Yonguwan—Kakafutu gi speri di e dwengi unu fu du san no bun
Yonguwan—Kakafutu gi speri di e dwengi unu fu du san no bun
„Den wortu fu unu musu abi sowtu, so taki unu sabi fa un musu piki ibriwan sma.”—KOL. 4:6.
1, 2. Fa furu yonguwan feni en taki den musu de tra fasi leki tra yonguwan? Fu san ede den e firi so?
A NO de fu taki dati yu sabi san a wani taki te speri e dwengi yu fu du san no bun. Fa yu e firi te wan sma e du dati nanga yu? Christopher di abi 14 yari, e taki: „Son leisi mi e winsi taki mi no ben de drape, noso taki mi ben de leki den skoromati fu mi. Na so mi no ben o abi fu meki muiti fu de tra fasi leki den.”
2 A de so taki den speri fu yu abi furu krakti na yu tapu? Efu dati de so, dan fa dati du kon? Na fu di yu wani taki den feni yu bun? Te yu e luku en bun, dan a no fowtu ala ten fu firi so. Fu taki en leti, bigisma wani tu taki den speri fu den feni den bun. Nowan sma, awansi na yonguwan noso owruwan, lobi te trawan no feni den bun. Ma son sma no sa feni yu bun te yu e weigri fu du san no fiti. Yesus srefi ben ondrofeni dati. Ma toku Yesus ala ten ben e du san bun. Aladi sonwan fu den sma di ben e waka na en baka ben tron disipel fu en, toku tra sma ben e wisiwasi en, èn den ben e „si en leki wan soso sma”.—Yes. 53:3.
Na sortu fasi speri kan dwengi wi fu du san no bun?
3. Fu san ede a no de wan koni sani fu teki na eksempre fu den speri fu yu?
3 Son leisi, yu ben kan prakseri fu teki na eksempre fu den speri fu yu, so taki den kan feni yu bun. Dati no ben o de wan koni sani fu du. Kresten no musu de ’leki beibi di e degedege neleki te winti e naki skwala go na ala sei’ (Ef. 4:14). Sma kan abi krakti tapu pikin-nengre makriki. Ma yu leki yonguwan e gro kon tron wan bigisma. Sobun, efu yu e bribi taki den markitiki fu Yehovah e tyari wini kon gi yu, dan a no de fu taki dati yu musu hori yusrefi na den markitiki dati (Deut. 10:12, 13). Efu yu no e du dati, dan yu e gi pasi taki tra sma e basi yu. Fu taki en leti, te yu e brokokindi te trawan e dwengi yu fu du san no bun, dan yu e gi den okasi fu du san den wani nanga yu.—Leisi 2 Petrus 2:19.
4, 5. (a) Fa Aron ben brokokindi di sma ben e dwengi en fu du san no bun, èn san a sani disi e leri yu? (b) Fa den speri fu yu kan pruberi fu dwengi yu fu du san no bun?
4 Wan leisi, Moses en brada, Aron, brokokindi di den speri fu en dwengi en fu du san no bun. Di den Israelsma ben e gi en deki-ati fu meki wan gado gi den, dan a du dati. Aron no ben de wan man di ben e frede sma. Wan pisi ten na fesi, a ben e horibaka gi Moses, èn a go taki nanga Farao, a moro makti man na ini Egepte. Na a okasi dati, Aron fruteri Farao san Gado ben taki, èn a taki nanga deki-ati. Ma di den Israelsma bigin dwengi Aron fu du san no bun, dan Aron brokokindi. Te sma e dwengi wi fu du san no bun, dan a sani dati kan abi furu krakti na wi tapu trutru! Aron ben feni en moro makriki fu kakafutu gi a kownu fu Egepte, leki fu kakafutu gi den speri fu en.—Ex. 7:1, 2; 32:1-4.
5 Soleki fa na eksempre fu Aron e sori, dan a no soso yonguwan e kisi fu du nanga speri di wani dwengi den fu du san no bun. A no de so tu taki a sani disi e miti soso sma di lobi fu du ogri. Srefi sma di trutru wani du san bun kan kisi fu du nanga den sortu speri disi. Yusrefi kan kisi fu du nanga den. Den speri fu yu ben kan tyalensi yu, den ben kan krutu yu, noso den ben kan dreigi yu, soso fu meki yu du san no bun. A no de wan makriki sani te speri e dwengi yu fu du san no bun, èn a no abi trobi na sortu fasi den e du dati. Fu man kakafutu gi den, dan yu o abi fu kisi wan moro tranga overtoigi taki den sani di yu e bribi na tru tori.
„Tan buweisi sortu sma unu de”
6, 7. (a) Fu san ede yu musu abi na overtoigi taki den sani di yu e bribi na tru tori? Fa yu kan kisi na overtoigi dati? (b) Sortu sani yu kan aksi yusrefi fu tranga na overtoigi fu yu?
6 Fu man kakafutu gi speri, dan yu musu abi na overtoigi taki den sani di yu e bribi na tru tori, èn taki yu e hori yusrefi na den yoisti markitiki. (Leisi 2 Korentesma 13:5.) Disi sa yepi yu fu sori deki-ati, awansi yu na wan sma di e syensyen (2 Tim. 1:7, 8). Ma awansi wan sma abi deki-ati, toku a kan muilek srefisrefi gi en fu opo taki gi wan sani, te a no e bribi a sani dati nanga en heri ati. Sobun, fu san ede yu no e ondrosuku gi yusrefi efu den sani di yu leri fu Bijbel na tru tori? Bigin nanga den makriki sani. Fu eksempre, yu e bribi na ini Gado, èn yu yere fa tra sma fruteri fu san ede den e bribi na ini En. Sobun, aksi yusrefi a sani disi: ’Fu san ede mi e bribi taki Gado de?’ Na aksi disi a no fu meki yu tweifri, ma na fu tranga a bribi fu yu. Aksi yusrefi a sani disi tu: ’Fa mi du sabi taki na Gado meki sma skrifi Bijbel?’ (2 Tim. 3:16) ’Fu san ede mi e bribi taki disi na „den lasti dei”?’ (2 Tim. 3:1-5) ’Fu san ede mi e bribi taki den markitiki fu Yehovah na fu mi eigi bun?’—Yes. 48:17, 18.
7 Kande yu no wani aksi yusrefi den sani disi, fu di yu frede taki yu no o man piki den aksi dati. Ma dati ben o de a srefi leki te yu no wani luku a meter fu yu wagi, fu di yu frede fu si taki a wagi lon drei! Efu oli no de na ini a tank, dan yu musu sabi dati so taki yu kan lai oli baka. Na so a ben o bun tu fu kon sabi efu a bribi fu yu swaki, so taki yu du san de fanowdu fu tranga a bribi fu yu.—Tori. 17:11.
8. Fa yu kan kon abi wan moro tranga overtoigi taki a komando di wi kisi fu lowe gi hurudu, na fu wi eigi bun?
8 Luku na eksempre disi. Bijbel e gi wi deki-ati fu „lowe gi hurudu”. Aksi yusrefi a sani disi: ’Fu san ede a bun fu gi yesi na a komando disi?’ Aksi yusrefi san na den difrenti reide fu san ede den speri fu yu e du hurudu, èn fu san ede wan sma di e du hurudu „e sondu teige en eigi skin” (1 Kor. 6:18). Now, luku den piki tapu den aksi dati, èn aksi yusrefi: ’San na a moro bun sani fu du? A de so trutru taki hurudu e tyari wini kon?’ Prakseri a tori moro fini. Aksi yusrefi: ’Fa mi ben o firi efu mi ben brokokindi gi hurudu?’ Kande sonwan fu den speri fu yu ben o feni en bun taki yu du dati. Ma fa yu ben o firi bakaten te yu de na a Kownukondre zaal makandra nanga yu papa nanga mama èn nanga yu Kresten brada nanga sisa? Fa yu ben o firi te yu ben o pruberi fu begi Gado? Yu ben o wani lasi a bun nen di yu abi na Gado, soso fu plisi den pikin fu yu klas?
9, 10. Te yu abi na overtoigi taki den sani di yu e bribi na tru tori, dan fa dati o yepi yu fu no frede te yu de makandra nanga den speri fu yu?
9 Efu yu na wan yonguwan, dan na ini a pisi ten disi fu yu libi, yu e kon sabi moro bun fa fu gebroiki „yu frustan”. (Leisi Romesma 12:1, 2.) Gebroiki a pisi ten disi fu denki bun fu san ede a prenspari gi yu fu de wan Yehovah Kotoigi. Te yu e denki dipi fu den sani disi, dan dati o yepi yu fu kon abi wan tranga overtoigi na ini den sani di yu e bribi. Dati o meki taki yu o man piki den speri fu yu wantewante te den e dwengi yu fu du san no bun, èn yu o man piki den nanga tranga overtoigi. Yu sa firi leki wan yongu Kresten sisa di ben taki: „Te mi e kakafutu gi speri di wani dwengi mi fu du san no bun, dan mi no e frede fu taigi den san mi e bribi. A bribi fu mi a no wan lawlaw sani. A abi krakti tapu a denki fu mi, tapu den marki di mi e poti, tapu a fasi fa mi e tyari misrefi, èn tapu mi heri libi.”
10 Iya, yu musu du tranga muiti fu tan horibaka gi san bun (Luk. 13:24). Èn kande yu e aksi yusrefi efu dati o tyari wini kon gi yu. Ma hori a sani disi na prakseri: Efu yu e syen fu opo taki gi a bribi fu yu, dan trawan o si dati, èn kande den o du moro sani fu pruberi fu dwengi yu fu du san no bun. Ma te yu e taki sondro frede, dan yu o fruwondru fu si o esi den speri fu yu o tapu fu dwengi yu. —Luku Lukas 4:12, 13.
’Prakseri dipi fu sani so taki yu kan gi piki’
11. Sortu wini a e tyari kon te yu e sreka yusrefi gi speri di wani dwengi yu fu du san no bun?
11 Ete wan prenspari sani di o yepi yu fu kakafutu gi den speri fu yu, na te yu e sreka yusrefi na fesi. (Leisi Odo 15:28.) Dati wani taki dati yu e prakseri na fesi sortu situwâsi ben kan opo kon. Son leisi, a bun fu prakseri sani na fesi, fu di dati kan yepi yu fu sorgu taki bigi problema no e opo kon. Luku na eksempre disi: Kon meki wi taki dati yu e si wan grupu pikin fu yu skoro e tanapu moro fara, èn den e smoko. Yu denki taki den o gi yu wan sikaret? Te yu denki taki den o fruferi yu, dan san yu kan du? Odo 22:3 e taki: „Te wan sma si taki ogri o miti en èn a go kibri, dan a koni.” Te yu e teki wan tra pasi, dan kande yu no o abi fu miti nanga den. A sani disi no wani taki dati yu frede, ma a e sori taki yu koni.
12. San yu kan du fu sori taki problema no e opo kon te yu speri e dwengi yu fu du san no bun?
12 Fa a de te yu e kisi fu du nanga wan situwâsi di yu no ben fruwakti? Kande wan speri fu yu e aksi yu a sani disi: „San! Yu wani taigi mi taki noiti ete yu abi seks?” A bun fu fiti a rai disi di skrifi na Kolosesma 4:6, pe skrifi: „Un musu taki na wan switi fasi ala ten, iya, den wortu fu unu musu abi sowtu, so taki unu sabi fa un musu piki ibriwan sma.” Soleki fa a tekst disi e sori, dan a fasi fa yu o piki a sma, abi fu du nanga a situwâsi di yu de na ini. Kande yu no abi fu hori wan heri preiki gi en fu sori en san Bijbel e taki fu a tori. Kande a nofo te yu e piki en syatu na wan fasi di a sa frustan krin. Fu eksempre, te wan sma e aksi yu efu yu abi seks kaba nanga wan trawan, dan yu ben kan taki nomo: „Nôno, mi no abi seks ete.” Noso yu kan taki: „Dati na mi tori.”
13. Fu san ede yu musu man si sani krin te yu wani piki wan speri di e aksi yu fruferi sani?
13 Nofo tron Yesus ben e gi sma wan syatu piki te a ben e si taki a no ben de fanowdu fu taki moro sani. Fu taki en leti, di Herodes ben poti aksi gi Yesus, dan Yesus no piki en noti (Luk. 23:8, 9). Nofo tron dati na wan bun sani di yu kan du te sma e poti fruferi aksi gi yu (Odo 26:4; Preik. 3:1, 7). Ma a kan taki wan sma di ben e kosi yu fosi, e aksi ensrefi fu san ede yu e bribi den sani di yu e bribi. Fu eksempre, kande yu e si taki a sma dati wani kon sabi trutru fu san ede yu e bribi taki hurudu no bun (1 Petr. 4:4). Efu dati de so, dan kande yu kan fruteri a sma disi moro fini san Bijbel e taki fu a tori. No frede fu du dati. Ala ten ’de srekasreka fu opo taki gi yusrefi’.—1 Petr. 3:15.
14. Te wan speri e dwengi yu fu du san no bun, dan fa yu kan dwengi en fu go denki fu sani?
14 Son leisi te speri e dwengi yu fu du san no bun, dan kande yu kan poti wan aksi gi den di o poti den na prakseri. Ma yu musu pruberi fu du dati sondro fu hati den firi fu den. Fu eksempre, efu wan pikin fu yu skoro e dwengi yu fu teki wan sikaret, dan yu ben kan taigi en: „Nôno, mi no wani”, èn baka dati yu kan taki moro fara: „Mi ben denki taki yu ben moro koni. Yu no sabi taki a no bun fu smoko?” Yu no si fa yu e meki en muilek gi en now fu gi piki? Na presi taki yu musu fruklari gi yu speri fu san ede yu no e smoko, now na en musu go denki fu san ede a e smoko.
15. O ten a bun fu waka gowe fu speri di e dwengi yu fu du san no bun? Fu san ede dati de so?
15 Fa a de te den speri fu yu e tan dwengi yu, awansi fa yu e pruberi fu kakafutu gi den? Te dati e pasa, dan a moro bun fu waka gowe. O moro langa yu e tan drape, o moro dati kan meki taki yu e brokokindi. Sobun, gowe fu drape. Yu kan du dati sondro fu firi leki yu lasi a strei. Te yu e luku en bun, dan yu meki a situwâsi waka bun. Yu no gi den speri fu yu na okasi fu du san den wani nanga yu, èn yu meki Yehovah prisiri.—Odo 27:11.
Prakseri ’fu du sani di o tyari wini kon gi yu’
16. Fa son sma di e taki dati den na Kresten, ben kan dwengi wi fu du san no bun?
16 Son leisi, a kan taki den wan di e dwengi yu fu du sani di no bun, na yonguwan di e taki dati den na futuboi fu Yehovah. Fu eksempre, san yu o du te wan yonguwan kari yu kon na wan demakandra, èn yu e si taki bigisma no de drape fu luku taki sani e waka bun? Noso san yu o du te wan yonguwan di e taki dati en na wan Kresten, e tyari sopi kon na wan demakandra, aladi yu nanga den trawan di de drape yongu tumusi fu dringi sopi? Wan tu situwâsi kan opo kon pe yu o abi fu arki a konsensi fu yu di e wroko na wan fasi di e kruderi nanga Bijbel gronprakseri. Wan Kresten di de wan tini, e fruteri: „Mi nanga mi sisa ben go luku wan felem makandra nanga wan grupu Kotoigi. Di wi si taki sma ben e taki furu doti-taki na ini a felem, dan wi opo gowe. Den trawan bosroiti fu luku a felem go doro. Wi papa nanga mama prèise wi fu di wi ben du dati. Ma den trawan na ini a grupu ben atibron fu di den ben feni taki wi meki den fesi fadon.”
17. Te yu e go na wan demakandra, dan sortu sani yu kan du fu sorgu taki yu e tan hori yusrefi na den markitiki fu Gado?
17 Soleki fa na ondrofenitori e sori, dan yu kan kon de na ini fruferi situwâsi te yu e arki a konsensi fu yu di e wroko na wan fasi di e kruderi nanga Bijbel gronprakseri. Ma tan du san bun. De srekasreka. Te yu e go na wan demakandra, dan prakseri na fesi fa yu o gowe fu drape te sani de tra fasi soleki fa yu ben fruwakti. Son yonguwan meki mofo nanga den papa nanga mama taki den o bel den fu kon teki den moro fruku (Ps. 26:4, 5). Te yu e ’prakseri fu du den sani disi, dan dati o tyari wini kon gi yu’.—Odo 21:5.
„Prisiri nanga den yongu yari fu yu”
18, 19. (a) Fu san ede yu kan de seiker taki Yehovah wani taki yu musu de koloku? (b) Fa Gado e denki fu den wan di e kakafutu gi speri di e dwengi den fu du san no bun?
18 Yehovah meki yu na so wan fasi taki yu kan nyan bun fu a libi, èn a wani taki yu musu de koloku. (Leisi Preikiman 11:9.) Hori na prakseri taki den sani di furu fu den speri fu yu e ondrofeni, na soso „prisiri nanga sondu fu wan pisi ten” (Hebr. 11:25). A tru Gado wani gi yu wan sani di bun omeni tron moro a sani dati. A wani taki yu musu de koloku fu têgo. Sobun, te speri e dwengi yu fu du wan sani di Gado no feni bun, dan hori na prakseri taki te fu kaba, san Yehovah e aksi fu yu de gi a bun fu yu ala ten.
19 Yu leki yonguwan musu hori na prakseri taki awansi den speri fu yu feni yu bun now, toku furu yari baka dati, wan lo fu den no o sabi yu nen moro srefi. Ma te yu e kakafutu gi speri di e dwengi yu fu du san no bun, dan Yehovah e si dati. Noiti a o frigiti yu, èn a no o frigiti tu fa yu tan gi yesi na en. A o ’opo den sroisi fu hemel, so taki blesi fadon leki alen gi yu. A o blesi yu so te, taki yu no o mankeri nowan sani’ (Mal. 3:10). Boiti dati, a de klariklari fu gi yu a santa yeye fu en fu yepi yu te dati de fanowdu. Iya, Yehovah kan yepi yu fu kakafutu gi speri di e dwengi yu fu du san no bun!
Yu e memre disi ete?
• Na sortu fasi speri kan dwengi yu fu du san no bun?
• Fu san ede yu musu abi wan tranga overtoigi fu man kakafutu gi speri?
• Fa yu kan sreka yusrefi gi speri di wani dwengi yu fu du san no bun?
• Fa yu du sabi taki Yehovah lobi te yu e tan gi yesi na en?
[Aksi fu a tori disi]
[Prenki na tapu bladzijde 8]
Fu san ede Aron brokokindi di sma dwengi en fu meki a gowtu pikin kaw?
[Prenki na tapu bladzijde 10]
De srekasreka, èn prakseri na fesi san yu o taki