan gi yesi na en.
21 Yehovah e gebroiki en santa yeye fu yepi wi. Boiti dati, a yeye disi e meki wi memre den sani baka di wi leri na ini Bijbel, so taki wi kan kakafutu gi tesi (Yoh. 14:26). Na so wi no sa brokokindi te wi e kisi tesi fu du san no bun. Fu eksempre, wi e frustan fu san ede a musu kon na krin taki na Yehovah abi a reti fu tiri, èn wi e frustan tu fu san ede wi musu tan gi yesi na en. Furu sma di sabi den sani disi ben kisi krakti fu Gado, so taki den ben man tan gi yesi na en te na dede. Toku a no de so taki na dede tyari frulekti kon gi den, ma na a yepi di den ben kisi fu Yehovah so taki den ben man horidoro te na a kaba, sondro fu brokokindi gi tesi. Yehovah kan yepi wi tu. Fu taki en leti, a e gebroiki den engel fu en tu fu yepi wi, èn ’a e seni den kon fu dini den sma di o kisi frulusu’ (Hebr. 1:14). Soleki fa a tra artikel o sori, dan soso den sma di e tan gi yesi na Gado, kan fruwakti fu kisi a moi grani fu tan horibaka fu têgo gi Gado di abi a reti fu tiri. Wi kan kisi a grani disi tu te wi e tai hori na Yehovah, wi Moro Hei Masra.
San yu ben sa piki?
• Fu san ede wi musu si Yehovah leki wi Moro Hei Masra?
• San a wani taki fu tan gi yesi na Gado?
• Fa wi du sabi taki heri esi Yehovah o tyari kon na krin taki na en abi a reti fu tiri?
• Te wi e luku san skrifi na 1 Korentesma 10:13, dan fu san ede wi man tan gi yesi na Gado?
[Aksi fu a tori disi]
[Prenki na tapu bladzijde 24]
Satan ben kori Adam nanga Eva fu trangayesi Yehovah
[Prenki na tapu bladzijde 26]
Abi a fasti bosroiti fu tan horibaka gi Yehovah, di abi a reti fu tiri